YAPA
Profeta Danielqa, Mesías chayamunanta willarqa
PROFETA Danielqa, Jesús nacekusqanmanta phichqa pachak wata ñawpaqta kawsarqa. Chaypachataq Jehovaqa, Danielman maykʼaqchus Mesías chayri Cristo chayamunanta willarqa, nirqataq: “Kayta yachay, umanchaytaq: Jerusalén llaqta watiqmanta ruwakunanpaq kamachisqa kanqa, chay ratomantapacha, Kamachiq Mesías chayamunankamaqa qanchis semana kanqa, suqta chunka iskayniyuq semana ima” (Daniel 9:25, NM).
Qhawarina imaynatachus kay profeciaqa, Mesías jamunanmanta willasqanta. Qallarinapaqqa, Mesías chayamunanpaq ima watamantapachachus yupananchik kasqanta yachananchik tiyan. Profeciaqa, “Jerusalén llaqta watiqmanta ruwakunanpaq kamachisqa ka[ptin], chay ratomantapacha” yupananchik kasqanta niwanchik. ¿Maykʼaqtaq chay karqa? Nehemiasqa “iskay chunka watastaña rey Artajerjes kamachishajtin”, Jerusalén watiqmanta ruwakunanpaq kamachikusqanta niwanchik (Nehemías 2:1, 4-8). Unaymanta yachaqkunaqa, 475 qayna pacha (q.p.) watapi, Artajerjes kamachiyta qallarisqanta ninku. Kaymanta iskay chunka watasta yupaspa, 455 q.p. wataman chayanchik. Chay watamantapacha (455 q.p.) profeta Daniel parlasqanqa, juntʼakuyta qallarirqa.
Chantá Danielqa, machkha unaymantachus Mesías chayamunanta willarqa. Profecianpi jinata nirqa: “Qanchis semana kanqa, suqta chunka iskayniyuq semana ima”, nispa. Tukuyninpi 69 semanas ruwakun. ¿Machkha tiempotaq chay karqa? Wak Biblias nisqanmanjina, chay semanasqa, mana pʼunchaykunamantachu karqa, manaqa, watasmanta. Jinamanta nisunman, chay semanasqa, mana qanchis pʼunchayniyuqchu, manaqa qanchis watasniyuq kasqanta. Ñawpa judiosqa, jinatapuni qanchismanta qanchis, watasta yupaq kanku. Llamkʼayninkupiqa, qanchis kaq watapi jallpʼasninkuta samachiq kanku (Éxodo 23:10, 11). Chayrayku juk semana 7 watayuq kaptin, 69 semanapiqa, 483 watas ruwakun.
Chayta yachaspaqa, 455 q.p. watamantapacha 483 watasta yupananchik tiyan. Kayta yupaspaqa, 29 kunan pacha (k.p.) wataman chayanchik, chay watapitaq Jesús bautizakurqa, jinamanta Mesiasjina akllasqa karqa (Lucas 3:1, 2, 21, 22). * ¿Manachu kay profecía allinta juntʼakusqanta niwaq?
^ párr. 2 Chay 455 q.p. watamanta 1 q.p. watakama, 454 watas ruwakun. Chantá, 1 q.p. watamanta 1 k.p. watakama, juk wata ruwakun. Chantapis, 1 k.p. watamanta 29 k.p. watakama, 28 watas ruwakun. Kimsantinpi ruwakusqanta yupanchik chayqa (454+1+28), 483 watas ruwakun. Jesustataq, 33 k.p. watapi, qanchis chunka semanapi ‘wañuchirqanku’ (Daniel 9:24, 26). Astawan yachanapaq, Prestemos atención a las profecías de Daniel, nisqa librota 11 yachaqanata ñawiriy, chantapis Perspicacia para comprender las Escrituras nisqata, 2 kaq librota, 1014-1017 paginata ima ñawirillaytaq. Kaykunatataq Jehovamanta sutʼinchaqkuna urqhunku.
