1, 2. ¿Imaraykutaj Jesús kausayninta qorqa, chanta imajtintaj chayta ruwananpuni karqa?

ADANQA mana pantaj runa karqa. Jinapis juchallikusqanrayku, niña wiñaypaj kausayta aterqachu, nitaj wawasninpis. Payqa yachashaspa juchallikorqa. Jinapis wawasnenqa, mana ima juchatapis ruwarqankuchu. Nitaj Adanpa juchallikusqanmanta juchayojchu karqanku (Rom. 5:12, 14). Adanqa juchallikusqanrayku wañunanpuni karqa. Jinapis, Jehovaqa Adán juchallikusqanmanta pisi tiemponman nerqa, imaynatachus Adanpa mirayninta juchamanta, wañuymantawan kacharichinanta (Gén. 3:15). Aswan qhepamantaj Jehovaqa, Wawanta kay jallpʼaman kachamorqa. Ajinamanta ‘kausayninta qospa, ashkha runasta kacharichinanpaj’ (Mar. 10:45; Juan 6:51).

² Adanqa juchallikuspa wañuyman vendeykuwarqanchej. Jesustaj kausayninta qospa wañuymanta kacharichiwanchej (1 Cor. 15:22). ¿Imajtintaj Jesús kausayninta runasrayku qonanpuni karqa? Imaraykuchus Diospa cheqan kamachiykunasninman jinaqa, ‘kausaymantaqa kausayllawantaj’ pagakunan karqa (Éxo. 21:23-25). Adanqa juchallikusqanrayku juchasapaman tukorqa. Jesustaj chay juchamanta orqhonawanchejpaj, cheqan kausayninta qorqa. Ajinamantataj Jehovaj cheqan kamachiykunasninman jina ruwarqa (Rom. 5:17). Chayrayku ninchej, Jesusqa paypa wañuyninpi creejkunaj ‘Wiñaypaj Tatanku’ kasqanta (Isa. 9:6; Rom. 3:23, 24).

3. Juan 14:31; 15:13 nisqanman jina, ¿imaraykutaj Jesús kausayninta qorqa?

³ Jesusqa, Jehová Diosta, runastapis mayta munakusqanrayku kausayninta qorqa (Juan 14:31; 15:13 leey). Chayraykullataj wañupunankama Tatanta kasukorqa, Tatanpa munaynintapunitaj ruwarqa. Jesús chayta ruwasqanraykutaj, Jehovaqa imatachus runaspaj qallariypi munasqanta juntʼanqa. Jinapis, ¿imajtintaj Jehová saqerqa Wawanta mayta ñakʼarichispa  wañuchinankuta? Kay yachaqanapi chay tapuyman kutichisun. Chantá qhawarisun, apóstol Juan Jesuspa wañuyninmanta mayta agradecekusqanta. Qhawarillasuntaj imaynatachus Jehovaman, Jesusmanwan noqanchejrayku ruwasqankumanta agradecekunata, chaytataj aswan jatunpaj qhawanata.

4. Niraj Jesusta wañuchishaspa, ¿imastataj paywan ruwarqanku?

⁴ Piensarina Jesusta wañucherqanku chay día imaschus kasqanpi. Paytaqa romano soldados presochaytawan mana khuyarispa maqarqanku. Jesustaj aguantakullarqa. Payqa atinman karqa, jarkʼanankupaj ashkha angelesta wajyakuyta. Jinapis mana chayta ruwarqachu (Mat. 26:52-54; Juan 18:3; 19:1). Soldadosqa, Jesusta seqʼospa aychasninta phatacherqanku. Chaymantataj llasa kʼaspita qʼepiriykuchispa, wañuchinanku karqa chayman pusasharqanku. Mana atejtintaj, waj runawan chay kʼaspita munajta mana munajta apacherqanku (Mat. 27:32). Wañuchinanku karqa chay lugarman chayachispataj, soldadosqa Jesusta chakisninmanta, makisninmantawan kʼaspiman clavaykorqanku. Clavasqa kashajtenqa, cuerponpa pesollantaj astawanrajchá heridasninta kicharerqa. Mamanwan amigosninwanqa, payta rikuspa mayta waqarqanku. Jinapis judiosta kamachejkunaqa, paymanta burlakorqanku (Luc. 23:32-38; Juan 19:25). Jesusqa kʼaspipi clavasqa unayta sufrerqa. Chayrayku niña kallpan karqachu, nitaj samaytapis aterqachu. Jesusqa yacharqa Tatanta tukuy imapi kasusqanta. Chayrayku niraj wañupushaspa orakorqa, umanta liwiykuspataj wañuporqa (Mar. 15:37; Luc. 23:46; Juan 10:17, 18; 19:30). Jesustaqa maytapuni ñakʼaricherqanku, kʼumuykachacherqanku, sufrichispataj wañucherqanku.

5. Jesús, ¿imamantataj astawan llakikorqa?

⁵ Jesusqa mana wañuchinankupaj imastachus ruwasqankumantachu llakikorqa. Payqa qhasimanta juchachasqankumanta astawan llakikorqa. Paytaqa Diospa contranta parlashan nispa juchacharqanku (Mat. 26:64-66). Jesuspa sonqonqa chayta nisqankumanta, maytapuni nanarqa. Chayrayku tatanman nerqa: “Tatáy, atikojtenqa, kay copata noqamanta karunchay”, nispa (Mat. 26:38, 39, 42). Jehová Diosqa, munasqa Wawan ñakʼarinanta, wañunanta ima saqerqa, kinsa imasrayku. Chaytataj qhepan parrafospi yachakusun.

6. Jesús kʼaspipi clavasqa wañusqanwan, ¿imamantataj judiosta kacharicherqa?

⁶ Ñaupaj kaj, Jesusqa kʼaspiman warkhusqa karqa, judiosta uj maldicionmanta kacharichinanpaj (Gál. 3:10, 13). Judiosqa Diospa leyninta kasukunankuta nerqanku. Jinapis mana kasukorqankuchu. Chayraykutaj maldecisqa karqanku. Chantapis paykunaqa Adanmanta juchata japʼisqankurayku, wañunanku karqa (Rom. 5:12). Diosqa israelitasman qosqan leypi nerqa, wañuchisqa kananpaj jina juchata ruwaj runaqa, wañuchisqapuni kananta. Wakin kutisqa, wañusqaj cuerponta kʼaspiman clavaykoj kanku, chayri warkhuykoj kanku (Deu. 21:22, 23; 27:26). * Judiosqa Jesusta qhesachaspa kʼaspiman clavaykorqanku. Jinapis Jesuspa wañuynenqa, paykunallatataj maldecisqa kasqankumanta, wañuymanta ima kacharicherqa.

7. ¿Imaraykutaj Jehová, Wawanta ñakʼarichinankuta saqerqa?

⁷ Iskay kaj, Jehovaqa Wawan ñakʼarichisqa kananta saqerqa, Kuraj kaj Sacerdote jina wakichisqa kananpaj. Jesusqa kausayninpi rikorqa, sinchʼi llakiykunapi kashaspa Jehovata kasukuy,  mana facilchu kasqanta. Payqa niñapuni aguantayta atispa, ‘waqarikuspa, qhaparikuspataj’ Diosmanta yanapata mañakorqa. Jesusqa chay jina llakiykunata pasasqanrayku, tukuyta entiendewanchej. Chantapis yanapayta atiwanchej, pruebaman churasqa kashanchej chaykunata. Mayta Jehovaman agradecekunchej, uj Kuraj Sacerdoteta churapuwasqanchejmanta. Chay ‘Kuraj Sacerdoteqa pantaj runas kasqanchejta yachan, chayraykutaj khuyakuwanchej’ (Heb. 2:17, 18; 4:14-16; 5:7-10).

8. ¿Imajtintaj Jehová saqellarqataj Wawanta wañuchinankukama ñakʼarichinankuta?

⁸ Kinsa kaj, Jehovaqa saqerqa Wawanta ñakʼarichinankuta, Satanás llulla kasqanta rikuchinanpaj. Imajtinchus Satanasqa nin, runasqa Diosta interesraykulla sirvisqanchejta, sinchʼi llakiypi kaspataj Diosta wasanchananchejta. Chantá nillantaj ñaupa tatanchej Adán jina, mana Jehová Diosninchejta munakusqanchejta (Job 1:9-11; 2:4, 5). Jehovaqa yacharqa, Wawan nipuni payta wasanchananta. Chayrayku saqerqa wañuchinankukama ñakʼarichinankuta. Jesusqa wañupunankama Jehovata kasukuspa, Satanás llulla kasqanta rikucherqa.

9. ¿Imatá yachakunchej apóstol Juanmanta?

⁹ Jesusqa juchamanta, wañuymantawan kacharichiwanchej. Chayta yachaytaj, cristianosta mayta kallpachawanchej. Ashkha cristianosqa runas paykunaman churanakojtinkupis, chayri imaymana llakiykunapi kaspapis predicallankupuni. Apóstol Juanmanta parlarina. Payqa 60 watas kurajtasina predicarqa, juchamanta wañuymantawan Jesús kacharichiwasqanchejmanta. Juanqa 100 watasniyoj jinaña kashaspa, “Diosmanta Jesusmantawan” predicasharqa (Apo. 1:9). Romamanta kamachejkunataj, chayta mana allinpajchu qhawarqanku. Chayrayku Patmos churuman presota aparqanku. Apóstol Juanqa sinchʼi creeyniyojpuni karqa, tukuy chay llakiytataj aguantarqa.

10. ¿Imajtintaj ninchej apóstol Juan Jesús runasrayku wañusqanmanta mayta agradecekusqanta?

¹⁰ Apóstol Juanqa qhelqasqan librospi Jesusta mayta munakusqanta, runasrayku wañusqanmanta mayta agradecekusqanta ima rikucherqa. Payqa chay librospi 100 kutismanta astawan, Jesuspa wañuyninmanta, imaynatachus chay yanapawasqanchejmanta ima parlarqa. Chay qhelqasqasninmanta ujqa kay kashan: “Sitajchus mayqellanpis juchallikun chayqa, tiyapuwanchej uj yanapawajninchej, paytaj Tata Diospa ñaupaqenpi kashan, chayqa Jesucristo, pichus cheqan kajta ruwan, chay” (1 Juan 2:1, 2). Apóstol Juanqa “Jesusmanta cheqa kajta” willananchejpuni kasqanta nerqa (Apo. 19:10). Sutʼita reparanchej Juanqa, Jesús kausayninta qosqanmanta maytapuni agradecekusqanta. ¿Imaynatá noqanchejpis pay jina ruwasunman? Qhepan parrafospi chayta qhawarisun.

11. ¿Imapitaj piensarinanchej kanman mana juchapi urmanapaj?

¹¹ Mana juchapi urmanapaj kallpachakuna. Jesús juchamanta, wañuymantawan kacharichiwasqanchejmanta agradecekusun chayqa, mana kayta nisunchu: “Juchallikusaj chayqa mana imapis pasanqachu, Jehovaqa perdonallawanqa”, nispa. Astawanpis ima juchapipis urmanapaj jina kashaspaqa, kayta nisunchej: “Jehovawan Jesuswanqa tukuy imata noqarayku ruwanku, ¿imaynatataj kayta ruwaymanrí?”, nispa. Chantapis Jehovamanta mañakuna kallpata, juchapi mana urmanapaj yanapanawanchejta ima (Mat. 6:13).

12. ¿Imaynatá 1 Juan 3:16-18 nisqanman jina ruwasunman?

¹² Hermanosninchejta munakuna. Paykunata  munakuspaqa, Jesús kausayninta qosqanmanta agradecekusqanchejta rikuchinchej. Imaraykuchus Jesusqa, tukuy hermanosninchejrayku wañorqa, manataj noqanchejraykullachu. Ajinamanta hermanosninchejta mayta munakusqanta rikucherqa (1 Juan 3:16-18 leey). Noqanchejpis hermanosninchejwan allinta kausakuspa, paykunata munakusqanchejta rikuchinchej (Efe. 4:29, 31–5:2). Paykunataqa onqosqa kashajtinku, chayri imaymana sinchʼi llakiykunapi kashajtinku yanaparinchejpuni. Jinapis uj hermano sonqonchejta nanachiwajtinchej, ¿perdonayta atillanchejchu? Chayta qhepan parrafopi qhawarisun.

13. ¿Imaraykutaj perdonananchejpuni tiyan?

¹³ Hermanosninchej sonqonchejta nanachiwajtinchej, ichá mana paykunata perdonayta atillanchejchu (Lev. 19:18). Jina kajtenqa, allin kanman kay yuyaychaypi piensarinanchej: “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej” (Col. 3:13). Hermanosninchejta sapa kuti perdonaspaqa, Jehovaman Wawanta noqanchejrayku qosqanmanta mayta agradecekunchej. ¿Imastawantaj ruwasunman Jesuspa wañuyninta jatunpaj qhawasqanchejrayku? Chayta qhepan parrafospi qhawarisun.

14. ¿Imatá ruwasunman Jesuspa wañuyninta jatunpaj qhawasqanchejrayku?

¹⁴ Jehovaman agradecekuna Wawanta runasrayku qosqanmanta. Hermananchej Joannamanta parlarina. Payqa 83 watasniyoj, India suyupitaj tiyakun. Pay nin: “Orakushaspaqa Jehovawan sapa día parlarinipuni Wawanta noqanchejrayku qosqanmanta, maytataj agradecekuni”, nispa. Orakushaspaqa Jehovaman willarina imaspichus chay día pantasqanchejta, perdontataj mañakuna. Jatun juchapi urmanchej chaytaj, ancianoswan yanapachikuna. Paykunaqa sumajta uyariwasun, Bibliawantaj yuyaychariwasun. Chantapis Jehovamanta mañapuwasun perdonanawanchejta. Jehová Diostaj, Jesuspa wañuyninnejta perdonawasun. Ajinamantataj watejmanta payman qayllaykusun (Sant. 5:14-16).

15. ¿Imaraykutaj allin kanman, Jesuspa wañuyninmanta astawan ukhuncharinanchej, chaypi tʼukurinanchej ima?

¹⁵ Jesús noqanchejrayku kausayninta qosqanpi tʼukurina. Hermana Rajamani 73 watasniyoj kashan. Pay nin: “Jesús mayta ñakʼarisqanmanta  sapa leespa, waqarikuni”, nispa. Ichá noqanchejpis, imaynatapunichus Jesús ñakʼarisqanpi piensaspa mayta llakikunchej. Jinapis Jesús noqanchejrayku kausayninta qosqanpi astawan tʼukurispaqa, astawan payta munakusun, jinallataj Jehová Diostapis. Chayrayku allin kanman sapallanchejpi Bibliata estudiashaspa, Jesuspa wañuyninmanta astawan ukhuncharinanchej.

16. Jesuspa wañuyninmanta wajkunaman yachachiy, ¿imaynatá yanapawanchej? (Kay revistaj tapanpi dibujota qhawariy).

¹⁶ Jesús noqanchejrayku kausayninta qosqanmanta wajkunaman yachachina. Jesuspa wañuyninmanta runasman yachachinapajqa, ashkha yanapas tiyapuwanchej. Chaypajqa yanapachikusunman, ¡Diosmanta jamoj sumaj willaykuna! folletopi “¿Pitaj Jesucristo?” nisqa yachaqanawan. Yanapachikullasunmantaj, ¿Imastá Biblia yachachiwanchej? nisqa libropi, “Diosqa noqanchejrayku Wawanta kachamorqa” nisqa yachaqanawan. Sapa wata Jesuspa Wañuyninta Yuyarinapaj tantakuyman rinchej, wajkunatapis kusiywan wajyarinchej. Chayta ruwaspataj, Jesús noqanchejrayku kausayninta qosqanmanta, astawan agradecekunchej. Jehová Diosqa, Jesusmanta wajkunaman yachachinanchejta saqewanchej. Chaytaj may sumajpuni.

17. ¿Imajtintaj Jehová Wawanta noqanchejrayku qosqan may sumajpuni?

¹⁷ Jesús noqanchejrayku kausayninta qosqanta, may jatunpaj qhawanchej, maytataj agradecekunchej. Imajtinchus Jesús chayta ruwasqanrayku, pantaj runas kaspapis Jehovawan sumaj amigos kayta atinchej. Chantapis Jesús kausayninta qosqanrayku, ‘Kuraj Supaypa ruwasqasnin tukuchisqa kanqa’ (1 Juan 3:8). Mana chayllachu, Jehovaqa Jesuspa wañuyninnejta imatachus qallariypi runaspaj munarqa chayta juntʼanqa. Kay jallpʼata uj paraisoman tukuchenqa, tukuy runastaj payta munakuspa sirvenqanku. Jehová Dios Wawanta noqanchejrayku qosqanqa, may sumajpuni. Chayrayku sapa día astawan kallpachakuna, Jesús noqanchejrayku kausayninta qosqanmanta astawan agradecekunapaj.