8 YACHAQANA
Dioslla may atiyniyoj
WAKIN runasqa noqanchejmanta aswan atiyniyoj, aswan kallpayojtaj kanku. ¿Pitaj tukuymanta aswan atiyniyoj?... Jehová Dios. Wawan Jesusrí, ¿atiyniyojllatajchu?... Arí.
Jesusqa Dioswan cielopi tiyakorqa. Payqa uj ángel karqa. ¿Waj angelesta Dios ruwarqachu?... Arí, may chhika angelesta ruwarqa. Angelesqa noqanchejmanta aswan atiyniyoj kanku (Daniel 7:10; Hebreos 1:7).
Mariawan parlarqa chay angelpa sutinta, ¿yuyarikunkichu?... Chay angelpa sutenqa Gabriel karqa. Paytaj Mariaman nerqa, Diospa Wawanpa maman kananta. Jehovaqa Wawan kay Jallpʼapi nacekunanpaj, Wawanpa kausayninta Mariaj wijsanman churarqa (Lucas 1:26, 27).
Mariawan Josewan, ¿imatá Jesusman ichá willarqanku?
¿Chayta creenkichu? Jesús cielopi Dioswan, ¿kausakorqapunichu?... Jesusqa kausakusqantapuni nerqa. ¿Imaynatá chayta yacharqa? Jesús wawallaraj kashajtin, Mariaqa willarqachá ángel Gabrielpa nisqanta. Ichá Josepis willallarqataj mana paychu tatan kasqanta, manaqa Dios.
Jesús bautizakusqantawan, Diospuni cielomanta nimorqa: ‘Kaymin Wawayqa’, nispa (Mateo 3:17). Jesusqa wañuchisqa kananpaj horasllaña faltashajtin Diosmanta mañakorqa: “Tatáy, qayllaykipi jatunchaway, jaqay janaj pacha jatun kaywan, mayqenchus tiyapuwarqa qanwan kashajtiy, manaraj kay pacha ruwakushajtin, chaywan”, nispa (Juan 17:5). Jesusqa Dioswan watejmanta cielopi kausakuyta mañakorqa. ¿Imaynatá cieloman kutinman karqa?... Jehová watejmanta uj angelman tukuchejtillan.
Ima niwajtaj: ¿Tukuynin angeleschu kʼachas kanku?... Qallariypeqa tukuy ángeles kʼachas karqanku, Jehová paykunata ruwasqanrayku. Jehovaj ruwasqasnenqa may sumajpuni kanku. Jinapis ujnin ángel sajraman tukorqa. ¿Imaynapí sajrayarqa?
Chayta yachanapajqa, Adanwan Evawan ruwasqa karqanku chay tiempomanta parlarina. Wakin runasqa ninku, Adanmanta Evamantawan Bibliaj nisqan cuentolla kasqanta. Sumaj Yachachej Jesustajrí mana cuentollachu kasqanta yacharqa.
Diosqa Adanta Evatawan Edén huertaman churarqa. Chay lugarqa may kʼachitu karqa. Paykunaqa ashkha wawasniyoj kananku karqa, wiñaypajtaj chay huertapi kausakunanku karqa. Jinapis Diosta kasukunanku karqa. Imaraykuchus kasukunapuni kasqanmanta ujtawan parlarina.
Adan, Eva ima Edenpi wiñaypaj kausanankupaj, ¿imatá ruwananku karqa?
Jehovaqa Adanta Evatawan kamacherqa: ‘Huertapi tukuynin sachʼasmanta mikhullankichej. Uj sachʼaj poqoynillanta amapuni mikhunkichejchu. Mikhunkichej chayqa, wañunkichej’, nispa (Génesis 2:17). ¿Imaraykutaj Dios chayta kamacherqa?...
Kasukuyta yachanankupaj. Kausananchejqa Jehová Diosta kasukunamanta kashan. Adanwan Evawanqa mana simillamantachu kasukunanku karqa. Diosta kasukuspaqa payta munakusqankuta, kamachejninkupaj qhawasqankuta ima rikuchinkuman karqa. Chantapis chay sumaj huertapi wiñaypaj kausakunkuman karqa. Chay sachʼaj poqoyninta mikhusparí, ¿imatá rikuchinkuman karqa?...
Diosta mana agradecekusqankuta. Chaypi kawaj karqa chay, ¿Jehovata kasukuwajchu karqa?... Adanwan Evawanqa qallariypi kasukorqanku. Aswan qhepamantaj, Eva engañachikorqa, Jehovatataj mana kasukorqachu. Evata chʼaukiyajqa aswan atiyniyoj karqa. ¿Yachankichu pichus kasqanta?...
¿Pitaj katarinejta Evawan parlarqa?
Bibliaqa uj katari Evawan parlasqanta nin. Katarisqa mana parlankuchu. Chantá, ¿imaynapí chay katari parlarqa?... Uj ángel chay katarinejta parlarqa, kataripis parlashanman jina rijchʼakunanpaj. Chay angelqa sajra imaspi yuyayta qallarisqa. Payqa munarqa Adanwan Evawan yupaychachikuyta, kasuchikuyta ima. Arí, Dios jina kayta munarqa.
Chay sajra angelqa Evaj umanta muyucherqa. Katarinejtataj nerqa: ‘Diosqa llullakusunkichej. Kay sachʼaj poqoyninta mikhuspaqa mana wañunkichejchu. Astawanqa Dios jina yachayniyoj kankichej’, nispa. Chayta, ¿qan creewajchu karqa?...
Evaqa chay sachʼaj poqoyninta moqʼeyta qallarerqa, Dios “ama mikhunkichejchu” nejtinpis. Chantá mikhuykorqa, Adanmanpis jaywarqa. Adantaj katarej nisqanta mana creespapis mikhuykullarqataj. Diosta munakunanmantaqa, warminta astawan munakorqa (Génesis 3:1-6; 1 Timoteo 2:14).
¿Imataj mana kasukusqankurayku karqa?... Adanwan Evawan juchasapasman tukorqanku, machuyarqanku, wañorqankutaj. Wawasninkupis juchasapasllataj nacekorqanku. Chayrayku machuyarqanku, wañorqankutaj. Diosqa mana llullakusqachu. Arí, kausananchejqa Diosta kasukunanchejmanta kashan (Romanos 5:12). Biblia nisqanman jina, Evata engañaj angelpa sutenqa Kuraj Supay, Satanastaj. Pay jina sajraman tukoj angelestaj supaykuna sutiwan rejsisqa kanku (Santiago 2:19; Apocalipsis 12:9).
Adan, Eva ima Diosta mana kasukusqankurayku, ¿imapí tukorqanku?
¿Imaraykú uj ángel sajraman tukorqa?... Sajra imaspi yuyayta qallarisqanrayku. Payqa Diosmanta aswan patapi kayta munarqa. Adanwan Evawan wawasniyoj kanankuta Dios nisqanta yachasqanrayku, runaswan yupaychachikuyta munarqa. Payqa mana munanchu Jehovata kasukunata. Chayrayku sajra yuyaykunawan umata muyuchiyta munawanchej (Santiago 1:13-15).
Satanasqa, ni pipis Jehovata tukuy sonqo munakusqanta nin. Chaywanqa niyta munashan ni qanpis, ni noqapis Diosta munakusqanchejta, nitaj nisqanta kasukuyta munasqanchejta. Chantapis allin rillawajtinchej Jehovata kasukusqanchejta nin. ¿Ajinachu kanchej? ¿Satanaspa nisqan cheqachu?
Jesusqa, Kuraj Supay llulla kasqanta nerqa. Tukuy sonqo kasukuspataj Jehovata munakusqanta rikucherqa. Nitaj wakin kutisllachu kasukorqa. Runas sajra ruwayman tanqajtinkupis kasukullarqapuni. Jesusqa manapuni Jehovamanta karunchakorqachu. Chayrayku Diosqa payta kausaricherqa wiñaypaj kausananpaj.
Yachakusqanchejman jina, ¿pitaj enemigonchej?... Arí, Kuraj Supay Satanás. ¿Payta rikuyta atinchejchu?... Mana. Jinapis yachanchej pay kasqantapuni. Payqa noqanchejmanta aswan atiyniyoj. Jinapis, ¿pitaj Supaymanta aswan atiyniyoj?... Jehová Dios. Chayrayku Jehová jarkʼayta atiwasqanchejmanta mana iskayrayanchejchu.
Pillatachus yupaychana kasqanmanta leerina: Deuteronomio 30:19, 20; Josué 24:14, 15; Proverbios 27:11; Mateo 4:10.
