Chaytaqa nisqa, uj amigan sonqochayta munaspa. Jinapis Bertaqa tatanman may yachasqa karqa, chayrayku sonqochasqa kananmantaqa astawan llakichillarqa. Sapa kutitaj Bertaqa tapurikoj: “¿Imayná aswan allin kanmanri?”, nispa. Watasninmantaj uj librota qhelqasqanpi, chaymanta parlallarqataj, chayqa rikuchin tatanmanta llakisqallapuni kashasqanta.

Bertaj kausaynenqa rikuchin familianchejmanta pillapis wañupusqanmanta unayña pasajtinpis, mana qonqayta atisqanchejta. Chayraykuchá Bibliaqa nin wañuy qhepa kaj enemigo kasqanta (1 Corintios 15:26). Wañoyqa tukuyman chayawanchej mana suyashajtillanchej. Ni pi ayqesunmanchu wañuymantaqa. Chayrayku, pillapis wañupojtenqa mana yachanchejchu imatachus ruwananchejta.

Ichá tapukunchej: “¿Mashkha unaypitaj manaña llakikusunmanchu? Llakisqa kashaspa, ¿imastá ruwasunman? ¿Imaynatá llakisqasta sonqochasunman? ¿Wañusqas kausarimunkumanchu?”, nispa.