Familiawan amigoswan allinta kausakunapaj
Wakin runasqa mana allintachu kausakunku familiasninkuwan, amigosninkuwanpis. Kunantaj yachakusun Bibliaj yuyaychaykunasnin yanapawasqanchejta wajkunawan allinta kausakunapaj.
WAJKUNAJ ALLINNINTA MASKʼANA
BIBLIAJ YUYAYCHASQAN: “Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej” (Filipenses 2:4).
¿IMA NIYTA MUNAN? Wajkunawan allinta kausakunapajqa paykunata yanapana, nitaj yanapanallawanchejtachu suyakuna. Payllapi yuyaj runaqa tukuywan phiñanakunman. Casadosmanta parlaspa, payllapi yuyaj qosa chayri warmeqa ichapis warminta chayri qosanta wasanchayta qallarinman. Kapusqanmanta chayri imastachus yachasqanmanta jatunchakoj runapis, mana amigosniyoj qhepakun. Uj libro nisqanman jinataj payllapi yuyaj runaqa llakiyllapi rikukun.
YUYAYCHAYKUNA
-
Wajkunata yanapana. Uj sumaj amigoqa atienekunapaj jina, yanapawanchejtaj. Wakin runas nisqankuman jina wajkunata yanaparej runasqa, mana depresión nisqa onqoywan onqollankuchu, nitaj pisipaj qhawakunkuchu.
-
Wajkunata khuyakuna. Khuyakuyniyoj runaqa wajkunaj nanayninta, llakiyninta ima entienden. Chayrayku wajkunata khuyakusun chayqa, ni jaykʼaj wajkunata pʼenqachinapaj jina, nitaj sonqota nanachinapaj jina parlasunchu.
Wajkunata khuyakuspaqa mana usqhayta phiñarparikusunchu, nitaj pitapis pisipaj qhawasunchu, amigosninchejpis tukuy lugaresmanta kanqanku.
-
Wajkunawan parlarinapaj tiempochakuna. Wajkunawan parlarispaqa, paykunata astawan rejsinchej. Sumaj amigosniyoj kanapajqa, sumajta paykunawan parlarina. Chayrayku amigosninchejta sumajta uyarina problemasninkuta willarishawajtinchej. Yachakusqanman jina sumajta parlarikoj runasqa aswan kusisqa kanku.
AMIGOSNINCHEJTA SUMAJTA AJLLANA
BIBLIAJ YUYAYCHASQAN: “Mana allinta purejkunawan tantakojqa, kʼacha ususninta chinkachin” (1 Corintios 15:33).
¿IMA NIYTA MUNAN? Runasqa piwanchus masichakusqanchejman jina imatapis ruwanchej. Yachayniyoj runaspis ajinapuni kasqanta ninku. Chantapis cigarrota pitaj runaswan chayri qosanmanta chayri warminmanta divorciakushaj runaswan masichakojqa, paykuna jinallataj ruwan.
YUYAYCHAYKUNA. Kʼacha runa kanaykipajqa kʼacha amigosta maskʼakuy. Amigosninchejqa kananku tiyan allin yuyayniyoj, respetoyoj runas, qorikuyta yachajkuna, wasinkuman wajyarikuyta yachajkunataj.
BIBLIA YUYAYCHALLANTAJ
Casadosta, jovenesta, wawasta yanapananpaj Bibliamanta orqhosqa videos tiyan, chaykunatataj qhawariy.
MANA SONQOTA NANACHINAPAJ JINA PARLANACHU
“Imallatapis mana yuyaychakuspalla runaj parlarparisqanqa espada jina tʼojsin” (PROVERBIOS 12:18).
QORIKUYTA YACHANA
“Pichus mana michʼakuspa wajman jaywarejqa tukuy imayojman tukun” (PROVERBIOS 11:25).
IMASTACHUS WAJKUNA RUWAPUNAWANCHEJTA MUNANCHEJ CHAYLLATATAJ RUWAPUNA
“Imastachus munankichej runas qankunapaj ruwanankuta, chayllatataj qankunapis paykunapaj ruwapuychej” (MATEO 7:12).
