Rebecaqa, Jehovata munakorqa. Qosan Isaacpis Jehovata munakullarqataj. Kay yachaqanapi, imaynatachus Rebecawan Isaacwan rejsinakusqankuta yachakusun. Chantá, imaraykuchus Rebeca, Jehovata kusichiyta munasqantapis.

Isaacpa tatanqa Abraham sutikorqa, mamantaj Sara. Paykunaqa Canaán llajtapi tiyakorqanku. Chaypitaj runasqa Jehovata mana yupaychajchu kanku. Chaywanpis Abrahamqa, Diosta yupaychaj warmiwan, wawan casarakunanta munarqa. Chayrayku ujnin kamachinta ichapis Eliezerta, Harán llajtaman kacharqa. ¿Imapaj? Isaacpaj warmita maskʼapunanpaj. Chay llajtapeqa, Abrahampa familiaresnin tiyakorqanku.

Eliezerqa, Abrahampa waj kamachisninwan khuska karuta Haranman rerqa. Chunka camellospitaj mikhunata, regalosta ima chajnarqanku. ¿Imaynatá Eliezer yachanman karqa, pitachus ajllananta? Payqa yacharqa, chay llajtamanta warmis pujyuman yakuta orqhoj jamunankuta. Chayrayku Haranman chayaspa, chay pujyuman rerqanku. Chaypitaj Eliezerqa Jehovamanta mañakorqa, nerqataj: “Noqa mayqen sipastachus nisaj: Pʼuñuykita uraykʼuchikuspa, yakuta qoriway ujyanaypaj, nispa, paytaj pʼuñunta uraykʼuchikuytawan, niwanqa: Kayqa,  ujyarikuy, camellosniykimampis ujyarichipusqayki, nispa, chay kachun ajllasqaykeqa kamachiyki Isaacpaj”, nispa.

Rebecaqa, pujyuman chayarqa. Bibliaqa nin, pay kʼachita kasqanta. Eliezer yakuta mañakojtintaj, Rebecaqa nerqa: “Kayqa, ujyarikuy, camellosniykimanpis ujyarichipusqayki”, nispa. Camellosqa, ashkha yakuta ujyanku. Chayrayku Rebecaqa, kutin kutita yakuta orqhoj rinan karqa. Sojta paginapi rikhurej dibujota qhawariy. ¿Imatá Rebeca ruwashan?... Eliezerqa, mayta llankʼasqanta rikuspa, Jehová mañakuyninta uyarisqantataj reparaspa, tʼukulla qhepakorqa.

Eliezerqa, Rebecaman kʼachitu regalosta qorqa. Rebecataj, Eliezerta, chay waj kamachistawan tatanpa wasinman wajyarerqa. Chaypitaj Eliezerqa sutʼincharqa imapajchus Abraham kachasqanta. Chantapis, Jehová mañakuyninta uyarisqanta willallarqataj. Chayta uyarispataj Rebecaj familiaresnenqa, mayta kusikorqanku. Isaacwan casarakunantataj munarqanku.

Rebecarí, ¿Isaacwan casarakuyta munanmanchu karqa?... Rebecaqa, Eliezerta Jehovapuni kachasqanta yacharqa. Chayrayku familian chayta tapojtin, arí nerqa. Eliezerwan khuskataj Canaanman riporqa. Chayman chayaspataj Isaacwan casarakorqa.

Rebecaqa, Jehovata kasukorqa. Chayrayku Diosqa, payta jarkʼarqa. Jesuspis familianmanta jamorqa. Qanpis wawáy Rebeca jina, Jehovata kasukunki chayqa, pay jarkʼasonqa, Jehovatataj kusichinki.