IMAYNATACHUS uj wawita rikhurisqanqa, ¡tʼukunapaj jinapuni! Wawita rikhurinanpajqa tatapis mamapis yanapakun. Chantataj wawitaqa nacekunankama mamanpa wijsanpi wiñakun. Chayraykuchá runasqa, uj wawita nacekusqan “uj milagro” kasqanta ninku.

Jinapis tata chayri mama kayqa mana wawata ruwayllachu. Wawasqa qallariypi tatankuta chayri mamankuta tukuy imapaj necesitanku. Wiñasqankuman jinataj, yanapata necesitallankupuni allin yuyayniyoj, allin sonqoyoj, llimphu kausayniyoj ima kanankupaj. Diosman qayllaykunankupajpis yanapanallataj tiyan.

Wawasqa kusisqa wiñanankupaj, tatamamanku munakunankuta necesitanku. Tatamamaqa mana simillamantachu wawasninkuta munakunanku tiyan. Astawanpis wawasqa, tatasninku ruwasqankuwan yachachinankuta necesitanku. Chantapis sumaj yuyaychaykunata juchʼuymantapacha necesitanku. Wawasta mana tiemponpichu yanaparejtinchejqa, sajra imasta ruwankuman. Chaytaj paykunapaj, familiankupajpis may llakiy kanman. Ashkha familiastaj jinapi rikukorqanku.

Aswan sumaj yuyaychaykunaqa Bibliapi kashan. Bibliaj nisqanman jina yachacheyqa, ¡may sumajpuni! Imaraykuchus wawasqa yachakusqankuta mana runaj yuyaychasqanta jinachu qhawanqanku, manaqa Tatanchej Jehovaj yuyaychasqanta jina. Tukuy sonqotaj japʼikonqanku.

Tatamamasqa, wawasninkuman allinta kausakunankupaj yachachinanku tiyan. Chayta ruwanankutataj, Biblia kamachin. Wawas wiñasqankuman jinataj, tatamamasqa wakin imasta yachachiyta pʼenqakunku. Jesusmanta yachakuna librotaj tatamamasta yanapananpaj wakichikun.  Kay libropeqa tataspis, wawaspis Diosmanta yachakuyta atenqanku. Chantapis wawasqa, piwanchus leerenqanku chaywan parlariyta atenqanku.

Kay libropeqa wawas kutichinankupaj ashkha tapuykuna tiyan, sumajta tʼukurispataj churakorqa. Chay tapuykunaj ladonpeqa kinsa puntitos rikhurin (...). Chayta rikuspaqa wawas kutichinankuta suyarina tiyan. Wawasqa yachakushaspa parlariytapuni munanku. Mana parlarichejtinchejqa saykʼupunku.

Kay libropi tapuykunaqa, imachus wawaykej sonqonpi kasqanta yachanaykipaj yanapasonqa. Ichapis wawaykeqa mana sumajtapunichu kutichenqa. Chaywanpis tapuykunaj qhepanpi kutichiynin kashan. Chaytaj wawaykita maychus kajta yuyananpaj yanapanqa.

Kay libropeqa 230 dibujosmanta astawan tiyan. Chay dibujospitaj tapuykuna rikhurin. Chay tapuykunaqa wakichikun, dibujosmanta, libropi leesqankumanta wawas parlarinankupaj jina. Chayrayku chay dibujosta sumajta qhawariychej, chaymantataj parlariychej. Dibujosqa yachakusqankuta sumajta japʼeqanankupaj wawasta yanapan.

Wawitayki leeyta yachakojtin, qanpaj leeripusunanta, sapallan leerinanta ima niy. Imaraykuchus kutin kutita leespaqa, yachakusqanta umitanpi sumajta japʼenqa, sonqonpitaj waqaychanqa. Chaywanpis aswan allin kanqa kay librota khuska, sapa kutitaj leerinaykichej. Ajinamanta astawan munanakunkichej, respetanakunkichejtaj.

Kay tiempomanta wawasqa ni jaykʼaj jina tanqasqa kanku, khuchichakuyman, layqeriosman, waj millay ruwaykunamanwan. Chaytaj ñaupa wataspi mana kajchu. Chayrayku wawasqa yanapanata necesitanku. Kay librotaj tatamamasta yanapanqa, mana pʼenqachinapaj jina, sutʼitataj yachachinankupaj. Wawasqa Jehovaj yachachiyninta necesitanku. Tukuy yachaytaj Tatanchej Jehovamanta jamun. Jesuspis yachachisqan Jehovamanta jamusqanta nej. Munayku kay libro qanta, familiaykita ima yanapananta. Ajinamanta Jehová munasqanman jina kausakunaykichejpaj, bendicionesnintataj wiñaypaj japʼinaykichejpaj.