1. ¿Imaraykutaj apóstol Pablo cristianosman nisqa astawanraj kallpachanakunanku kasqanta?

ÑAUPA tiempopi apóstol Pabloqa, hebreo cristianosta jinata nerqa: “Ujkuna ujkunataj purajmanta qhawarinakunachej, ajinamanta astawan munakuy kananpaj, allin ruwaykunatataj ruwananchejpaj. Amataj tantakuykunaman riyta saqenachu, imaynatachus wakinkuna yachaykukunku, ajinataqa. Astawanpis purajmanta kallpachanakuna, astawanraj Diospa pʼunchaynin qayllamushasqanta reparaspaqa”, nispa (Heb. 10:24, 25). Chantá phishqa watanman jina, Jehová Diospa jatun pʼunchaynin chayamorqa. Chayqa karqa 70 watapi. Chaypacha Jehová Diosqa romanosnejta Jerusalenta thuñerqa. Cristianostaj Jesuspa nisqanta kasukuspa Jerusalenmanta ayqekorqanku. Cristianosqa ichá chaypiraj repararqanku kallpachanakunanku kasqanta (Hech. 2:19, 20; Luc. 21:20-22).

2. ¿Imajtintaj ujkuna ujkunawan purajmanta qhawarinakunanchej kasqa?

² Noqanchejpis qhepa pʼunchaykunapi kausakushanchej. Tumpamantawantaj Jehová Diospa pʼunchaynin chayamonqa. Chay diataj manchachikuna pʼunchay kanqa (Joel 2:11). Chaymanta parlaspa  profeta Sofonías jinata nerqa: “Tata Diospa jatun pʼunchaynenqa qayllamushanña. Qayllapiña kashan, usqhayllatataj chayamushan”, nispa (Sof. 1:14). Chayrayku ujkuna ujkunawan “purajmanta qhawarinakunachej, ajinamanta astawan munakuy kananpaj, allin ruwaykunatataj ruwananchejpaj” (Heb. 10:24). Arí, purajmanta astawan qhawarinakunachej kallpachanakunapaj.

3. ¿Imatataj apóstol Pablo Romamanta hermanosman nisqa? (20 paginapi dibujota qhawariy).

³ Bibliaqa nin: “Phuteyqa runata mana allinman tukuchin, miskʼi palabrasrí sonqonta tʼikarichin”, nispa (Pro. 12:25). Tukuypis wajkuna kallpacharinawanchejta necesitanchej. Apóstol Pablo nerqa, congregacionta ñaupajman apajkunapis kallpacharinata necesitasqankuta. Apóstol Pabloqa Romapi kaj hermanosman jinata nerqa: “Noqaqa rikuytapuni munashaykichej, Diosmanta qankunawan parlarinaypaj. Ajinamanta sinchʼita sayanaykichejpaj, astawanqa purajmanta kallpachanakunanchejpaj, qankunapis noqapis kikin creeyniyoj kasqanchejrayku”, nispa (Rom. 1:11, 12). Reparanchej jina, apóstol Pablopis kallpacharinata necesitarqa (Romanos 15:30-32 leey).

4, 5. ¿Pikunatataj kallpachasunman?

⁴ Noqanchejqa kallpachasunman precursoresta, misionerosta, Betel Wasipi trabajajkunata, traducción wasipi trabajajkunata, congregacionesta waturejkunata señorankutawan. Paykunaqa wakin imasta saqerqanku Jehová Diosta astawan sirvinankurayku. Chayrayku paykunata kallpacharinanchej tiyan. Kallpacharillasunmantaj pikunachus aswan ñaupajpi precursores, misioneros, congregacionesta waturejkuna karqanku chayri Betel Wasipi sirvirqanku, chaykunata, kusisqallapuni kanankupaj.

⁵ Wakin hermanosqa, “Señorllapi” nisunman Jehová Diosta sirvejllawan casarakuyta munasqankurayku solteros qhepakunku. Chay hermanostapis kallpacharillasunmantaj (1 Cor. 7:39). Qosaspis señorankuta kallpachallankumantaj. Chaypajqa “munakuyki” ninkuman, tukuy ruwasqasninkumantataj agradecekunkuman (Pro. 31:28, 31). Kallpachallasunmantaj creeyninkurayku qhatiykachasqa kaj hermanosta, onqosqa hermanostapis (2 Tes. 1:3-5). Jehová Dioswan Jesuswantaj tukuy chay hermanosta kallpachanku (2 Tesalonicenses 2:16, 17 leey).

6. Isaías nisqanman jina, ¿imatataj kurajkuna nisunman ancianos ruwananku kasqa?

⁶ (Isaías 32:1, 2 leey). Sajra pʼunchaykunapi kausakusqanchejrayku ichá llakikusunman chayri mana allin imaspi yuyasunman. Chayrayku Jesusqa kallpachawanchej ajllasqa cristianosnejta chayri kurajkunanejta nisunman ancianosnejta. Ancianosqa creesqanchejmanta mana patroneschu kanku. Astawanpis kusisqa kananchejpaj yanapawanchej. Munankutaj creesqanchejrayku sinchʼita sayananchejta (2 Cor. 1:24).

7, 8. ¿Ancianos miskʼi parlayllawanchu hermanosta kallpachananku kasqa?

⁷ Ancianosqa Pablomanta mayta yachakunkuman. Pabloqa hermanosta kallpachajpuni. Uj pachataj Tesalónica llajtapi kaj hermanosman jinata qhelqarqa: “Qankunata may jinatapuni munakusqaykurayku, mana Diospa sumaj willaykunasnillantachu qankunaman rejsichiyta munayku, manaqa kausayniykutapis qankunata yanapanaykupaj qoyta munayku”, nispa (1 Tes. 2:8).

⁸ Ancianosqa miskʼi parlaykunawan hermanosta mayta kallpachankuman. Chaywanpis mana chayllatachu ruwananku kashan. Chayrayku apóstol Pabloqa, Éfeso llajtapi kaj ancianosman, jinata nerqa: “Tukuy ruwasqaywan rikucherqaykichej, pisi kallpayojkunata yanapanaykichej kasqanta. Señor Jesuspa nisqantapis yuyarikunaykichej tiyan, pay nerqa: ‘Aswan kusiy wajman qoriy, qorichikunamanta nisqaqa’”, nispa (Hech. 20:35). Apóstol Pabloqa ‘tukuy ima kapusqanta, kausaynintapis kusiywan hermanosrayku tukucherqa’. Pabloqa ruwasqanwan  rikucherqa hermanosninta yanapaytapuni munasqanta (2 Cor. 12:15). Ancianospis Pablo jinallataj ruwasqasninkuwan hermanosta kallpachananku, sonqochanankutaj tiyan, manataj parlaspallachu. Ajinamanta sutʼi yachakonqa, ancianos tukuy hermanosmanta llakikusqankuta (1 Cor. 14:3).

9. ¿Pi jinataj ancianos hermanosta kʼamirinanku chayri yuyaycharinanku kasqa?

⁹ Ancianosqa hermanosta yuyaycharinanku chayri kʼamirinanku tiyan creeypi sumaj sayasqa kanankupaj. Ancianosqa hermanosta kʼachamanta kʼamirinankupaj Bibliapi ashkha ejemplosta tarinkuman. Jesusmantaqa mayta yachakunkuman. Payqa wañuymanta kausarimusqanmanta pisi tiemponman, wakin congregacionesta kʼamirerqa. Chay congregacionesmanta wakenqa Éfeso llajtapi, Pérgamo llajtapi, Tiatira llajtapi, Laodicea llajtapi ima kasharqanku. Jesusqa chay llajtaspi kaj congregacionesta niraj kʼamirishaspa, allin ruwasqasninkumanta kusikusqanta nerqa (Apo. 2:1-5, 12, 13, 18, 19). Laodicea llajtapi kaj congregacionmantaj, jinata nerqa: “Tukuy pikunatachus munakuni, chaykunataqa kʼamini, jasutʼinitaj. Chayrayku juchasniykimanta pesachikuy, Diostataj tukuy sonqo sirviy”, nispa (Apo. 3:19). Ancianosqa kallpachakunanku kashan Jesús jina wajkunata kʼamirinankupaj chayri yuyaycharinankupaj.

10. ¿Imatataj ruwasunman purajmanta kallpachanakunapaj?

¹⁰ Hermanostaqa mana ancianosllachu kallpacharinkuman. Pabloqa tukuy cristianosman nerqa: “Allin kajllata parlaychej, uyarejkuna chaywan kallpachasqa kanankupaj”, nispa (Efe. 4:29). Chayrayku sapa ujninchej kallpachakunanchej tiyan imastachus hermanosninchej necesitasqankuta reparanapaj. Ajinamanta necesitasqankupi yanapanapaj. Apóstol Pabloqa hebreo cristianosman, jinata nerqa: “Liwi makista, llauchʼiyasqa chaki moqostapis kallpachaychej. Chakisniykichejpajpis ñanta cheqanchallaychejpuni. Ajinamanta cojo kajqa mana chʼutachikunanpaj, astawanpis sanoyapunanpaj”, nispa (Heb. 12:12, 13). Jovenespis parlasqankuwan, ruwasqankuwan ima hermanosta kallpachayta atinkuman.

11. ¿Imaynatataj uj kuraj hermanita Martata kallpachasqa?

 ¹¹ Hermananchej Martamanta parlarina. * Payqa uj tiempota may phutisqa kasharqa. Pay nin: “Uj pacha Jehová Dios kallpacharinawanta mañakorqani. Chay diataj uj kuraj hermanitata rejserqani. Payqa kʼachamanta parlapayawarqa. Willariwarqataj uj tiempota paypis noqa jinallataj llakiypi rikukusqanta. Chaytaj reparachiwarqa mana noqallachu ajina llakiypi rikukusqayta”, nispa. Chay kuraj hermanitaqa, ichá mana reparallarqapischu hermananchej Martata maytapuni kallpachasqanta.

12, 13. ¿Yanapawasunmanchu imatachus apóstol Pablo Filipos llajtapi kaj hermanosman nisqan?

¹² Apóstol Pabloqa, Filipos llajtapi kaj hermanosman jinata nerqa: “Qankunaqa Cristopi ujchasqa kashankichej. Wajkunata kallpachankichej, sonqochankichejtaj, paykunata munakusqaykichejrayku. Chantapis wajkunamanta llakikunkichej, paykunata munakunkichej, khuyakunkichejtaj. Chaywanpis sonqoyta kusiywan juntʼachinaykichejpajqa uj sonqolla, kikin munakuyniyoj, sumaj ujchasqas, uj yuyayllataj kanaykichej tiyan. Ama churanakojkuna, nitaj qhasimanta jatunchakojkunaqa kaychejchu. Astawanqa kʼumuykukoj sonqo kaspa, wajkunata qankunamanta aswan kurajta jina qhawaychej. Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej”, nispa (Fili. 2:1-4).

¹³ Tukuypis kallpachakunanchej tiyan hermanosninchejta imaynallamantapis kallpacharinapaj, sonqocharinapaj, yanapanapaj ima. Chaykunatataj hermanosninchejta munakusqanchejrayku ruwananchejpuni kashan.

14. ¿Imaynatataj precursoresta kallpachasunman?

¹⁴ Mayta kusikunchej pikunatachá yanaparqanchej chaykuna Diosta sirvishallasqankutapuni yachaspa. Uj kutipi apóstol Juan nerqa: “Mana imapis astawan kusichiwanchu, wawasniy cheqa kajpi purishasqankuta uyarisqaymanta nisqaqa”, nispa (3 Juan 4). Ashkha precursoresqa, mayta kusikunku estudiosninku Jehová Diosta tukuy sonqo sirvishallasqankutapuni chayri precursores jina sirvishasqankuta yachaspa. Chayrayku uj precursorta kallpacharinapajqa, yuyarichina imaynatachus wajkunata yanapashasqanta.

15. ¿Imaynatataj Diospaj astawan llankʼajkunata kallpachasunman?

¹⁵ Congregacionesta waturej hermanosta kallpachanapajqa, uj cartata jaywarisunman waturikuwasqanchejmanta agradecekuspa. Chantapis kallpachallasunmantaj ancianosta, misionerosta, precursoresta, Betel Wasipi trabajajkunatawan. Paykunataqa Diospaj astawan llankʼashasqankumanta sumajta ruwashasqankuta nisunman.

16. ¿Imaynatataj hermanosta kallpacharisunman?

¹⁶ Hermanosninchejta kallpachariyta atisunman wajkunawan parlariyta manchachikuspapis. Uj hermano imaynachus kashasqanta yachanapajqa, asirispa saludasunman. Pay mana kikinta saludariwajtinchejqa, llakisqa kasqanta reparasun, kallpacharinatataj necesitasqanta yachasun. Chay hermanota kallpacharinapajtaj paywan parlarisunman, llakiyninta willariwajtinchejtaj allinta uyarisunman (Sant. 1:19).

17. ¿Imaynatataj congregacionesta waturej hermano Henrita yanapasqa?

¹⁷ Hermanonchej Henrimanta parlarina. Payqa jovenllaraj. Paypa ashkha familiaresnenqa, Diospa llajtanmanta karunchakusqanku. Tatanpis anciano kashaspa Diospa llajtanmanta karunchakusqa. Chayrayku Henriqa may llakisqa kasharqa. Uj kutitaj congregacionesta waturej hermanoqa, Henri llakisqa kashasqanta reparasqa.  Chayraykutaj payqa Henrita cafeta tomarej pusasqa. Henri llakiyninta willarishajtintaj, congregacionesta waturej hermanoqa sumajta uyarisqa. Parlarisqankutawantaj Henriqa, reparasqa familiaresnin Diospa llajtanman kutinpunankupajqa, pay ni imarayku Diosmanta karunchakunanchu kasqanta. Chantapis leesqa Salmo 46, Sofonías 3:17, Marcos 10:29, 30 versiculosta. Chay versiculostaj mayta sonqochasqa.

18. 1) ¿Imatataj Salomón nisqa? 2) ¿Imatataj apóstol Pablo yuyaychasqa?

¹⁸ Yachakorqanchej jina, hermanosqa Martata, Henritapis tukuy imaymanamanta kallpacharqanku. Noqanchejpis chay hermanos jinallataj hermanosninchejta kallpachasunman. Uj pacha rey Salomonqa jinata nerqa: ‘Pipis tiemponpi parlarejtenqa, ancha sumajpuni’, nispa. Chantá nillarqataj: “Kusiy ñawiwan qhawayqa sonqota kusichin; sumaj willaykunaqa sumajta kallpachan”, nispa (Pro. 15:23, 30). Llakisqa hermanosninchejta kallpachanapajqa, Torremanta Qhawaj revistata leeripusunman chayri Internetpi jw.org nisqamanta uj yachaqanata leeripusunman. Apóstol Pabloj yuyaychasqanman jina ruwallasunmantaj. Pay nerqa: “Purajmanta yachachinakuychej, kallpachanakuychejtaj: salmoswan, Diosta alabanapaj takiykunawan, yupaychanapaj kʼacha takiykunawan ima. Tukuy sonqotaj Jehová Diosman takiychej”, nispa (Col. 3:16; Hech. 16:25). Reparanchej jina, Jehová Diosman takiypis mayta kallpachallawasunmantaj.

19. 1) ¿Imajtintaj astawan purajmanta kallpachanakunanchej kasqa? 2) ¿Imatataj apóstol Pablo ruwananchejta nisqa?

¹⁹ Jehová Diospa jatun pʼunchaynin qayllamushasqanta yachaspa, astawan purajmanta kallpachanakunanchej tiyan (Heb. 10:25). Chayrayku apóstol Pabloj yuyaychasqanta kasukuna. Pay nerqa: “Qankunapura sonqochanakullaychejpuni, kallpachanakuychejtaj, imaynatachus ruwashankichej, ajinata”, nispa (1 Tes. 5:11).