¿IMARAYKÚ uj ángel Supayman tukorqa?... Yupaychachikuyta munasqanrayku Diospa contranta oqharikorqa. Waj ángeles, ¿Supayta qhatillarqankutajchu?... Arí. Bibliaqa paykuna Supaypa ‘angelesnin’ chayri supaykuna kasqankuta nin (Apocalipsis 12:9).

Chay sajra ángeles, ¿Diospi creenkuchu?... Bibliaqa ‘supaykunapis Diospi creesqankuta’ nin (Santiago 2:19). Jinapis kunanqa mancharisqa kashanku. Imajtinchus yachanku sajra ruwasqasninkumanta Dios jasutʼinanta. ¿Imastataj supaykuna ruwarqanku?...

Biblia nisqanman jina, chay angelesqa cielopi kausayninkuta saqerqanku. Jallpʼamantaj uraykamorqanku runas jina kausanankupaj. Chayta ruwarqanku kʼachita warmiswan qhariwarmi jina  puñuykuyta munaspa (Génesis 6:1, 2; Judas 6). ¿Yachankichu imallatapis qhariwarmi jina puñuykuymanta?...

Qhariwan warmiwan puñuykojtinkoqa, wawitayoj kayta atinkuman. Chantá wawitaqa mamanpa wijsanpi wiñaytawan nacekun. Diosqa casarasqaslla qhariwarmi jina puñuykunankuta nin. Ajinamanta wawitanku nacekojtin, iskayninku uywayta atinku. Angelestaj mana warmiswan puñuykunankupajchu ruwasqa kanku.

Sajra ángeles runaman tukuspa warmiswan puñuykojtinku, wawasniyoj karqanku, wawasninkutaj may jatuchej runas karqanku, may sajrastaj. Runastataj ñakʼarichej kanku. Chayrayku Diosqa paykunata, sajra runastawan chinkachinanpaj, Jallpʼaman yaku juntʼaykunankama parachimorqa. Cheqan runasta salvananpajtaj, Noeta kamacherqa uj arcata chayri uj jatun barcota ruwananta. Jesusqa Noej tiemponmanta yuyarikunatapuni nerqa (Génesis 6:3, 4, 13, 14; Lucas 17:26, 27).

Jatun Para jichʼakamojtin, ¿yachankichu sajra ángeles imatachus ruwasqankuta?... Paykunaqa aycha cuerponkuta  saqeytawan cieloman kuterqanku. Diostajrí, niña paykunata japʼikaporqachu, Satanaspa angelesninmantaj tukorqanku. Chantá, ¿imataj karqa jatunkaray wawasninkumanta?... Diosta mana kasukojkunawan khuska Jatun Parapi wañorqanku.

Jatun Para pasayta, Diosqa niña saqerqachu supaykuna aychallikunankuta. Supaykunata mana rikojtinchejpis, runasta sajra ruwayman tanqallankupuni. Kunantaj astawan chʼampaykunata rikhurichishanku, Jallpʼaman wijchʼuchikamusqankurayku.

Chantá, ¿imaraykú supaykunata mana rikunchejchu?... Mana aycha cuerpoyojchu kasqankurayku. Jinapis supaykunaqa kankupuni. Biblia nisqanman jina Supayqa, sajra angelesninwan ‘pachantinpi runasta pantachishan’ (Apocalipsis 12:9, 12).

¿Noqanchejtapis pantachiwasunmanchu?... Arí, mana allinta qhawarikojtinchejqa pantachiwasunman. Jinapis mana manchachikunachu tiyan. Sumaj Yachachej Jesús nerqa: ‘Kuraj Supayqa contraypi mana imata ruwayta atinchu’, nispa. Diospa qayllallanpipuni kajtinchejqa, Satanasmanta supaykunasninmantawan pay jarkʼawasun (Juan 14:30).

Ima sajra ruwaykunamanchus supaykuna tanqanawanchejta, yachana tiyan. Kaypi tʼukuriy: Jallpʼaman jamuspa, ¿imatá supaykuna ruwarqanku?... Niraj Jatun Para kashajtin, warmiswan puñuykuspa juchallikorqanku. Diosqa sutʼita nin, pikunallachus qhariwarmi jina puñuykunankuta. Supaykunaqa kusikunku, runas chayta mana kasukojtinku. ¿Pikunallataj qhariwarmi jina puñuykuyta atinku? ¿Yuyarikunkichu?... Arí, casarasqaslla.

Kay tiempopi wakin waynuchus, sipasitaspis qhariwarmi jina puñuykunku. Chaytaj jucha. Bibliaqa Dios qharitapis warmitapis jispʼanayojta ruwasqanta nin. Jehovaqa qharita, warmita ajinata  ruwarqa, casarakuspa munakuyninkuta rikuchinakunankupaj. Supaykunaqa mayta kusikunku, runas Jehovaj chejnisqan imasta ruwajtinku. Sutʼinchanapaj, uj lloqallituwan uj imillitawan jispʼanitankuta tʼojpinakojtinkoqa, supaykuna kusikunku. ¿Manacharí paykunata kusichiyta munanchejchu?...

Wakin runasqa waj jinamanta supaykunata kusichillankutaj. Jehovataj chayta chejnikun. ¿Imata ruwaspataj kusichinku?... Kallpankuman atienekuspa sajrata ruwaspa (Salmo 11:5). Chay runasqa mana khuyaspa wajkunata ñakʼarichinku. Supaykunaj jatuchaj wawasninkupis ajinata ruwaj kanku.

Supaykunaqa runasta manchachispa kusikullankutaj. Paykunaqa runasta creechinku wañusqas kausashasqankuta, runaswanpis parlayta atisqankuta. Chaypajqa wañupoj runa jina rikuchikunku, parlanku ima. Ajinamanta may chhika runasta chʼaukiyanku. Chayrayku ashkhas creenku runa almayoj kasqanta.

 Satanaswan, supaykunasninwan mana chʼaukiyachikunapajqa, allinta qhawarikunanchej tiyan. Biblia nin: ‘Satanasqa yachan kʼacha angelman tukuriyta. Kamachisninpis kikillantataj ruwanku’, nispa (2 Corintios 11:14, 15). Chaywanpis supaykunaqa sajraspuni kanku. Qhawarina imaynasmantachus tanqawasunman, paykuna jina kananchejpaj.

¿Maypitaj runas yachakunku maqanakuymanta, mana casaraspalla qhariwarmi jina puñuykuymanta, espiritusmanta, almasmanta ima?... ¿Manachu telepi, videojuegospi, Internetpi, wakin librospi ima? Chay ruwaykuna, ¿Diosmanchu qayllaykuchiwanchej? Chayrí, ¿Satanasman, supaykunasninman imachu? ¿Ima niwajtaj?...

¿Pikunataj munanku sajra imasta uyarinata, qhawanata ima?... Satanaswan supaykunasninwan. Chayrayku, ¿imatá ruwana?... Allinninchejpaj, Jehovata sirvinapajtaj yanapawanchej, chay imasta leena, uyarina, qhawana ima. ¿Imastaj chaykuna kanku?...

Allin kajta ruwaspaqa, supaykunata mana manchikunachu tiyan. Imaraykuchus Jesusqa, supaykunamanta aswan atiyniyoj. Uj kuti Jesusta mancharisqas taporqanku: “Noqaykuta tukuchejchu jamunki?”, nispa (Marcos 1:23, 24). Paykunata Jesús tukuchejtin, ¿maytacharí kusikusun?... Chaykamaqa Jesuspa, jinallataj Tatanpa qayllanpi kana. Ajinamanta Jesusqa, supaykunamanta jarkʼawasun.