¿IMATAJ YANAPAWASUNMAN NIÑA WAJKUNATA CHEJNIKUNAPAJ
3 | Yuyayninchejmanta chejnikuyta orqhona
Biblia nin:
“Yuyayniykichejta mosojyachispa mosoj runaman tukuychej. Ajinamanta qankunallataj sutʼita reparankichej Diospa munaynenqa kʼacha, cheqan, payta kusichinanpaj jinataj kasqanta” (ROMANOS 12:2).
¿Ima niytá munan?
Diosqa imatachus yuyasqanchejta sumajta yachan (Jeremías 17:10). Imatachus nisqanchejta, ruwasqanchejta ima sumajta qhawarikuna tiyan, jinapis mana chayllatachu ruwananchej tiyan. Chejnikoyqa yuyayninchejpi, sonqonchejpi ima qallarin, chayrayku chayta yuyayninchejmanta, sonqonchejmanta ima orqhona tiyan. Chayta ruwaspaqa mana pitapis chejnikusunchu.
Kayta ruwawaj:
Sumajta qhawarikuna imatachus wajkunamanta yuyasqanchejta, astawanraj waj llajtayoj chayri waj rijchʼayniyoj kajkunamanta. Kaypi piensarina: ¿Imatá paykunamanta yuyanchej? Paykunamanta wajkuna sajrata parlajtinku, ¿paykuna jinallatajchu yuyanchej? Chejnikuymanta chayri maqanakuykunamanta peliculasta ama qhawanachu, ni redes socialespipis. Chaykunata qhawaspaqa wajkunata chejnikuyta qallarisunman.
Diospa Palabranqa yanapawasunman yuyayninchejmanta, sonqonchejmanta ima chejnikuyta orqhonapaj.
Wakin kutisqa mana cuentata qokuspalla pitapis chejnikuyta qallarishasunman. Jinapis Diospa Palabranqa yanapawasunman, ‘sutʼiman orqhonapaj sonqoj yuyasqanta, imajtinchus ajinata yuyasqantapisʼ (Hebreos 4:12). Chayrayku allin kanman Diospa Palabranmanta yachakunayki. Chay yanapasonqa allintachus manachus yuyashasqaykita reparakunaykipaj. Diospa Palabranqa “sumaj perqasman rijchʼakoj imasta thuñinapaj” atiyniyoj, imachus yuyayninchejpi sonqonchejpi kasqanta thuñiyta atin, chejnikuytapis chinkachiyta atin (2 Corintios 10:4, 5).
