Yachakorqanchej jina, Jesusqa chinkasqa qhari wawamanta parlarqa. Chay kikinchaywantaj yachachisharqa, Diosninchej juchasninkumanta pesachikojkunata perdonayta munasqanta. Chayrayku impuesteroswan, leymanta yachachejkunawan, fariseoswan chayta yachakunanku karqa (Lucas 15:1-7, 11). Chantá Jesusqa, uj qhapaj runamanta parlarqa. Chay qhapaj runaqa mayordomon mana allintachu ruwasqanta yacharqorqa.

Jesús nisqanman jina, chay mayordomota chʼataykusqanku patronninpa kapuyninta usuchisqanmanta. Chayrayku chay qhapaj runaqa mayordomonta wajyaspa nisqa: “Qanqa manaña wasiypi mayordomo kawajchu”, nispa. “Chantá mayordomoqa sonqonpi nisqa: ‘¿Imatataj ruwasajri? Patronneyqa mayordomo kayniyta qhechuwanqa, manañataj kallpay kanchu chajrapi llankʼanaypaj, qolqeta mañakuspa puriytapis pʼenqakuni’”, nispa. Chantá pay yuyaychakusqa: “‘Ajá, yachaniña imatachus ruwanayta, patronniy wijchʼuwajtin runas wasinkuman wajyarinawankupaj’, nispa. Chantá patronninpa sapa uj manunta wajyaspa, ñaupaj kajta tapusqa: ‘¿Patronniyman mashkha manutaj kanki?’, nispa” (Lucas 16:3-5).

Chay runataj kutichisqa: “Pachaj pʼuñus aceite manu kani”, nispa. Chaytaj ichapis 2.200 litros aceite karqa. Chay manukoj runaqa ichapis ashkha olivos sachʼasniyoj karqa chayri aceiteta vendej comerciantechus karqa. Mayordomotaj chay runata nisqa: “Tiyaykuspa manu papelniykiman phishqa chunkallataña usqhayllata qhelqay”, nispa. (Lucas 16:6).

Chantá wajtañataj tapusqa: “Qanrí, ¿mashkha manutaj kanki?”, nispa. Paytaj kutichisqa: “Pachaj trigo cargas manu kani”, nispa. Mayordomotaj nisqa: “Manu papelniykiman pusaj chunkallataña qhelqay”, nispa (Lucas 16:7).

Chay mayordomoqa cargollanpiraj kakusharqa. Chayrayku patronninman deberqanku chay runaspa manusninta pisiyachiyta aterqa. Ajinata ruwaspataj chay runaswan amigosta ruwakusharqa. Cargonmanta wijchʼuchikojtintaj, chay runas payta khuyankuman karqa.

Patronnenqa chayta yachaspa tʼukusqa. Payqa qolqenta pierdespapis “mayordomota alabasqa, mana cheqan runa kaspapis sumaj yuyaywan chayta ruwasqanmanta”. Chantá Jesús nerqa: “Kay mundomanta runasqa aswan yuyayniyoj kanku Diospa kamachisninmanta nisqaqa”, nispa (Lucas 16:8).

Jesusqa mana nerqachu mayordomoj ruwasqan allin kasqanta, nillataj nerqachu runasta engañaspa negociosta ruway allin kasqanta. Astawanpis payqa yachachisqasninta nerqa: “Amigosta maskʼakuychej kay mundoj qhapaj kapuyninwan, chay imas tukukojtin, wiñay tiyakuna cheqasman wajyarisunaykichejpaj”,  nispa (Lucas 16:9). Jesusqa chayta nispa yachachisharqa, ñaupajmantaña imatapis qhawarina kasqanta, allinta yuyaychakuspataj imatapis ruwana kasqanta. Chayrayku ‘Diospa kamachisnenqa’ allinta yuyaychakuspa sumaj imasta kapuyninchejwan ruwana tiyan. Chantapis ama qonqanachu qhepaman wiñay kausayta japʼinanchejta.

Jehová Dioswan, Wawan Jesucristollawan niyta atinku pikunachus cieloman rispa Diospa Gobiernonpi gobernamunankuta, pikunatajchus kay jallpʼapi wiñaypaj kausakunankuta. Chayrayku kallpachakunanchej tiyan paykunaj qayllallanpipuni kanapaj. Kapuyninchejwantaj yanapachikuna Diospa Gobiernonta ñaupajman churanapaj. Ajinamanta wiñay kausayta japʼisunchej. Chaypachataj qoriwan, qolqewan, waj valorniyoj imaspiwan manaña imapajpis valenqankuchu.

Chantá Jesusqa nerqa, kapuyninwan allin imasta ruwajqa, aswan sumaj imastapis allillantataj ruwananta. Pay nerqa: “Qankunachus kay mundoj qhapaj kapuyninwan mana allinta ruwankichej chayqa, ¿pitaj cheqamanta qhapaj kayta qosunkichejmanri?”, nispa (Lucas 16:11). Chay ‘qhapaj kayqa’ Diospa llajtanpa ruwasqan imas kanku.

Chayta nispa Jesusqa nisharqa, yachachisqasnin ashkha imasta ruwanankuta “wiñay tiyakuna cheqasman” wajyarisqa kanankupaj. Mana atinchejchu Diosta sirviyta, chantá kay mundoj qhapaj kapuyninpa esclavon kaytawan. Chayrayku Jesusqa nerqa: “Mana pi kamachipis iskay patronesta ujllapi sirviyta atinmanchu, imaraykuchus ujninta chejnenqa ujnintataj munakonqa, ujninman kʼaskakonqa ujnintataj pisipaj qhawanqa. Qankunaqa mana atinkichejchu ujllapi Diostawan qolqetawan sirviyta”, nispa (Lucas 16:9, 13).