LECCIÓN 49
Familiaykiwan kusisqa kausakuy (1 kaj)
Recién casarakojkunaqa casarakusqanku diapi jina kusisqa kausakuyta munanku tukuy kausayninkupi. Ajinata kausakuytataj atinkumanpuni. Chaytaj rikukun ashkha watastaña casado cristianospi. Paykunaqa Bibliaj nisqanman jina kausakunankupaj kallpachakunku.
1. ¿Ima kamachiytaj qosaspaj Bibliapi tiyan?
Jehovaqa qosata churan familiamanta uma kananpaj (Efesios 5:23 leey). Payqa suyan familianpaj allinninta maskʼaspa imatapis ajllananta. Bibliaqa qosasman nillantaj: “Warmiykichejta munakullaychejpuni”, nispa (Efesios 5:25). Warminta munakoj qosaqa mana waj runaspa ñaupaqenpi kʼumuykachachinchu, nitaj sapallanku kashajtinkupis. Astawanpis payta cuidan, imatachus necesitasqanta qon, kusichin ima (1 Timoteo 5:8). Chantapis warminta yanapan Jehovaj qayllanpi kananpaj (Mateo 4:4). Chaypajtaj warminwan khuska Bibliata leen, orakun ima. Ajinata munakuywan warminta yanapaj qosaqa Jehovaj qayllallanpipuni kanqa (1 Pedro 3:7 leey).
2. ¿Ima kamachiytaj Bibliapi tiyan casada warmispaj?
Biblia nin: “Warmitajrí qosanta sonqomantapacha respetanan tiyan”, nispa (Efesios 5:33). Chaytataj ruwanman qosan allin imasta ruwasqanpi, paytawan wawasnintawan cuidananpaj kallpachakusqanpi piensarispa. Qosanta respetasqanta rikuchillantaj imatachus ajllasqanpi yanapaspa, kʼacha simiwan paywan parlaspa, qosanmanta allintapuni parlaspa ima, qosan mana Jehovata yupaychajtinpis.
3. ¿Imatataj casados ruwananku tiyan aswan ujchasqas kanankupaj?
Biblia nin: “Iskayninkutaj ujllaña kanqanku”, nispa (Mateo 19:5). Chaywan nishan casadosqa mana saqenankuchu kasqanta ni ima paykunata tʼaqanachinanta. Casadosqa khuska kanankupaj tiempochakunanku tiyan. Imaynachus kashasqankumanta, imatachus yuyasqankumantapis sutʼita, munakuywantaj parlarinanku tiyan, nitaj saqenankuchu tiyan ni pi, ni ima paykunata karunchachinanta. Sapa uj qhawarikunanku tiyan mana wajwan anchata masichakunankupaj, manaqa Diosllawan sumaj amigos kayta atinku.
ASTAWAN YACHAKUNA
Kaypi yachakusun Bibliaj mayqen yuyaychaykunasninchus casadosta aswan ujchasqa kanankupaj yanapayta atisqanta.
4. Qosas, warmiykichejta munakuychej, cuidaychejtaj
Biblia nin: “Qosaspis warminkuta munakunanku tiyan, cuerponkuta jina”, nispa (Efesios 5:28, 29). Chay nisqan ima niytachus munasqanta yachanapaj VIDEOTA qhawariychej, chantá yachakojta tapuriy.
-
¿Imastataj qosas ruwananku kasqa warminkuta munakusqankurayku, cuidayta munasqankurayku ima?
Colosenses 3:12 leeriychej, chantá yachakojta tapuriy:
-
Kay versiculopi leesqanchejman jina, ¿imaynataj uj qosa kanan kasqa?
5. Warmis, qosaykichejta munakuychej, respetaychejtaj
Bibliaqa warmisman yuyaychan qosankuta respetanankuta, qosanku Jehovata sirvejtinpis chayri manapis. 1 Pedro 3:1, 2 leeriychej, chantá yachakojta tapuriy:
-
Sichus qosayki mana Jehovata yupaychanchu chayqa, maytachá munashanki qanwan khuska Jehovata yupaychananta. ¿Imaynatá qosaykita yanapawaj, sapa kuti Bibliamanta payman parlaspachu chayri Bibliamanta yachakusqaykiman jina kausakuspachu? ¿Imaraykutaj chayta ninki?
Casadosqa iskayninkumanta imatapis sumajta ajllayta atinku. Jinapis warmeqa mana tukuy imapipunichu qosanwan uj yuyaylla kanqa. Chay kutispi warmeqa imatachus yuyasqanta kʼachallamanta, respetowantaj qosanman willarinan tiyan. Chantapis mana qonqananchu tiyan Jehová qosata churasqanta familianpaj imachus allin kasqanta ajllananpaj. Imatapis qosa ajllajtin warmeqa yanaparinan tiyan ajllasqanman jina ruwakunanpaj. Ajinamanta familiapi kusisqa kausakunankupaj yanapakonqa. 1 Pedro 3:3-5 leeriychej, chantá yachakojta tapuriy:
-
¿Imaynatá Jehová qhawan warmis qosankuta respetasqankuta?
6. Casadosqa ima problematapis allinchayta atinku
Qosapis warmipis pantanqapuni. Chayrayku iskayninkumanta ima problematapis allinchanankoqa may sumaj. VIDEOTA qhawariychej, chantá yachakojta tapuriy.
-
Videopi rikorqanchej chay qhariwarmi, ¿imaynataj kasharqanku?
-
Karunchanakusqankuta reparaspa, ¿imastataj ruwarqanku?
1 Corintios 10:24; Colosenses 3:13 leeriychej, chantá yachakojta tapuriy:
-
¿Kay versículos casadosta yanapanmanchu?
Bibliaqa niwanchej purajmanta respetanakunanchej kasqanta. Chaywan nishawanchej wajkunawan kʼachamanta, respetowantaj parlarina kasqanta. Romanos 12:10 leeriychej, chantá yachakojta tapuriy:
-
¿Uj familiapi pitaj wajkunata respetaypi ñaupajpi kanan tiyan qosachu chayri warmichu? ¿Imajtintaj chayta ninki?
WAKIN RUNAS NINKU: “Qhariwarmi kausayniykupi manaña ñaupajta jinachu kausakuyku”, nispa.
-
Ajinata nisojtinku, ¿imaynatá sutʼinchariwaj Biblia paykunata yanapariyta atisqanta?
¿IMASTÁ YACHAKUNCHEJ?
Kaypi yachakunchej qhariwarmis kusisqa kausakuyta atisqankuta, purajmanta munanakojtinku, respetanakojtinku, Bibliaj nisqanman jinataj kausakojtinku.
Yuyarikunapaj
-
Familiapi kusisqa kausakunapaj, ¿imatá qosa ruwanan tiyan?
-
Familiapi kusisqa kausakunapaj, ¿imatá warmi ruwanan tiyan?
-
Casado kanki chay, ¿Bibliamanta ima versiculotaj yanapasunkiman qhariwarmi kausaypi ujchasqa kanaykichejpaj?
ASTAWAN YACHAKUNAYKIPAJ
¿Ima yuyaychaykunataj familiaykipi kusisqa kausakunaykipaj yanapasunkiman? Chayta yachanaykipaj kay folletota leeriy.
Qhariwarmis Bibliaj nisqanta kasukuspa ashkha bendicionesta japʼisqankuta yachanaykipaj, kay takiykunasniyoj videota qhawariy.
¿Ima niyta munan qosata umata jina qhaway, respetay ima? Chayta yachanaykipaj kayta leeriy.
¿Imataj uj qhariwarmita yanaparqa problemasninkuta atipanankupaj, watejmantataj casarakunankupaj?
Diosqa casado kausayniykuta allinchanaykupaj yanapawayku (5:14)
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
