¿IMA willaykunatataq telepi, radiopi ima uyarinki? ¿Manachu maqanakuymanta, suwakuymanta, wañuchinakuymanta ima uyarikun? Chantapis llakiykunasniykipi tʼukuriy. Ichapis, amigoyki chayri familiaykimanta pillapis unquykun chayri wañupun, chaytaq llakichichkasunki. Ichapis Jobjina llakiywan jinata ninki: “Ima pʼunchaypis llakiyllaña noqapajqa”, nispa (Job 30:16).

Chayrayku ichapis tapukunki:

• ¿Kayjinata kawsananchiktachu Dios munarqa?

• ¿Maypitaq llakiyniyta atipanaypaq yanapata tariymanrí?

• ¿Maykʼaqllapis maqanakuykuna Jallpʼamanta chinkanmanchu?

Biblialla kay tapuykunaman kutichiwanchik.

“Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis.” (Apocalipsis 21:4)

“Cojosqa tarukas jina phinkiykachanqanku.” (Isaías 35:6)

“Ciegospis rikuyta atenqanku.” (Isaías 35:5)

 “Tukuy pʼampasqa kajkunaqa [...] jatarimonqanku.” (Juan 5:28, 29)

“Mana pipis nenqachu: Onqosqa kani, nispaqa.” (Isaías 33:24)

“Nacionnimpeqa ashkha trigo [chayri mikhuna] ka[nqa].” (Salmo 72:16)

Tawa, phichqa kaq paginapi imachus rikukusqanqa mana juk cuentollachu, imaraykuchus Diosllataq ajina kananta nirqa, Bibliataq imaynatachus juntʼakunanta willawanchik.

Astawanpis llakiypi kaspa imaynatachus kusisqa kawsakunata yachachillawanchiktaq. Chʼampayniykipi, llakiyniykipi ima tʼukuriy, ichapis qullqimanta, familiaykimanta pillapis unqusqa kasqanmanta chayri wañupusqanmanta phutisqa kachkanki. Bibliaqa, chay tukuy llakiykunata atipanapaq yanapawanchik, chantapis kay tapuykunaman kutichispa sunquchawanchik:

• ¿Imaptintaq ñakʼarinchik?

• ¿Imaynatataq llakiyninchikta atipasunman?

• ¿Imatataq familianchik kusisqa kawsakunanpaq ruwasunman?

• ¿Maymantaq wañuspa ripunchik?

• ¿Wañusqa familiaresninchikwan watiqmanta tinkukapusunmanchu?

• ¿Imaptintaq Diospa nisqan juntʼakunanta suyasunman?

 Kay librota ñawirisqaykiqa, Bibliamanta yachakuyta munasqaykita rikuchin, kay librotaq Bibliamanta yachakunaykipaq yanapasunqa. Sapa paginap ura kantunpi tapuykunata tarinki, parrafopi ñawirisqaykimanjina kutichinaykipaq. Achkha runastaq, Jehovamanta sutʼinchaqkuna ajinamanta Bibliamanta yachachisqankuta allinpaq qhawanku, qampis allinpaq qhawanaykita suyayku.Imatapunichus Biblia yachachisqanta yachanaykipaq Dios yanapasunanta munayku.