CAMPOPI raqay lugarman risqaykipi tʼukuriy. Chay lugarpi puriykachashaspa, ashkha pʼakisqa yuritusta, lajrasqa pʼuñitusta, waj imastawan rikunki. Jinallapi uj kʼacha yurituta tarinki. Chay yuritoqa mana ni imanasqachu, mosojsitu jinataj kashan. Chayrayku piensarinki: “Kay lugarqa may chhika unayniyojña, ¿imajtin kay yuritu sanitopacha kashanri? Ni parapis, ni ruphaypis imanasqachu, ¿pichus jallchʼarqa i? ¿Imamantapuni ruwasqa kashanri?”, nispa.

Bibliataqa chay mana ni imanasqa yurituwan kikinchasunman, imajtinchus may chhika unayniyojña. Kay tiempopi waj libros unayniyoj kajtinkupis, chay librosqa raqay lugarpi pʼakisqa yuritus jina kanku. Imajtinchus qʼala thantasllaña kashanku. Chay librosmanta wakenqa cienciamanta parlanku. Jinapis cientificosqa, astawan estudiasqankurayku manaña chay librosta valechinkuchu. Wakin unay librospitajrí, onqoykunamanta jampikunapaj yuyaychaykuna tiyan. Jinapis chay yuyaychasqankoqa, runasta manaña yanapanchu. Chay unay librosmanta wakin partesllaña tiyan. Imajtinchus wakenqa chinkaporqa chayri thantakaporqa.

Bibliarí mana chay libros jinachu. Imajtinchus 3500 watas kurajniyojña kajtinpis, ni imanakunchu. Runasqa Bibliata chinkachiyta munaspa, ruphacherqanku, sajrata parlarqanku, Bibliayoj kajkunatataj wañucherqanku. Jinapis Bibliata mana chinkachiyta aterqankuchu. Kay tiempopi runaspa yachayninku yapakojtinpis, mana Bibliata yachaypi atipankuchu. Imajtinchus Bibliaqa may unayña yachacherqa, imastachus runas kunallanraj yachashanku, chay imasta (“Bibliaqa runasta yachaypi atipan”, nisqa recuadrota leeriy).

Ichapis ninki: “Bibliaj yuyaychaykunasnin, ¿kay tiempopi yanapawasunmanrajchu?”, nispa. Chayta yachanaykipaj, ima problemaschus kay mundopi kasqanpi tʼukuriy. ¿Mayqenkunataj astawan llakichisunki? Ichapis guerras, kay jallpʼata chʼichichasqanku, maqanakuykuna chayri suwas miraykusqanku. Bibliaj wakin yuyaychaykunasninta qhawarina. Chay yuyaychaykunata leerishaspa, tʼukuriy imaynachus kausay kananpi, runas chay yuyaychaykunata kasukojtinku.

TUKUYWAN ALLINPI KANA

“Kusisqa kanku runasta allinyachejkunaqa, paykunaqa Diospa wawasnin nisqa kanqanku” (Mateo 5:9). “Tukuy atisqaykichejta ruwaychej, tukuywan allinpi kausakunaykichejpaj” (Romanos 12:18).

KHUYAKUNA, PERDONANATAJ

“Kusisqa kanku khuyakojkunaqa, paykunaqa khuyasqallataj kanqanku” (Mateo 5:7). “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová * Dios qankunata tukuy sonqo perdonasorqachej, ajinallatataj qankunapis perdonanakuychej” (Colosenses 3:13).

TUKUY RUNASTA MUNAKUNA

Diosqa “uj runallamanta tukuy laya runasta miracherqa jallpʼantinpi tiyakunankupaj” (Hechos 17:26). “Reparani, Diosqa tukuy runasta uj rejllata qhawasqanta. Payqa allinpaj qhawan mayqen nacionllamantapis payta manchachikojta, cheqa kajtataj ruwajta” (Hechos 10:34, 35).

JALLPʼATA CUIDANA

“Tata Diosqa runa ruwasqanta Edén huertaman churarqa llankʼanampaj, qhawanampajtaj” (Génesis 2:15). Diosqa ‘Jallpʼata pierdechejkunata tukuchenqa’ (Apocalipsis 11:18).

MUNAPAYAYTA, KHUCHICHAKUYTA IMA CHEJNINA

“Allinta qhawarikuychej, tukuy imata munapayaymantataj jarkʼakuychej. Runaqa ashkha kapuyniyojpis kachun, mana chaychu kausayta qonqa” (Lucas 12:15). “Ama parlallaychejpischu khuchichakuy juchamanta, imaymana millay imasmanta, nitaj munapayaymantapis. Imaraykuchus chaykunaqa mana Diospa kamachisninpaj jinachu” (Efesios 5:3).

ALLINTA KAUSAKUNA, TRABAJANATAJ

“Tukuy imapitaj allintapuni puriyta munayku” (Hebreos 13:18). “Suwakojqa amaña suwakuchunchu. Astawanqa sinchʼita trabajachun” (Efesios 4:28).

NECESITAJKUNATA YANAPARINA

‘Llakisqa kajkunata sonqochaychej, llauchhiyajkunata yanapaychej, tukuypajtaj pacienciayoj kaychej’ (1 Tesalonicenses 5:14). “Wajcha wawasta, viudasta llakiyninkupi” yanapaychej (Santiago 1:27).

Bibliaqa chay yuyaychaykunata qowanchej. Nillawanchejtaj imaynatachus chay yuyaychaykunaman jina ruwanata. Tukuy runas chay yuyaychaykunata kasukunkuman chayqa, kay mundopi problemasqa pisiyanman, ¿icharí? Chayrayku Bibliaj  yuyaychaykunasnenqa, kay tiempopi yanapawasunmanpuni.

Tukuy runasmanta aswan yachayniyoj runa nerqa: “Uj runaj yachaynenqa cheqan kajta ruwasqanpi yachakun”, nispa (Mateo 11:19). Ajinapunitaj, uj runaj yuyaychasqan allinchus manachus kasqanta yachanapajqa, chay yuyaychayman jina ruwana tiyan. Ajinallataj Bibliawanpis. Bibliaj yuyaychaykunasnin sumaj chayqa, kausayninchejpi allin rinawanchejpaj yanapanawanchej tiyan. Chantapis llakiykunasninchejta atipanapaj yanapanawanchej tiyan. Anaj kausayninmanta parlarina.

Anaqa * ashkha ruwanasniyoj karqa, kusisqa, sonqo juntʼasqataj kausakusharqa. Jinallapi sipas wawan wañuporqa, qosan saqerparqa, mana qolqeyojtaj rikhurerqa. Pay nin: “Wawitay wañuporqa, mana qosayoj, nitaj wasiyoj rikhurerqani. Chaykunas pasawasqanrayku pichus kasqaytapis niña yacharqanichu. Qhasillataña kausaspa jinasharqani”, nispa.

Anaj kausayninpi sutʼi rikukorqa Salmo 90:10 nisqan cheqapuni kasqan. Chay versículo nin: “Qanchis chunka watasllata kawsayku, aswan kallpayojkunataj pusaj chunkata. Chay jina kawsayniyoj  kayqa llakiyllata, ñakʼariyllata apamun. Sapa wata imata jina ripun noqayku jinallataj”, nispa.

Anaqa chay jina llakiykunapi kaspa, Bibliapi yanapata maskʼarqa. Bibliatajrí sumajta yanaparqa. Qhepan yachaqanaspi, yachakusun imaynatachus Bibliaj yuyaychaykunasnin ashkha runasta yanapasqanta. Chay runasqa repararqanku, Bibliaqa qallariypi parlarqanchej chay yuritu jinapuni kasqanta. Imajtinchus Bibliaqa mana uj tiempollapaj sirvej libros jinachu. Bibliataqa Dios yuyaycharqa, chay waj librostarí runalla ruwarqa (1 Tesalonicenses 2:13).

Ichá qanpis ninki: “Pisillata kausanchej, kausayninchejtaj llakiykunamanta juntʼa”, nispa. ¿Maypitaj sonqochayta, yanapata ima tariwaj? ¿Pitaj yuyaychasunkiman llakiykunapi kashajtiyki?

Bibliapeqa kausayninchejpaj sumaj yuyaychaykuna tiyan. Qhawarina imaynatachus yanapawasqanchejta:

1. Llakiykunapi mana rikukunapaj.

2. Llakiykunata atipanapaj.

3. Llakiyninchej mana tukukojtin.

Qhepan yachaqanaspi chay kinsa imasmanta parlarisunchej.