MUSICATA tocaj runamanta videota qhawashasqaykipi piensariy. Chay runaqa may rejsisqa. Chay videopeqa rikukun wawa kashaspa imastachus ruwasqan, musicata tocayta yachakushasqan, ashkha horasta practicashasqan ima. Rikukullantaj conciertospi tocashasqan, waj suyusman tocaj viajashasqan, may rejsisqaman tukusqantaj. Chaywanpis rikukullantaj viejoyapusqan, wañupusqantaj.

Chay videoqa mana uj cuentollachu. Jinapis chay videopi rejsisqa runaqa wañusqaña. Chay video uj cientificomanta, deportistamanta chayri mayqen rejsisqa runamantapis kanman karqa chayqa, jinallapitaj tukunman karqa. Chay rejsisqa runaqa kausashaspa tukuy imata ruwarqa, mana wañupuspataj ashkha imastawanrajchá ruwanman karqa.

Reparanchej jina wañoyqa tukuy runasman chayan (Eclesiastés 9:5). Tukuy imata ruwaspapis viejoyaymanta, wañuymantapis mana ayqeyta atinchejchu. Chantapis mana piensashaspalla wañupusunman uj accidentepi chayri sinchʼita onqoykuspa. Biblia nin jinataj kausayninchejqa “uj phuyu jinalla”, “mayqenchus uj chhikan tiempota rikhurin, chinkaripuntaj” (Santiago 4:14).

Wakin runasqa ninku kausay llakiylla, qhasillataj kasqanta. Chayrayku ninku: “Mikhuna ari, ujyanataj, imaraykuchus qʼaya wañupusun”, nispa (1 Corintios 15:32). Chayta nispaqa sutʼita yachanku wañunankuta. Chayrayku maykʼajllapis uj jatun llakiypi rikukuspaqa yachayta munanchej imapajchus Dios ruwawasqanchejta. ¿Chayta yachayta atisunmanchu?

Ashkha runasqa cientificospi, doctorespi ima atienekunku. Paykunataj tukuy imaymana jampista ruwanku, runa unayta kausananpaj. Wakin cientificosqa waj imastawan ruwashanku aswan unaytaraj runa kausananpaj. Chaywanpis nipuni yachankuchu imaraykuchus viejoyasqanchejta, wañusqanchejtapis. Nillataj yachankuchu wañuy chinkachisqa kanantapis. Qhepan yachaqanaspi chaymanta yachakusunchej, kay tapuymantaj kutichisunchej: ¿Imapajtaj Dios ruwawarqanchej?