¿JEHOVAWAN parlayta yachankichu?... Diosqa munan paywan parlarinaykita. Chayta ruwaspataj Diosmanta mañakushanki. Jesusqa cielopi kaj Tatanwan parlallajpuni. Wakin kuteqa sapallanpi Paymanta mañakoj. Biblia nin jina, uj kuti “sapallan orqoman wicharerqa Dios Tatanmanta mañakoj. Tutayaykuytataj pay sapallan jaqaypi kasharqa” (Mateo 14:23).

¿Maypitaj Diosmanta sapallayki mañakuwaj?... Ichapis cuartoykipi, manaraj puñukapushaspa. Jesús nerqa: “Diosmanta mañakunaykipajqa, cuartoykiman yaykuy; punkuykita wisqʼaykamuspataj, pakaypi Tataykimanta mañakuy”, nispa (Mateo 6:6). Niraj puñukapushaspa, ¿Diosmanta mañakunkichu?... Allin kanman mañakunayki.

 Jesusqa waj runaswan kashaspapis Diosmanta mañakoj. Amigon Lázaro wañupojtin, maypichus pʼamparqanku chaypi runas chaupipi mañakorqa (Juan 11:41, 42). Yachachisqasninwan tantasqa kashaspapis Diosmanta mañakullajtaj. ¿Tantakuykunaman riyta yachankichu?... Chaypeqa uj hermano tantakuypi kajkunapaj Diosmanta mañakun. Mañakusqanta allinta uyarinayki tiyan, imaraykuchus Diosmanta qanpajwan mañakushan. Ajinallamanta mañakuyta tukusqantawan, “amén” niyta atinki. ¿Yachankichu imaraykuchus “amén” nisqanchejta?... “Amén” nispaqa chay mañakuyta allinpaj qhawasqanchejta nishanchej. Chantapis mañakuyninchejta jina qhawanchej.

Jesusqa niraj mikhushaspapis, Jehovamanta mañakoj mikhunamanta agradecekunanpaj. Qanrí, ¿niraj mikhushaspa Jehovaman agradecekunkipunichu?... Allin kanman agradecekunanchej. Wakin kuti, wajkuna agradecepusonqanku. Sapallayki chayri Jehovata mana agradecekojkunawan mikhunayki kajtinrí, ¿imatá ruwawaj?... Diosman sapayki agradecekunayki tiyan.

¿Jatunmantapunichu Diosmanta mañakuna tiyan? Chayrí, ¿uyarinchu sonqonchej ukhupi mañakusqanchejta?... Nehemiasmanta  parlarina. Payqa Jehovata sirvej. Persiamanta rey Artajerjespa kamachina wasinpitaj trabajaj. Nehemiasqa llajtan Jerusalenpa perqasnin thuñisqa kasqanmanta llakisqa kasharqa.

Reyqa Nehemiasta taporqa imaraykuchus llakisqa kashasqanta. Nehemiastaj chay rato Diosmanta sonqollanpi mañakorqa. Chantá reyman willarqa imajtinchus llakisqa kashasqanta. Mañakorqataj Jerusalenman kachananta, llajtanpa perqasninta sayarichimunanpaj. Chantá, ¿imataj karqa?...

Diosqa Nehemiaspa mañakusqanta uyarerqa. Chayrayku reyqa Jerusalenman kachallarqa. Llajtaj perqasninta sayarichinanpajtaj ashkha maderata qorqa. Kaymanta yachakunchej, sonqollanchejpi mañakojtinchejpis Dios uyariwasqanchejta (Nehemías 1:1-3; 2:4-8).

 Diosmanta mañakunapaj, ¿kʼumuykukunachu? Chayrí, ¿qonqorikunachu? ¿Ima niwajtaj?... Jesusqa Diosmanta mañakunanpaj wakin kutis qonqorikorqa. Wakin kutistaj sayasqalla mañakorqa. Waj kutistaj cielota qhawarispa mañakorqa, imaynatachus Lazarota kausarichinanpaj mañakorqa, ajinata.

¿Imatá kaymanta yachakunchej?... Imaynamantapis mañakuyta atisqanchejta. Ichá wakin kuti, chʼirmiykuspa kʼumuykukunayki kanqa. Wakin kutitaj ichá Jesús jina qonqorikuspa mañakuwaj. Chaywanpis ama qonqaychu: Diosmantaqa tutapis, pʼunchaypis mañakuyta atinchej, paytaj uyariwasunpuni. Chayrayku creena tiyan Jehová mañakuyninchejta uyarisqanta. Qan, ¿creenkichu?...

Mañakuyninchejpi, ¿imatá Jehovaman nisunman?... Diosmanta mañakushaspa, ¿imamantá parlarinki?... Jehovaqa ashkha sumaj imasta qowanchej. Chaykunamantataj agradecekuna tiyan, ¿icharí?... Mikhunamanta agradecekuspapis, cielopi estrellasmanta, sachʼasmanta, tʼikitasmanta, ¿agradecekuyta yachankichu?... Chaykunatapis Diosllataj ruwarqa.

Ujpacha, Jesusta yachachisqasnin nerqanku: “Diosmanta mañakuyta yachachiwayku”, nispa. Sumaj Yachachej Jesustaj, imastachus astawan mañakunanku kasqanta yachacherqa.  ¿Yachankichu imatachus nisqanta?... Bibliapi Mateo 6:9-13 versiculosta maskʼarina. Chaypi kashan “padrenuestro” sutiwan rejsisqa mañakuy. Chayta leerina.

Leerinchej jina, Jesusqa Diospa sutin jatunchasqa chayri llimphuchasqa kananta mañakunanchejta nerqa. ¿Imamín Diospa sutin?... Arí, sutenqa Jehová. Chay sutitataj munakuna tiyan.

Jesusqa yachachillarqataj, “Reinoyki jamuchun”, nispa mañakunata. Chay Reino chayri chay Gobiernoqa may sumajpuni. Imaraykuchus allin kausayta apamonqa, Jallpʼatataj uj kʼachitu huertaman tukuchenqa.

¿Imatawan Jesús mañakunanchejta nerqa? Diospa munaynin kay Jallpʼapi ruwakunanta cielopi jina. Chayta mañakuspataj, Diospa munayninta ruwana tiyan.

Chantá Jesús yachacherqa, mikhunata sapa pʼunchaypaj mañakunata. Chaymanta nerqa sajra imasta ruwasqanchejmanta pesachikunata, Diosmanta perdonta mañakunata ima. Dios perdonanawanchejpajtaj, noqanchejraj wajkunata perdonananchej tiyan. Qan, ¿wajkunata perdonayta atillankichu?...

Jesús nisqaman jina, ¿imatawan Diosmanta mañakuna tiyan? Sajramanta jarkʼanawanchejta, nisunman Kuraj Supay Satanasmanta. Tukuy chay allin imasta Diosmanta mañakusunman.

Mañakusqanchejta Jehová uyarisqanpi creenapuni tiyan. Yanapanawanchejta mañakuspapis, agradecekunallataj tiyan. Sonqomantapacha, allin imastataj mañakojtinchejqa pay kusikun. Mañakusqanchejtataj qowasunpuni. ¿Chaypi creenkichu?...