¿Imaraykutaj respeto chinkapushan?

RIKUCHIY

¿IMARAYKUTAJ WAJKUNATA RESPETANANCHEJ TIYAN?

Wajkunata respetayqa yanapawanchej phiñakuyninchejta ñitʼiykukunapaj, ima problematapis ama astawan jatunyaykuchinapaj.

Bibliamanta uj proverbio nin: “Kʼachallamanta kuticheyqa rabiata thasnun, sonqota nanachej palabrastaj runata phiñachin”, nispa (Proverbios 15:1). Mana respetowan parlajtinchej, mana piensarispataj imatapis ruwarpajtinchej wajkunawan astawan phiñanakunchej, chaytaj problemasllapi rikhurichiwanchej.
Jesusqa nerqa: “Sonqopi imachus juntʼa kashan, chaymanta simeqa parlan”, nispa (Mateo 12:34). Mana respetowan parlasqanchejpi sutʼita yachakunman imaynachus sonqonchejpi kasqanchej. Ichapis chaypi rikuchishasunman waj laya runasta, waj culturayoj runasta, waj nacionniyoj runasta chejnikusqanchejta.

28 suyuspi 32.000 runasta tapusqankuman jina, paykunamanta khuskan kurajpuni nisqanku kay tiempopi ni jaykʼaj jina manaña respeto kasqanta.

¿IMATÁ RUWAWAJ?

Pitapis respetowanpuni parlapayay, mana qan jinachu yuyajkunatapis. Imaspichus kikinta yuyasqaykichejta reparayta yachakuy. Ajinamanta mana wajkunata juzgankichu, nitaj qhawarankichu.

“Amaña wajkunata juzgaychejchu, ama qankunapis juzgasqa kanaykichejpaj” (Mateo 7:1).

Imatachus munanki runas ruwapusunankuta, chayllatataj paykunapajpis ruwapuy. Sichus wajkunawan kʼacha kanki, allin kajtapunitaj ruwapunki chayqa, paykunapis kikillantataj ruwapusonqanku.

“Imatachus munankichej runas ruwapusunaykichejta, chayllatataj paykunapajpis ruwapuychej” (Lucas 6:31).

Perdonayta yachay. Ama wajkunamanta sajrata yuyaychu. Pipis imata nirpasojtin chayri mana kʼachachu qanwan kajtin, chayta pasachillay.

“Yachayniyoj runaqa mana imitamantapis phiñarparikullanchu. Phiñakunanpaj jina imatapis ruwajtinku payqa pasachillan, chaytaj kʼacha runapaj qhawachin” (Proverbios 19:11).

¿IMATATAJ JEHOVAJ TESTIGOSNIN RUWAYKU?

Jehovaj testigosnenqa maypi tiyakuspapis maypi trabajaspapis, tukuyta respetanaykupaj kallpachakuyku, wajkunamanpis respetayta yachachiyku.

Tukuy laya runasman gratislla Bibliamanta yachachiyku. Mana pitapis obligaykuchu noqayku jina yuyanankupaj chayri noqayku jina creenankupaj. Astawanpis creenciasniykumanta parlarishaspa, Biblia nisqanman jina “llampʼu sonqowan”, ‘sonqomantapacha respetaspataj’ sutʼinchariyku (1 Pedro 3:15; 2 Timoteo 2:24).

Ni pita chejnikuykuchu, nitaj qhawaraykuchu. Pillapis Bibliamanta yachakuyta munaspa tantakuykunasniykuman jamun chayqa, maymanta kajtinpis, imayna kausayniyoj kajtinpis, chunka makiwan japʼikuyku. Mayta kallpachakuyku wajkunata respetanaykupaj, ‘tukuy laya runastataj jatunpaj’ qhawanaykupaj, paykunaj ruwasqanku mana allinchu rijchʼawajtiykupis (1 Pedro 2:17).

Gobiernota respetayku (Romanos 13:1). Leyesta kasukuyku, impuestostapis pagayku. Noqaykoqa mana politicaman chhapukuykuchu, chaywanpis respetayku wajkuna ima partidotapis apoyajtinku.

¡RIJCHʼARIY!