Munayninwan mana atipachikoj runaqa:

• imatachus munashasqan juntʼakunanta pacienciawan suyakun

• sonqonta ñitʼiykukun

• ruwanasninta juntʼan mana gustajtinpis

• wajkunaj allinninta maskʼan

Munayninkuwan mana atipachikoj wawasqa, imata munaspapis mana munasqankuman jinapunichu ruwanku. Munayninkuwan atipachikoj wawastaj:

• phiñakunkuman

• llakiywan onqoykunkuman

• cigarrota pitayman, drogakuyman, machaymantaj qokunkuman

• mana allin imasta mikhunkuman chayri ni imata mikhunkumanchu

Uj universidadpi nikusqanman jina, munayninkuwan mana atipachikoj wawasqa wiñaspa mana anchata onqonkuchu, qolqenkuta sumajta apaykachanku, leyestapis kasukunku. Chayrayku Pensilvania Universidadmanta profesora Angela Duckworth jinata nerqa: “Munayninwan mana atipachikoj runaqa allinta ruwan”, nispa.

Mana nispaqa ama arí niychu

BIBLIA NIWANCHEJ: “‘Arí’ nisqaykichejqa, arí kachun, ‘mana’ nisqaykichejpis, mana kachun”, nispa (Mateo 5:37).

Wakin kuti wawasqa tatasninkuwan kasuchikuyta munaspa qʼellikunku, astawanraj runaj ñaupaqenpeqa. Uj tata mana nishaspa wawanta kasun chayqa, wawanqa kasunallantaña munanqa.

Chantapis uj tata “mana” nin chayqa, wawanqa reparanqa mana munasqanman jinapunichu imapis ruwakusqanta. Chaymanta parlaspa David Walsh sutiyoj doctor jinata nin: “Mana munasqankuman jinapunichu imapis ruwakusqanta reparajkunaqa, aswan kusisqasman rijchʼakunku. Chayrayku ama saqenachu wawas tukuy ima munasqankuta ruwajta”, nispa. *

 Tatasqa wawasninkuman mana nispa, yachachishanku jatunyajtinku mana drogasta japʼikunankupaj, mana khuchichakuy juchapi urmanankupaj, nitaj sajra imasta ruwanankupaj.

Wawasta yachachina allin kajta ruwayta

BIBLIA NIWANCHEJ: “Imatachá uj runa tarpun, chayllatataj oqharenqa”, nispa (Gálatas 6:7).

Wawasqa yachananku tiyan imatapis mana allinta ruwajtinku mana allin rinanta. Wawas imallamantapis phiñakunku chayqa, amigosnin karunchakonqanku. Mana usqhayllata phiñakuspa wajkunata kʼachamanta uyarej wawastaj, amigosniyoj kanqanku. Tatas wawasninkuta mana munayninkuwan atipachikunankupaj yanapajtinkoqa, wawasta allin renqa.

Yachachina imaschus aswan allin kasqanta reparanankupaj

BIBLIA NIWANCHEJ: ‘Imaschus aswan allin imas kasqanta reparaychej’, nispa (Filipenses 1:10).

Munayninwan mana atipachikoj runaqa, ruwanasnin mana gustajtinpis juntʼananpaj kallpachakun, nitaj sajra imasta ruwanchu. Wawaspis reparananku tiyan imastarajchus ñaupajta ruwananku kasqanta. Por ejemplo, pujllanankumantaqa escuelamanta tareasninkutaraj ruwananku tiyan.

Tatasqa ruwasqankuwan yachachinanku tiyan

BIBLIA NIWANCHEJ: “Chayta ruwani qankuna yachakunaykichejpaj, imaynatachus noqa ruwani ajinallatataj qankunapis ruwanaykichejpaj”, nispa (Juan 13:15).

Wawasqa tatasninkuta sumajta qhawashanku imatachus ruwasqankuta, imaschus phiñachisqantataj. Tatasqa ruwasqankuwan yachachinkuman mana munayninkuwan atipachikuy allinpuni kasqanta. Tatas: wawasniykichej rabiachisojtiykichej, ¿phiñakunkichejpachachu chayri pacienciakunkichejchu?