1. ¿Imaynasmantataj Dioswan khuska llankʼasunman?

JEHOVÁ DIOSQA Adanta Evatawan ruwarqa paywan khuska llankʼanankupaj. Chaywanpis paykunaqa juchallikorqanku. Jinamantataj juchasapas kanchej. Juchasapas kaspapis Jehová Dioswan llankʼayta atinchej. Noqanchejqa ‘Dioswan khuska llankʼanchejʼ sumaj willaykunata predicaspa, runasta Jesuspa yachachisqasninman tukuchispa ima (1 Cor. 3:5-9). Jehová Dioswan khuska llankʼaytaj ni imawan kikinchakunchu. Chaywanpis mana predicaspallachu Dioswan llankʼayta atinchej. Chayrayku qhepan parrafospi yachakusunchej Dioswan khuska llankʼayta atisqanchejta familianchejta yanapaspa, hermanosta yanapaspa, wajkunata wasinchejman wajyarikuspa, Diospa llajtanpi tukuy imaynasmanta yanapakuspa, Diosta astawan sirvinapaj kallpachakuspa ima (Col. 3:23).

2. ¿Imajtintaj hermanosninchejwan mana kikinchakunachu kasqa?

² Qhepan parrafosta ukhunchashaspaqa ama wajkunawan kikinchakunachu. Imajtinchus mana tukuychu kikin edadniyoj kanchej, nitaj tukuychu sanitos kanchej, nitaj tukuychu kikin problemaspi rikukunchej, nillataj tukuychu kikin imasta ruwayta atinchej. Chayrayku imastachus wakin hermanos Jehová Diosninchejrayku ruwayta atisqankuta ama kikinchanachu noqanchej imatachus  ruwayta atisqanchejwan. Apóstol Pablopis nerqa: “Sapa ujpis ruwasqanta allinta qhawarikuchun. Ajinamanta paypa ruwasqanmanta kusikonqa. Manataj wajkunawan kikinchakunanchu tiyan”, nispa (Gál. 6:4).

3. ¿Familianchejman necesitasqankuta qonapunichu kasqa?

³ Jehová Diosqa munan familianchejta qhawananchejta. Wakenqa imatachus familianchej necesitasqankuta qonapaj trabajananchej kashan. Casi tukuy mamastaj juchʼuy wawasninkuta qhawanankupaj wasipi qhepakunanku kashan. Wakintaj tatasninchejta qhawananchej kashan viejoyapusqankurayku. Bibliapis niwanchej: “Cheqamantapuni sichus pipis paypata kajkunaman, astawanraj familianmanta kajkunaman, imatachus necesitasqankuta mana qonchu chayqa, creeyta qhesachan. Mana creeyniyoj runamantataj aswan mana allinraj”, nispa (1 Tim. 5:8). Ichapis familianchejrayku ashkha imasta ruwananchej kashan. Ichá chaynejta Jehová Diospaj mana astawan ruwayta atisqanchejrayku llakikusunman. Chaywanpis mana chaymanta llakikunanchejchu tiyan. Imajtinchus familianchejman necesitasqankuta qospaqa Diosta kusichishanchej (1 Cor. 10:31). 

4. ¿Imaynatataj tatas Jehová Dioswan llankʼankuman?

⁴ Tatasqa Jehová Dioswan llankʼankuman wawasninkuta Diosta astawan sirvinankupaj yanapaspa. Ashkha tatasqa chayta ruwarqanku. Kunantaj wawasninkoqa Diospaj astawan llankʼashanku. Wakenqa misioneros jina sirvishanku, wakintaj precursores jina karu lugarespi yanapakushanku, wakinrí Betel wasipi sirvishanku. Tatasqa ichapis llakikunkuman wawasninku karupi sirvishasqankumanta. Chaywanpis Dios jina yuyaj tatasqa, wawasninku karupi sirvejtinkupis paykunata kallpachanku Diospaj astawan llankʼanallankupajpuni. Imajtinchus mayta kusikunku wawasninku Jehová Diosta ñaupajman churashasqankuta rikuspa (3 Juan 4). May chhika tatasqa Ana jina ninku. Anaqa Eliman nerqa: “Kunanqa kay wawata Tata Diosman pusampuni; kawsanankamaqa, Tata Diospata kachun”, nispa. Ana jina ruwaj tatasqa sonqo juntʼasqa sientekunku (1 Sam. 1:28).

5. ¿Imaynasmantataj hermanosninchejta yanapasunman? (23 paginapi fotosta qhawariy).

⁵ Familianchejmanta ni pita qhawananchejchu kajtenqa, machitu hermanosta chayri onqosqa hermanosta yanaparisunman, paykunata cuidajkunatapis. Chayrayku allin kanman congregacionninchejmanta hermanospi piensarinanchej. Qhawarisunman pikunachus yanapata necesitashasqankuta. Ichapis uj hermanita tatanta cuidashanman. Jina kajtenqa tatanta qhawaripusunman chay hermanita ruwanasninta ruwanankama. Chantapis wakin hermanosninchejta reunionesman pusasunman chayri tiendaman acompañasunman, hospitalmanpis visitarej risunman. Chay jinasmanta yanapakojtinchejqa Jehová Dios noqanchejnejta orakusqankuman kutichishanman (1 Corintios 10:24 leey).

6. Griego parlaypi, ¿imatawan niyta munasqa “wasinchejman wajyarikuy”?

⁶ Dioswan khuska llankʼajkunaqa, wasinkuman wajyarikuyta yachanku. Griego parlaypi “wasinchejman wajyarikoyqa”, niyta munallantaj “forasteroswan kʼacha kay” (Heb. 13:2, notanta qhawariy). Bibliapeqa niwanchej imaynatachus wakin runas wajkunata wasinkuman wajyarikusqankuta chayri wajkunawan kʼachas kasqankuta (Gén. 18:1-5). Chayrayku atishaspaqa, tukuyta yanapana creeypi hermanosninchejpis manapis kachunku (Gál. 6:10).

7. ¿Walejchu kasqa congregacionesta waturikoj hermanosta alojarinanchej?

 ⁷ Diospa munayninta ruwanchej congregacionesta waturikoj hermanosta wasinchejman wajyarikuspa (3 Juan 5, 8 leey). Paykunata wajyarikojtinchejqa, purajmanta kallpachanakusunchej (Rom. 1:11, 12). Olaf sutiyoj hermanomanta parlarina. Pay joven kashajtenqa, uj superintendente congregacionninta waturikushaspa ni maypi alojakuyta atisqachu. Chayrayku hermanonchej Olafqa, tatasninta tapurisqa congregacionesta waturikoj hermanota alojarinanpaj. Tatasnenqa mana Testigos kaspapis nisqanku: “Jatun sillonpi puñunayki kajtenqa, chay hermanota alojayta atiwaj”, nispa. Paytaj “ya” nisqa, jinamanta chay hermanota alojasqa. Chay semanamanta parlaspa hermanonchej Olaf nin: “Congregacionesta waturikoj hermanowan sapa paqarin tempranito jatarikoj kayku. Desayunashaspataj tukuy imamanta parlarej kayku. Chay hermanoqa maytapuni kallpachawarqa. Chayrayku Diospaj astawan llankʼayta munarqani”, nispa. Jinamantataj hermanonchej Olafqa, 40 watasta misionero jina ashkha suyuspi sirvisqa.

8. Wajkuna mana agradecekuwajtinchejpis, ¿imajtintaj kʼachaspuni kananchej kasqa?

⁸ Mana rejsisqanchej runasta munakunanchej tiyan, mana agradecidos kajtinkupis. Uj señoramanta parlarina. Payqa Yésica sutikun, Ecuadormantataj. Kunantaj Españapi kashan. Uj hermanita chay señoraman Bibliamanta yachachishajtin, chay señoraqa waqarikusqa. Hermanataj chay señorata nisqa: “¿Imajtintaj waqashanki?”, nispa. Chay señorataj nisqa: “Niraj kayman jampushajteyqa, manchay pobre karqani. Uj kutipi, ni imapis kapuwarqachu imillitayman mikhuchinaypaj, yakitullata jaywarerqani. Wawitayta marqʼarikuspa puñuchishajtiytaj, Diospa yanapanta mañakorqani. Chantá uj ratonman iskay Testigos wasiyta takaykamorqanku, uj revistatataj jaywariwarqanku. Noqataj phiñakuspa chay revistata llikʼiytawan paykunata qhapariykorqani: ‘Kaytachu wawayman mikhuchisaj’, nispa. Chantá chay hermanasqa sonqochayta munawarqanku. Phiñasqa kasqayrayku mana uyarillarqanipischu. Chantá chay hermanasqa uj ratonman canastapi mikhunata wasi punkuyman saqepuwasqanku. Kunanqa chayta yuyarikuspa waqashani. Imajtinchus pesachikuni chay hermanitasta wijchʼusqaymanta, Diosqa chay hermanitasnejta yanapashawarqa. Kunantaj Diosta sirviytapuni munani”, nispa. Arí, chay señoraqa Diosta sirviyta munarqa, chay iskay hermanitas paywan kʼachas kasqankurayku (Ecl. 11:1, 6).

9, 10. 1) ¿Imaynasmanta yanapakuspataj israelitas Diosta yupaychasqanku? 2) ¿Imaynasmanta yanapakuspataj congregacionninchejpi Diosta yupaychasunman?

⁹ Unay tiempopi israelitasqa tukuy imaymanamanta yanapakuspa Diosta yupaychayta aterqanku (Éxo. 36:2; 1 Cró. 29:5; Neh. 11:2). Noqanchejpis kay tiempopi tukuy imaymanamanta yanapakuspa Diosta yupaychayta atinchej. Diostaqa jatunchasunman tukuy tiemponchejwan, kapuwasqanchejwan, imastachus ruwayta yachasqanchejwan ima. Chay jinamanta Diosta jatunchaspaqa sonqo juntʼasqa kasunchej, ashkha bendicionestataj japʼisunchej.

¹⁰ Hermanosqa, Dioswan khuska llankʼayta atinku, ancianos chayri siervos ministeriales kanankupaj kallpachakuspa (1 Tim. 3:1, 8, 9; 1 Ped. 5:2, 3). Chay ruwaykunata japʼiyta munajkunaqa, hermanosta yanapayta, kallpachayta ima munanku (Hech. 6:1-4). Ichapis ancianosqa, niwasunman acomodador jina yanapakunanchejta chayri publicacionesmanta, territoriosmanta encargakunanchejta. Chantapis ichá niwasunman  tantakuna wasita allinchaspa chayri llimphuchaspa yanapakunanchejta, manachayri waj imasta ruwananchejta. Congregacionpi chay jinasmanta yanapakoj hermanosqa kusisqa kanku.

11. ¿Pikunataj hermananchej Margieta yanapasqanku?

¹¹ Tantakuna Wasista ruwaysikuspa yanapakojkunaqa ashkha amigosta ruwakunku. Hermananchej Margiemanta parlarina. Payqa 18 watasta Tantakuna Wasista ruwaysikuspa yanapakusqa. Chay wataspeqa ashkha jovencitasta construccionmanta yachachisqa. Chaymanta parlaspa nin: “Jovencitaswan trabajaspaqa creeypi mayta kallpachanakoj kayku”, nispa (Rom. 1:12). Margie llakiykunapi rikukoshajtenqa, chay amigasnin mayta yanapasqanku, sonqochasqankutaj. Noqanchejpis Tantakuna Wasista ruwaysikuspa yanapakusunman construccionmanta yachaspapis manapis.

12. ¿Imaynasmantataj desastrespi rikukoj hermanosta yanapasunman?

¹² Inundaciones, terremotos chayri ima desastrellapis kajtenqa hermanosninchejta yanapasunman. Paykunata yanapaspaqa Dioswan llankʼashanchej. Hermanosninchejtaqa ichá qolqesitunchejwan yanapasunman (Juan 13:34, 35; Hech. 11:27-30). Yanapallasunmantaj wasisninkuta llimphuchaspa, allinchaspa chayri watejmanta sayachispa. Hermananchej Gabrielamanta parlarina. Payqa Polonia suyumanta. Uj inundación kasqanraykutaj wasinta pierdesqa. Ajinata pierdespapis, mayta kusirikusqa chay lugarmanta ashkha hermanos yanapaj risqankurayku. Pay nin: “Imastachus pierdesqaymantaqa mana llakikunichu. Astawanpis kusikuni hermanos yanapawasqankumanta. Paykuna yanapawasqankuta rikuspaqa repararqani Diospa llajtanmantapuni kasqayta, Diospa llajtallanpitaj kusisqa kanayta”, nispa. May chhika hermanospis chay hermana jinallataj ninku hermanos mayta kallpachasqankuta. Chay jina llakiypi rikukoj hermanosta yanapajkunapis sonqo juntʼasqa kanku, kusisqastaj (Hechos 20:35; 2 Corintios 9:6, 7 leey). 

13. ¿Imatataj uj hermanita nisqa wajkunata yanapasqanmanta?

¹³ Hermananchej Stephaniewan waj hermanoswanqa, waj suyumanta ayqekamoj  hermanosta yanapasqanku. Chay hermanosqa guerrarayku Estados Unidosman ayqekusqanku. Stephaniewan waj hermanoswanqa ayqekamoj hermanospaj wasista, imastachus necesitasqankutawan maskʼapusqanku. Chaymanta parlaspa Stephanie nin: “Ayqekamoj hermanitosqa kusisqa kasharqanku yanapasqaykumanta, maytataj agradecekuwarqayku. Chayta rikuspataj kusiymanta waqarikorqayku. Paykunaqa yuyarqanku noqayku paykunata yanapasqaykuta. Chaywanpis paykuna noqaykuta mayta kallpachawarqayku. Imajtinchus rikorqayku paykuna manchay ujchasqa kasqankuta, creeypi sumaj sayasqa kasqankuta, Diospitaj sinchʼita atienekusqankuta. Chayta rikoyqa yanapawarqayku Jehová Diosta astawan munakunaykupaj, imastachus llajtannejta qowasqanchejtataj jatunpaj qhawanaykupaj”, nispa.

14. ¿Imatataj Isaías nisqa Jehová Diosman?

¹⁴ Jehová Diostaqa mayllapipis sirviyta atinchej. Dioswan astawan llankʼayta munaspaqa, pisi hermanoslla kanku chayman ripusunman. Karu lugaresman ripoj hermanosqa profeta Isaías jina ninku. Isaías nerqa: “Señorta parlajta uyarerqani: Pitataj kachasajri? Pitaj nisqaykuta willamonqari? nispa nejta. Chantá noqa nerqani: Kaypi kani, noqata kachaway ari”, nispa (Isa. 6:8). Noqanchejpis Isaías jina Diospa llajtanpi yanapakusunman. Chayrayku qhawarinachej imaynasmantachus Diospaj astawan llankʼayta atisqanchejta.

15. ¿Imatataj ruwasunman Diospaj astawan llankʼanapaj?

¹⁵ Jesusqa predicanamanta parlaspa jinata nerqa: “Cheqamanta cosechanaqa ashkha, oqharejkunarí pisilla kanku. Chayrayku cosechaj Dueñonmanta mañakuychej cosechanman oqharejkunata kachamunanpaj”, nispa (Mat. 9:37, 38). Chayrayku precursores jina pisi hermanoslla kanku chayman yanapakoj ripusunman chayri wajkunata yanapasunman Diosta karu lugarespi sirvinankupaj. May chhika hermanosqa precursores jina karu lugaresman yanapakoj riporqanku Jehová Diosta, runasta ima munakusqankurayku. Noqanchejpis waj jinasmanta Jehová Diospaj astawan llankʼasunman. Chayta ruwajtinchejqa kusisqallataj kasunchej.

16, 17. ¿Imaynasmantawantaj astawan Jehová Diosta sirvisunman?

¹⁶ Diosta astawan sirvillasunmantaj Betel wasipi sirvispa, construccionpi yanapakuspa ima. Chaykunapeqa wakin diasllatapis yanapakusunman. Chaykunapi yanapakunapajqa, wakichisqa kananchej tiyan mayllapipis sirvinapaj, ima trabajollatapis japʼinapajtaj. Jehová Diosqa jatunpaj qhawan payta tukuy imaymanasmanta sirvinankupaj kallpachakojkunata (Sal. 110:3).

¹⁷ Diosta sumajta sirvinapaj wakichisqa kayta munanchej chayqa, Diospa Gobiernonmanta Willajkunapaj Escuelaman risunman. Chay escuelamanqa precursores riyta atinku. Ajinamanta Diosta astawan sirvinallankupajpuni. Chay escuelaman rejkunaqa, wakichisqa kananku tiyan mayllamanpis kachasqa kanankupaj. Chayrayku tukuypis kallpachakusunman chay escuelaman rinapaj (1 Cor. 9:23).

18. ¿Kusisqa kayta atisunmanchu Dioswan llankʼaspa?

¹⁸ Jehová Diosta yupaychasqanchejrayku tukuypis kallpachakunanchej tiyan wajkunawan kʼachas kanapaj, qorikuyta yachanapaj, tukuyta munakunapaj ima. Ajinamanta kusisqas, sonqo tiyaykusqastaj kasunchej (Gál. 5:22, 23). Ima problemapi rikukuspapis kusisqas kayta atisunman Jehová Dios jina wajkunawan kʼachas kaspa, paywan khuska llankʼaspa ima (Pro. 3:9, 10).