YAPA
¿Pitaq arcángel Miguelrí?
BIBLIAQA, wakin pʼitikunapi, juk angelmanta Miguel sutiyuqmanta parlawanchik. Chay pʼitikuna nisqanmanjina Miguelqa mana jinallachu kakuchkan. Daniel qillqasqanpiqa, Miguel saqra angeleswan maqanakusqanmanta; Judas cartapiqa, Kuraq Supaywan churanakusqanmanta; chantapis Apocalipsis libropi Kuraq Supaywan, supaykunawan ima maqanakusqanmanta ñawirinchik. Arí, Miguelqa, tukuy tiempopi Jehovap kamachiyninta jarkʼachkan, Diospa enemigosninwantaq maqanakuchkan. Jinamanta sutin nisqanmanjina ruwan. ¿Imataq Miguel suti ninayan? Miguel sutiqa, “¿Pitaq Diosjinarí?”, niyta munan. Chantá, ¿pitaq Miguelrí?
Manaraq paymanta parlaspa, yuyarina wakin runas iskay sutisniyuq kasqankuta. Jacob, jatun familiap tatan karqa, paytaqa Israel sutiwan riqsillaqtaq kanku; jinallataq apóstol Pedrotapis, Simón sutiwan riqsillaqtaq kanku (Génesis 32:28; Mateo 10:2-4). Kikillantaq Biblia rikuchiwanchik, Miguel janaqpachapi Jesuspa wak sutin kasqanta manaraq Jallpʼaman jamuchkaptin, chantá janaqpachaman kutipuptin. Qhawarina imaynatachus Biblia chayta yachachisqanta.
Arcángel. Bibliaqa, Miguel juk “arcángel” kasqanta nin (Judas 9). Kay rimayqa, “kuraq ángel”, “astawan patapi kaq ángel”, ima ninayan. Bibliaqa, juk arcangellla kasqanta nin. Chantapis Biblia nisqanmanjina Jesús arcangeljina ruwananta ruwan. Ñawpaq kaq Tesalonicenses 4:16, Jesucristop ruwananmanta jinata niwanchik: “Señorpuni janaj pachamanta uraykʼamonqa. Chaypacha uyarikonqa uj jatun qhapariy arcangelpa voznin”, nispa. Kay pʼitiqa Jesús arcangelpa vozninwan parlasqanta nin. Jinamanta Jesús arcángel Miguel kasqanta yachanchik.
Kamachiq. Biblia jinata niwanchik: “Arcángel Miguelqa, angelesnin ima sierpewan maqanakorqanku”, nispa (Apocalipsis 12:7). Kay pʼitipi, Miguel chiqa sunqu angelesta kamachisqanta rikunchik. Jinallataq Apocalipsis libroqa, Jesús chiqa sunqu angelesta kamachichkasqanta rikuchiwanchik (Apocalipsis 19:14-16). Apóstol Pablo sutʼita nirqa: “Señor Jesús atiyniyoj angelesninwan jamojtin”, nispa (2 Tesalonicenses 1:7). Jinamanta Bibliaqa, ‘Miguel angelesninwan’ kasqanta nin, chantá Jesús “angelesninwan” kasqanta nillantaq (Mateo 13:41, 42; 16:27; 24:31; 1 Pedro 3:22). Bibliaqa mana maypi iskay kasqankuta ninchu, manaqa juklla kasqankuta nin. Arí Miguelqa, Jesucristollataq, payqa janaqpachapi Diospa munayninta ruwachkan. *
^ párr. 1 Miguel Diospa Churin kasqanmanta astawan yachakunaykipaq Perspicacia para comprender las Escrituras nisqapi, 2 kaq libropi 386, 387 paginasta ñawiriy. Kaytataq Jehovamanta sutʼinchaqkuna urqhunku.
