BIBLIAQA, maykʼaqchus Jesús paqarikusqanta mana willanchu. Nitaq diciembre killapi paqarikusqanta yachachinchu.

Yachanchikjina Jesús Belén llaqtapi paqarikurqa. Chay llaqtapi, diciembre killapi, ¿imaynataq tiemporí? Judiospa calendarionkupi kislev killa tiyan, kay killataq noviembre, diciembre killaspi urman, chay killaspi manchayta chirin, paran ima. Chaymanta tebet killa jamun, chay killataq diciembre, enero killaspi urman, chay killapi tukuy killasmanta nisqaqa astawan chirin, urquspitaq wakin kuti ritʼi urman. Imaynachus chay llaqtaspi tiempo kasqanmanta Bibliap nisqanta qhawarina.

Bibliata juknin qillqaq, Esdras, kislev killapi manchayta chirisqanta, parasqanta ima niwanchik. Payqa “jisqʼon killamanta [kislev killamanta], iskay chunka pʼunchaynimpi” may chhika runas tantakusqankuta niwanchik, paykunataq “tiyakorqanku kharkatitispa, [...] manchayta paramusqa[nmanta]”. Chantapis Esdras, chay runas nisqankuta, jinata qillqarqa: “May chhika kayku, manchaytataj paramushan; chayrayku mana callepi qhepakuykumanchu”, nispa (Esdras 10:9, 13; Jeremías 36:22).  Chayrayku diciembre killa qayllamuchkaptin, chay llaqtaspi ovejata michiqkunaqa, ovejasninkuta kanchasninkuman qhatikapuq kanku, mana jawapi puñunankupaq.

Mana chaymanjinataq Bibliaqa, Jesús paqarikuchkaptin, michiqkuna campopi ovejasninkuta michichkasqankuta yachachin. Astawanpis, Lucas, juk Evangeliota qillqaq, nisqanmanjina, Belén qayllanpi “michejkuna kasharqanku ovejasninkuta tutantin qhawaspa” (Lucas 2:8-12). Michiqkuna mana campopi pʼunchaykunallapichu kachkarqanku, manaqa, chaypi tiyakurqanku. “Ovejasninkuta tutantin qhawaspa” qhipakuq kanku. Belén llaqtapi diciembre killapi chayjinata chiriptin, paraptin ima, ¿michiqkuna ovejasninkuwan campopi qhipakunkumanchu karqa? Mana, ¿icharí? Chayrayku, Biblia nisqanmanjina Jesusqa, mana diciembre killapichu paqarikurqa. *

Biblia willawanchik maykʼaqchus Jesús wañupusqanta, chaywanpis maykʼaqchus paqarikusqanmanta mana imatapis ninchu. Chaytaq Salomón parlasqanta yuyarichiwanchik, paytaq nirqa: “Sumaj runapaj rejsisqa kayqa aswan allin, sumaj qʼapashaj jawinasmanta nisqaqa. Wañupuna pʼunchayqa astawan allin nacekuna pʼunchaymanta nisqaqa”, nispa (Eclesiastés 7:1). Chayrayku Bibliaqa Jesuspa ruwayninmanta, wañuyninmanta ima tukuy imata willawanchik, manataq maykʼaqchus paqarikusqanmanta anchata ninchu.