Ichá wawa kashaspa urmakuspa makiykita khuchurpakorqanki, chayri chaki moqoykita khiturpakorqanki. Chaypi, ¿imaynatá mamayki sonqochasorqa? Ichá nanasqaykita picharqospa jampiykusorqa, waqashajtiykitaj kʼachallamanta munakuywan sonqochasorqa. Arí, wawasqa chay rato sonqochasqa kayta atinku.

Wiñasqanchejman jina kausayqa mana kikillanpunichu, imajtinchus ashkha chʼampaykunapi rikukunchej. Sonqochasqa kaytataj mana atillanchejchu. Machu runaspa chʼampayninkoqa mana allinchanapaj jinallachu. Chaykunamanta wakinta qhawarina.

• ¿Maykʼajllapis mana trabajoyoj qhepakorqankichu? Julián ajinapi rikukusqanmanta yuyarikuspa, sinchʼi llakisqapuni kashasqanta nerqa. Yuyajtaj: “¿Imaynatá kunan familiayta uywasajri? Watastaña sinchʼita trabajajtiypis, ¿imajtintaj empresapi niña llankʼayta atisqayta niwankuri?”, nispa.

• Ichá divorciakusqaykirayku sinchʼi llakisqa kashanki. Raquel ajinapi rikukorqa, pay nin: “Qosayqa jinallamanta riporqa, chaymantaqa wata khuskanniyojña pasan. Maytapuni llakikorqani, sonqo pʼakisqataj kasharqani. Tʼunasqa jina kasharqani, sonqo nanasqataj. Mancharisqapuni kasharqani”, nispa.

• Ichá sinchʼi onqosqa kashanki nitaj sanoyapuyta atinkichu. Ichapis Job jina sientekullawajtaj, pay nerqa: “Manaña kayta atinichu, nitaj kawsaytapis munaniñachu”, nispa (Job 7:16). Chayri Luis jina yuyawaj, payqa 80 watayoj, nerqataj: “Noqaqa wañuyllataña suyakushani”, nispa.

• Ichá familiaykimanta pillapis wañupusqanrayku sonqochasqa kayta munanki. Robert nin: “Waway avionpi accidentakuspa wañupusqanta willawajtinku nipuni creerqanichu. Chaymantaraj llakikorqani, Bibliapi nin jina, chay llakeyqa espada jina sonqoyta tʼojserqa”, nispa (Lucas 2:35).

May sinchʼi llakiypi kaspapis Julián, Raquel, Luis, Robert ima sonqochayta tarerqanku. Paykunataqa Dioslla sonqocharqa. ¿Imaynatá Dios sonqochawanchej? Sonqochasqa kayta necesitajtiyki, ¿sonqochallasunkimantajchu?