1, 2. ¿Imatataj jóvenes ruwananku kashan? (Patapi kaj fotota qhawariy).

JOVEN, karu lugarman flotapi viajanaykipi piensariy. Chaypajqa terminalmanraj rinayki kanman. Terminalman chayaspataj ichapis umaykita muyuchikuwaj juntʼa kasqanrayku chayri ima flotamanchus wicharinaykita mana yachasqaykirayku. Chaywanpis maymanchus viajanaykita sutʼita yachaspaqa, yachanki ima flotamanchus wicharinaykita.

² Kausayninchejqa, waj lugarman viajay jina. Maymanchus viajashasqanchejta yachaspaqa, yachanchej ima flotatachus japʼinanchejta. Jovenespis imatachus kausayninkuwan ruwanankuta ajllananku kashan. Imatachus ruwanankuta mana yachajtinkoqa, umankuta muyuchikunkuman. Chaywanpis kausayninkuwan imatachus ruwanankuta yachajtinkoqa, allin kajta ajllayta atillanqanku.

3. ¿Imaynatataj jóvenes Jehová Diosta kusichinkuman?

³ Kay yachaqanapeqa parlarisunchej jóvenes Jehová Diosta kusichinankupaj kallpachakunanku kasqanta. Jovenesqa, Jehová Diosta kusichinkuman paypa yuyaychasqanta kasukuspa. Chaytataj sutʼita rikuchinkuman ima trabajotapis ajllashajtinku, universidadman rinankutachus manachus ajllashajtinku chayri casarakunankutachus manachus ajllashajtinku. Jehová Diospaj astawan llankʼajtinkoqa, Jehová  Diosman astawan qayllaykonqanku. Jehová Diostaj tukuy imapi paykunata bendicenqa (Proverbios 16:3 leey).

4. ¿Imastataj qhepan parrafospi yachakusunchej?

⁴ Jehová Diospaj astawan llankʼanapaj kallpachakoyqa, may sumajpuni. Chayrayku qhepan parrafospi yachakusunchej, imajtinchus jóvenes Jehová Diospaj astawan llankʼanankupaj kallpachakunanku kasqanta. Chaytaj Diosman astawan qayllaykunankupaj yanapanqa. Chantapis yachakusunchej imajtinchus jovencitollaraj kashaspa Diospaj astawan llankʼanapaj kallpachakuna kasqanta.

5. Jóvenes, ¿imajtintaj Jehová Diospaj astawan llankʼanaykichejpaj kallpachakunaykichej kasqa?

⁵ Joven, Jehová Diospaj astawan llankʼanaykipaj kallpachakunayki tiyan. Imajtinchus chayta ruwaspalla payman rikuchinki mayta agradecekusqaykita, qanrayku tukuy imata ruwasqanmanta. Uj kuti uj salmista, jinata nerqa: “Patapi Kaj Tata Dios, ancha sumajpuni qanman graciasta qonaykoqa”, nispa. Chantá nillarqataj: “Tata Dios, ruwasqasniykiwan kusichiwanki; makisniykej ruwasqasnenqa kusichiwanku”, nispa (Sal. 92:1, 4). Joven, ama qonqaychu Jehová Dios kausayta, Palabranta, hermanostawan qosusqanta. Amallataj qonqaychu paypi creenaykipaj yanapasusqanta, uj sumaj kausaytataj qosunanta. Chaykunamantataj agradecekuwaj, paypaj astawan llankʼanaykipaj kallpachakuspa. Chantapis chayta ruwaspaqa payman astawan qayllaykunki.

6. 1) Jóvenes, ¿yanapasunkichejmanchu Jehová Diospaj astawan llankʼanaykichejpaj kallpachakunaykichej? 2) Wawas, ¿imastataj ruwawajchej Jehová Diosta kusichinaykichejpaj?

⁶ Joven, Jehová Diospaj astawan llankʼanaykipaj kallpachakojtiykeqa, Jehová Diospa ñaupaqenpi cheqan kajtapuni ruwanki, astawantaj payman qayllaykunki. Chaymanta parlaspa, apóstol Pablo jinata nerqa: “Diosqa cheqan, manataj qonqaponqachu ruwasqaykichejta, sutinta munakusqaykichejtapis”, nispa (Heb. 6:10). Wawaspis Jehová Diosta kusichiyta atinku. Cristinamanta parlarina. * Payqa 10 watitayoj kashaspa hermanospa experienciasninkuta leenanta nikusqa. Tomaspis 12 watitayoj kashaspa, manaraj bautizakushaspa entero Bibliata leenanta nikusqa. Maximopis 11 watitayoj kashaspa bautizakusqa. Hermanan Noemipis 10 watitayoj kashaspa bautizakusqa. Iskayninkutaj Betel Wasipi sirvinankuta nikusqanku. Chayta mana qonqanankupajtaj, cuartonkupi Betelman rinapaj solicitudta kʼaskaykuchisqanku. Tukuy qankunapis wawas, tʼukuriwajchej imaynasmantachus Jehová Diosta kusichinaykichejpi. Chayta juntʼanaykichejpajtaj kallpachakuychej (Filipenses 1:10, 11 leey).

7. Jóvenes, ¿yanapasunkichejmanchu kausayniykichejpi imatachus ruwanaykichejta sutʼita yachanaykichej?

⁷ Joven, kausayniykiwan imatachus ruwanaykita ajllanayki kashan. Ajllanallaykitaj kashan imatachus estudianaykita, imapichus trabajanaykita, waj imastawan. Chaykunata ajllaytaj uj cruceman chayay jina, maypichus mayqen ñantachus rinaykita ajllanayki tiyan. Maymanchus rishasqaykita sutʼita yachajtiykeqa, mayqen ñantachus rinaykita ajllayta atillanki. Kikillantaj kausayniykipipis. Kausayniykiwan imatachus ruwanaykita sutʼita yachajtiykeqa, imatachus ruwanaykita sumajta ajllayta atinki. Biblia nin: “Imatapis ruwanampaj kʼuchi runaj wakichisqanqa allimpuni llojsin”, nispa (Pro. 21:5). Joven, Jehová Diospaj astawan llankʼanaykipaj kallpachakojtiykeqa, allinpuni risonqa. Imaynatachus Damarista allinpuni rerqa, ajinata. Payqa colegiota tukuytawan imatachus kausayninwan ruwananta sumajta ajllarqa.

8. ¿Imaraykutaj Damaris universidadman mana risqachu?

⁸ Damarisqa colegiopi sumaj notasniyoj karqa. Chayrayku colegiota tukojtin, abogada kananpaj becata qonankuta nerqanku universidadpi estudiananpaj. Chaywanpis payqa mana chay becata japʼikusqachu. Astawanpis uj bancopi trabajayta qallarisqa. Imajtinchus payqa jovencitamantapacha precursora kananta nikusqa. Pay nin: “Precursora  kanaypajqa wakin diasllata trabajanay karqa. Chaywanpis abogada kanaypaj estudiayman karqa chayqa, ashkhata ganajtiypis mana wakin diasllata trabajayta atiymanchu karqa”, nispa. Kunantaj Damarisqa 20 watastaña precursora jina llankʼashan. Pay nin: “Ni imarayku pesachikunichu jovencitamantapacha precursora kanaypaj kallpachakusqaymanta. Imajtinchus bancopi trabajaspaqa, rejsini ashkha abogadosta mana kusisqachu trabajasqankuta. Noqapis paykuna jinachá llakisqa kashayman karqa abogadapaj estudiayman karqa chayqa. Pero may kusisqa, sonqo juntʼasqataj kashani Jehová Diosta precursora jina sirvishasqaymanta”, nispa.

9. ¿Imatataj ashkha jóvenes allintapuni ruwashasqanku?

⁹ Jallpʼantinpi ashkha jovenesqa, allintapuni ruwashanku Jehová Diosta tukuy sonqo sirvispa, paypaj astawan llankʼanankupajtaj kallpachakuspa. Chayta ruwaj jovenesqa, kusisqa kausakunku. Chantapis Jehová Diospa yuyaychaykunasnintapuni maskʼanku, maypichus trabajanankuta, imatachus estudianankuta chayri casarakunankutachus manachus ajllashajtinku. Chaymanta parlaspa Salomón nerqa: ‘Tukuy sonqoykiwan Tata Diospi atienekuy. Tukuy ima ruwasqaykipi Tata Diosmantaqa yuyarikuy. Paymin cheqan ñanta pusasonqa’, nispa (Pro. 3:5, 6). Joven, Jehová Diosqa mayta munakusunki. Chayrayku payqa jarkʼasonqa, yanapasonqa, bendecisonqataj.

10. 1) ¿Imatataj Jesús nisqa? 2) Jóvenes, ¿imatataj ruwawajchej predicacionwan gustachikunaykichejpaj?

¹⁰ Joven, Jehová Diosta kusichinaykipaj kallpachakojtiykeqa, sonqoyki aysasonqa runasman paymanta willarinaykipaj. Jesuspis nerqa: “Ñaupajtaqa sumaj willaykunaraj tukuy laya runasman willakunan tiyan”, nispa (Mar. 13:10). Reparanki jina, Jehová Diosmanta usqhayta willamuna kashan, chaytataj kausayniykipi ñaupajman churay. Chaypajtaj astawan predicaj llojsiwaj. Chantapis precursor jina llankʼawaj. Predicaspa mana kusisqachu kanki chayqa chayri Bibliamanta mana sutʼinchayta atillankichu chayqa, allinta wakichikuy, amataj manchachikuychu Jehová Diosmanta wajkunaman willariyta. Chayta ruwajtiykeqa predicaspa mayta gustachikunki.

11. Jóvenes, ¿imaynatataj wakichikuwajchej wajkunaman Bibliawan sutʼinchanaykichejpaj?

¹¹ Joven, sumajta wakichikunaykipajqa, ñaupajtaqa ichapis tʼukuriwaj imatachus compañerosniyki tapurisunankupi. Ichapis compañerosniykeqa jinata nisunkiman: “¿Imajtintaj Diospi creenkichej?”, nispa. Chay tapuyman sumajta kutichinaykipajqa, Internetpi jw.org/es nisqapi “¿Qué razones tengo para creer en Dios?”, nisqa hojata tariwaj. Chayta tarinaykipajqa ENSEÑANZAS BÍBLICAS nisqapi ñitʼiwaj, chantá JÓVENES nisqaman yaykuspa, PONLO POR ESCRITO nisqanman yaykuwaj. Chaypitaj “¿Qué razones tengo para creer en Dios?”, nisqa hojata tarinki. Chay hojaman jinataj imaynatachus kutichinaykita wakichikuwaj. Chantapis chay hojapeqa kay textos tiyan: Hebreos 3:4, Romanos 1:20, Salmo 139:14. Chay versiculostataj compañerosniykipaj leeripuwaj. Chantapis waj hojasta tarillawajtaj PONLO POR ESCRITO nisqa cheqapi. Chaykunaqa yanapallasonqataj waj tapuykunaman kutichinaykipaj (1 Pedro 3:15 leey).

12. ¿Imatataj Lucas escuelapi ruwasqa?

¹² Joven, compañerosniykimanqa niwaj jw.org nisqaman yaykunankuta Diosmanta yachakunankupaj. Lucaspis chayta ruwasqa. Uj kuti escuelapi kashajtin, tukuy religionesmanta parlaj librota ukhunchasqanku. Lucastaj reparasqa chay libro Jehovaj testigosninmanta llullata parlasqanta. Chayrayku Lucasqa mancha manchalla profesoranta nisqa: “¿Saqeriwankimanchu kay libro llullata parlashasqanta compañerosniyman sutʼinchanayta?”, nispa. Profesorantaj Lucasta parlarinanta saqellasqa. Jinapitaj Lucasqa tukuy compañerosninman chay libro llullata parlasqanta sutʼincharisqa. Chantapis imaschus Internetpi jw.org nisqapi kasqanta rikuchisqa. Chantá profesoraqa, Lucaspa compañerosninman tareata jina qosqa, “Mana maqanakuspalla jarkʼakuwaj nisqa  videota qhawankichej”, nispa. Lucastaj mayta kusikusqa cursonpi Jehová Diosmanta parlarisqanrayku.

13. Joven, ¿imajtintaj japʼinakusojtinkupis Diosmanta willanallaykipuni kanman?

¹³ Joven, wajkuna japʼinakusojtinkupis, Jehová Diospaj astawan llankʼanaykipaj kallpachakullaypuni (2 Tim. 4:2). Karinamanta parlarina. Payqa 17 watasniyoj kashajtin, trabajomanta tukuy compañerosninman predicayta qallarisqa. Jinapis ujnin compañeronqa pʼenqaypi rikhurichiyta munaspa ashkha kutispi qhapariykusqa. Chaywanpis Karinaqa, mana kutichikuspa compañerosninman Diosmanta willallasqapuni. Compañeron Hanstaj, Karina allin kajtapuni ruwasqanta reparasqa. Chayrayku Hansqa publicacionesninchejta leeyta qallarisqa, uj hermanowanpis Bibliata estudiayta qallarisqa, chantá bautizakusqa. Karinataj waj lugarman ripusqanrayku mana yachallasqapischu Hans Testigoman tukupusqanta. Chayrayku 13 watanman jina, Karinaqa familianwan congregacionninpi Hansta discursashajta rikuspa, mayta kusikusqa. Reparasqataj trabajomanta compañerosninman churanakojtinkupis willasqanqa, mana qhasichu kasqanta.

14. Jóvenes, ¿imatataj yuyarikunaykichej kasqa waj jóvenes imata ruwanankupajpis wajyarikusojtiykichej?

¹⁴ Kunankamaqa yachakunchej may allinpuni kasqanta Diosta kusichiy, paypaj astawan llankʼanapaj kallpachakuy ima. Chaywanpis ashkha jovenesqa munasqallankuta ruwaspa kusirikunku. Chayrayku joven, ichá qantapis imata ruwanankupajpis wajyarikusunkuman, paykunawan kusirikunaykipaj. Chay kutispi ama qonqaychu Diosta kusichinayki kasqanta, paypaj astawan llankʼanaykipajtaj kallpachakunayki kasqanta. Chayrayku ama waj jóvenes jina munasqaykita ruwaspa musphaykachaychu. Arí, amapuni waj jóvenes jina imatapis ruwaychu kusirikushasqankuta rikusqaykiraykullaqa, imaynatachus maymanpis viajashaspa mana mayqen flotamanpis wicharillanchejchu, ajinata.

15. Jóvenes, ¿imatataj ruwawajchej mana waj jóvenes jina imatapis ruwarpanaykichejpaj?

¹⁵ Joven, mana waj jóvenes jina imatapis ruwarpanaykipajqa, yuyayniyoj runa jina “sajra kajta rikuspa” pakakuy (Pro. 22:3). Chantapis tʼukuriwaj waj jóvenes jina ruwajtiyki imaspichus rikukunaykipi (Gál. 6:7). Chantapis kʼumuykukoj sonqoyoj  kay, kurajkunata kasukuspa. Arí, tatasniykita, experienciayoj hermanostapis kasukuypuni (1 Pedro 5:5, 6 leey).

16. ¿Imatataj jóvenes Cristofermanta yachakunkuman?

¹⁶ Cristofermanta parlarina. Payqa bautizakusqanmanta pisi tiemponman uj gimnasioman riyta qallarisqa. Gimnasiopitaj jovenesqa, payta uj equipomanta kananpaj invitasqanku. Cristofertaj niraj chay equipoman yaykushaspa uj ancianowan parlarisqa. Ancianotaj nisqa: “Cristofer, chay equipoman yaykuspa imaspichus rikukunaykipi piensariy. Ichapis chay equipoman yaykuspaqa, imapipis atipaytapuni munanki”, nispa. Ajinata chay anciano yuyaycharejtinpis, Cristoferqa chay equipoman yaykusqapuni. Tiemponmantaj Cristoferqa, reparasqa chay equipopi kanan mana allinchu kasqanta, imajtinchus rikusqa tukuypis maqanakuyllata munasqankuta. Reparallasqataj kausayninta wañuy pataman churashasqanta. Chayrayku watejmanta ancianoswan parlarisqa. Paykunataj Bibliawan yuyaycharisqanku. Chaymanta parlaspa Cristofer nin: “Jehová Diosqa sumajta ancianosnejta yuyaychawarqa. Mana chay ratochu kasukojtiypis, chay yuyaychawasqankoqa sumajtapuni yanapawarqa”, nispa. Reparanchej jina, payqa kʼumuykukoj sonqoyoj kasqanrayku, ancianospa yuyaychasqanta japʼikorqa. Chayrayku joven, kʼumuykukoj sonqoyoj kay yuyaychasusqankuta kasukunaykipaj.

17, 18. 1) ¿Imatataj Jehová Dios jovenespaj munasqa? 2) Jóvenes machuyaspa kusisqa kanaykichejpaj, ¿imatataj ruwanaykichej kasqa? 3) ¿Imatataj Mirianmanta yachakusunman?

¹⁷ Bibliaqa nin: “Wayna, mayta kusikuy tiempoykipi; wayna kashaspa, imaschus allin kajwan kusikuy”, nispa (Ecl. 11:9). Jehová Diosqa joven kashajtiyki kusikunaykita munan. Kay yachaqanapitaj yachakorqanchej kusisqa kanaykipajqa, Jehová Diospaj astawan llankʼanaykipaj kallpachakunayki kasqanta, imata ruwanaykipajpis Jehová Diospi atienekunayki kasqanta. Kunanmantapacha Jehová Diospaj astawan llankʼanaykipaj kallpachakunki chayqa, reparanki imaynatachus Jehová Dios ñanninta pusasusqanta, jarkʼasusqanta, bendecisusqantapis. Chayrayku Diospa Palabranta ukhunchaspa miskʼichikuy, kasukuytaj. Biblia nin: “Wayna kashaspa, pichus Ruwasoj Diosmanta yuyarikuy”, nispa (Ecl. 12:1).

¹⁸ Joven kayqa uj tiempolla. Chayrayku joven kashaspa Jehová Diospaj astawan llankʼanaykipaj kallpachakullaypuni. Ajinamanta machuyaspa Diospaj astawan llankʼasqaykimanta mayta kusikunki. Manataj wakin hermanos jinachu pesachikunki. Wakin hermanosqa mayta pesachikunku joven kashaspa waj imasllata ruwasqankumanta chayri Diospaj astawan llankʼanankupaj mana kallpachakusqankumanta. Mirianmanta parlarina. Paytaqa jovencita kashajtin, uj campeonatopi pujllananpaj invitasqanku sumajta pujllayta yachasqanrayku. Miriantajrí chayman rinanmantaqa precursora regular jina Diospaj astawan llankʼayta qallarisqa. Chay kutimantapacha 30 watasña pasajtinpis, Mirianqa qosanwan khuska Jehová Diospaj astawan llankʼashallanpuni. Mirian nin: “Qhapajyayta, may rejsisqa kaytawan maskʼajkunaqa, mana kusisqaschu kanku. Chayrayku kusisqa kanapajqa, Jehová Diospaj astawan llankʼana, paymantataj runasman willamuna”, nispa.

19. ¿Imajtintaj jovenesta nisunman allinta ruwashasqankuta?

¹⁹ Tukuy jovenesman niyta munayku allintapuni ruwashasqaykichejta, ima llakiypi rikukuspapis Jehová Diospaj astawan llankʼanaykichejpaj kallpachakushasqaykichejmanta. Imajtinchus waj imaspi musphanaykichejmantaqa, Diosmanta willashallankichejpuni. Chantapis mayta kallpachakushankichej mana kay mundomanta runas jina imatapis ruwanaykichejpaj. Amataj qonqaychejchu tukuy ruwasqasniykichej, Diospaj mana qhasipajchu kasqanta. Amallataj qonqaychejchu tukuy hermanospis yanapasunaykichejpaj wakichisqa kashasqankuta. Chayrayku imata ruwanaykichejpajpis Jehová Diospipuni atienekuychej, paytaj allin risunaykichejpaj yanapasonqachejpuni.