Gemelo hermanosmanta parlarina. Paykunaqa sumaj ujchasqas kanku. Nancy Segalqa gemela hermanayoj. Payqa maypichus gemelosta estudianku, chay lugarmanta directora. Pay nin: “Ujnin gemelo niraj imatapis parlayta tukushajtin, ujnenqa ñapis entiendenña imatachus niyta munasqanta”, nispa. Waj warmitaj nin: “Gemela hermanayqa sumajta rejsiwan, noqapis payta kikillantataj rejsini”, nispa.

¿Imaraykutaj gemelos ajinata entiendenakunku? Gemelosmanta yachajkuna nisqankuman jina, ichapis tatasninkurayku chayri maypichus uywasqa kasqankurayku jinata entiendenakunku. Jinapis astawanqa entiendenakunku, mamankoj wijsanpi imayna ruwasqachus kasqankurayku.

TʼUKURINA: Diosninchej Jehovaqa, sumajta yachan imaynachus sapa ujninchej ruwasqa kasqanchejta. Chayrayku ñaupa tiempomanta rey David, jinata nerqa: “Mamaypa wijsampeqa qampuni ruwawarqanki. Qampajqa mana pakasqachu karqa ukhuy wiñasqanqa, pakaypi ruwasqa kashajtiypis. [...] Ñawisniykeqa imaynatachus cuerpoy ruwakusharqa, chayta rikorqaña”, nispa (Salmo 139:13, 15, 16). Arí, Diosnillanchej sumajta yachan imaynatachus mamanchejpa wijsanpi wiñakusqanchejta. Payqa yachallantaj imayna uywasqachus kasqanchejtapis. Diosninchej ajinata rejsiwasqanchejqa, rikuchiwanchej noqanchejmanta tukuy imatapuni yachasqanta.

Davidqa Jehová Diosman nerqa: “Tata Dios, qanmin allinta qhawaykuwanki, rejsiwankitaj. Tukuy ruwasqasniyta qan yachanki. Yuyasqaytaqa karumantapacha qan yachanki. Manaraj parlashajtiy, Tata Dios, qanqa ñapis yachankiña”, nispa (Salmo 139:1, 2, 4). Jehová Diosninchejqa sonqonchejtapis, yuyayninchejtapis sumajta rejsin (1 Crónicas 28:9; 1 Samuel 16:6, 7). ¿Imatá chay versiculosmanta yachakusunman?

Diosninchejqa mana ruwasqallanchejtachu qhawan. Orakuspa mana tukuy imata willajtinchejpis, payqa ima yuyaywanchus, ima sonqowantajchus imatapis ruwasqanchejta yachan. Payqa yachallantaj, allin kajta ruwayta munasqanchejta, mana chayta ruwajtinchejpis. Chantapis Diosninchejqa, munakuyta atinanchejpaj jina ruwawarqanchej. Chayrayku payqa, imachus sonqonchejpi, yuyayninchejpi kasqanta yachayta munan (1 Juan 4:7-10).

 Biblia niwanchej

• “Jehová Diospa ñawisnenqa cheqan runasta qhawashan, ninrisninpis paykunaj mañakusqankuta uyarishan” (1 PEDRO 3:12).

• “Tata Diosqa nin: Ñawisneyqa qanllapi kashan, yachachisqayki, yuyaychasqaykitaj mayqen ñantachus rinaykita” (SALMO 32:8).

Diosninchej llakiyninchejta entiendesqanta yachay, ¿yanapawasunmanchu? Arí, llakiykunata aguantanapaj yanapawanchej. Lidiaj kausaynin chayta rikuchiwanchej. Payqa Nigeria suyumanta. Pay nin: “Sinchʼi llakiypi kasqayrayku, wañupullaytaña munaj kani. Ñaupajta qosay wañuporqa, imillitaytaj ñojtitunpi yaku kasqanrayku hospitalpi kasharqa. Jinallapi doctores ñuñusniypi cancerniyoj kasqayta niwarqanku. Chantá operawarqanku, waj tratamientostawan ruwachiwarqanku. Wawitaywan khuska hospitalpi internasqa karqayku. Noqapajqa may llakiypuni karqa”, nispa.

¿Imaynatataj Lidia chay llakiykunasninta aguantarqa? Pay nin: “Filipenses 4:6, 7 nisqanpi tʼukurej kani. Chaypeqa nin, ‘Diosqa sonqo tiyaykuyninta qowasqanchejta, yuyayninchejta, sonqonchejtawan waqaychananpaj’. Chay versiculosta sapa yuyarikojtiy, Jehová Dios ladoypipis kashanman jinata reparaj kani. Yacharqani payqa ni pi jina sumajta entiendewasqanta. Cristiano hermanosniypis mayta sonqochawarqanku”, nispa.

Lidia nillantaj: “Nirajpuni allin sanochu kani. Jinapis wawitaywan noqawanqa, manaña anchata llakikuykuchu. Tatanchej Jehová yanapawasqaykurayku, llakiykunasniykuta aguantallayku. Santiago 5:11 niwanchej: ‘Pikunachus aguantarqanku chaykunata, kusikuyniyoj kasqankuta ninchej. Qankunaqa Job ñakʼariykunata aguantasqanmanta uyarerqankichej, yachankichejtaj Jehová Dios payta bendecisqanta. Chayrayku yachankichej, Jehová Diosqa jatun sonqoyoj, khuyakuyniyojtaj kasqanta’, nispa”. Jehová Diosninchejqa Jobpa llakiyninta sumajta entienderqa. Llakiyninchejtapis jinallatataj entienden.