RUNASQA, Diospa kamachiyninman churanakusqankurayku, mana ni ima suyakuyniyuq kaptinkupis, Diosqa mana jinallata saqirparirqachu. Biblia jinata sutʼinchawanchik: “Chayrayku kay pachapis mana imapajchus karqa, chaypaj jinañachu, chaytaj mana payllamantachu, manachayqa Diospa munayninrayku. Chaywampis kay suyakuy tiyan. Tukuy kay pachapis ismuypa atiyninmanta kacharichisqa kanqa, Diospa kacharichisqa wawasninwan khuska jatun kusiypi kanampaj” (Romanos 8:20, 21). Diosqa, Adanpa wawasninta wañuymanta, juchamanta ima, kacharichinanta nirqa. Jinamanta runasqa, watiqmanta Jehová Diosman qayllaykuyta atinankupaq. ¿Imaynamantá?

² Adán, Evawanqa imachus allin, imataqchus mana allin kaqta akllasqankurayku wawasninkuman juchata, wañuyta ima saqirqanku. Chayraykutaq runasqa kusiy kawsayta, wiñay kawsayta ima, mana tariyta atinkuchu. Kikinchanapaq Adanpa miraynin kasqankurayku, juk saqra patronman vendesqajina kanku, chaymanta kacharichikunankupaqtaq mana ni imata ruwayta atinkuchu. Kikillantaq juchaqa wañuypaq patronnin, wañuytaq runaspa patronninjina kachkan (Romanos 5:14, 21). Runataqa juchamanta, wañuymanta ima, mana pipis kacharichiyta atinanpaqjina karqa, imaraykuchus ñawpa tatanku juchap atiyninman venderqa. Chaywanpis jatun khuyakuyniyuq runa, churinta kachan, chay churintaq tukuy runas kacharichisqas kanankupaq pagan (Salmo 51:5; 146:4; Romanos 8:2).

³ Kay khuyakuyniyup runaqa, Jehová Dios, chay pagap churintaq Jesucristo, paytaq Diospa kʼata churin, manaraq kay Jallpʼaman jamuchkaspa janaqpachapi tatanwan kawsarqaña (Juan 3:16). Diosqa manaraq ni imata  ruwachkaspa Jesucristotaraq ruwarqa, paytaq tukuy ima ruwasqanpi yanaparqa (Colosenses 1:15, 16). Diosqa atiyninwan Churinta, mana qharita riqsiq warmip wiksanman churarqa, jinamanta chay wawitaqa mana juchayuq paqarikurqa. Diospa chiqan kayninmanjina, churin mana juchayuq kasqanrayku paylla juchamanta kacharichinawanchikpaqjina karqa (Lucas 1:26-31, 34, 35).

⁴ Jesusqa 30 watayuq, Jordán mayupi bautizakurqa, chaypitaq Diospa espíritu santonwan nisunman atiyninwan, akllasqa karqa. Chaymantapachataq Cristoman tukurqa, chay sutitaq “Akllasqa”, niyta munan  (Lucas 3:21, 22). Kay Jallpʼapitaq kimsa wata khuskanniyuqta “Diospa reinonmanta” willarqa, chaypitaq discipulosninman janaqpachamanta reino kamachimuchkaptin, runas juktawan Diosman qayllaykuyta atinankumanta yachachirqa (Lucas 4:43; Mateo 4:17). Jesusqa, runas kusisqas kawsanankupaq imatachus ruwanankuta sumaqta yacharqa, chaymanjinataq discipulosninman sutʼita yachachirqa. Jesús imatachus urqupi yachachisqanmanta Bibliaykipi kay Mateo libropi 5-7 tʼaqakama ñawiriy.

⁵ Jesús, Adanmanta nisqaqa, Diosta tukuy imapi kasukurqa, chayrayku ‘mana jaykʼaqpis juchallikurqachu’ (1 Pedro 2:22; Hebreos 7:26). Jesusqa kay Jallpʼapi wiñaypaq kawsakuyta atinman karqa, chaywanpis ‘kawsayninta wañuspa jaywarqa’, jinamanta Adán chinkachisqanta, Diosman kutichinanpaq kawsayninta kurkupi wañuspa jaywarqa (Juan 10:17; 19:28-30; Romanos 5:19, 21; Gálatas 3:13). Wañuyninwantaq, runasta wañuymanta, juchamanta ima kacharichinanpaq, maychus kaqta pagarqa (Mateo 20:28). Kaypi tʼukuriy, watarunatajina manchayta llamkʼachichkasusqankuta. Chantá juk runa kawsayninta wañuyman quspa kacharichisuptin, ¿manachu chay runata mayta agradecewaq? Jesús, kawsayninta quspa juk ñantajina qampaq kicharin, Diospa kamachisninwan khuska, kusisqa kawsanaykipaq, maypichus jucha, wañuy ima mañana kanqankuñachu (2 Corintios 5:14, 15).

⁶ Jehovap khuyakuyninta yachay, may allinpaq qhaway ima, Bibliap yuyaychaykunasninmanjina kawsanapaq tanqawanchik. Bibliap yuyaychaykunasninmanta wakinta juntʼayqa, mana atikullanchu, kaypi tʼukuriy; juk runa ima saqratapis ruwawaptinchikqa, mana perdonayta atillanchikchu. Chaywanpis, ¿yuyarikunkichu 2 kaq yachaqanapi Efesios 4:32 pʼitipi imatachus nisqanta? Kay pʼitipiqa pipis phiñachiwaptinchik perdonana kasqanmanta jinata nin: “Sapa uj perdonanakuychej, imaynatachus Diospis Cristopi perdonasorqachej, ajinata”. Imastachus Jehová, Jesús ima ñuqanchikrayku ruwasqankupi sumaqta tʼukurisqaykiqa, wakkunata perdonanaykipaq tanqasunqa, astawanraq phiñachisusqankumanta perdonta mañakusuptinku, pesachikuptinku imaqa.