“Uj runanejta jucha kay mundoman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa” (ROMANOS 5:12).

Diosqa Adanta, Evatawan sumaj yuyayniyojta ruwarqa wiñaypaj kausayta atinankupaj ima. Paykunata, kʼachitu lugarpi Edén sutiyoj huertapi tiyakunankupaj churarqa. Diosqa nerqa chay huertapi tukuy sachʼaspa poqoyninta mikhunankuta. Jinapis uj sachʼaj poqoynillanta mana mikhunankuta. Adanwan Evawantajrí chay mana mikhunanku sachʼaj poqoyninta mikhuykorqanku, ajinamantataj juchallikorqanku (Génesis 2:15-17; 3:1-19). Mana kasukusqankuraykutaj Diosqa Adanta Evatawan chay huertamanta wijchʼumorqa. Chaymantapacha paykunaj kausayninkoqa may llakiy karqa. Tiemponmantaj wawasniyoj karqanku, paykunapis machuyarqanku, wañorqankutaj (Génesis 3:23; 5:5). Noqanchejpis Adanpata Evajpata wawasnin kasqanchejrayku onqonchej, machuyanchej, wañunchej ima.

‘Mundontinmanta runas Kuraj Supaypa makinpi kanku’ (1 JUAN 5:19).

“Kuraj Supayqa” Satanás. Payqa uj ángel, Diospa contranpitaj churanakorqa (Juan 8:44; Apocalipsis 12:9). Tiemponmanqa waj angelespis Satanasman ujchaykukorqanku, paykunapis supaykunaman tukorqanku. Chay sajra supaykunaqa atiyninkuwan  runasta engañanku, Diosmantataj karunchanku. Chantapis ashkha runasta mana allin imasta ruwanankupaj tanqanku (Salmo 106:35-38; 1 Timoteo 4:1). Satanaswan supaykunawanqa sufrichiwasqanchejmanta mayta kusikunku.

“Imatachá uj runa tarpun, chayllatataj oqharenqa” (GÁLATAS 6:7).

Wakin kutisqa sufrinchej juchasapas kasqanchejrayku, kay mundo Satanaspa makinpi kasqanrayku ima. Chantapis sufrillanchejtaj imatapis mana allinta ruwasqanchejrayku. Allin imasta ruwajtinchejqa allin riwanchej, chaywanpis sajra imasta ruwajtinchej, chayri imatapis mana allinta ajllajtinchej mana allinchu riwanchej. Uj tata allin kajta ruwajtin, sumajta trabajajtin, familianta munakojtin ima, familianpi kusisqa kausakunku. Chaywanpis sichus chay tata qolqerayku pujllanman, anchata machanman nitaj trabajayta munanmanchu chayqa familianqa llakiyta kausakunman. Chayrayku Diospa nisqanman jina kausakoyqa may sumajpuni, imajtinchus payqa munan allin rinawanchejta, ‘sonqo tiyaykusqallapunitaj kananchejta’ (Salmo 119:165).

‘Qhepa pʼunchaykunapeqa, runasqa kay jina kanqanku: paykunallata munakojkuna, qolqeta munakojkuna, tatasninkuta mana kasojkuna, munayninkuwan atipachikojkuna, manchay phiñas, allin kajta mana munakojkuna’ (2 TIMOTEO 3:1-5).

Kay tiempomanta runasqa kay textopi nikusqanman jinapuni kausashanku. Chaytaj rikuchiwanchej qhepa pʼunchaykunapiña kausakushasqanchejta. Bibliaqa nillarqataj kay tiempopi kananta guerras, yarqhaykuna, jallpʼa ikhakuykuna, onqoykuna ima (Mateo 24:3, 7, 8; Lucas 21:10, 11). Ashkha runasqa chay imas kasqanrayku sufrinku, wañunku ima.