Mulhouse llajtapi nacekorqani, chaytaj Francia suyupi kashan, tiyakorqani chaypi runasqa trabajayman yachasqa karqanku. Jinapis chay lugarpeqa ashkha chʼajwa kaj. Wawa kashasqaymanta yuyarikuspaqa chay lugarpi familiaspura maqanakusqallankuta yuyarikuni. Familiaypi, qharisqa warmista pisipaj qhawaj kanku, casi ni imapaj valechejchu kanku. Niwajtaj kanku warmeqa waykʼunanpaj, qosanta, wawasninta ima atiendenanpaj kasqanta.

Wawa kashajteyqa llakiypuni kausayniy karqa. Chunka watayoj kashajtiy, tatay wañuporqa anchata machasqanrayku. Phishqa watanmantaj ujnin kuraj hermanoy wañuchikorqa. Chay watallataj familiay maqanakusqankupi uj wañorqa. Chaytaj mancharisqata saqewarqa. Wakin familiaresneyqa cuchillosta, pistolasta apaykachanaypaj chantá maqanakuyta ima yachachiwarqanku. Joven kashaspaqa chʼajwasllata rikhurichej kani, tukuy cuerpoypi tatuajeta ruwachikorqani, machaymantaj qokorqani.

Chunka sojtayoj kashaspaqa, cervezata chunkata chayri chunka phishqayoj botellasta ujyaj kani. Drogakuytataj qallarerqani. Chayta rantinaypajqa maukʼa imasta vendej kani, suwakojtaj kani. Chunka qanchisniyoj kashaspa carcelpi wisqʼachikorqaniña. Suwasqayrayku, sajra imasta ruwasqayraykutaj 18 kutista carcelpi wisqʼachikorqani.

Kausayneyqa 20 watayoj kashajtiy aswan llakiyraj karqa. Sapa día marihuanamanta 20 cigarrillosta pitaj kani. Heroinawan, waj drogaspiwan drogakoj kani. Chayrayku ashkha kutispi casi wañorqani. Drogasta vendesqayrayku uj armayoj purej kani. Uj kuteqa uj runata balearparerqani, bala cinturonpa hebillallanman chayasqanrayku mana chay runa wañorqachu. Mamayqa 24 watayoj kashajtiy wañuporqa, aswan sajramantaj tukorqani. Runasqa callepi kashajtiy manchachikuwaj kanku, uj ladonmantaj ripoj kanku. Casi sapa semana tukukuyta maqanakusqayrayku wisqʼachikoj kani chayri hospitalman chayaj kani jampichikunaypaj.

Casarakorqanitaj 28 watayoj kashaspa, warmiytaqa millay palabraswan qhaparej kani, maqajtaj kani. Paywan kanaypaj mana tiempochakojchu kani, suwasqay imasta qosqaywan allin kananta yuyaj kani. Jinallapi warmeyqa, Bibliamanta yachakuyta qallarerqa Jehovaj testigosninwan. Ñaupaj kutita estudiaytawan niña cigarrota pitajchu, nillataj suwasqa qolqeta japʼikojchu, waj suwasqay imastapis  kutichipuwarqa. Noqataj niña Bibliata estudiananta nerqani. May phiñasqa kasharqani, cigarro pitaspataj uyanman phukuykoj kani, vecinosniykupa rikunantataj pʼenqaypi rikhurichej kani.

Uj chʼisi sinchʼi machasqa kashaspa, mana reparakuspalla wasiykuman ninata japʼiykucherqani. Warmiytaj noqata, phishqa watitayoj imillitayta ima mana chaypi wañunaykupaj salvawarqayku. Chʼaki sonqoña kaspataj chay ruwasqaymanta mayta pesachikorqani. Uyarej kani uj cura nisqanta sajra runasqa infiernoman rinankuta. Doctorniypis niwarqa: “Ni imapaj valenkiñachu. Ni pi salvasunkimanñachu”, nispa.

Wasiyku ruphaykusqantawantaj suegrosniypaman tiyakoj riporqayku. Testigosqa warmiyta waturej jamorqanku, noqataj chaypi paykunata tapurerqani: “¿Dios juchasniyta perdonawanmanchu?”, nispa. Paykunataj Bibliapi leeripuwarqanku 1 Corintios 6:9-11 versiculosta. Chaypi nin ima ruwaykunatachus Dios chejnikusqanta. Nillantaj: “Ajina karqankichej qankunamanta wakin”, nispa. Chay palabrasqa kausayniyta tijrachiyta atisqayta rikuchiwarqa. Testigos leeripullawarqankutaj 1 Juan 4:8 versiculota Dios munakuwasqanta rikuchinawankupaj. Chayqa maytapuni sonqochawarqa, chayrayku semanapi iskay kutita yachachinawankuta mañakorqani, tantakuyninkumanpis rerqani. Jehovamantataj mayta mañakoj kani.

Killanmantaj, manaña drogakorqanichu, nitaj macharqanichu. Jinapis cuerpoyqa munallajpuni. Chayrayku mana puñuyta atejchu kani, umay nanawaj, calambres japʼiwaj, waj nanaykunataj. Chaywanpis, Jehová yanapashawasqanta, kallpachashawasqanta repararqani. Apóstol Pablo jina kasharqani, pay nerqa: “Imallapipis tarikuspa, atipayta atisajpuni, kallpachawajniy [Diospi kasqanrayku, NM] (Filipenses 4:13). Tiempowanqa manaña pitarqanichu (2 Corintios 7:1).

Bibliaqa kausayniyta allinyachinaypaj, familiaywan allinta kausakunaypajtaj yanapawarqa. Ajinamanta warmiytaqa respetowan parlapaj kani, imatapis kʼachamanta mañakoj kani, agradecekojtaj kani. Chantapis wawitaywan kanaypaj tiempochakoj kani. Bibliata estudiashaspa watanman warmiy jina, Jehovaj testigon kayta munaspa bautizakorqani.

Mana iskaychakunichu Bibliamanta yachakusqay kausayniypi mayta yanapawasqanmanta. Mana Testigo kaj familiaresniypis drogakuspa chayri maqanakuspa wañunayta creesqanku.

Imaynachus qosas, tatastaj kanankuta Biblia nisqanta kasukusqaymantapacha, familiaypi may allinta kausakuyku (Efesios 5:25; 6:4). Tukuy imata khuska ruwayku. Manaña suyanichu warmiy waykʼuspalla kananta. Astawanpis Diosmanta willaj llojsin, noqataj mayta kusikuni yanapaspa. Paypis congregacionpi anciano jina ruwanasniyta juntʼanaypaj mayta yanapallawantaj.

Dios munakuwasqanrayku, pacienciayoj kasqanraykutaj, kausayniyta cambiarqani. Chayrayku tukuy sonqo Jehovamanta yachachiyta munani, niña imapaj valesqankuman rijchʼakojkunaman, imaraykuchus noqapis ajina karqani. Tukuy runas kausayninkuta allinchayta atisqankuta yachani, Bibliaj nisqanta kasukojtinkutaj allin rinanta. Noqapis yachakorqani tukuy runasta respetanayta qharis chayri warmis kajtinkupis; chantá yachakullarqanitaj noqapis respetakunay kasqanta.