Jehovaqa, Satanás saqra ruwasqanta, allinchanqa. Jesustataq Jallpʼata kamachinanpaq Reytajina churan. Chay kamachiyninpitaq kay Jallpʼaqa juk paraisoman tukunqa (Daniel 7:13, 14; Lucas 23:43, NM).

Jehová imatachus nisqanta qhawarina.

• ACHKA MIKHUNA KANQA: ‘Jallpʼaqa sumaqta puqunqa, Diosninchiktaq bendeciwasunchik’. ‘Nacionninpiqa achkha trigo kanqa; urqu puntaspipis trigoqa wayrawan pukllanqa’ (Salmo 67:6; 72:16).

• MANAÑA MAQANAKUYKUNA KANQACHU: “Jamuychej, Tata Diospa tʼukuna ruwasqasninta qhawaychej, imaraykuchus kay pachata Tata Dios chʼin pachata saqerqa. Tukuy kay pachapi chʼajwasta chʼinyachin” (Salmo 46:8, 9).

• MANAÑA SAQRA RUNAS KANQACHU: “Sajra runasqa kay jallpʼamanta chinkachisqa kanqanku [...] Tumpamantawanqa manaña sajra runas kanqankuchu; may jinata maskʼaspapis, manaña paykunata tarinkiñachu” (Salmo 37:9, 10).

•  MANAÑA UNQUY, NANAY, WAÑUY IMA KANQACHU: “Chaypacha ciegospis rikuyta atenqanku, joqʼaraspa ninrisninkupis kicharisqa kanqa. Cojosqa tarukas jina phinkiykachanqanku; opapis kusiywan takirenqa” (Isaías 35:5, 6).

  “Diostaj paykunaj Diosninku kanqa. Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu.” (Apocalipsis 21:3, 4.)

Satanás, supaykuna ima, llullas kanku, Jehovataq ni jaykʼaq llullakunchu, paypa nisqanqa juntʼakunqapuni (Lucas 1:36, 37). Jehovaqa munakusunki, kay Jallpʼata juk Paraisoman tukuchispa chaypi kawsakunaykitataq munan. Chayrayku Jehovamanta sutʼinchaqkunata maskʼay, Bibliamanta chiqa kaqta yachakunaykipaq. Kawsayniykipi Bibliap nisqanmanjina ruwanki chayqa, tukuy llulla kaqmanta, saqra kaqmanta ima jarkʼakunki. Astawan qhipamantaq, juchamanta, wañuymanta ima kacharichisqa kanki. Jesús nirqa: “Cheqa kajta rejsinkichej, chay cheqa kajtaj kacharichisonqachej”, nispa (Juan 8:32).