1. ¿Pikunataj yanaparqanku Filipos llajtapi ñaupaj congregación rikhurinanpaj?

APÓSTOL Pablowan, Silaswan, Lucaswan, Timoteowan ima, Romaj atiyninpi kaj Filipos llajtaman chayarqanku. Chaypitaj paykunaqa, repararqanku ashkha runas Diospa Gobiernonmanta yachakuyta munasqankuta. Paykunaqa chay llajtapi uj congregacionta rikhuricherqanku. Chay llajtamanta cristianostaj, ichapis Lidiaj wasinpi tantakuyta qallarerqanku. Payqa wajyarikuyta yachajpuni (Hech. 16:40).

2. ¿Ima problemaspitaj mosoj congregación rikukorqa?

² Filipos llajtapi mosoj congregacionmanta hermanosqa, niraj imapi problemaspi rikukorqanku. Satanasqa cheqa kajman churanakoj runasta tanqarqa, Pablota compañerosnintawan mana predicajta saqenankupaj. Chay llajtamanta kamachejkunataj, Pablotawan Silastawan presocharqanku, varawan seqʼorqanku, carcelmantaj wisqʼaykorqanku. Chantá qʼayantin kachariporqanku. Chaymanta llojsimuytawantaj, Pablowan Silaswanqa mosoj cristianosta kallpacharej rerqanku. Chaymantataj Pablo, Silas, Timoteo ima, chay llajtamanta riporqanku, Lucastajrí chaypisina qhepakorqa. Filiposmanta mosoj cristianostaj, Jehová Diospa atiyninpa yanapayninwan payta sirvillarqankupuni (Fili. 2:12). Pabloqa chayta yachaspa mayta kusikorqa.

3. Filipenses 1:9-11 nisqanman jina, ¿imastataj Pablo mañakorqa?

³ Filipos llajtapi mosoj congregación rikhurisqanmanta chunka watanman jina, Pabloqa filipensesman cartanta qhelqarqa. Chay cartanta leerispataj, reparanchej Filiposmanta hermanosta mayta munakusqanta. Payqa chay cartanpi nerqa, paykunata mayta faltachasqanta, Cristo Jesús jinataj  paykunata munakusqanta (Fili. 1:8). Pabloqa paykunapaj mañapusqantapis nillarqataj. Pay nerqa: ‘Diosmanta mañakullanipuni, munakuyniykichej astawan astawan wiñananta, imaschus aswan allin imas kasqanta reparanaykichejta ima. Mañakullanitaj mana kʼaminas kanaykichejpaj, nitaj wajkunata urmachinaykichejpaj. Diosmanta mañakullanitaj, cheqan ruwaykunata astawan astawan ruwanaykichejpaj’, nispa. Kunanpis Pabloj nisqanwan mayta yanapachikusunman (Filipenses 1:9-11 leey). Kay yachaqanapeqa, yachakusunchej imastachus Pablo mañakuyninpi nisqanta, imaynatachus chayman jina kausakunanchejta ima.

4. 1) Kay 1 Juan 4:9, 10 nisqanman jina, ¿imatá Jehová Dios ruwasqa munakuwasqanchejrayku? 2) ¿Jehová Diosta tumpallatachu munakunanchej kasqa?

⁴ Jehová Diosqa mayta munakuwasqanchejrayku, Wawanta juchasninchejrayku wañunanpaj kachamorqa (1 Juan 4:9, 10 leey). Ajinata munakuwasqanchejta yachayqa, payta munakunapaj yanapawanchej (Rom. 5:8). Chantá, ¿Jehová Diosta tumpallatachu munakunanchej tiyan? Jesusqa imaynatachus Diosta munakunamanta uj fariseoman nerqa: “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwantaj”, nispa (Mat. 22:36, 37). Jehová Diosninchejtaqa tukuy sonqo munakunanchej tiyan. Chay munakuyninchejtataj sapa día wiñachinanchej tiyan. Pabloqa filipensesman nerqa, ‘munakuyninku astawan wiñananta’. Qhepan parrafospi, Jehová Diosta astawan munakunapaj imatachus ruwananchejta yachakusun.

5. ¿Imatá ruwasunman Jehová Diosta astawan munakunapaj?

⁵ Jehová Diosta munakunanchejpajqa, payta rejsinanchej tiyan. Biblia nin: “Wajkunata mana munakojqa mana Diosta rejsinchu, imaraykuchus Diosqa munakuymin”, nispa (1 Juan 4:8). Apóstol Pablo nerqa, Jehová Diosmanta astawan yachakojtinchej, pay jinataj imatapis ‘sumajta reparayta’ yachajtinchej, payta astawan munakunanchejta (Fili. 1:9). Bibliata estudiayta qallarishaspaqa, Jehová Diosmanta wakin imasta yachakorqanchej. Chaytaj payta munakunapaj yanapawarqanchej. Jehová Diosta astawan rejsispataj, payta astawan munakorqanchej. Chayrayku Bibliata sumajta estudiayqa, chaypitaj tʼukureyqa may sumajpuni (Fili. 2:16).

6. ¿Imatá ruwananchej tiyan 1 Juan 4:11, 20, 21 nisqanman jina?

⁶ Jehová Dios munakuwasqanchejta yachayqa, hermanosninchejta munakunapaj yanapawanchej (1 Juan 4:11, 20, 21 leey). Tukuyninchej Jehová Diosta sirvishanchej, pay jina kanapaj kallpachakushanchej, Jesús jinataj ruwayta munanchej. Chayrayku ichá yuyanchej, hermanosninchejta munakuyta atinallanchejta. Jesusqa mayta munakuwasqanchejrayku kausayninta qorqa. Jinapis Jesús munanakunata kamachiwasqanchejtaqa, wakin kutis mana kasukuyta atillanchejchu. Chayrayku imachus Filiposmanta congregacionpi kasqanta qhawarina.

7. ¿Imatá yachakunchej apóstol Pablo Evodiaman Sintiquemanwan yuyaychasqanmanta?

⁷ Evodiawan Sintiquewanqa, apóstol Pablowan khuska Jehová Diosta sirvispa llankʼarqanku. Jinapis ichá phiñanakusqankurayku niña amigaschu karqanku. Pabloqa filipensesman apachisqan cartapi, paykunata sutisninkuta oqharispa yuyaycharqa, nerqataj “uj yuyaylla” kanankuta (Fili. 4:2, 3). Chantapis apóstol Pabloqa tukuynin congregacionman nerqa: “Tukuy imata ruwallaychejpuni mana thutuspa, nitaj churanakuspa”, nispa (Fili.  2:14). Pabloj yuyaychasqanqa, chay iskay hermanasta, chay congregacionpi kajkunatawan yanaparqachá astawan munanakunankupaj.

8. 1) ¿Imaraykutaj hermanosninchejta mana munakuyta atillasunmanchu? 2) ¿Imatataj hermanosninchejta munakunapaj ruwasunman?

⁸ Noqanchejpis Evodia jina, Síntique jinataj hermanospa pantasqasninkuta qhawasun chayqa, mana paykunata munakuyta atillasunchu. Imajtinchus tukuypis pantanchejpuni. Hermanosninchejpa pantasqasnillankuta qhawasun chayqa, niña paykunata munakusunchu. Kaypi piensarina: Ichá uj hermanoqa salonta pichaysinawanchejta qonqapunman. Chayraykutaj paypaj phiñakusunman. Paypa tukuy pantasqasninta yuyarikusunman chayqa, paypaj astawan phiñakusunman, niñataj munakusunmanchu. Ajinapi rikukuspaqa, Jehová Diospi piensarina. Payqa noqanchejpa pantasqasninchejta, chay hermanonchejpa pantasqasnintapis qhawashan, jinapis paytapis noqanchejtapis munakuwanchej. Chayrayku hermanosninchejta Jehová Dios jina munakuna, paykunaj allin ruwasqasninkutataj qhawana. Hermanosninchejta munakunapaj kallpachakusun chayqa, astawan ujchasqa kasun (Fili. 2:1, 2).

9. ¿Imastaj aswan allin imas kashan?

⁹ Pabloqa Diospa atiyninnejta filipensesman kamacherqa, “imaschus aswan allin imas kasqanta” reparanankuta. Noqanchejmanpis chayllatataj kamachiwanchej (Fili. 1:10). Chay allin imasqa kashan, Jehová Diospa sutinta jatunchay, munaynin juntʼakunan, congregacionpi ujchasqa, allintataj kausakunanchej (Mat. 6:9, 10; Juan 13:35). Kausayninchejpi chay imasta ñaupajman churasunchej chayqa, Jehová Diosta munakusqanchejta rikuchisunchej.

10. ¿Imatataj ruwasunman Jehová Diospa ñaupaqenpi mana kʼaminas kanapaj?

¹⁰ Pablo nillarqataj “mana kʼaminas” chayri mana juchayoj kananchejta. Chaywanqa mana nisharqachu ni imapi pantananchejta. Noqanchejqa mana Jehová Dios jina kayta atisunmanchu. Payqa mana pantanchu. Jinapis astawan munakuyniyoj kanapaj kallpachakojtinchej, allin imastataj reparayta yachajtinchej, Jehová Diospa ñaupaqenpi mana kʼaminas kasunchej. Jehová Diosta, hermanosninchejta ima munakusqanchejta rikuchisunman, hermanosninchejta mana pantachinapaj kallpachakuspa.

11. ¿Imaraykutaj mana wajkunata pantachinanchejchu tiyan?

¹¹ Pablo ‘wajkunata mana pantachinanchejta’ nisqanta kasukunanchej tiyan. Ichapis imawanchus kusirikusqanchej, imaynatachus vistikusqanchej, chayri imapichus llankʼasqanchej, wajkunata pantachinman. Imatachus ruwasqanchej mana juchachu kajtinpis, wajkunaj sonqonkuta nanachinman, pantachinmantaj chayqa, niña allinchu kanman. Jesús nerqa: ‘Sichus pipis ujninta juchaman urmachinman chayqa, aswan allin kanman chay runapajqa molino rumita kunkanman warkhuykuspa, qochaman wijchʼuykunanku’, nispa (Mat. 18:6).

12. ¿Imatataj uj qhariwarmi precursoresmanta yachakusunman?

¹² Uj qhariwarmi precursoresmanta parlarina. Paykunaqa wajkunata mana pantachinankupaj kallpachakorqanku. Congregacionninkupeqa, uj qhariwarmi recienllaraj bautizakorqanku. Paykunaj familiankupeqa, ashkha imasta juchapaj qhawaj kanku. Chayrayku yuyarqanku cristianosqa mana cineman peliculasta qhawaj rinankuchu kasqanta, wakin películas allillan kajtinpis. Chayrayku paykunaqa, qhariwarmi precursores peliculata qhawaj  risqankuta yachaspa phiñakorqanku. Qhariwarmi precursorestaj, chayta yachaspa niña cineman rerqankuchu. Chaytataj ruwarqanku recién bautizasqa qhariwarmi, imachus allin, imatajchus mana allinchu kasqanta aswan allinta reparayta yachanankukama (Heb. 5:14). Ajinamanta precursoresqa, rikucherqanku paykunata mana simillamantachu munakusqankuta (Rom. 14:19-21; 1 Juan 3:18).

13. ¿Imata ruwaspataj wajkunata juchaman urmachisunman?

¹³ Wajkunata pantachillasunmantaj juchaman urmanankupaj tanqaspa. Anchata tomaj runa Bibliata estudiayta qallarisqanpi piensarina. Payqa mayta kallpachakuytawan chay viciota saqepun, yachantaj ni uj chhikitallatapis tomananchu kasqanta. Chantá payqa kausayninta rato cambiaytawan bautizakun. Aswan qhepaman, uj hermanoqa payta waj hermanostawan wasinman invitan. Wasinpitaj chay hermanoqa, mosoj hermanoman uj vaso cervezata jaywarispa nin: “Qanqa bautizasqaña kanki, Jehová Diostaj atiyninta qosunkiña. Chay atiypa poqoyninmanta ujnintaj, munayninchejwan mana atipachikuy kashan. Munayniykiwan mana atipachikunki chayqa, maychus kajllata tomanki”, nispa. Chay mosoj hermano tomanman chayqa, ichapis watejmanta chay vicioman urmanman.

14. ¿Imaynatá reuniones yanapawanchej Filipenses 1:10 nisqanman jina ruwanapaj?

¹⁴ Reunionesninchejqa, yanapawanchej Filipenses 1:10 nisqanman jina ruwanapaj. Ñaupaj kaj, yuyarichiwanchej imastachus Jehová Dios aswan allinpaj qhawasqanta. Iskay kaj, tantakuypeqa yachakusqanchejman jina  kausakuyta yachakunchej, ajinamanta mana kʼaminas kanapaj. Kinsa kaj, reunionesqa yanapawanchej munakuyniyoj kanapaj, allin kajtataj ruwanapaj (Heb. 10:24, 25). Hermanosninchej kallpachawajtinchejqa, paykunata, Jehová Diosta ima astawan munakunchej. Jehová Diosta, hermanosninchejtawan tukuy sonqo munakusun chayqa, tukuy atisqanchejta kallpachakusun hermanosninchejta mana pantachinapaj.

15. ¿Imaynatá “cheqan ruwaykunata” ruwanchej?

¹⁵ Pabloqa Jehová Diosmanta mañakorqa, Filiposmanta cristianos ‘cheqan ruwaykunata astawan ruwanallankupajpuni’ (Fili. 1:11). ¿Imataj chay ‘cheqan ruwaykuna’ karqa? Jehová Diosta, hermanostawan munakusqanku, jinallataj Jesuspi creesqankuta, imatachus suyakusqankutawan runasman willarisqanku. Pabloqa Filiposmanta cristianosman nillarqataj: ‘Lliphipiriychej kay mundopi kʼanchajkuna jina’, nispa (Fili. 2:15). Jesuspis discipulosninta nillarqataj: “Kay mundoj kʼanchaynin kankichej”, nispa (Mat. 5:14-16). Paykunamantaj kamacherqa: “Runasta yachachisqasniyman tukuchimuychej”, nispa. Chantá nerqa ‘testigos jina willamunankuta kay jallpʼaj tukuy kʼuchusnintinpiʼ (Mat. 28:18-20; Hech. 1:8). Chay llankʼaypi tukuy atisqanchejta yanapakuspaqa, “cheqan ruwaykunata” ruwashanchej.

16. Filipenses 1:12-14 nisqanman jina, ¿imaynatá kʼanchay jina lliphipirisunman imapi rikukuspapis? (Kay revistaj tapanpi dibujota qhawariy).

¹⁶ Imapi rikukuspapis, kʼanchay jina lliphipirisunman. Ichá wakin kutisqa, niña predicananchejpaj uj chʼampay rikhurinman. Ajinapi rikukuspapis astawanraj runasman predicasunman. Apóstol Pablo ajinapi rikukorqa. Filipensesman cartanta qhelqashajtin, payqa Romapi wasinpi presochasqa kasharqa. Ajina  presochasqa kaspapis, soldadosman, payta waturikoj rejkunamanwan, Diosmanta tukuy sonqo willallarqapuni. Chay ruwasqanqa hermanosta yanaparqa, ‘mana manchachikuspa Diospa palabranmanta willanankupaj’ (Filipenses 1:12-14 leey; Fili. 4:22).

17. Autoridades mana predicajta saqejtinkupis, ¿imaynatá uj suyumanta hermanos predicallasqankupuni?

¹⁷ Ashkha hermanosqa, mana manchachikuspa Pablo jina predicanku. Paykunaqa maypichus autoridades mana wasimanta wasi predicajta, nitaj waj jinasmanta predicajta saqenkuchu, chay suyuspi tiyakunku. Chayrayku waj jinasmanta predicanankupaj yuyaychakunku (Mat. 10:16-20). Chay suyusmanta ujninpi, congregacionesta waturej hermanoqa, hermanosta yuyaycharerqa imaynatachus predicanankuta. Pay nerqa sapa ujninku parientesninkuman, vecinosninkuman, rejsisqasninkuman, escuelamanta chayri trabajomanta compañerosninkuman predicanankuta. Chay circuitopeqa, iskay watallapi ashkha congregaciones yapakorqa. Ichá noqanchejtaqa autoridades predicajta saqellawanchej. Jinapis chay hermanosmanta mayta yachakusunman. Noqanchejpis runasman willamunapaj, tukuy atisqanchejta kallpachakuna. Chayta ruwasun chayqa, Jehová Dios yanapawasun ima kajtinpis willamunallapajpuni (Fili. 2:13).

18. ¿Imastataj ruwayta munanchej?

¹⁸ Pablo filipensesman qhelqasqan cartaqa, kay tiempopi astawan yanapawasunman. Chayrayku imaschus aswan allin imas kasqanta sumajta reparana, mana kʼamina runas kanapajtaj kallpachakuna. Chantapis ama wajkunata pantachinachu, cheqan ruwaykunatataj ruwanallapuni. Ajinamanta munakuyninchej astawan wiñanqa, munakuyniyoj Tatanchej Jehovatataj jatunchasunchej.