1. ¿Familianchej imata ruwanankutataj munanchej?

PAULINA * sutiyoj hermana nin: “Jehová Diosta rejsisqaymantapacha, maytapuni munarqani familiaypis noqawan khuska paraisopi kanankuta. Astawanqa munarqani qosay Walter, wawitaywan ima, noqawan khuska Jehová Diosta sirvinankuta”, nispa. Noqanchejpis ichá Paulina jinallataj, munanchej familianchej noqanchejwan khuska Jehová Diosta sirvinankuta.

2. ¿Ima tapuykunamantaj kay yachaqanapi kutichisun?

² Familianchejtaqa mana obligasunmanchu sumaj willaykunata japʼikunankupaj. Jinapis Bibliaj yachachisqanta yachakuyta munanankupaj yanapayta atisunman (2 Tim. 3:14, 15). ¿Imajtintaj Jehová Diosmanta familianchejman willarinanchej tiyan? ¿Imajtintaj paykunata entiendenanchej tiyan? ¿Imatá ruwasunman noqanchej jina Jehová Diosta munakunankupaj? Chantá, ¿imaynatá congregacionmanta hermanos chaypaj yanapawasunman? Kay yachaqanapeqa, chay tapuykunaman kutichisun.

3. Kay 2 Pedro 3:9 nisqanman jina, ¿imajtintaj familianchejman Jehová Diosmanta willanapuni tiyan?

³ Tumpamantawan, Jehová Diosqa Satanaspa sajra mundonta chinkachenqa. “Wiñay kausayta japʼinankupaj allin sonqoyoj” kajkunallataj salvakonqanku (Hech. 13:48). Tiyakunchej chaypi runasmanqa tukuy atisqanchejta predicanchej.  Chayrayku familianchejmanqa astawanraj predicayta munanchej. Munakuyniyoj Jehová Diosninchejqa, “mana munanchu ni pi chinkachisqa kananta. Astawanqa munan tukuy pesachikunankuta” (2 Pedro 3:9 leey).

4. ¿Imaynatá familianchejman wakin kutis predicanchej?

⁴ Salvakunapaj willaymantaqa iskaynejmanta parlasunman: miskʼi simiwan chayri runaj sonqonta nanachinapaj jina. Ichá mana rejsisqanchej runamanqa, kʼachallamanta predicanchej. Familianchejmantajrí ichapis sonqonkuta nanachinapaj jina predicanchej.

5. ¿Imaynatataj familianchejman Diosmanta willarisunman?

⁵ Familianchejman Jehová Diosmanta imaynatachus qallariypi parlarisqanchejta yuyarikuspaqa, ichapis ninchej: “Amallapis jinata niymanchu karqa. Kʼacha simillawan willarinay karqa”, nispa. Apóstol Pabloqa cristianosman yuyaycharqa: “Kʼacha simiwanpuni parlaychej, kachiwan kachinchasqata jina. Ajinamanta yachankichej, sapa runaman imaynatachus kutichinaykichej kasqanta”, nispa (Col. 4:5, 6). Familianchejwan Diosmanta parlarishaspaqa, Pabloj yuyaychasqanman jina ruwana. Mana ajinata ruwasunman chayqa, phiñachisunman, niñataj uyariwasunmanchu.

6, 7. 1) ¿Imatataj hermananchej Paulina ruwarqa? 2) ¿Allinchu kanman hermananchej Paulina jina ruwananchej?

⁶ Familianchejta entiendena. Paulinamanta parlarerqanchejña. Pay nin: “Ñaupaj kutispeqa qosaywan Bibliallamanta parlariyta munaj kani, manataj waj imasmanta parlarejchu kayku”, nispa. Jinapis Paulinaj qosanqa Bibliamanta pisillata yacharqa, sutʼinchasqantataj mana entiendejchu. Chayrayku yuyarqa Paulina iglesiallanpi yuyasqanta. Piensarqataj  mana allin iglesiaman yaykusqanta, engañachikushasqantataj.

⁷ Paulinaqa casi tukuynin tardesnin, semana tukukuytapis, reunionesman rispa, hermanoswan predicaspa, paykunawan kusirikuspa ima kaj. Chaymanta yuyarikuspa nin: “Wakin kutis qosay wasiman chayananpajqa, ni pi chaypi kajchu, sapayakojtaj”, nispa. Qosanqa Paulinata, wawantawan faltachaj. Payqa mana hermanosta rejserqachu, yuyarqataj Paulinaqa hermanosninta astawan valechisqanta. Chayrayku Walterqa Paulinata nerqa paymanta divorciakunanta. ¿Imatataj hermananchej Paulina ruwayta atinman karqa qosanta astawan entiendenanpaj?

8. Kay 1 Pedro 3:1, 2 nisqanman jina, ¿imatataj familianchej astawan qhawanku?

⁸ Imaynatachus kausakusqanchejwan yanapana. Familianchejqa imaynatachus kausakusqanchejta astawan qhawanku, manataj imatachus parlasqanchejtachu (1 Pedro 3:1, 2 leey). Paulinaqa chayta repararqa. Pay nin: “Yacharqani qosayqa munakuwasqaykuta. Payqa mana noqamanta divorciakuytapunichu munasharqa. Jinapis divorciakunaykuta niwasqanqa, reparachiwarqa Jehová Diospa kamachisqanta mana juntʼashasqayta. Bibliallamanta anchata parlanaymantaqa, kausayniywan rikuchinay karqa Bibliaj nisqanta kasukushasqayta”, nispa. Chayrayku Paulinaqa, niña Bibliamanta anchata parlarqachu, astawanqa qosanwan parlarej imastachus sapa día ruwasqankumanta. Qosantaj repararqa Paulina astawan kʼacha kasqanta, wawanpis aswan sumaj wawa kasqanta (Pro. 31:18, 27, 28). Walterqa Bibliaj yuyaychasqan familianta yanapashasqanta repararqa. Chayrayku payqa warmin Bibliamanta willarejtin uyarillajña (1 Cor. 7:12-14, 16).

9. ¿Imajtintaj familianchejta mana saykʼuspa yanapana tiyan?

 ⁹ Mana saykʼuspa familianchejta yanapanallapuni. Jehová Diosmanta yachakuna. Payqa tukuy runas wiñay kausayta japʼikunankuta munan. Chayrayku kutin kutita kamachisninwan sumaj willaykunata willachishan (Jer. 44:4). Apóstol Pabloqa, Timoteota nerqa runasta mana saykʼuspa yanapanallantapuni. ¿Imaraykutaj chayta nerqa? Imaraykuchus chayta ruwaspaqa, pay kikinta salvakunman karqa, jinallataj payta uyarejkunatapis (1 Tim. 4:16). Familianchejta munakusqanchejrayku, Bibliamanta cheqa kajta yachachiyta munanchej. Paulinamanta parlarinallapuni. Payqa familianta yanaparqa, parlasqanwan kausayninwan ima. Kunantaj Paulinaqa qosanwan khuska Jehová Diosta sirvishan. Iskayninku precursores kanku, qosantaj anciano. Chayrayku payqa may kusisqa kashan.

10. ¿Imaraykutaj familianchejwan pacienciakuna tiyan?

¹⁰ Pacienciakuna. Bibliaj nisqanman jina kausakuyta qallarejtinchej, ichá familianchejqa imapichus creesqanchejta, imaynatachus kausakusqanchejta ima mana entiendeyta atillanqankuchu. Paykunaqa fiestasta niña ruwasqanchejta, nitaj politicaman satʼikusqanchejta reparankupacha. Chayraykutaj ichá noqanchejwan phiñakunku (Mat. 10:35, 36). Jinapis paykunawan pacienciakunallapuni tiyan. Imapichus creesqanchejta paykunaman niña entiendechisunchu chayqa, “paykunaqa mana wiñay kausayta japʼinankupaj jinachu kanku” nispa juzgashasunman. Jehová Diostaj mana munanchu runasta juzgananchejta. Payqa Jesusllata churan runasta juzgananpaj (Juan 5:22). Familianchejwan pacienciakusun chayqa, ichapis aswan qhepaman Bibliamanta parlarisqanchejta uyarillawasunña (“ jw.org nisqawan familianchejta yanapana” nisqa recuadrota leeriy).

11-13. ¿Imatataj Aliciamanta yachakusunman?

¹¹ Familianchejwan kʼachas kaspapis sinchʼita sayana (Pro. 15:2). Hermananchej Aliciamanta parlarina. Payqa tatasninmanta karupi tiyakushaspa, Jehová Diosmanta yachakuyta qallarerqa. Tatasnenqa mana Diospi creejchu kanku, politicamantaj allin satʼisqa kasharqanku. Aliciaqa yacharqa imatachus yachakushasqanmanta tatasninman usqhayllata willarinan kasqanta. Pay nin: “Yacharqani tatayman mamayman imapichus creesqayta, imatatajchus ruwashasqayta mana chay rato willarejtiy phiñakunankuta”, nispa. Chayrayku payqa Bibliamanta paykunawan parlarinanpaj cartasta apachej. Chay cartaspitaj imamantachus yachayta munankuman, chaymanta parlarej, imatachus piensasqankutataj tapurej. Uj pacha, imatachus Biblia munakuymanta nisqanta qhelqarqa (1 Cor. 13:1-13). Chantapis Aliciaqa tatasninman agradecekoj sumajta uywasqankumanta, regalostapis apachej. Paykunata visitarej rispataj, mamanta wasipi ruwanaswan yanaparejpuni. Jinapis imapichus creesqanta willarejtin, paykunaqa qallariypi phiñakorqanku.

¹² Aliciaqa tatasninpa wasinpi kashaspa, sapa día Bibliata leellajpuni. Mamantaj chayta rikuspa, Alicia Bibliata jatunpaj qhawasqanta repararqa. Tatanrí Bibliata leeyta qallarerqa, imaraykuchus Alicia cambiasqanta yachananpaj, Bibliapi mana allin yachachiykunata tariyta munaspa ima. Alicia nin: “Tatayman uj Bibliata qorqani, chay Biblia ukhupitaj wakin palabrasta qhelqarqani”, nispa. Tatanqa Bibliata leeytawan, mana ima pantaytapis tarerqachu. Astawanpis mayta tʼukorqa imatachus leesqanmanta.

¹³ Familianchej churanakuwajtinchejpis, paykunawan kʼachas kananchej tiyan, sinchʼitataj sayana tiyan (1 Cor. 4:12). Aliciaj mamanqa payman churanakorqa. Pay nin:  “Bautizakusqaytawan, mamayqa mana payta munakusqayta niwarqa”, nispa. ¿Imatá Alicia ruwarqa? Pay nin: “Mamayman respetowan nerqani Jehovaj testigon kayta ajllasqayta, nitaj chayta saqenayta. Nillarqanitaj payta mayta munakusqayta. Chantá iskayniyku waqarikorqayku, sumaj mikhunitatataj waykʼorqaporqani. Chaymantapachataj, mamayqa repararqa Biblia kausayniypi mayta yanapawasqanta”, nispa.

14. Imatachus ajllasqanchejta familianchej cambiachiyta munawajtinchej, ¿imatá ruwasunman?

¹⁴ Ichapis familianchejqa, Jehová Diosta sirviyta jatunpaj qhawasqanchejta, mana chay ratochu entiendenqanku. Aliciaqa tatasnin ajllaporqanku chay carrerata estudiananmantaqa, precursora kayta ajllarqa. Chayrayku mamanqa watejmanta waqarikullarqataj. Jinapis Aliciaqa sinchʼita sayarqa. Pay nin: “Familianchej imatachus ajllasqanchejta cambiachinawanchejta saqenchej chayqa, waj imaspipis cambiachillaytaña munawasun. Jinapis imatachus ajllasqanchejpi sinchʼita sayasun, kʼachastaj kasun chayqa, ichapis uyariwasun”, nispa. Payqa chay nisqanman jina ruwarqa. Kunantaj tatanwan mamanwan precursores kanku, tatantaj anciano kashan.

15. Mateo 5:14-16 chanta 1 Pedro 2:12 nisqanman jina, ¿imaynatá hermanospa sumaj ruwasqasninku familianchejta yanapanman?

¹⁵ Jehová Diosqa kamachisninpa ‘sumaj ruwasqasninkunejta’ runasta payman pusamushan (Mateo 5:14-16; 1 Pedro 2:12 leey). Qosayki chayri warmiyki mana Jehovaj testigonchu chayqa, allin kanman congregacionmanta hermanosta rejsichinayki. Paulinamanta watejmanta parlarina. Payqa hermanosta  wasinman wajyarikoj, qosan paykunata rejsinanpaj. Uj hermanotaj qosanta yanapasqa pantasqa yuyayninta cambiananpaj. Chayta yuyarikuspa, Paulinaj qosan nin: “Chay hermanoqa, trabajonmanta permisota mañakorqa, wasiypi uj partidota noqawan qhawananpaj. Chaypitaj repararqani paypis tukuy runas jinallataj kasqanta”, nispa.

16. ¿Imaraykutaj familianchejta reunionesman pusarinanchej tiyan?

¹⁶ Chantapis familianchejtaqa yanapallasunmantaj, reunionesninchejman pusarispa (1 Cor. 14:24, 25). Paulinaj qosan ñaupaj kaj tantakuyman risqanqa, Jesuspa Wañuyninta Yuyarinapaj tantakuy karqa. Payqa chay tantakuyman rerqa mana trabajasqan horapichu kasqanrayku, mana ancha unaytachu kasqanrayku ima. Walter nin: “Chay tantakuypi imatachus nikusqantaqa, mana tukuynintachu entienderqani. Jinapis yuyarini imatachus hermanos ruwasqankuta. Paykunaqa qayllaykamuwaspa qʼapiriwarqanku, kʼacha runaspuni karqanku”, nispa. Chantá aswan qhepaman, payqa Bibliata estudiayta munarqa. Chayrayku señoranpa congregacionninmanta Mario sutiyoj hermanota estudiachinanta nerqa. Mariowan señoranwanqa reunionespi, predicacionpi ima, Paulinata wawanta qhawaysispa yanapaj kanku.

17. 1) ¿Familianchejta Jehová Diosta sirvinankupaj obligasunmanchu? 2) ¿Imaraykutaj familianchejta yanaparinallapuni tiyan?

¹⁷ Mayta suyashanchej tukuy familianchej Jehová Diosta sirvinankuta. Paykunata yanapanapaj mayta kallpachakojtinchejpis, ichá paykunaqa manapuni Jehová Diosta sirvenqankuchu. Jina kajtinpis ama llakikunachu. Paykunataqa mana obligasunmanchu Jehová Diosta sirvinankupaj. Jinapis ichá paykunaqa, Jehovata sirvispa kusisqa kasqanchejta rikuspa, Jehovata sirviyta munallanqankutaj. Chayrayku paykunapaj Diosmanta mañapuna, cheqa kajmanta respetowan parlarina, yanaparinallapunitaj (Hech. 20:20). Chayta ruwajtinchej, Jehová Diosqa bendeciwasunpuni. Familianchej Jehová Diosta sirvenqanku chayqa, paykunapis salvakonqanku.