JEHOVAQA Jesusta wawa kashajtin jarkʼarqa. Jesús chayta yachaspa, ¿Jehovaman agracekunmanchu karqa?... Mariawan Josewanpis Egiptoman apaspa Jesusta salvarqanku. Chayta yachaspa, ¿imatá Jesús paykunaman ninman karqa?...

Kunanqa Jesús manaña wawitachu, niñataj Jallpʼapichu kausashan. Wakin runastajrí, uywa qaranapi sirishaj wawitata jinallapuni Jesusta qhawanku. ¿Chayta reparankichu?... Chayqa ashkha lugarespi rikukun, astawanraj Navidadpeqa.

Jesús manaña Jallpʼapichu kaspapis, ¿kausashallanpunichu?... Arí, Dios kausaricherqa, kunantaj cielopi may atiyniyoj Rey. ¿Kamachisninta yanapayta atinchu?... Jesusqa Jallpʼapi kashaspa, payta munakojkunata yanapayta atisqanta rikucherqa. Uj kuti yachachisqasninwan uj botepi kashajtin imachus pasasqanta qhawarina.

Chay día, Jesusqa Galilea qocha qayllapi diantinta yachacherqa. Chay qochaqa saytʼunman 20 kilometrosniyoj jina  karqa, anchonmantaj 12 kilometrosniyoj. Tutayaykushajtinña, Jesús yachachisqasninman nerqa: “Jakuchej qochaj chimpanman”, nispa. Ajinapi, boteman wicharispa risharqanku. Jesusqa may saykʼusqa kasqanrayku, botej qhepanejninman rispa almohadapi umanta atiykuspa chay rato puñurparerqa.

Jesuspa yachachisqasnenqa boteta purichinankupaj, rijchʼarisqa kasharqanku. Jinallapi sinchʼi wayra oqharikorqa. Astawan astawan wayramusqanraykutaj, yakoqa manchayta qhollchoqeyasharqa. Boteman wajtakamuspataj juntʼaykusharqaña.

Jesuspa yachachisqasnenqa bote chinkaykunanta yuyarqanku. Jesustaj qhepanejpi wañusqa puñusharqa. Yachachisqasnenqa Jesusta rijchʼarichispa nerqanku: ‘Señor, Señor, salvawayku, yakuman chinkaykushanchejña’, nispa. Chayta uyarispa Jesusqa jatarikorqa, wayratawan, qochatawantaj nerqa: ‘Chʼin kaychej. Sayaychej’, nispa.

Wayrataj chay rato chʼinyaporqa, qochapis tiyaykorqa. Yachachisqasnenqa chayta rikuspa tʼukorqanku.  Imaraykuchus ni jaykʼaj chay jinata rikusqankuchu. Paykunapurataj tapunakorqanku: “Pitaj chantá kayri, wayrata, yakutapis kamachejtin, kasunkuri?”, nispa (Lucas 8:22-25; Marcos 4:35-41).

Qanrí, ¿yachankichu pichus Jesús kasqanta?... ¿Imajtintaj chay jina atiyniyoj?... Yachachisqasnenqa Jesús paykunawan kashajtin, mana manchachikunankuchu karqa. Imaraykuchus Jesusqa mana mayqen runa jinallachu karqa. Payqa ni pí jina, tʼukuna imasta ruwayta aterqa. Yachachisqasninta yanapananpaj imatachus waj kutipi ruwasqanta willarisqayki.

Uj pʼunchay tardeyaykuyta, Jesusqa yachachisqasninta kamacherqa, botepi qocha chimpaman ñaupanankuta, chaypitaj suyanankuta. Chantá Jesusqa sapallan orqoman wicharerqa, Tatan Jehovamanta chʼinnejpi mañakunanpaj.

 Yachachisqasnenqa boteman wicharispa risharqankuña. Jinallapi sinchʼi wayra jatarerqa, tutañataj karqa. Paykunaqa barcota purichinapaj carpata uraqachispa, barcota purichiyta munasharqanku. Ñaupaqenkumanta sinchʼita wayramusqanraykutaj, mana aterqankuchu. Yakoqa qhollchoqeyaspa, boteta kayman jaqayman apaykachasharqa, botemantaj juntʼaykusharqa. Paykunaqa boteta qocha kantuman chayachiyta munasharqanku, manataj aterqankuchu.

Chaykama Jesusqa unaytaña orqopi sapallan kasharqa. Ajinapi, yachachisqasnin yakuman chinkaykunankupaj jina kashasqankuta rikorqa. Qocha kantumantaj uraykorqa. Paykunata yanapayta munasqanrayku, yaku patanta purispa rerqa.

¿Imataj kanman yaku patanta purejtiyki?... Yakuman chinkaykuwaj, wañuwajtaj. Jesustajrí atiyniyoj karqa, mana noqanchej jinachu. Jesusqa botekama karuta rerqa. Imaraykuchus yachachisqasnin yaku patanta purejta rikunankupajqa sutʼiyamusharqaña. Chay rikusqankoqa mana creenapaj jina karqa. Chayrayku mancharikuspa qhaparerqanku. Jesustaj paykunaman nerqa: “Sonqochakuychej. Noqa kani; ama mancharikuychejchu”, nispa.

Jesús boteman wicharejtinkama, manaña wayramorqachu. Yachachisqasnintaj tʼukorqanku. Chantá Jesusman kʼumuykukorqanku, nerqankutaj: ‘Cheqamantapuni qanqa Diospa Wawan kanki’, nispa (Mateo 14:22-33; Juan 6:16-21).

Chay tiempopi kausakuy, chay milagrosta rikuypis, may sumajchá karqa, ¿icharí?... ¿Yachankichu imaraykuchus Jesús chay milagrosta ruwasqanta?... Yachachisqasninta munakusqanrayku, yanapayta munasqanrayku ima. Chantapis atiyniyoj kasqanta rikuchiyta munarqa, Diospa Gobiernonpi kamachishajtin imastachus ruwananta ima.

 Kunanpis, Diospa Gobiernonmanta willayta Satanás sayachiyta munajtin, Jesusqa paypi creejkunata atiyninwan yanapan. Chaywanpis mana paykunata sanoyachinchu, nitaj onqoykunamanta jarkʼanchu. Jesuspa apostolesninpis tiemponman wañuporqanku. Juanpa hermanon Santiagotaqa wañucherqanku, Juantataj presocharqanku (Hechos 12:2; Apocalipsis 1:9).

Kunanpis kikillantaj. Jehovata yupaychajkuna, mana yupaychajkunapis onqonku, wañunkutaj. Tumpamantawantaj, Jesús Diospa Gobiernonpi kamachishajtin, niña jinachu kanqa. Niña ni imamanta manchachikunachu kanqa. Imaraykuchus Jesusqa payta kasukojkunata bendicenqa (Isaías 9:6, 7).