Yachakorqanchej jina, Jesusqa nerqa “juchʼuy tropa” ovejasmanta kajkunalla Diospa Gobiernonpi gobernamunankuta (Lucas 12:32). Chay juchʼuy tropamanta kajkunataj, cieloman riyta atisqankuta mana pisipajchu qhawananku tiyan. Astawanpis Jesusqa, paykunata yuyaycharqa wakichisqapuni kanankuta.

Jesusqa munarqa, kutimunanpaj yachachisqasnin wakichisqa kanankuta. Chayrayku nerqa: “Sumaj chumpisqa kaychej, mecherosniykichejpis japʼichisqa kachun. Qankunaqa patronninkuta casamientomanta kutimunanta suyajkuna jina kaychej. Paykunaqa suyanku patronninku chayamuspa punkuta takamojtinkama kicharinankupaj. Chay kamachisqa mayta kusikonqanku, patronninku chayamuspa qhawashajta paykunata taripajtin”, nispa (Lucas 12:35-37).

Jesús nisqanman jina, kamachisqa sumaj wakichisqa patronninku kutimunanta suyasharqanku. Chayrayku Jesús nerqa: “Patronninku tutataña chayri chaupi tuta pasaytaña chayamuspa suyashajta paykunata taripanman chayqa, chay kamachisqa mayta kusikonqanku”, nispa (Lucas 12:38). Jesuspa yachachisqasnintaj chay kikinchayta sumajta entienderqanku.

Jesusqa chayta nispa mana nisharqachu kʼuchi kamachislla kanankuta. Manachayqa munarqa yachachisqasnin, “juchʼuy tropa” ovejasmanta kajkuna ima, pay kutimunanpaj wakichisqa kanankuta. Chayrayku nerqa: “Wakichisqa kaychej, noqaqa mana yuyasqaykichej horapi jamusaj”, nispa (Lucas 12:40).

Chantá Pedroqa, imamantachus Jesús parlashasqanta allinta yachayta munaspa nerqa: “Señor, chay kikinchayqa, ¿noqallaykupajchu chayri tukuypajchu?”, nispa. Jesustajrí mana chay tapuyman kuticherqachu. Astawanpis payman uj kikinchayta willarerqa. Pay nerqa: “¿Pitaj chay allin mayordomo yuyayniyoj, pitachus patronnin churanqa kamachisninman necesitasqankuman jina tiemponpi mikhunata qonallanpajpuni, chay? Kusikonqa chay kamacheqa, patronnin chayamuspa ajinata ruwashajta taripajtenqa. Cheqatapuni niykichej: Patronnenqa payta churanqa tukuy kapuyninta qhawananpaj”, nispa (Lucas 12:41-44).

Jesusqa “patronmanta” parlaspa, payllamantataj parlasharqa. Yuyayniyoj “allin mayordomomanta” parlaspataj, “juchʼuy tropa” ovejaswan ninakoj runasmanta parlasharqa, pikunachus Diospa Gobiernonpi gobernamonqanku, chaykunamanta (Lucas 12:32). Jesusqa imachus qhepa tiempopi kananmanta parlasharqa. Pay nerqa “juchʼuy tropa” ovejaswan ninakoj runasmanta wakenqa, “kamachisninman” “tiemponpi mikhunata” qonankuta. Chayrayku Pedro, waj yachachisqasnin ima, repararqanku aswan qhepaman Jesús kutimunanta. Jesús kutimuspataj, kay jallpʼapi chay ‘allin mayordomo’ jina runasta taripanqa. Paykunataj Jesuspa yachachisqasninman Diosmanta yachachishanqanku. Jesús kay jallpʼapi kashajtenqa mana chay mayordomo jina runas necesitakorqachu, imajtinchus Jesús yachachisqasninman yachacherqa.

Chantá Jesús nillarqataj: “Chay kamachichus sonqonpi ninman: ‘Patronneyqa manaraj kutimonqachu’, nispa chayqa, qhari kamachistataj maqayta qallarinman, jinallataj warmi kamachistapis, chantá mikhunman, ujyanman, machaykunmantaj chayqa, chay kamachej patronnenqa kutimonqa mana suyasqan pʼunchaypi, mana yachasqan  horapitaj. Chantá may sinchʼita jasutʼispa, payta wijchʼonqa maypichus mana kasukojkuna kashanku, chayman”, nispa (Lucas 12:45, 46). Jesusqa chayta nerqa, yachachisqasnin wakichisqas kanankupaj, mana sajra imasta ruwanankupaj, nitaj paykunapura churanakunankupaj.

Chantá Jesús nerqa: “Noqaqa kay jallpʼapi ninata japʼichej jamorqani”, nispa. Chaytaj ajinapuni karqa. Jesuspa yachachisqanqa, nina jina runaspa llulla yachachisqankuta, costumbresninkuta ima chinkacherqa. Jesuspa yachachisqanqa familiastapis tʼaqanachinan karqa. Jesús nerqa: “Tataqa qhari wawanpa contranpi kanqa, qhari wawataj tatanpa contranpi. Mamaqa warmi wawanpa contranpi kanqa, warmi wawataj mamanpa contranpi. Suegraqa qhachuninpa contranpi kanqa, qhachunitaj suegranpa contranpi”, nispa (Lucas 12:49, 53).

Jesusqa tukuy chay imasta yachachisqasninman yachacherqa. Chantá Jesusqa, chay uj ladopi kasharqanku chay runasman kutirikorqa. Chay runasmanta ashkhastaj, mana creerqankuchu Jesús Mesías kasqanpi. Chayrayku Jesusqa paykunata nerqa: “Qankunaqa inti yaykuynejmanta phuyuta oqharikushajta rikuytawan niyta yachankichej: ‘Loco para jamushan’, nispa, paramuntaj. Uranejmanta wayramojtintaj niyta yachankichej: ‘Sinchʼita ruphamonqa’, nispa, ruphamuntaj. Puraj uyas, jallpʼatawan cielotawan qhawarispa imayna tiempochus kananta yachankichej. Chantá, ¿imaraykutaj mana reparayta yachankichejchu kay tiempopi imaschus kasqantari?”, nispa (Lucas 12:54-56). Chay runasqa mana wakichisqachu kasharqanku pichus Mesías kasqanta reparanankupaj.