LECCIÓN 24
¿Imatá Biblia nin angelesmanta?
Angelesqa cielopi tiyakunku. Paykunataj Diospa familian kanku, Bibliaqa nin ‘Diospa wawasnin kasqankuta’ (Job 38:7, sutʼinchaynin). Jehovaqa munan paykunamanta yachananchejta. Kaypi yachakusun imatachus Biblia angelesmanta nisqanta, imatachus ángeles ruwasqankuta, tukuy angeleschus Diospa familianmanta kasqankuta manachus.
1. ¿Imaynataj ángeles kanku?
Angelesqa espíritus kanku, nisunman mana rikukoj cuerpoyoj. Paykunaqa cielopi tiyakunku (Hebreos 1:14). Jehová Diosqa niraj jallpʼata ruwashaspa may chhika angelesta ruwarqa, sapa ujninkutaj uj jina kanku (Apocalipsis 5:11). Paykunaqa ‘Jehová Diospa nisqanta uyarispa kasukunku’ (Salmo 103:20). Ñaupa tiempopi angelesqa Jehovaj nisqanta runasman willarqanku. Chantapis Diospa llajtanta enemigosninmanta jarkʼarqanku, yanaparqankutaj. Kay tiempopipis angelesqa cristianosta yanapanku Diosmanta yachakuyta munaj runasta tarinankupaj.
2. ¿Imaynatá wakin ángeles sajrasman tukorqanku?
Wakin angelesqa niña Diospa kamachisqanta kasukorqankuchu. Diospa contranpi oqharikoj ñaupaj kaj sajra angelqa “sutichasqa Diablo, Satanastaj [...]. Payqa jallpʼapi kaj tukuy runasta chʼaukiyashan” (Apocalipsis 12:9). Satanasqa angelestapis runastapis kamachiyta munarqa. Chayrayku Adantawan Evatawan engañarqa, waj angelestapis Diosmanta karunchacherqa. Chay karunchakoj angelestaj demonios kanku. Jehovaqa paykunata kay jallpʼaman wijchʼumorqa, tumpamantawantaj chinkachenqa (Apocalipsis 12:9, 12 leey).
3. ¿Imaynasmantataj Satanaswan demonioswan runasta engañanku?
Satanaswan demonioswanqa ashkha runasta layqerioswan engañashanku. Layqeriosta ruwajkuna ukhupi kashanku: adivinos, estrellaspi suerteta qhawajkuna, aysiris, yatiris, layqas, jampiris ima. Chay runasqa imatapis yachanku chayri ruwanku demoniospa atiyninkuwan. Wakenqa runasta creechinku wañusqaswan parlayta atisqankuta. Satanaswan demonioswanqa Diospa enemigosnin kanku. Paykunaqa llakiypi kananchejta munanku. Chayrayku Jehová niwanchej: “Ama aysirista tapukoj riychejchu, nitaj adivinostapis watukuychejchu”, nispa (Levítico 19:31).
ASTAWAN YACHAKUNA
Kaypi yachakusun imaynatachus kʼacha ángeles yanapawasqanchejta, layqeriosman chhapukojtinchej imapichus rikukunata, Satanaswan demonioswan mana engañachikunapaj imastachus ruwanata ima.
4. Kʼacha angelesqa runasta yanapanku Jehovata rejsinankupaj
Kʼacha angelesqa mana paykuna kikinpunichu Diosmanta willarinku, manaqa cheqa cristianosta yanapanku Diosmanta yachakuyta munaj runasta tarinankupaj. Apocalipsis 14:6, 7 leeriychej, chantá yachakojta tapuriy:
-
¿Imaraykutaj Diosmanta runasman willamunapaj angelespa yanapayninta necesitanchejpuni?
-
¿Qantapis ángeles yanapasunkumanchu Diosmanta yachakuyta munaj runasta tarinaykipaj? ¿Chayta yachay kusichisunkichu?
5. Ama layqeriosman chhapukunachu
Satanaswan demonioswanqa Jehová Diospa enemigosnin kanku. Noqanchejpatapis enemigosnillanchejtaj kanku. Lucas 9:38-42 leeriychej, chantá yachakojta tapuriy:
-
¿Supaykuna imanajtaj kasqanku runasta?
Noqanchejqa mana demonioswan engañachikuyta munanchejchu. Chayrayku ama ima layqeriosmanpis chhapukunachu. Deuteronomio 18:10-12 leeriychej, chantá yachakojta tapuriy:
-
¿Imaswantaj demonios runasta engañaj kasqanku? Qan tiyakunki chaypi, ¿runas chay imasta ruwallankutajchu?
-
¿Imaraykutaj Jehová Dios mana munanchu layqeriosman satʼikunanchejta?
VIDEOTA qhawariychej, chantá yachakojta tapuriy:
-
Palesa sutiyoj señora supaykunamanta wawitanta jarkʼananpaj uj manillata churasqan, ¿imaraykutaj mana allinchu karqa?
-
Demonios mana imananankupaj, ¿imatá Palesa sutiyoj señora ruwanan karqa?
Jehová Diospa kamachisnenqa demoniospa contranpi sayaykunanchej tiyan. Hechos 19:19; 1 Corintios 10:21 leeriychej, chantá yachakojta tapuriy:
-
¿Imastataj ruwananchej kasqa layqerioswan chhapusqa imaswan?
6. Satanastawan demoniostawan atipana
Demoniostaqa Satanás kamachishan, kʼacha angelestataj Arcángel Miguel. Arcángel Migueltaqa Jesús sutiwan rejsillanchejtaj. Satanaschus Arcángel Miguelchus aswan atiyniyoj kasqanta yachanapaj Apocalipsis 12:7-9 leeriychej, chantá yachakojta tapuriy:
-
¿Pikunataj astawan atiyniyoj kanku, Miguelwan angelesninwanchu chayri Satanaswan demoniosninwanchu?
-
¿Satanastawan demoniostawan manchikunanchejchu kanman?
Satanastawan demoniostawanqa atipayta atinchej. Santiago 4:7 leeriychej, chantá yachakojta tapuriy:
-
¿Imatataj ruwananchej kasqa Satanastawan demoniostawan atipanapaj?
WAKIN RUNAS NINKU: “Layqerioswan chhapusqa peliculaspis pujllaykunapis kusirikunapaj may sumaj”, nispa.
-
¿Ajinata yuyay allinchu kanman? ¿Imaraykutaj chayta ninki?
¿IMASTÁ YACHAKUNCHEJ?
Kaypi yachakunchej kʼacha angelesqa yanapawasqanchejta, Jehová Diospa enemigosnin Satanaswan demoniosninwantaj layqeriosnejta runasta engañasqanta.
Yuyarikunapaj
-
¿Kʼacha ángeles yanapawanchejchu Diosmanta yachakuyta munaj runasta tarinapaj?
-
¿Imaynatá wakin ángeles sajrasman tukusqanku?
-
¿Imaraykutaj mana allinchu layqerio imasta ruwananchej?
ASTAWAN YACHAKUNAYKIPAJ
¿Imaraykutaj Jesusta Arcángel Miguel nikun? Chayta yachanaykipaj kayta leeriy.
“¿Pitaj Arcángel Miguel?” (Chaytaqa Internetpi jw.org nisqapi tarinki)
¿Diabloqa runaspa sonqonkupi sajra kajllachu? Chayta yachanaykipaj kayta leeriy.
“¿Diablo kanpunichu?” (Chaytaqa Internetpi jw.org nisqapi tarinki)
Uj warmeqa demoniospa atiyninkumanta kacharichikorqa. Paymanta yachanaykipaj kayta leeriy.
¿Imaynatá Satanás layqeriosnejta runasta engañan? Chayta yachanaykipaj kayta leeriy.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
