¿Celular imatapis yachakunapaj yanapawanchejchu?
Runasqa escuelapi, trabajopi chayri maypi kashaspapis yachakushanchejpuni. Celulartaj chaypaj mayta yanapawasunman. Kay tiempopi ni jaykʼaj jina Internet tukuynejpi kasqanrayku, wasimantapacha ashkha imasta yachayta atinchej.
Chaywanpis celular tʼojpirisqalla kajkunaqa kay llakiykunapi rikukunkuman:
-
Leeshaspa waj imaspi yuyashankuman.
-
Ujllapi ashkha imasta ruwashankuman.
-
Mana celularwan kajtinku aburrikunkuman.
KAYTA YACHANA
LEESHASPA
Wakin runasqa imatapis leeshaspa pata patallanta leenku, nitaj sumajtachu.
Pata patallanta leeyqa uj tapuypa kutichiyninta tarinapaj may sumaj. Jinapis imallatapis sumajta yachakuna kajtenqa mana yanapawanchejchu.
KAYPI PIENSARIY: ¿Ashkha paginasta leeyta atillankichu? ¿Imaraykú creenki leenaykipaj kallpachakusqayki, yachakunaykipaj yanapasusqanta? (PROVERBIOS 18:15).
UJ IMALLAPI YUYANA
Wakin runasqa celularwan ujllapi ashkha imasta ruwanankuta creenku. Ichapis estudiashaspa amigosninkuman mensajesta apachishankuman. Jinapis iskay imasta ujllapi ruwajtinkoqa, ni mayqenta allinta ruwanqankuchu.
Uj imallapi yuyanapajqa mayta kallpachakuna tiyan. Chayta ruwaytaj mana qhasipajchu. Uj jovencita Grace sutiyoj jinata nin: “Uj imallata ruwaspaqa pisillata pantanchej, nitaj anchata llakikunchejchu. Repararqanitaj uj imallata ruway may allin kasqanta, ashkha imasta ujllapi ruwanamanta nisqaqa”, nispa.
KAYPI PIENSARIY: Ujllapi ashkha imasta ruwaspa, ¿estudiasqaykita entiendeyta chanta yuyarikuyta atillankichu? (PROVERBIOS 17:24).
SAPAYAKOJTINCHEJ
Ashkha runasqa ni imata ruwaspaqa mana kayta atinkuchu, sapayakunkutaj. Chayrayku celular tʼojpirisqalla kanku. Olivia sutiyoj señora jinata nin: “Celularta, tabletata chayri teleta qhawarisqallapuni kashani. Mana chaykunawanqa ni uj ratollapis kanichu, aburrikunipachataj”, nispa.
Chaywanpis leesqanchejpi sumajta tʼukurinapajqa sapanchej kayta necesitanchej. Chaytaj yanapawasun sumajta yachakunapaj.
KAYPI PIENSARIY: ¿Sapallayki kashaspa tʼukurinaykipaj kallpachakunkichu? (1 TIMOTEO 4:15).
¿IMATÁ RUWASUNMAN?
IMAYNATACHUS CELULARTA APAYKACHASHASQAYKIPI PIENSARIY
¿Imaynatá celular yanapasunkiman imatapis sumajta yachakunaykipaj? Chanta, ¿imaynatá celular pantachisunkiman imatapis yachakushajtiyki?
BIBLIA NIWANCHEJ: “Leytawan, yuyaychaytawanqa sumajta waqaychay” (PROVERBIOS 3:21).
