AMIGOSNINCHEJQA kanku, pikunawanchus parlarinchej chayri aswan tiempota pasanchej chaykuna. Chaywanpis allin amigosta ajllayta yachana tiyan. ¿Pitaj aswan sumaj amigonchej kanman?... Arí, Jehová Dios.

¿Diospa amigosnin kayta atisunmanchu?... Biblia nin jina, “Abrahamqa Diospa kawsaqen” chayri amigon karqa. Payqa ñaupa tiempopi kausakorqa (Santiago 2:23). ¿Imaraykú Abraham Diospa amigon karqa?... Biblia nin jina, Abrahamqa Diosta tukuy imapi kasukojpuni. Chayrayku Diospa amigon karqa. Noqanchejpis Jehovaj amigosnin kanapajqa, allinpaj qhawasqan imasta ruwana tiyan, Abraham jina, Jesús jinataj (Génesis 22:1-14; Juan 8:28, 29; Hebreos 11:8, 17-19).

 Jesusqa apostolesninman nerqa: ‘Qankunaqa amigosniy kankichej, sichus kamachisqasniyta kasunkichej chayqa’, nispa (Juan 15:14). Jesusqa Jehovaj kamachisqantapuni yachachej. Chayrayku Jesuspa amigosnenqa, Diospa kamachisqanta juntʼajkuna karqanku. Tukuy amigosnin Diosta munakojkuna karqanku.

Jesuspa wakin sumaj amigosnenqa, apostolesnin karqanku. Paykunataqa kay libroj 75 paginanpi qhawariwaj. Apostolesnenqa Jesuswan rej kanku, khuskataj willaj kanku. Chantapis khuska mikhoj kanku, Diosmanta parlarej kanku, waj imastawan ruwaj kanku. Chantapis Jesusqa ashkha amigosniyoj karqa. Wakin kuteqa wasinkupi qhepakoj, khuskataj kusirikoj kanku.

Jerusalén qayllapi Betania rancho kasharqa. Chaymantaj Jesusqa uj familiata waturikoj rejpuni. ¿Yuyarikunkichu pikunatachus?... Mariata, Martata, Lazarota ima. Jesusqa Lázaro amigon kasqanta nerqa (Juan 11:1, 5, 11). Payqa kinsantinkuta munakoj,  paykunawan kaspataj kusirikoj. Imaraykuchus paykunapis Jehovata munakoj kanku.

Jesusqa Diosta mana yupaychajkunawanpis kʼachallataj karqa. Payqa wasinkumanpis rej, paykunawantaj mikhoj. Chayrayku wakin runasqa nej kanku: “Impuesteroswan, juchasapaswan imataj kawsakun”, nispa (Mateo 11:19). Jinapis Jesusqa, mana sajra kausayninkuta allinpaj qhawasqanraykuchu wasinkuman rej, manaqa Jehovamanta yachachej. Jesusqa paykunata Diosman kutirikunankupaj yanapayta munarqa.

Uj kuti, Jesusqa Jerusalenman rishaspa, Jericó llajtanejta pasasharqa. Chaypeqa uj runa Zaqueo sutiyoj, Jesusta rikuyta munarqa. Chaywanpis runasqa kʼiski kasharqanku. Zaqueotaj juchʼuy runalla kasqanrayku, mana rikuyta aterqachu. Chayrayku usqhayllata ñauparispa, uj sachʼaman wicharerqa. Ajinamanta Jesusta, chayninta pasashajtin rikunanpaj.

Jinapi Jesusqa chaynejta pasashaspa, Zaqueota sachʼa patapi rikorqa. Nerqataj: ‘Usqhayta uraykamuy. Kunanqa wasiykiman risaj’, nispa. Zaqueoqa qhapaj karqa, sajra imastataj ruwaj. ¿Imaraykú Jesús chay jina runaj  wasinman riyta munarqa?...

Diosmanta yachachinanpaj riyta munarqa, manataj Zaqueoj sajra kausayninta allinpaj qhawasqanraykuchu. Jesusqa repararqa, Zaqueo payta rikunanpaj tukuy imata ruwasqanta, uyarinantataj yacharqa. Chayrayku sumajpuni karqa, Jesús Diospa munayninta Zaqueoman yachachinanqa.

Kunanqa dibujota qhawariy. ¿Imatá chaypi rikushanki?... Zaqueoqa Jesuspa yachachisqanta sumajpaj qhawarqa. Chayrayku wajkunata engañasqanmanta pesachikorqa. Paykunamanta suwasqan qolqetapis, kutichipunanta nerqa. Jesuspa yachachisqan kajtintaj, amigonman tukorqa (Lucas 19:1-10).

Jesús jina kasun chay, ¿imatá ruwasun?... Mana amigosninchejchu kanku chaykunatapis waturikusun. Chaywanpis mana kausayninkuta allinpaj qhawasqanchejraykuchu wasinkuman risun. Nitaj sajra kajta ruwaysikunapajchu, manaqa Diosmanta yachachinapaj.

 Sumaj amigosninchejqa kanku, pikunawanchus aswan ashkha tiempota pasanchej chaykuna. Pikunatachus Dios allinpaj qhawan, chaykuna amigosninchej kananku tiyan. Ichá wakenqa pichus Jehová kasqantapis, mana yachankuchu. Jehovamanta yachakuyta munanku chaytaj, yanapasunman. Jehovata noqanchej jina munakojtinkutaj, sumaj amigosninchej kayta atenqanku.

Uj runa sumaj amigochus, manachus kasqanta ruwasqasninta qhawarispa yachallasunmantaj. ¿Wajkunata toreaspachu kusikun? Chayqa mana allinchu, ¿icharí?... ¿Piwanpis maqanakullanchu? Chayri, ¿imamanpis satʼikullanchu? Paywan purispa, mana ima juchayojpis rikhuriyta munanchejchu, ¿icharí?... ¿Yachashaspachu sajra imasta ruwan? Mana japʼichikuspataj, ¿vivo kasqantachu yuyan? Mana pí rikusqanta yuyajtinpis, Diosqa ruwasqanta rikushan, ¿icharí?... Chay jina runas, ¿amigosninchejchu kananku tiyan?...

Bibliapi leerina, amigosninchej allinman chayri mana allinman tanqawasqanchejta. Chaypaj maskʼariy 1 Corintios 15:33 versiculota. ¿Tarinkiñachu?... Chaypi nin: “Ama chʼawkiyachikuychejchu. Sajra runaswan pureyqa kʼacha ususta chinkachin”, nispa. Chaytaj jinapuni, sajra runaswan purispaqa, paykuna jinallataj kasunman. Allin amigostajrí, allin imasta ruwanapaj yanapawasun.

Kausayninchejpeqa Jehová ñaupajpi kanan tiyan. Chayta ama qonqanachu. Mana paymanta karunchakuyta munanchejchu, ¿icharí?... Chayrayku Diosta munakoj amigosta ajllanapaj kallpachakuna.