1, 2. ¿Ima kikinchaytaj yanapawanchej 1 Pedro 2:21 versiculota entiendenapaj?

UJ TATA, wawanwan tʼuru ñanta rishasqankupi piensarina. Tatanqa ñaupajta rin, sumajtataj qhawarikun maynintachus rinanta. Wawantajrí tatanpa qhepanta rispa, maymanchus tatan saruykorqa chayninta rin. Chayta mana ruwanman chayqa, urmanman chayri llustʼanman.

² Kay sajra mundoqa tʼuru ñan jina. Noqanchejtaj chay tʼuru ñanta rej wawa jina kanchej. Jesustajrí tʼuru ñanta rej tata jina. Jehová Diosqa, Jesusta churapuwanchej ñaupaqenchejta rinanpaj. Chayraykutaj Jesuspa qhepanta riyta atillanchej (1 Ped. 2:21). Imaynatachus uj tata wawanta maynintachus rinanta rikuchin, ajinallatataj Jesuspis ñaupaqenchejta rispa, maynintachus rinanchejta rikuchiwanchej. Chayrayku kay yachaqanapeqa, kay kinsa tapuykunaman kutichisun: ¿Ima niytataj munan Jesuspa purisqanta sumajta qhatiy? ¿Imaraykutaj chayta ruwananchejpuni tiyan? ¿Imaynasmantataj chayta ruwasunman?

3. Uj runaj purisqanta qhatina nispa, ¿imamantataj parlashanchej?

³ ¿Imapajtaj Biblia oqharin “purerqa” palabrata chanta “chakispa sarusqan” palabrata? Wakin kutis chayta oqharin, uj runaj kausayninmanta parlanapaj (Gén. 6:9, Biblia Quechua de Cuzce; Pro. 4:26). Chayrayku uj runaj sarusqanta chayri purisqanta qhatina nispaqa, pay jina kausanamanta parlashanchej.

4. Jesuspa purisqanta qhatina nispa, ¿imamantataj parlashanchej?

 ⁴ Jesuspa purisqanta qhatina nispa, ¿imamantataj parlashanchej? Pay jina kausanamanta. Kay yachaqanapaj textopi Pedroqa nerqa: “Cristopis qankunarayku ñakʼarerqa, pay jinallataj ruwanaykichejpaj”, nispa. Jesusmantaqa ashkha imasta yachakusunman (1 Ped. 2:18-25). Arí, yachakusunman imaynachus kasqanmanta, imatachus ruwasqanmanta ima.

5. Juchasapa runas kaspapis, ¿atisunmanchu Jesuspa purisqanta qhatiyta?

⁵ Juchasapa runas kaspapis, ¿atisunmanchu Jesuspa purisqanta qhatiyta? Arí, atisunman. Apóstol Pedroqa, Jesuspa purisqanta sumajta qhatiychej niwanchej, manataj kikisituntapuni ruwanatachu niwanchej. Pantaj runas kaspapis, Jesuspa purisqanta sumajta qhatisun chayqa, imatachus apóstol Juan nisqanta juntʼasun. Pay nerqa purinata, ‘imaynatachus Jesús purerqa, ajinata’ (1 Juan 2:6).

6, 7. ¿Imasta ruwaspataj Jehovaman astawan qayllaykusunman?

⁶ Jesuspa purisqanta qhatispaqa, Jehová Diosman astawan qayllaykusunchej. Jesusqa Jehovaj munayninman jina kausakuspa, payta kusicherqa. Noqanchejpis pay jina ruwasunman (Juan 8:29). Jesuspa purisqanta qhatispaqa, Jehovata kusichisunchej. Jehovataj payman qayllaykunapaj kallpachakojtinchej, qayllaykamullawasuntaj (Sant. 4:8).

⁷ Chantapis Jesusqa, Tatan jinapuni tukuy imata ruwarqa. Chayrayku pay nerqa: “Noqata rikuwajqa Tataytapis rikullantaj”, nispa (Juan 14:9). Jesús jina wajkunawan kʼachas kananchej tiyan. Payqa lepra onqoyniyoj runata khuyakorqa, yawar apaywan onqosqa warmitapis entienderqa. Chantapis familiankumanta pillapis wañupusqanrayku llakisqa kajkunamanta, llakikorqa. Noqanchejpis Jesús  jina kʼachas kaspaqa, Jehová jina ruwashanchej (Mar. 1:40, 41; 5:25-34; Juan 11:33-35). Jehová jina kanapaj astawan kallpachakusun chayqa, payman astawan qayllaykusun.

8. ¿Yanapawasunmanchu Jesuspa purisqanta qhatiy kay sajra mundota atipanapaj?

⁸ Jesuspa purisqanta qhatispaqa, mana kay sajra mundoman chhapukusunchu. Jesusqa wañuchinankupaj uj chʼisi faltashajtin nerqa: “Noqaqa kay mundota atipani”, nispa (Juan 16:33). Chayta nerqa mana kay sajra mundomanta runas jinachu piensasqanrayku, ruwasqanrayku ima. Chantapis payqa mana kay mundopi tukuy imayoj kaytachu maskʼarqa. Astawanpis Jehovata jatunchaypipuni yuyarqa. Noqanchejpis pay jinallataj Jehová Diosta sirviypi yuyananchej tiyan. Manataj saqenanchejchu tiyan, kay sajra mundo paymanta karunchanawanchejta. Chayta ruwasun chayqa, noqanchejpis Jesús jina kay mundota ‘atipasun’ (1 Juan 5:5).

9. ¿Imatataj ruwananchej tiyan wiñay kausayman pusaj ñanllapipuni kanapaj?

⁹ Jesuspa purisqanta qhatisun chayqa, wiñay kausayta japʼisun. Uj pacha uj qhapaj joven, Jesusman nerqa: ‘¿Imatataj ruwanay tiyan wiñay kausayta japʼinaypajri?’, nispa. Jesustaj payman nerqa: “Qhepayta jamuy”, nispa (Mat. 19:16-21). Jesús Cristopuni kasqanta mana creerqankuchu chay judiosmanpis nerqa: ‘Noqaj ovejasneyqa qhepayta jamunku. Noqataj paykunaman wiñay kausayta qoni’, nispa (Juan 10:24-29). Uj pacha Nicodemomanpis nillarqataj: ‘Pillapis noqapi creejqa wiñay kausayniyoj kanqa’, nispa (Juan 3:16). Nicodemoqa Jatun Juntamanta ujnin karqa, Jesuspa yachachisqanmantataj yachakuyta munarqa. ¿Imatá chaymanta yachakusunman? Noqanchejpis Jesuspi creenanchej kasqanta. Chaytataj ruwasunman paymanta yachakusqanchejman jina kausakuspa. Ajinamantataj wiñay kausayman pusaj ñanpi purillasunpuni (Mat. 7:14).

10. ¿Imastataj Jesusmanta yachakunallanchejpuni tiyan? (Juan 17:3).

¹⁰ ¿Imatataj ruwananchej tiyan Jesuspa purisqanta qhatinapaj? Payta sumajta rejsinanchej tiyan (Juan 17:3 leey). Payta rejsiytaqa mana tukusunmanchu. Yachakunallanchejpuni tiyan imaynachus kasqanmanta, imatachus yuyasqanmanta, kamachiykunasninmanta ima. Mashkha unayña testigo kaspapis, Jehovamanta, Wawan Jesusmantawan yachakunallanchejpuni tiyan.

11. Mateo, Marcos, Lucas, Juan libros, ¿imamantataj willawanchej?

¹¹ Jehová Diosqa, Wawanta rejsinapaj Palabranpi tawa librosta qhelqacherqa. Chay librosqa kashan Mateo, Marcos, Lucas, Juan ima. Chaykunapitaj willawanchej Jesuspa kausayninmanta, predicasqanmanta, imatachus  nisqanmanta, imatachus ruwasqanmanta, kʼacha kasqanmanta ima. Chaykunataj Jesuspa saqesqan lastrosnin jina. Chayrayku chay librosqa, Jesuspa kausayninpi tʼukurinapaj yanapawanchej (Heb. 12:3). Chaypajtaj chay tawa librosta estudiananchej tiyan. Chayta ruwaspaqa Jesusta astawan rejsisunchej, ajinamantataj purisqanta qhatisunchej.

12. Jesuspa kausayninmanta parlaj libroswan yanapachikunapaj, ¿imatá ruwananchej tiyan?

¹² Jesuspa kausayninmanta parlaj libroswan yanapachikunapajqa, mana leerpanallachu tiyan. Astawanpis sumajta estudianapaj, tʼukurinapaj ima tiempochakuna tiyan (Jos. 1:8). Qhepan parrafospi yachakusun imaynatachus leesqanchejpi tʼukurinata, yachakusqanchejman jinataj ruwanata.

13. Jesuspa kausayninmanta parlaj librosta, ¿imaynatá leesunman?

¹³ Jesuspa kausayninmanta parlaj librosta leeshaspaqa, rikushasunmanpis jina leena. Leeshaspaqa rikushasunmanpis jina, uyarishasunmanpis jina, chayri chaypipis kashasunman jina leena. Chaypajqa Diospa llajtan qowasqanchej publicaciones yanapawasunman. Chantapis Jesuspa kausayninmanta uj versiculota leeshaspaqa, ñaupaj versiculosninta qhepan versiculosnintawan leerisunman. Paymanta astawan sutʼinchaj yachaqanastapis publicacionespi maskʼarisunman. Chantá Mateo libropi Jesuspa kausayninmanta imatapis leeshanchej chayqa, chaymanta parlaj versiculosllatataj Lucas libropi maskʼarispa kikinchasunman. Jesuspa kausayninmanta parlaj librosta qhelqajkunaqa, kikin imasmanta parlaspapis, sapa uj waj imitastawan yapaykurerqanku.

14, 15. ¿Imaynatataj Jesuspa kausayninmanta yachakusqanchejman jina ruwasunman?

¹⁴ Jesuspa kausayninmanta yachakusqanchejman jina kausakuna (Juan 13:17). ¿Imaynatataj chayta ruwasunman? Chaypajqa Jesusmanta parlaj chay tawa librosta sumajta estudiananchej tiyan. Chantá piensarina chay yachakusqanchejman jina, imaynatachus kausayninchejpi ruwanata. Piensarinallataj chay yachakusqanchejwan imaynatachus  wajkunata yanaparinata. Paymanqa kʼachallamanta willarisunman imatachus Jesusmanta yachakusqanchejta.

¹⁵ Bibliapi uj runaj kausayninmanta leeshaspaqa, rikushasunmanpis jina leerina, chayman jinataj ruwana. Qhepan parrafospitaj imaynatachus chayta ruwanata yachakusun. Chaypajqa uj wajcha viudamanta parlarisun.

16. Marcos 12:41 imatachus nisqanta sutʼinchariy.

¹⁶ Wajcha viudaj kausayninmanta leeshaspaqa, rikushasunmanpis jina leena (Marcos 12:41 leey). Kay 33 watapi 11 de nisán pʼunchaypi, imachus kasqanpi piensarina. Chaypachaqa Jesusta wañuchinankupaj kinsa día jinallaña faltarqa. Jesusqa templopi casi diantinta yachachisharqa. Jinapis fariseos, leymanta yachachejkuna ima, mayta payman churanakorqanku. Paykunamanta wakintaj nerqanku: “¿Pitaj kachamusunki chay imasta ruwanaykipaj?”, nispa. Wakintaj pantachiyta munaspa tukuy imata taporqanku (Mar. 11:27-33; 12:13-34). Chaymanta Jesusqa, Warmispa Pationku nisqa cheqamanñatajsina rerqa. Chaynejpeqa qolqeta churanapaj cajas kasharqa. Jesustaj chaypi tiyaykukuytawan, runas cajasman qolqeta churashasqankuta qhawasharqa. Qhapaj runasqa, chay cajasman ashkha qolqeta churasharqanku. Ichapis Jesusqa chay qayllallapi kasharqa. Chayrayku uyarerqachá qolqeta cajasman churajtinku sonasqanta.

17. Marcos 12:42 nisqanman jina, ¿imatataj uj wajcha viuda ruwarqa?

¹⁷ (Marcos 12:42 leey). Jesús warmispa pationkupi unaysitutaña tiyasqa kashajtin, uj wajcha viuda chayman qayllaykorqa (Luc. 21:2). Payqa manchay wajcha kasqanrayku, imastachus necesitasqanta mana rantikuyta atillajchu. Jinapis payqa qolqe churana cajasman qayllaykuspa, mana reparayllata iskay qolqesitusta churarqa. Chay qolqesqa juchʼuysitus kasqankurayku, manasina sonallarqankupischu. Jesusqa yacharqa, chay viuda pisi valorniyoj iskay qolqesitusta churasqanta. Chay tiempopi chay qolqeqa, aswan pisi valorniyojpaj qhawasqa karqa. Chay qolqeqa, mana ni uj juchʼuy pʼisqetuta rantinapajpis alcanzajchu. Chay pʼisqetutaqa mikhunapaj rantikoj kanku. 

18. Marcos 12:43, 44 nisqanman jina, ¿imatataj Jesús wajcha viuda qolqeta churasqanmanta nerqa?

¹⁸ (Marcos 12:43, 44 leey). Jesusqa imatachus chay viuda ruwasqanmanta tʼukorqa. Chayrayku discipulosninta wajyaspa, paykunaman nerqa: “Kay wajcha viudaqa qolqe churana cajasman aswan ashkhata churan, tukuy churajkunamanta nisqaqa. Tukuypis puchojllataña churanku, kay viudatajrí wajcha kayninpi tukuy kapusqanta churaykun”, nispa. Chay wajcha viudaqa, tukuy kapusqantapuni chay día churarqa. Ajinamantataj Jehová payta cuidananpi atienekusharqa (Sal. 26:3).

19. ¿Imatataj wajcha viudamanta yachakunchej?

¹⁹ Wajcha viudaj kausayninmanta yachakusqanchejman jina ruwana. Payqa ichapis tukuy kapuyninta Jehová Diosman qoyta munarqa. Pisilla kapojtinpis, tukuy kapusqanta Jehová Diosman qorqa. Jesusqa yacharqa chay viudaj churasqanta, Jehová Dios may allinpaj qhawasqanta. ¿Imatataj wajcha viudamanta yachakusunman? Jehová Diosta tukuy sonqo, tukuy kausayninchejwantaj sirvispaqa, payta kusichisqanchejta (Mat. 22:37; Col. 3:23). Payqa mayta kusikun, tukuy atisqanchejta paypaj llankʼajtinchej. Chayrayku payta sirvinapaj, predicacionman rinapaj, reunionesman rinapajpis, tukuy tiemponchejta, kallpanchejta ima churanchej.

20. Wajcha viudamanta yachakusqanchejwan, ¿imaynatá wajkunata yanapasunman?

²⁰ Wajcha viudamanta yachakusqanchejwan,  wajkunata yanaparina. Ichapis uj hermanita onqosqa kasqanrayku, niña ñaupajta jinachu predican. Chayraykutaj ni imapaj valesqanta yuyan. Chayrí ichá uj hermano mana jampiy atina onqoyniyoj kasqanrayku, mana anchata reunionesman riyta atinchu, chayraykutaj mayta llakikun. ¿Imaynatá chay hermanitosta yanaparisunman? Paykunawan parlarishaspaqa, kallpacharinapaj jinapuni parlarina (Efe. 4:29). Paykunaman nina tukuy atisqankuta ruwasqankoqa, Jehová Diosta mayta kusichisqanta. Chantapis paykunaman, wajcha viudamanta imatachus yachakusqanchejta willarina. Chayta ruwaspaqa paykunata mayta kallpachasunchej, Jehovapaj may munasqa kasqankutataj yuyarichisunchej (Pro. 15:23; 1 Tes. 5:11). Wajkunata Jehovapaj pisita llankʼajtinkupis, allinta ruwasqankuta nispaqa, Jesuspa purisqanta qhatishanchej.

21. ¿Imatataj ruwananchej tiyan Jesuspa purisqanta qhatinapaj?

²¹ Jehovaman mayta agradecekunchej Jesusmanta parlaj tawa librosta qhelqachipuwasqanchejmanta. Chay librosqa Jesusmanta ashkha imasta willawanchej. Chaytaj yanapawanchej pay jina ruwanapaj, purisqantataj qhatinapaj. ¿Imatataj ruwasunman chay libroswan sumajta yanapachikunapaj? Sapallanchejpi chayri familianchejwan khuska, chay librosta sumajta estudiana. Chantapis Jesuspa kausayninmanta estudiashaspaqa, rikushasunmanpis jina leena, yachakusqanchejman jinataj kausakuna. Chantapis Jesús imatachus nisqanta kasukunanchej tiyan. ¿Imatá yachakusunman Jesús niraj wañupushaspa imastachus nisqanmanta? Chayta qhepan yachaqanapi yachakusun.