Bibliaj yuyaychasqan: “Kausayniykichejpi amapuni qolqemanta wañusqa kaychejchu. Astawanpis imaschus kapusunkichej chaywan kusisqa kaychej” (Hebreos 13:5).

Kay mundomanta runasqa tukuy imayoj kanapaj tanqawanchej. Chaywanpis Bibliaqa nin kapuwasqallanchejwan kusisqa kausakuyta atisqanchejta.

Ama qolqeta munakunachu. Ashkha runasqa qolqeta munakusqankurayku onqoykunku, familiankuwan, amigosninkuwan ima mana allintachu kausakunku, mana allin kausayniyojchu, niñataj confianapaj jinachu kanku (1 Timoteo 6:10). Qolqeta munakusqankurayku llakiyllapi rikukunku. Chantapis qhapaj runaqa “astawampuni munan” (Eclesiastés 5:10).

Runasta munakuna waj imasmanta nisqaqa. Yachanchej jina imaschus kapuwasqanchejqa mana munakuwasunmanchu. Nitaj uj amigonchej jinachu kusisqa kanapaj yanapawasunman (Proverbios 17:17).

Bibliaj yuyaychasqan: “Sonqo kusisqa kayqa uj sumaj jampi” (Proverbios 17:22).

Kusisqa kayqa “sumaj jampi” jina onqoyninchejta aguantanapaj yanapawanchej. Chaywanpis onqosqa kashaspaqa mana kusisqa kayta atillasunmanchu.

Agradecekuyta yachana. Problemasnillanchejpi yuyasun chayqa “sapa pʼunchay llakiyllapuni” kanqa (Proverbios 15:15). Chaywanpis Bibliaqa nin: “Agradecekuychejpuni”, nispa (Colosenses 3:15). Imaschus kapuwasqanchejmanta Diosman agradecekuyta yachakusunman. Runastaqa mayta kusichiwanchej intita yaykushajtin pukayarisqanta qhaway, chiri wayritata sientey chayri pillatapis asirejta uyariy.

Wajkunata yanapana. Onqosqa kaspapis wajkunaman qorispaqa kusisqa kasunman (Hechos 20:35). Imallatapis ruwasqanchejmanta wajkuna agradecekuwajtinchejqa kusikunchej, problemasninchejmantapis qonqapunchej. Wajkunaqa kusikunku yanaparejtinchej, noqanchejpis kusikullanchejtaj.

Bibliaj yuyaychasqan: “Imaschus aswan allin imas kasqanta” reparaychej (Filipenses 1:10).

Khuska kanankupaj mana kallpachakoj qhariwarmisqa ichá karunchanakunkuman. Chayrayku allin kanman qosapis warmipis qhariwarmi kausayninta ñaupajman churanan.

Khuska imatapis ruwankuman. Bibliaqa nin: “Aswan walej iskay ukhu kayqa”, nispa (Eclesiastés 4:9). Qhariwarmisqa imatapis khuska ruwanankupaj kallpachakunkuman, ichá khuska waykʼurinkuman, pasearikamunkuman chayri mercadoman khuska rantirakoj rinkuman.

Purajmanta munanakunkuman. Bibliaqa nin qhariwarmis munanakunankuta, respetanakunankutataj (Efesios 5:28, 33). Qhariwarmisqa aswan ujchasqa kankuman qharipis warmipis asirejtin, qosanta chayri warminta abrazarejtin chayri imallatapis regalarejtin. Chantapis casadosqa warmillankuwan chayri qosallankuwan puñuykunanku tiyan (Hebreos 13:4).