Kusisqa kanapaj
Bibliaqa nin phiñakuywan atipachikuy mana allinchu kasqanta.
PHIÑAKUYTA ÑITʼIYKUKUNA
BIBLIAJ YUYAYCHASQAN: “Wapu kanamantaqa aswan allin llampʼu sonqo kana” (Proverbios 16:32).
¿IMA NIYTA MUNAN? Phiñakuyninchejta ñitʼiykukoyqa allinpuni. Wakin kuti phiñakunallanchejta phiñakuspapis, mana controlakuspaqa llakiypi rikukusunman. Phiñakuywan atipachikoj runasqa, mana reparakuspa imatapis parlarpallanku chayri ruwarpallanku chaymantaraj pesachikunku.
YUYAYCHAYKUNA. Ama rabiawan atipachikuychu. Rabiawan atipachikoj runasqa piensanku wapus kasqankuta, chaytaj mana jinachu. Biblia nin: “Imaynachus uj mana perqayoj llajta, pillapis yaykunampaj jinalla, ajinallataj pichus phiñakuyninta mana ñitʼiykukojqa”, nispa (Proverbios 25:28). Mana phiñakuywan atipachikunapajqa imatapis allinta yachananchej tiyan. “Runaj yuyayniyoj kaynenqa phiñakuyninta thasnun” (Proverbios 19:11). Phiñachisuyta munajkunata allinta uyarinki chayqa, sumaj yuyayniyoj kanki, nitaj rabiawan atipachikunkichu.
AGRADECEKUNA
BIBLIAJ YUYAYCHASQAN: “Agradecekuychejpuni” (Colosenses 3:15).
¿IMA NIYTA MUNAN? Agradecekuyta yachaj runaslla kusisqa kanku. Jatun llakiykunapi mana imayoj qhepakojkunapis reparanku agradecekuspaqa kusisqa kasqankuta. Chantapis kapusqankuwan kusisqa kausakuspaqa mana anchata piensankuchu imastachus pierdesqankupi.
YUYAYCHAYKUNA. Sapa día imasmantachus agradecesqa kashasqanchejmanta anotakusunman. Ichá agradecekusunman cielota pukayarishajta rikusqanchejmanta, familianchejwan kusisqa parlarikusqanchejmanta chayri uj diatawan kausasqanchejmanta. Kay yuyaychaykunaman jina kausakuspaqa, kusisqa kausakusun.
Mayta yanapawasunman familianchejman, amigosninchejman ima agradecekuy. Piensariy imata ruwasqankutachus allinpaj qhawasqaykipi, chaytataj paykunamanpuni niwaj chayri uj cartanejta, correonejta chayri uj mensajenejta. Ajinamanta aswan ujchasqa paykunawan kausakunki, reparankitaj aswan kusiy kasqanta wajkunapaj allin imasta ruwapuy (Hechos 20:35).
BIBLIA YUYAYCHALLANTAJ
Bibliata grabasqata uyarinaykipaj Internetmanta jw.org nisqamanta uraqachikuwaj ima parlayllapipis, 40 parlaykunapi jinaña tiyan.
AMA PHIÑANAKUNACHU
“Pichus phiñanakuyta qallarejqa qochapis phataykushanman jina; chayrayku chay phiñakuytaqa saqey manaraj jatunyaykushajtin” (PROVERBIOS 17:14).
AMA QHASITA LLAKIKUNACHU ASWAN QHEPAMANTA
“Ama phutikuychejchu imachus qʼaya kananmanta, imaraykuchus qʼaya pʼunchaypa llakiynenqa kallanqa. Sapa pʼunchaypa llakiynenqa kallan” (MATEO 6:34).
IMATA RUWANAPAJPIS ALLINTARAJ PIENSARINA
“Tanteyayqa allinta qhawasonqa, sumaj yachayniyoj kaypis waqaychasonqa” (PROVERBIOS 2:11).
Kaykunatapis qhawaykurillawajtaj
¡RIJCHʼARIY!
¿Imatá ruwasunman mana llakiywan atipachikunapaj?
Wakin yuyaychaykunata qhawarina, chaykunataj yanapawasun mana llakiyninchejwan atipachikunapaj.
