¿Imajtintaj runas wiñaypaj kausayta munanchej? Imajtinchus Bibliaqa nin Dios “wiñay kasqanta” sonqonchejman churasqanta (Eclesiastés 3:11). Nillawanchejtaj “Diosqa munakuymin” kasqanta (1 Juan 4:8). Kay versiculosqa sutʼita reparachiwanchej Diosqa munakuwasqanchejta, wiñaypaj kausayta munananchejpajtaj ruwawasqanchejta.

Chayrayku ni pi wañuyta munanchejchu. Astawanpis Bibliaqa nin wañuy uj enemigo jina kasqanta (1 Corintios 15:26). Wakenqa jovenesllaraj wañupunku, wakintaj viejitosña, jinapis tukuy wañunchejpuni. Wakin runasqa mana wañuypi yuyayta munallankupischu, wakintaj manchachikunku. Chaywanpis, ¿wañuy chinkanmanchu?

Diosqa mana munarqachu ni pi wañunanta. Bibliapi Génesis libropi nisqanman jina, Diosninchejqa munarqa runa wiñaypaj jallpʼapi kausananta. Jehová Diosqa jallpʼapi kaj tukuy imata kʼachituta ruwarqa. Chantataj Adanta ruwarqa. Paytaqa qhallallaj Edén huertaman churarqa. Chaymantataj “Dios rikorqa tukuy ima ruwasqanqa sumajpuni kasqanta” (Génesis 1:26, 31).

Diosqa Adanta ruwarqa payman rijchʼakojta. Adanqa cheqan runa karqa (Deuteronomio 32:4). Evapis cuerponpi yuyayninpi ima mana juchayoj karqa. Jehová Diostaj paykunaman nerqa: “Miraychej,  kay pachaman juntʼaychej; atiyniyojtaj kaychej, kamachispa mama qochapi kaj challwasta, tukuy pʼisqosta, jallpʼa patapi tukuy qhatatakojkunatawan”, nispa (Génesis 1:28).

Paykunaqa unaypichá jallpʼaman juntʼankuman karqa. Diospa munaynin juntʼakunanpaj, Evaqa wawasniyoj kanan karqa. Wawasnintaj wawasniyojllataj kananku karqa jallpʼantinman juntʼanankukama (Isaías 45:18). Jehová Diosqa nichá jallpʼaman juntʼanankuta kamachinmanchu karqa, wawasniyoj, allchhisniyojtaj kanallankupaj, nitaj allin kausayta rikunankupajqa.

Diosqa kamachillarqataj animalesta qhawanankuta. Adanqa sapa animalman sutita churanan karqa, chaytataj unaypichá ruwarqa (Génesis 2:19). Chaywanpis imaynatachus sapa animalta cuidananpajqa, sapa ujta sumajta rejsinan karqa. Chaytataj aswan unaypirajchá ruwarqa.

Chayrayku Jehová Dios Adanman Evaman jallpʼaman juntʼanankuta, animalesta qhawanankuta kamachisqanqa, rikuchin paykunata unayta kausanankupaj ruwasqanta. Chayrayku Adanqa unayta kausarqa.

Bibliaqa nin, Jatun Para ñaupajta runasqa ashkha watasta kausasqankuta, kunan tiempomanta nisqaqa. Biblia nin: “Adanqa kawsarqa tukuynimpi jisqʼon pachaj kinsa chunkayoj watasta”, nispa. Chantá sojta runasmanta parlan, pikunachus novecientos watas kurajta kausarqanku. Paykunaqa karqanku Set, Enós, Cainán, Jared, Matusalén, Noé ima. Noeqa 600 watasniyojña kasharqa Jatun Para qallarishajtin (Génesis 5:5-27; 7:6; 9:29). ¿Imaraykutaj chay chhika unayta kausarqanku?

Paykunaqa Adanwan Evawan juchallikusqankumanta pisi tiempollanman nacekorqanku. Ichapis chayrayku unayta kausakorqanku. Jinapis imaraykuchus viejoyasqanchejta, wañusqanchejta ima yachanapajqa, ñaupajtaqa yachananchej tiyan cheqan runa kaywan, unayta kausaywan mana kikinchu kasqanta, imaynatachus wañuy chinkanantapis.