Diospa Gobiernonmanta sumaj willaykunaqa jallpʼantinpi willakushan, imaynatachus Jesús nerqa, ajinata (Mateo 24:14). Bibliamanta Daniel libroqa, chay Gobiernota Dios sayarichinanta nerqa. Daniel libroj iskay capitulonqa, atiyniyoj gobiernos rikhurinankumanta parlan. Chay gobiernosqa Babilonia nacionwan qallarerqa, kay tiempopi gobiernoskamataj kashan. Bibliaqa imachus chay qhepata kananmanta, Daniel 2:44 versiculopi nin:

“Janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajrí wiñaypaj sayanqa”.

Chay versículo, Bibliamanta waj versiculospis, willawanchej Diospa Gobiernon tukuy gobiernospa cuentanmanta kamachinanta. Chay Gobierno kamachishajtintaj, kay jallpʼapi allin kausaylla kanqa. Qhawarina imayna sumajchus chay kausay kanqa.

• GUERRAS MANAÑA KANQACHU

  Salmo 46:9 nin: Diosqa “tukuy kay pachapi chʼajwasta chʼinyachin. Maqanakuna flechasta, tʼojsina lanzastapis pʼakiran, caballoswan aysana carretastataj rupharachin”, nispa.

  Kay tiempopi, runasqa yachayninkuta, qolqenkutawan armasta ruwanankupaj churanku. Jinapis Diospa Gobiernon kamachishajtenqa, chay imasta runa masinkuta yanapanankupaj churanqanku. Chayrayku manaña guerras kanqachu.

• ONQOYKUNA NIÑA KANQACHU

  Isaías 33:24 nin: “Mana pipis nenqachu: Onqosqa kani, nispaqa”.

  Manaña sonqomanta onqoykunawan, cancerwan chayri diabeteswan onqosunchu. Chayrayku manaña kanqachu hospitales, nitaj medicinas chayri jampispis. Tukuyninchej sanitos kasunchej.

• YARQHAY MANAÑA KANQACHU

  Salmo 72:16 nin: “Ashkha trigo kachun; orqo puntaspipis trigoqa wayrawan pujllachun”, nispa.

  Jallpʼapeqa ashkha mikhuna poqonqa, tukuypajtaj kanqa. Niña pipis yarqhaymanta onqonqachu, nitaj yarqhaywan wañonqachu.

• MANAÑA WAÑUY KANQACHU, NITAJ LLAKIYPIS, NITAJ NANAYPIS

  Apocalipsis 21:4 nin: Diosqa “ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis. Chay ñaupaj kaj imasqa chinkapunña”, nispa.

   Niña juchasapaschu kasun, wiñaypajtaj kay jallpʼapi kusisqa kausakusun. Chayta niwanchej Tatanchej Jehová.

Chay sumaj kausaypi piensaspa, ichapis ninki: “Nichá chay kanmanchu”, nispa. Casi tukuynin runas chay sumaj kausayta japʼiyta munanku. Jinapis ashkhas mana creenkuchu wiñaypaj kausayta atisqanchejta. Imaraykuchus kay tiempopi ni pi wiñaypaj kausaj kanchu.

Runasqa may chhika unaytaña jucharayku ñakʼarishanchej. Chayrayku ashkhas yuyanku ajinapuni kausay kanan kasqanta. Jinapis Diosqa mana chaytachu runaspaj munarqa.

Diosninchejqa paypa nisqanpi creenanchejpaj, palabranmanta nerqa: “Noqamanqa mana chʼusajllachu kutimonqa, manachayqa noqaj munasqayta ruwanqa; imapajchus noqa kacharqani, chayta juntʼanqa”, nispa (Isaías 55:11).

Bibliaqa Jehová Diosmanta nin, “mana jaykʼaj llullakoj Dios” kasqanta (Tito 1:2). Pay chay sumaj kausay kananta niwarqanchej. Chayrayku yachananchej tiyan, kay jallpʼapi wiñay kausay kanqapunichus manachus, chayta. Chantá yachanallanchejtaj tiyan, imatachus chay kausayta japʼinapaj ruwananchej kasqanta. Chaytataj yachakunki qhepan yachaqanaspi.