WAKIN runasqa “rikusqallaypi creeni” ninku. Chaytaj ni allinchu. Imajtinchus ashkha imasta mana rikunchejchu, jinapis kankupuni. ¿Imastaj kanku?...

Tʼukurina, ¿imaynapí samay kasqanta yachanchej?... Makiykita phukurikuy. ¿Imatapis sientenkichu?... Chayqa samayniyki. Jinapis, ¿manacharí rikunkichu?...

Ñaupaj yachaqanaspi mana aycha cuerpoyoj kajkunamanta parlarerqanchej. Yachakorqanchejtaj wakenqa kʼachas, wakintaj sajras kasqankuta. ¿Pikunataj kʼachas kanku?... Arí, Jehová, Jesús, kʼacha ángeles ima. Chantá, ¿sajra ángeles kallantajchu?... Biblia nin kasqankuta. ¿Imastaña angelesmanta yachanki?...

Kʼacha ángeles, sajra angelespis, noqanchejmanta aswan atiyniyoj kasqankuta yachanchej. Jesusqa angelesta sumajta rejsej. Payqa niraj Jallpʼapi nacekushaspa uj ángel karqa. May chhika angeleswantaj cielopi tiyakorqa. ¿Ángeles sutiyojchu kanku?...

Yachakorqanchej, Diosqa estrellasman sutita churasqanta. Chayrayku angelespis sutiyojllatajchá kanku. Chantapis ángeles paykunapura parlasqankuta yachanchej, imajtinchus Bibliaqa ‘ángeles parlayniyoj’ kasqankuta nin (1 Corintios 13:1). Chantá, ¿imamantá parlanku? ¿Runasmantachu parlankuman?...

Yachakorqanchej jina, Satanaspa supaykunasnenqa Jehovata kasukunata mana munankuchu. Jehovata mana kusichinapajtaj, paykuna jina kananchejta munanku, chayrayku ichá imaynatachus  pantachinawanchejmanta parlanku. Kʼacha angelesrí, ¿noqanchejmanta parlallankutajchu?... Arí. Paykunaqa yanapayta munawanchej. Kunantaj Jehovata munakusqankurayku sirvej runasta, wakin ángeles yanapasqankumanta willarisqayki.

Uj runa, Daniel sutiyoj Babilonia llajtapi tiyakorqa. Chaypeqa pisi runaslla Jehovata munakoj kanku. Chay llajtayoj sajra runasqa uj leyta orqhocherqanku, Diosmanta mañakojkunata castiganankupaj. Danieltajrí, Diosmanta mañakullarqapuni. Chayrayku, ¿imanarqankutaj Danielta?...

Chay sajra runasqa, leones kasharqanku chay tʼoqoman Danielta wijchʼuykucherqanku. Danielqa chay yarqhasqa phiña leoneswan kasharqa. ¿Leones mikhuykorqankuchu?... Daniel nin: ‘Dios angelninta kachamorqa, paytaj leonespa siminkuta wisqʼaykurarqa’, nispa. Leonesqa Danielta mana  imanarqankuchu. Arí, angelesqa Jehovata sirvejkunapaj tʼukuna imasta ruwankuman (Daniel 6:18-22).

Uj kuti Pedrota carcelman wisqʼaykorqanku. Yachakorqanchej jina Pedroqa Sumaj Yachachej Jesucristoj amigon karqa. Payqa, Jesús Diospa churin kasqanta yachachisharqa. Wakin runastaj chaymanta phiñakorqanku. Chayraykutaj Pedrota carcelman wisqʼacherqanku. Mana ayqenanpajtaj soldadosta churarqanku. ¿Pillapis yanapanmanchu karqa?...

Pedroqa makisninmanta cadenaswan watasqa iskay soldadospa chaupinpi puñusharqa. Bibliataj nin: ‘Chayllaman Jehovaj  angelnin rikhurimorqa, chay ukhumantaj kʼanchay juntʼaykorqa. Angeltaj Pedrota wajtanpi takarispa rijchʼaricherqa, nerqataj: “Usqhayta jatariy”, nispa’.

Chay ratopacha cadenasqa Pedroj makisninmanta urmararqa. Chantá angelqa Pedrota nerqa: ‘Chumpiykita matʼiykukuy, jukʼutasniykitapis churakuy, qhepaytataj jamuy’, nispa. Soldadosqa ni imanayta aterqankuchu, imajtinchus Pedrota uj ángel yanapasharqa. Chantá fierro punkuman chayajtinku, punkoqa sapallanmanta kicharikorqa. Chay angelqa Pedrota kacharicherqa Diosmanta willanallanpajpuni (Hechos 12:3-11).

¿Diospa angelesnin yanapawasunmanchu?... Arí. ¿Chay ninayanchu ni jaykʼaj ñakʼarinanchejta?... Mana. Noqanchejpuni imamanpis satʼikojtinchej, angelesqa mana yanapawasunchu. Mana imaman satʼikojtinchejpis, wakin kutis llakiy kanqapuni. Imajtinchus Diosqa angelesta mana ninchu tukuy tiempo yanapanawanchejta. Jinapis paykunaman uj jatun ruwayta qon.

Biblia nisqanman jina, uj ángel tukuy runasman Diosta yupaychanankuta nishan (Apocalipsis 14:6, 7). ¿Imaynatá chayta nishan? ¿Cielomantapachachu qhaparimushan?... Mana. Astawanpis Jesuspa yachachisqasnin Diosmanta willashanku. Angelestaj paykunata yanapashanku, Diosta rejsiyta munajkunaman pusaspa. Noqanchejpis Diosmanta willamuyta atinchej, angelestaj yanapawasun.

Diosta mana munakojkuna ñakʼarichiwajtinchej, ¿imatá ruwasun? Presochawajtinchejrí, ¿ángeles kacharichiwasunchu?... Kacharichiwasunman. Jinapis mana chayta ruwankupunichu.

Uj kuti sinchʼita parashajtin, wayrashajtin ima, Pablota presochasqata barcopi apasharqanku. Payqa Jesuspa ujnin yachachisqan karqa. Angelestajrí, mana chay ratochu Pablota kacharicherqanku. Imaraykuchus waj runasmanwan Diosmanta yachachinan  karqa. Uj ángel Pabloman nerqa: “Ama manchachikuychu, Pablo. Jatun kamachej Cesarpaman chayanaykipuni tiyan”, nispa. Ajinapunitaj karqa, Pabloqa Cesarman Diosmanta willamorqapuni. Angelesqa mana paymanta qonqakaporqankuchu, yanaparqankutaj. Diosta mana wasanchaspa sirvejtinchej noqanchejtapis ángeles yanapallawasuntaj (Hechos 27:23-25).

Angelesqa waj jatun imatawanraj ruwananku tiyan. Chaytataj pisimantawan ruwanqanku. Diosqa sajra runasta, nisunman payta mana yupaychajkunata pisimantawan tukuchenqa. “Ángeles mana kanchu” nejkunataj, pantasqa kasqankuta reparanqanku (2 Tesalonicenses 1:6-8).

¿Imataj noqanchejmanta kanqa?... Diospa angelesninwan khuska llankʼajtinchejqa, paykuna yanapawasunchej. ¿Imaynatá chayta ruwasunman?... Jehovata sirvispa. Chayta ruwaspaqa waj runastapis Diosta sirvinankupaj yanapasunchej.