BIBLIAQA, Abraham, Diospi may iñiyniyuq kasqanta niwanchik, Ur llaqtapi sumaq kawsayninta saqispa, Haranman ripurqa, chaypi pisi tiempota tiyakuytawantaq, toldosllapi tukuyniqpi tiyakurqa (Génesis 12:1-3; Hechos 7:2-7; Hebreos 11:8-10). Chaywanpis Bibliaqa jinata nin: “Abrahamqa wañuporqa allin wañuypi [‘sunqu juntʼasqa’, NM], allin machuña, ashkha watasniyojtaj” (Génesis 25:8). ¿Imaraykutaq sunqu juntʼasqa wañupurqa? Mana tukuy imata kawsayninpi ruwasqanraykullachu sunqu juntʼasqa wañupurqa, manaqa Diospi iñiyninta churasqanrayku, chayrayku aswan qhipaman Jehovap “kawsaqen” chayri amigon nisqa karqa (Santiago 2:23; Isaías 41:8). Manchay sunqu juntʼasqa kawsakurqa Ruwaqninman qayllaykuyta atisqanrayku.

² Imaynatachus unay tiempopi Abraham Diospa amigon karqa, qampis Diospa amigon kaspa sunqu juntʼasqa kawsakuwaq. Ruwawaqninchikpa amigon kayqa, mana creenapaqjina kanman, chaywanpis paypaq amigon kayta atinki. Chaypaqqa payta sumaqta riqsinayki, munakunayki ima tiyan (1 Corintios 8:3; Gálatas 4:9). Jinata ruwanki chayqa, sunqu juntʼasqa kawsakuyta atinki.

³ Jesuspa wañuyninta jatunpaq qhawaqkunamanqa, Jehová imaynatachus kusisqas kawsanankupaq yachachin (Isaías  48:17). Yuyarikuy, Adanqa pay sapallanmanta imachus allin kaq, mana allin kaqta akllasqanrayku Diospa contranta uqharikurqa. Jehová Diosninchik tukuy runasta, juchamanta, wañuymanta ima, Churinpa wañuyninwan rantiwaptinchikpis, sapa juk Jesuspa wañuyninta jatunpaq qhawananchik tiyan, manataq sapallanchikmanta, imachus allin kaq, mana allin kaqta akllananchikchu tiyan. Jesuspa wañuyninta jatunpaq qhawaptinchikqa, Diospa kamachiykunasninta, yuyaychaykunasninta ima, juntʼananchik tiyan.

⁴ Bibliata astawan ukhunchanki, yachachisqasninmanjina kawsanki ima chayqa, Dios, allin kaq, mana allin kaqmanta kamachisqanta may jatunpaq qhawanki (Salmo 19:7-9). Qampis, imaynatachus profeta Moisés Diosman nirqa, kikinta niyta munanki: “Kunanqa Tata Dios, sichus qampi tarini khuyakuyta chayqa, kunan rikuchiway ari ñanniykita, qanta rejsisunaypaj”, nispa (Éxodo 33:13; Salmo 25:4). Bibliapiqa sumaq yuyaychaykuna tiyan, kay ‘manchay saqra pʼunchaykunapi’ yanapasunanpaq (2 Timoteo 3:1). Bibliata ñawirisqaykiqa, Jehová Diosta astawan riqsinaykipaq, payman qayllaykunaykipaq, amigon kanaykipaq ima yanapasunqa.

⁵ Abrahamqa, ‘machituña [‘sunqu juntʼasqa’, NM] wañupurqa’, jinallatataq tukuypis wañuyman chayanchik, imaraykuchus kawsayninchikqa may pisilla. Machuyasqaña kaspapis, mana pipis wañuytaqa munanchu. Imaraykuchus Diosninchik “runaj sonqonman wiñay [wiñaypaq] kasqanta churarqa; chaywampis runaqa manapuni yachayta atinchu imatachus Dios qallariymantapacha ruwasqanta kunankama” (Eclesiastés 3:11). Wiñaypaq kawsaspapis, ni jaykʼaq Diospa ruwasqasnintaqa allinta yachayta atisunchu. Chayrayku sumaq ruwasqasninmanta yachakuyqa, mana tukukuyniyuq kanqa (Salmo 19:1-4; 104:24; 139:14).

⁶ Chay tiempopi Jallpʼanchik saqra ruwaykunamanta juntʼa kanan kaptinqa, ichapis mana wiñaypaq kawsayta munawaqchu. Chaywanpis mana llakikunaykichu tiyan imaraykuchus Bibliaqa kayta nin: “Noqanchejrí suyashanchej mosoj cielota, mosoj jallpʼatawan, Dios ruwasaj nisqanman jina, maypichus cheqan kawsaylla kanqa, chayta” (2 Pedro 3:13). Bibliaqa ‘musuq  cielomanta’ parlaspa, juk musuq kamachiq —Diospa Reinon— janaqpachamanta kay Jallpʼata kamachimunanmanta parlachkan. ‘Musuq jallpʼa’ nispataq, chiqan sunquyuq runasmanta parlachkan, paykunataq chay Reinop kamachiyninpi kawsanqanku. Diosninchik imatachus kay Jallpʼapaq munasqan juntʼakunanpaqqa, pisimantawan ‘kay pachata phiriqkunata tukuchinqa’ (Apocalipsis 11:18; 2 Pedro 3:10).

⁷ ¿Ima ninayantaq “pisimantawan”? Jesucristoqa, kay pachap tukukunan qayllata, ima señalchus rikukunanmanta parlarqa. Nirqataq, jatuchaq maqanakuykuna, “yarqhaykuna, sinchʼi jallpʼa ikhakuykuna ima kaynejpi, jaqaynejpi”, “wañuchej onqoykuna tukuynejpi”, ‘jucha anchapuni kananta’ ima, nirqa (Mateo 24:3-13; Lucas 21:10, 11; 2 Timoteo 3:1-5). Chantapis nillarqataq: “Chay tukuy imasta rikuspaqa, yachaychej Diospa reinon qayllapiña kasqanta”, nispa (Lucas 21:31). Chiqamanta, Jehová saqra runasta chinkachinan pʼunchayqa, usqhayllata qayllaykamuchkan. *

⁸ Jehová Dios ‘jatun pʼunchayninpiqa’ kay Jallpʼamanta tukuy saqra kaqta chinkachinqa, chaymantataq kay pachata tʼika pachaman kutichinqa (Apocalipsis 16:14, 16; Isaías 51:3). Chay tiempopiqa, “cheqan runasqa kay pachata herenciankupaj japʼenqanku, chaypitaj wiñaypaj kawsanqanku” (Salmo 37:29). ¿Wañusqasrí jinallachu qhipakunqanku? Jesús jinata nirqa: “Ama chay nisqaymanta tʼukuychejchu. Hora chayamonqa, chaypachataj tukuy pʼampasqa kajkunaqa Runaj Churimpa parlasqanta uyarenqanku. Allinta ruwajkunaqa kawsayman yaykunankupaj jatarimonqanku, sajrata ruwajkunatajrí, juiciopi juchachasqa kanankupaj kawsarimponqanku” (Juan 5:28, 29). Jehovaqa tukuymanta dakukun, chayrayku wañusqas kaqkunatapis kawsarichimunqa. Ruwawaqninchikqa, ni pi jina manchay yachayniyuq,  chayrayku imaynachus sapa runa kasqanta sumaqta yuyarisqanrayku kawsarichimunqa. Qampis, familiaykimanta wañupuqkunawan paraisopi kawsarimuptinku tinkukapuyta atinki.

⁹ ¿Imaynataq paraisopi kawsay kanqa? Jallpʼaqa Ruwawaqninchikta, jukchasqa, kusisqas ima, yupaychaqkunamanta juntʼa kanqa. Nitaq “pipis nenqachu: Onqosqa kani, nispaqa” (Isaías 33:24; 54:13). Mana pipis llakikunqañachu, nitaq phutikunqañachu. Runaspaqqa, mana mikhunanku pisiyanqachu, kusisqastaq llamkʼanqanku Diospa munayninta ruwaspa (Salmo 72:16; Isaías 65:23). Runaqa, runa masinwan, animaleswan ima, khuska kawsakunqanku, astawanpis ‘Dioswan allinpi’ kanqanku (Romanos 5:1; Salmo 37:11; 72:7; Isaías 11:6-9).

¹⁰ ¿Imatá qam ruwawaq chay Paraisopi sunqu juntʼasqa kawsanaykipaq? Jesucristo nirqa: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis” (Juan 17:3). Chayrayku Diosmanta, Churinmanta ima, yachakullaypuni, jinallataq imatachus Dios ruwanaykita munasqantapis yachakuy. Jinamanta Diosta kusichiyta atinki, sunqu juntʼasqataq kawsakunki.