WAWAS allin imasta ruwajtinkoqa, tatasninku mayta kusikunku. Chayrayku uj lloqallitu chayri uj imillita allinta imatapis ruwajtenqa, tatanqa niyta yachan: “¡Kaymá wawayqa!”, nispa.

Jesusqa Tatanpa nisqantapuni ruwan. Chayrayku Tatanqa paywan sonqo juntʼasqa kashan. Jesús kinsa yachachisqasninwan kashajtin imatachus Tatan nisqanta, ¿yuyarikunkichu?... Diosqa cielomantapacha nimorqa: ‘Kaymin munasqa Wawayqa. Paywan ancha kusisqa kani’, nispa (Mateo 17:5).

Jesusqa Tatanpa nisqanta ruwaspa mayta kusikun. ¿Yachankichu imaraykuchus? Tatanta mayta munakusqanrayku. Tanqasqa jinalla imatapis ruwajtinchejqa, mana ruwayta atillanchejchu. Tukuy sonqo ruwajtinchejtaj atillanchej.

Jesusqa niraj Jallpʼaman jamushaspapis, Tatanta munakusqanrayku tukuy imapi kasukoj. Cielopi Tatanwan llankʼashajtin, Tatanqa uj jatun ruwayta qorqa. Jesusqa cielomanta uraykamunan karqa, Jallpʼapitaj nacekunan karqa. Chaytataj tukuy sonqo kasukorqa, Jehovaj munaynin kasqanrayku.

Jesusqa kay Jallpʼapi nacekunanpaj mamayoj kanan karqa. ¿Pitaj maman karqa?... María karqa. Jehovaqa ángel Gabrielta cielomanta kachamorqa, Mariaman kayta willananpaj: “Nacechikunki uj qhari wawata, Jesús sutiwantaj sutichanki”, nispa. Chantá, ¿pitaj chay wawaj tatan kanman karqa?... Chay angelqa chay wawaj Tatan, Jehová kananta nerqa. Chayrayku Jesusqa  Diospa Wawan nisqa kanan karqa.

Mariarí, ¿imatataj nerqa?... ¿Nerqachu: “Mana Jesuspa maman kayta munanichu”, nispa? Mana. Mariaqa Diospa munayninta tukuy sonqo ruwayta munarqa. Jesustaj cielopi kasharqa. ¿Imaynatá Jallpʼapi nacekunman karqa? ¿Imaraykú Jesuspa nacekusqan waj wawitaspa nacekusqankuwan mana kikinchu? ¿Chayta yachankichu?...

Diosqa Adanta Evatawan ruwarqa wawasniyoj kayta atinankupaj. Chayrayku warmeqa, qosanwan qhari warmi jina puñuykuspa wijsallikun. Chantapis niraj wawita nacekushajtenqa mamanpa wijsanpiraj wiñakun. Runasqa chayta “uj milagro” ninku. Qanpis jinallatatajchá yuyanki.

Diostaj aswan jatun milagrota ruwarqa. Cielopi kasharqa chay Wawanpa kausayninta Mariaj wijsanman churarqa. Diosqa mana jaykʼajpis chayta ruwarqachu, niñataj chayta ujtawan ruwanñachu. Ajinamanta Jesusqa Mariaj wijsanpi wiñayta qallarerqa, imaynatachus tukuy wawitas mamankoj wijsanpi wiñanku, ajinata. Chantá Mariaqa Josewan casarakorqa.

Jesús nacekunanña kashajtin, Mariawan Josewanqa Belén llajtapi kasharqanku. Chay llajtaman ashkha runas  risqankurayku, mana alojamientota tarerqankuchu, animalitospa canchapitaj quedakorqanku. Mariaqa chaypi Jesusta nacechikorqa. Chantá uywa qaranaman siriykucherqa, kay dibujopi rikushanki jina.

Jesús nacekusqan chʼisipi, manchay tʼukuna imas karqa. Belén qayllapi michejkunaman uj ángel rikhurerqa. Paykunamantaj nerqa: ‘Willasqaykichej may kusiyniyoj willanasta. Kunan nacekun qankunapaj uj Salvaj’, nispa (Lucas 2:10, 11).

Chantá michejkunaman nillarqataj: ‘Wawata Belenpi tarinkichej, uywa qaranapi sirikushajta’, nispa. Jinallapi chay angelpa qayllanman ashkha ángeles rikhurimorqanku. Paywan khuskataj  Diosta yupaychayta qallarerqanku: ‘Gloria kachun Diosman, kay pachapitaj sonqo tiyaykuy kachun Diospa munakuyninpi kajkunapaj’, nispa (Lucas 2:12-14).

Ángeles chinkapusqankutawan, michejkunaqa Belenman kachaykukorqanku, chaypitaj Jesusta tarerqanku. Chantá Joseman Mariamanwan, ima sumaj willaytachus uyarisqankuta nerqanku. Mariaqa, ¡maytachá kusikorqa Jesuspa maman kayta munasqanmanta!

Chaymanta Josewan Mariawanqa, Jesusta Nazaret llajtaman aparqanku, chaypitaj wiñakorqa. Wiñarqospañataj Tatan Jehová kamachisqanman jina,  runasman yachachiyta qallarerqa. Jesusqa Tatanta mayta munakusqanrayku, chayta tukuy sonqo ruwarqa.

Jesusqa manaraj Diosmanta yachachiyta qallarishaspa, Juan Bautistawan Jordán Mayupi bautizachikorqa. Chay kuti tʼukunapaj jinapuni karqa. Jesús yakumanta llojsimusqantawan, Jehovaqa cielomanta parlamorqa: “Kaymin ancha munasqa [Wawayqa]. Paywan sonqo juntʼasqa kani”, nispa (Mateo 3:17). Tatayki chayri mamayki “munakuyki” nisojtin, ¿kusikunkicharí?... Jesuspis maytachá kusikorqa.

Jesusqa cheqan kajtapuni ruwarqa. Mana puraj uyachu karqa, nitaj “Dios kani” nerqachu. Ángel Gabrielqa Mariaman nerqa: ‘Jesusqa Diospa Wawan sutichasqa kanqa’, nispa. Jesuspis Diospa Wawan kasqanta nerqa. Manataj Tatanmanta aswan yachayniyoj kasqantachu nerqa. Astawanpis nerqa: ‘Tatayqa noqamanta kuraj’, nispa (Juan 14:28).

Jesusqa cielopipis, imatachá Tatan kamachej chayta ruwaj. Payqa Tatanta munakusqanrayku kasukoj. Chayrayku Jallpʼaman jamuspa, imatachá Tatan kamacherqa chayta ruwarqa. Manataj tiemponta waj imaspi usucherqachu. ¡Chayraykuchá Jehovaqa Jesuswan kusisqa karqa!

Noqanchejpis Jehovata kusichiyta munanchej, ¿icharí?... Chaypajqa Jesús jina Diosta kasukuna. Diosqa Biblianejta parlawanchej. Mana allinchu kanman Bibliaj kamachiykunasninta mana kasukushaspa, “Diosta kasukuni” ninanchej, ¿icharí?... Yuyarikuy, Jehovata cheqamanta munakusunchej chayqa, tukuy sonqo payta kasukuspa kusikusunchej.