1, 2. 1) Apóstol Pabloj tiemponpi, ¿imajtintaj runas esclavosmanta, kacharichisqa kaymantawan mayta parlaj kanku? 2) Apóstol Pablo nisqanman jina, ¿pikunataj kacharichisqa kayta atinkuman?

ÑAUPA tiempomanta cristianosqa, Romaj japʼiyninpi tiyakorqanku. Romamanta runastaj mayta jatunchakoj kanku leyesninkumanta, suyunkupi justicia ruwakusqanmanta, ni pejpa esclavon kasqankumantawan. Chantapis Roma llajtapeqa, esclavosta sinchʼita trabajachej kanku. Uj tiempopeqa, sapa kinsa runasmanta uj runapuni esclavo karqa. Chayrayku runasqa, wakin cristianospis esclavosmanta, kacharichisqa kaymantawan mayta parlaj kanku.

² Apóstol Pablopis kacharichisqa kaymanta parlallarqataj. Chaywanpis Pabloqa, mana chay tiempomanta runas jinachu tukuy problemasta allinchayta munarqa. Astawanpis sutʼincharqa pikunachus kacharichisqa kayta atisqankuta. Pay nerqa: “Jehová Diospa atiyninwan kajkunataj, kacharichisqa kanku”, nispa (2 Cor. 3:17). Chayrayku apóstol Pablowan waj cristianoswanqa, Diospa Gobiernonpi imaschus kananmanta runasman willarqanku. Yachachillarqankutaj Jesucristo kausayninta qospa, runasta juchamanta kacharichisqanta.

3, 4. 1) ¿Imamantataj apóstol Pablo Iskay kaj Corintios kinsa capitulopi parlasqa? 2) ¿Imatataj ruwananchej kasqa kacharichisqa kanapaj?

 ³ Apóstol Pabloqa Iskay kaj Corintios kinsa capitulopi nerqa, Moisespa uyan lliphipisqanta, Sinaí Orqopi Jehová Dioswan parlamusqanrayku. Moisés chaymanta uraykamusqantawantaj, israelitasqa uyanta mana qhawariyta aterqankuchu, uyan anchata lliphipisqanrayku. Chayrayku israelitasqa manchachikorqanku payman qayllaykuyta. Chay jawataj Moisesqa uyanta velowan qhataykukorqa (Éxo. 34:29, 30, 33; 2 Cor. 3:7, 13). Pabloqa chayta niytawan jinata nerqa: “Chaywanpis Jehová Diosman pillapis kutirikojtenqa, chay veloqa qhechusqa”, nispa (2 Cor. 3:16). Kunantaj qhawarina imatachus apóstol Pablo chaywan niyta munashasqanta.

⁴ Pabloqa nisharqa kacharichisqa kanapaj, Diosman kutirikunanchej kasqanta, nisunman Diosman astawan qayllaykunanchej kasqanta. Imajtinchus Jehová Diospa ñaupaqenpi kaspalla chayri atiyninwan kaspalla kacharichisqa kayta atisunman. Ñaupaj yachaqanapitaj yachakorqanchej, Jehová Dioslla munasqanta ruwayta atisqanta tukuy imata ruwasqanrayku. Chaywanpis israelitasqa, chʼin pampapi kashaspa mana entiendeyta aterqankuchu Diosman astawan qayllaykunanku kasqanta. Paykunaqa velowan qhatasqa jina kasharqanku. Imajtinchus paykunaqa Egiptomanta kacharichisqa kaspaña munaynillankuta ruwarqanku (Heb. 3:8-10).

5. 1) ¿Imasmantataj Jehová Dios kacharichiwasqanchej? 2) Carcelpi kaspapis, ¿Jehová Diosta tukuy sonqo yupaychayta atillasunmanpunichu? 3) ¿Imatataj qhepan parrafospi yachakusunchej?

⁵ Jehová Diosqa atiyninwan mana uj runaj esclavon kaymantachu kacharichiwanchej, manaqa juchaj esclavon kaymanta. Kacharichillawanchejtaj wañuymanta, llulla yachachiykunamanta, llulla religionespa costumbresninkumantawan (Rom. 6:23; 8:2). Jehová Dios jinaqa ni pi juchamanta kacharichiwasunmanchu. Kacharichisqa kasqanchejraykutaj, carcelpi kaspapis Jehová Diostaqa tukuy sonqo yupaychayta atillasunpuni (Gén. 39:20-23). Imaynatachus hermananchej Nancy Yuen, jinallataj hermanonchej Harold King, carcelpi kaspapis Diosta tukuy sonqo yupaychallarqankupuni, ajinata. Paykunaqa, Jehová Diosta mana wasanchasqankurayku unayta carcelpi wisqʼasqa karqanku. Paykunaj kausayninkumanta astawan yachakusunman Internetpi JW Broadcasting nisqaman yaykuspa. Chaypajqa, VIDEOS nisqapi ñitʼiy, HERMANOSPA KAUSAYNINKUMANTA nisqaman yaykuy, LLAKIYKUNATA ATIPANKU nisqa cheqapitaj maskʼay. Qhepan parrafospitaj yachakusunchej, imastachus ruwanata Jehová Diosman agradecekunapaj juchamanta kacharichiwasqanchejmanta.

6. ¿Israelitas Jehová Diosman agradecekusqankuchu Egiptomanta kacharichisqa kasqankumanta?

⁶ Israelitasqa Jehová Diosman mana agradecekorqankuchu paykunata Egiptomanta kacharichisqanmanta, imaynatachus uj runa jatun regalota japʼejtinpis mana agradecekunchu, ajinata. Israelitasqa, kacharichisqa kasqankumanta pisi killasninman, Egiptoman kutipuyta munarqanku. Imastachus Egiptopi saqesqankumantataj yuyarikuyta qallarerqanku. Paykunaqa quejakuspa nerqanku: “Qhasilla mikhoj kayku challwasta. Chantá mikhullajtaj kayku pepinosta, melonesta, puerrosta, cebollasta, ajosta ima. Kunanrí yarqhaywan wañushaykuña, ni imapis kaypeqa kanchu; Maná nisqa tʼantalla tiyan”, nispa. Chayraykuchá Jehová Diosqa manchayta paykunapaj phiñakorqa (Núm. 11:5, 6, 10; 14:3, 4). Kunantaj imastachus paykunamanta yachakuyta atisqanchejta qhawarina.

7. 1) Apóstol Pablo juchasapa runa kasqanmanta phutikuspapis, ¿imatataj nisqa? 2) ¿Imatataj apóstol Pablo jina ruwasunman?

⁷ Apóstol Pabloqa cristianosman nerqa: “Mañakuyku, Diospa jatun khuyakuyninta ama  qhasipaj japʼinaykichejta”, nispa. Jehová Diosqa khuyakuwasqanchejrayku Wawanta qorqa juchamanta kacharichinawanchejpaj (2 Corintios 6:1 leey). Pabloqa juchasapa runa kasqanrayku phutisqa nerqa: “¡Ay, imanallasajtaj! ¿Pitaj wañuyman pusaj cuerpoymanta kacharichiwanqari?”, nispa. Ajinata phutikuspapis, nerqa: “Diosman graciasta qoni. Imaraykuchus paymin kacharichiwan Señorninchej Jesucristonejta”, nispa. Chantá nillarqataj: ‘Diospa atiyninpa leyninpi kayqa, Cristo Jesuswan ujchasqa kananchejpaj kausayta qowanchej. Chaytajrí juchaj leyninmanta, wañuypa leyninmantawan kacharichiwanchej’, nispa (Rom. 7:24, 25; 8:2). Noqanchejpis, apóstol Pablo jina Jehová Diosman agradecekunanchejpuni tiyan juchamanta, wañuymantawan kacharichiwasqanchejrayku. Jehová Diosta llimphu sonqowan, tukuy sonqotaj yupaychayta atinchej Wawannejta juchamanta kacharichiwasqanchejrayku (Sal. 40:8).

8, 9. 1) ¿Jehová Dios kacharichiwasqanchejmanta agradecekunallanchejchu kasqa? 2) ¿Imamantaj jóvenes tanqasqas kankuman?

⁸ Jehová Dios juchamanta kacharichiwasqanchejmanta mana agradecekunallachu, manaqa sajra kajta mana ruwanapaj kallpachakuna. Nitaj ajinata yuyanachu: “Jehová Dios juchamanta kacharichiwanñaqa, perdonallawanqa”, nispa. Imajtinchus apóstol Pedroqa, nerqa mana sajra kajta ruwanapajchu juchamanta kacharichisqa kasqanchejta (1 Pedro 2:16 leey). Chantapis ama qonqanachu, israelitas mayta ñakʼarisqankuta sajra kajllatapuni ruwasqankurayku. Chayrayku allin kajta ruwanallapajpuni mayta kallpachakunanchej tiyan. Imajtinchus Diablowan, sajra runaswanqa, munanku mikhuspa, tomaspa, fiestasman rispa, pujllaspa, modaman jina vestikuspa ima munasqanchejman jina kausananchejta. Chantapis runasqa, imata vendenankupajpis propagandasta ruwanku kʼachita warmiswan, alajito qhariswan. Ajinamanta imatapis rantirpanallanchejpaj mana necesitashajtinchejpis. Chayrayku sumajta qhawarikunanchej tiyan mana munayninchejman jina imatapis ruwarpanapaj.

⁹ Chantapis uj sumaj trabajota japʼinapaj chayri universidadman yaykunapaj tanqasqa kashaspaqa, Pedroj nisqanta yuyarikunanchej tiyan. Pay nerqa juchamanta kacharichisqa runas jina kananchejta, Diospa kamachisnin jina kausakunapaj. Kay tiempopi runasqa, manchayta jovenesta sumaj notasniyoj kanankupaj tanqanku, ajinamanta jatuchaj universidadesman yaykunankupaj. Ashkha runasqa jovenesman ninku profesional kajtinku, sumaj trabajoyoj kanankuta, ashkhata gananankuta, runaspis respetanankuta. Chantapis chay runasqa, ninku universidadpi estudiajkuna astawan ganasqankuta, colegiollata tukojkunamanta nisqaqa. Jovenestaj, ichapis chayrayku universidadpi estudiayta munankuman. Chaywanpis yuyarikunanku tiyan tukuy imatapis mana munasqankuman jinallachu ruwananku kasqanta. Chaymanta astawan parlarina.

10. Kausayninchejpi imata ruwanapajpis, ¿imatataj yuyarikunanchej kasqa?

¹⁰ Wakin hermanosqa ichapis ninkuman: “Universidadpi estudianaqa sapa ujmanta kashan. Sonqonchej mana juchachawanchej chayqa, universidadpi estudiallasunman”, nispa. Tukuypis ajllayta atinchej imatachus estudianata, imatachus kausayninchejpi ruwanatapis. Chaywanpis yuyarikunanchej tiyan mana munaynillanchejtachu ruwananchej kasqanta, imatapis mana allinta ruwajtinchejtaj llakiypi rikukunanchejta. Chayrayku Pablo nerqa: “Tukuy imata ruwayta atinchej, manataj tukuyninchu walej. Tukuy imata ruwayta atinchej, manataj tukuyninchu kallpachan”, nispa (1 Cor. 10:23). Pabloj nisqanqa, sutʼita reparachiwanchej mana munayninchejman jinallachu imatapis ruwana kasqanta, manaqa Diospa munayninman jinapuni.

11. ¿Imapajtaj Jehová Dios juchamanta wañuymantawan kacharichiwasqanchej?

¹¹ Apóstol Pedro nerqa: “Kacharisqa runas jina kaychej. Chaytaj kachun mana sajra kajta ruwanaykichejpajchu, manachayqa Diospa kamachisnin jina kausanaykichejpaj”, nispa. Kayqa sutʼita reparachiwanchej Jehová Dios juchamanta, wañuymantawan kacharichiwasqanchejta, payta tukuy kausayninchejwan yupaychanapaj.

12. ¿Imatataj Noemanta familianmantawan yachakusunman?

¹² Juchamanta wañuymantawan kacharichisqa kasqanchejrayku, tukuy tiemponchejta, kallpanchejtawan churana Jehová Diosta sirvinapaj. Chayta ruwaspaqa mana profesional kaytachu, nitaj sumaj trabajoyoj kaytachu maskʼasunchej, nillataj munayninchejman jinallachu imatapis ruwasunchej (Gál. 5:16). Kunanqa Noemanta familianmantawan parlarina. Paykunaqa, may millay sajra runaspa chaupinpi kausakorqanku. Chaywanpis Noewan familianwanqa, mana chay sajra runaspa ruwasqasninkutachu ruwarqanku. Astawanpis Diospa kamachisqanta ruwanankupaj tiemponkuta churarqanku. Jehová Diosqa, paykunaman kamacherqa uj arcata ruwanankuta, paykunapaj, animalespajpis mikhunata tantanankuta, runasmanpis Jatun Para chayamunanta willanankuta. Bibliataj nin: “Noeqa ruwarqa, Dios imaynatachus payman nisqanman jina”, nispa (Gén. 6:22). Noewan familianwanqa, Diospa munayninta ruwasqankurayku Jatun Para chayamojtin salvakorqanku (Heb. 11:7).

13. ¿Imatataj Jehová Dios kamachiwasqanchej?

¹³ Jehová Diosqa, kamachiwanchej sumaj willaykunata runasman willamunanchejta (Lucas 4:18, 19 leey). Chaywanpis Diabloqa runaspa yuyayninkuta laqhayachin. Chayrayku runasqa llulla religionman, qolqeman, politicaman ima watasqa jina kanku (2 Cor. 4:4). Noqanchejtajrí Jesús jina, chay jina runasta yanapayta atisunman Jehová Diosta rejsinankupaj, payta tukuy sonqo sirvinankupaj ima (Mat. 28:19, 20). Runasman Diospa sutinta rejsichiytaj mana facilchu. Imajtinchus wakin lugaresmanta runasqa,  Diosmanta mana uyarillaytapis munankuchu, wakintaj predicajtinchej mayta phiñakunku. Ajina kajtinpis Diospaj astawan llankʼayta atisunman. Jehová Dios willamunanchejta kamachiwasqanchejraykutaj, allin kanman piensarinanchej imaynasmantachus astawan paypaj llankʼananchejpi.

14, 15. ¿Imatataj ashkha hermanos ruwayta qallarisqanku? (8 paginapi fotosta qhawariy).

¹⁴ Ashkha hermanosqa, qhepa pʼunchaykunapi kausakushasqanchejta reparasqankurayku, kapuyninkuta pisiyachispa precursores jina Diospaj astawan llankʼayta qallarerqanku. Chaytaj tukuyta maytapuni kallpachawanchej (1 Cor. 9:19, 23). Wakin precursoresqa, congregacionninkupi mayta yanapakunku, wakin precursorestaj karu lugaresman yanapakoj ripunku. 2012 watamantapachataj 250.000 hermanosmanta astawan precursores regulares kayta qallarerqanku. Kunantaj jallpʼantinpi 1.100.000 kurajña precursores regulares tiyan. Chay chhika hermanos precursores regulares jina Jehová Diospaj llankʼashasqankoqa, may sumajpuni (Sal. 110:3).

¹⁵ Kunanqa, qhawarinachej imajtinchus wakin hermanos precursores jina llankʼayta qallarisqankuta. Chaypajqa hermanonchej Johnmanta señoran Judithmantawan parlarinachej. Paykunaqa 30 watasta jinaña ashkha lugarespi precursores jina Diosta sirvisqanku. Paykunataqa precursores kanankupaj yanapasqa, imatachus 1977 watapi Precursorespaj Escuelapi nikusqan. Chay escuelapi tukuy precursoresta kallpachasqanku maypichus pisi willajkunalla kanku chayman ripunankuta. Chayta juntʼanankupajtaj Johnwan señoranwanqa, kapuyninkuta pisiyachinanku karqa. Chayrayku Johnqa trabajonmanta cambiakusqa pisillataña trabajananpaj. Chantá Johnwan señoranwanqa, precursores jina waj suyuman ripusqanku yanapakoj. Chaypitaj reparasqanku Jehová Diosmanta mañakusqankurayku, paypitaj atienekusqankurayku chay suyoj costumbresninman yachaykukuyta atisqankuta, parlayninkutapis yachakuyta atisqankuta. Waj suyupi yanapakusqankumantataj John nin: “Precursor jina waj suyupi runasman Diosmanta yachacheyqa, noqapaj uj sumaj bendición. Waj suyupi yanapakuspaqa, repararqani Jehová Diosqa uj kʼacha tata jina mayta yanapawasqanta. Jinapi entienderqani imatapunichus Santiago 4:8 niyta munasqanta. Chaypi nin: ‘Diosman qayllaykuychej, paytaj qankunaman qayllaykamusonqachej’, nispa. Diospa qayllanpi kaspalla kusisqa, sonqo juntʼasqataj kasunman”, nispa.

16. ¿Imatataj ashkha hermanos ruwasqanku Jehová Diosta jatunchanankupaj?

¹⁶ Wakin hermanospis John jina señoran jinataj ashkha watasta precursores regulares kayta atinku. Wakin hermanostaj onqoyrayku chayri waj imasrayku pisi tiempollata precursores regulares kayta atinku. Ashkha hermanostaj Tantakuna Wasista ruwaspa yanapakunku. Estados Unidospi Centralninchej ruwakunanpajpis, casi 27.000 hermanoswan hermanaswan yanapakorqanku. Paykunaqa Centralninchejta ruwaysikunankupaj tukuy tiemponkuta, kallpankutawan churarqanku. Ajinamantataj Jehová Diosta jatuncharqanku. Paykunamantaqa mayta yachakusunman.

17. Jehová Diosta tukuy atisqanchejta sirvejtinchej, ¿ima bendicionestataj japʼisunchej?

¹⁷ Jehová Diosman may agradecesqa kashanchej, payta rejsinapaj yanapawasqanchejmanta, tukuy sonqotaj payta yupaychajta saqewasqanchejmanta. Jehová Diosman may agradecesqa kasqanchejtataj, kausayninchejpi allin kajta ruwaspa rikuchina, tukuy atisqanchejtataj payta sirvinapaj kallpachakuna. Chayta ruwajtinchejqa, Jehová Dios mayta bendeciwasun. Imajtinchus payqa, tukuy ima ruwasqanta juchaj atiyninmanta, wañuymantawan kacharichenqa. Chay jinamanta Diospa wawasnin jina kacharichisqa kasunchej, chaytaj may sumajpuni kanqa (Rom. 8:21).