1. ¿Imatataj Jehová Dios munakuwasqanchejrayku ruwan?

JEHOVÁ DIOSQA munakuwasqanchejrayku llajtanpi kajta saqewanchej. Chaypi mana kikin imastachu ruwajtinchejpis, tukuyninchej may valorniyoj kanchej, purajmantataj yanapanakunchej. Apóstol Pabloqa chayta sumajta entiendenapaj yanapawanchej. Qhepan parrafopi chaymanta parlarisun.

2. Efesios 4:16 nisqanman jina, ¿imajtintaj purajmanta yanapanakunanchej tiyan?

² Apóstol Pabloqa kay yachaqanapaj ajllasqa textopi, cuerpoj imasninmanta parlasharqa. Chaywantaj yachachiwanchej, mana mayqen hermanotapis “mana qanllawan kasaj” ninanchejchu kasqanta (1 Cor. 12:21). Congregacionpi allin kausay kananpajqa, mana mayqen hermanotapis pisipaj qhawanachu tiyan, purajmantataj yanapanakuna tiyan (Efesios 4:16 leey). Hermanosninchejwan sumaj ujchasqa kasun chayqa, tukuyninchej kallpachasqa kasun, may munasqas kasqanchejtataj reparasun.

3. ¿Imastataj kay yachaqanapi yachakusun?

³ Kay yachaqanapeqa hermanosninchejta kinsa imaspi respetanamanta parlarisun. Ñaupajtaqa yachakusun, imaynatachus ancianos purajmanta respetanakunankuta. Chantá yachakusun, imaynatachus solteros kajkunata respetanata. Chaymantataj yachakusun, parlayninchejta yachakoj hermanosta jatunpaj qhawanata.

4. Romanos 12:10 nisqanman jina, ¿imatataj ancianos ruwananku tiyan?

⁴ Tukuy ancianosqa Jehová Diospa atiyninnejta churasqa kanku. Jinapis mana kikinchu kanku, nitaj kikin imastachu sumajta ruwayta yachanku (1 Cor. 12:17, 18). Wakenqa reciellanraj ancianos kasqankurayku, manaraj ashkha experienciayojchu kanku. Wakintajrí machitusña chayri onqosqas kasqankurayku, congregacionpi pisillataña yanapakunku. Jinapis ni mayqen ancianopis, waj ancianomanta yuyananchu tiyan ni imapi yanapakusqanta. Astawanpis imatachus Romanos 12:10 (leey) nisqanta kasukunanku tiyan.

5. 1) ¿Imaynatá ancianos waj ancianosta respetasqankuta rikuchinkuman? 2) ¿Imatataj ancianos entiendenanku tiyan?

⁵ ¿Imaynatá ancianos waj ancianosta respetasqankuta rikuchinkuman? Paykunata sumajta uyarispa. Chaytataj astawanraj ruwananku tiyan, congregacionpi imatapis qhawarinankupaj tantakushajtinku. ¿Imaraykutaj chayta ruwananku tiyan? Chayta yachanapajqa, imatachus uj revistanchej nisqanta qhawarina. 1 de octubre de 1988 watamanta La Atalaya revista nin: “Ancianosqa entiendenanku tiyan, Cristoqa tukuy ancianosta Diospa atiyninwan yanapasqanta. Chayrayku uj problemata allinchananku kajtin chayri congregacionpaj imatapis ruwananku kajtin, Cristoqa mayqennillankutapis Bibliaj nisqanta yuyarichinman (Hech. 15:6-15). Jehová Diospa atiynenqa tukuy ancianosta yanapan, nitaj ujllatachu”.

6. 1) ¿Imaynatataj ancianos respetanakusqankuta rikuchinkuman? 2) Ancianos munanakojtinku, respetanakojtinkutaj, ¿imatataj ruwayta atenqanku?

⁶ Waj ancianosta respetaj ancianoqa, ancianospura reunionpi kashajtinku mana payrajpunichu parlayta munanqa. Manallataj payllachu parlaykonqa, nitaj paypa nisqantapunichu valechiyta munanqa. Astawanpis imatachus piensasqanta kʼumuykukoj sonqowan nenqa, waj ancianostapis sumajta uyarenqa. Chantapis imallapajpis Bibliaj nisqantapuni qhawaykuriyta munanqa, “allin kamachi yuyayniyoj” nisqantataj kasukonqa (Mat. 24:45-47).  Sichus ancianos munanakonqanku, purajmantataj respetanakonqanku chayqa, Jehová Dios paykunata atiyninwan yanapanqa. Ajinamantataj congregacionta yanapanankupaj jina imatapis sumajta ruwanqanku (Sant. 3:17, 18).

7. ¿Imatataj Jesús soltero kaymanta yuyaj?

⁷ Congregacionespeqa qhariwarmis, wawasniyoj familiaspis tiyan. Jinapis kallantaj soltera hermanas, soltero hermanospis. ¿Imaynatá paykunata qhawananchej tiyan? Chayta yachanapajqa, imatachus Jesús soltero kaymanta yuyasqanta qhawarina. Jesusqa kay jallpʼapi kashaspa ni jaykʼaj casarakorqachu. Soltero kasqanraykutaj, tukuy tiemponta churarqa Diospa kamachisqanta juntʼananpaj. Jesusqa ni jaykʼaj yachacherqachu solteropuni kakuna kasqanta. Nillataj yachacherqachu casarakunapuni kasqanta. Jinapis nerqa, wakin cristianosqa paykunapuni solteros kakuyta ajllanankuta (Mat. 19:11, 12). Jesusqa solteros kajkunata respetarqa. Payqa mana yuyarqachu, casadosqa solterosmanta nisqa astawan valesqankuta.

8. Kay 1 Corintios 7:7-9 nisqanman jina, ¿imapitaj cristianos piensarinanku kanman?

⁸ Apóstol Pablopis Jehová Diosta Jesús jinallataj soltero sirverqa. Payqa ni jaykʼaj yachacherqachu, casarakoyqa jucha kasqanta. Astawanpis nerqa, casarakuytachus manachus sapa uj ajllananta. Jinapis cristianosman yuyaycharqa, Jehová Diosta sirvinankupaj solteros kakuypi piensarinankuta (1 Corintios 7:7-9 leey). Apóstol Pabloqa solterosta mana pisipajchu qhawarqa. Chayrayku joven Timoteota ajllarqa Diospa llajtanpi uj jatun ruwanata qonanpaj. Timoteotaj soltero karqa (Fili. 2:19-22). * ¿Imatá chaymanta yachakunchej? Mana allinchu kanman ninanchej: “Kayta ruwanapajqa uj casado aswan wakichisqa kashan”, nispa. Nillataj allinchu kanman ninanchej: “Kaytaqa uj soltero aswan sumajta ruwanman”, nispa (1 Cor. 7:32-35, 38).

9. ¿Imatá yuyananchej kasqa casarakuymanta, soltero kaymantawan?

⁹ Ni Jesuspis ni Pablopis yachacherqankuchu, casarakunapuni kasqanta chayri solteropuni qhepakuna kasqanta. Noqanchejrí, ¿imatá yuyananchej kanman? Qhawarina imatachus uj revistanchej casarakuymanta, soltero kaymantawan nisqanta. 1 de octubre de 2012 watamanta La Atalaya revista nin: “Casarasqa kaypis soltero kaypis, Diospa regalon. [...] Jehová Diosqa mana munanchu, soltero  cristianos mana casarakusqankumanta pʼenqakunankuta, nitaj llakikunankutapis”, nispa. Chayrayku tukuypis, soltero hermanosninchejta jatunpaj qhawananchej tiyan.

10. ¿Imaynatá soltero chayri soltera hermanasta respetasunman?

¹⁰ ¿Imatá ruwasunman soltero hermanospa sonqonkuta mana nanachinapaj? Ñaupajtaqa imaraykuchus sapallanku kashasqankupi piensarina. Wakenqa munasqankurayku solteroslla kakushanku. Wakintajrí casarakuyta munaspapis, mana paykunapaj jina warmita chayri qosata tarinkuchu. Wakintajrí viudos chayri viudas kasqankurayku, sapallanku kashanku. Imayna kajtinpis, mana allinchu kanman solterosta ninanchej: “¿Maykʼaj casaranki?”, nispa. Nillataj allinchu kanman ninanchej: “Kay hermanita chayri jaqay hermanito qanpaj jinapuni. Noqa presentaykiman”, nispa. Ichá wakenqa, pillatapis presentananchejta munankupuni. Jinapis mana imata niwajtinchejqa, mana pitapis kʼaskachinachu tiyan. Chayta ruwasunman chayqa, chay hermanitosta pʼenqachisunman chayri sonqonkuta nanachisunman (1 Tes. 4:11; 1 Tim. 5:13). Qhepan parrafospi, wakin soltero hermanospa nisqankuta qhawarisun.

11, 12. ¿Imata ruwaspataj soltero hermanospa sonqonkuta nanachisunman chayri pʼenqachisunman?

¹¹ Uj soltero hermanoqa, congregacionesta waturispa sumajta yanapakun. Payqa soltero kasqan, chayta ruwananpaj mayta yanapasqanta nin. Jinapis nillantaj: “Hermanos sapa kuti ‘¿maykʼaj casaranki?’ niwajtinkoqa, sonqoy nanawan. Noqamanta llakikuspa tapuwajtinkupis, ‘amallapis chayta tapuwankumanchu’ nini”, nispa. Betelpi yanapakoj soltero hermanotaj nin: “Wakin hermanosqa, solterosta lastimay khuyaypaj qhawawayku. Soltero kayta uj maldicionta jina qhawanku”, nispa.

¹² Betelpi yanapakoj soltera hermanataj nin: “Wakin hermanosqa, yuyanku tukuy solteros casarakuyta munasqaykuta. Uj fiestitaman rejtiyku chayri imallapajpis tantarikojtiyku, maskʼakoj risqaykuta piensanku. Uj pacha, waj llajtaman kachawarqanku Betelpaj uj trabajitota ruwanaypaj. Chayarqani chay diaqa reunión kasqa. Alojawarqa chay hermanataj niwarqa: ‘Mana piwanpis kʼaskachiyta munaykichu. Pero congregacionniypeqa iskay hermanos qanpaj jinapuni tiyan’, nispa. Chay chʼisi salonman chayajtiykutaj, chay rato paykunaman aysawarqa presentanawanpaj. Kinsantiyku pʼenqaywan ni imanakuyta aterqaykuchu”. 

13. ¿Imatataj uj soltera hermananchej nin?

¹³ Waj soltera hermanataj, pichus Betelpi yanapakushan, nin: “Unaytaña soltero kaj precursoresta rejsini. Paykunaqa imatapis maychus kajta ruwanku, wajkunata yanaparinku, Diosta sirviypitaj astawan yuyanku. Chay hermanosqa Jehovapaj llankʼaspa mayta kusikunku, congregacionpipis sumajta yanapakunku. Paykunaqa mana yuyankuchu, soltero kasqankurayku casadosmanta aswan sumaj kasqankuta. Nillataj yuyankuchu, casarakuspapuni chayri wawasniyoj kaspapuni kusisqa kanankuta”, nispa. Uj congregacionpi tukuy respetanakojtinku, munanakojtinku, mana envidianakojtinku, mana khuyaypaj qhawanakojtinku, ni pitapis pisipaj qhawajtinku, nitaj ancha sumajpaj qhawajtinku, ¡may sumajpuni! Tukuypis chay jina congregacionpi kayta munasunman.

14. ¿Imaynatataj soltero hermanosninchejta qhawananchej tiyan?

¹⁴ Soltero hermanosninchejtaqa, mana khuyaypaj qhawasqanchejraykuchu munakunanchej tiyan, manaqa kʼachas kasqankurayku. Paykunaqa chayta ruwajtinchej kusikunku. Chayrayku solterosta khuyaypaj qhawanamantaqa, Jehová Diosta tukuy sonqo sirvisqankuta  jatunpaj qhawana. Mana chayta ruwajtinchejqa, paykunaman kaytapis nishasunman jina kanqa: “Mana qanllawan kasaj” (1 Cor. 12:21). Jinapis paykunata munakusun, respetasuntaj chayqa, Diospa llajtanpi kashasqankumanta kusikonqanku.

15. ¿Imatataj ashkha hermanos ruwanku Jehová Diospaj astawan llankʼanankupaj?

¹⁵ Kay qhepa wataspeqa, ashkha hermanos Jehovapaj astawan llankʼanankurayku waj parlayta yachakushanku. Paykunaqa parlayninkupi kaj congregacionta saqenku, waj parlaypi kaj congregacionmantaj ripunku. Ajinamanta maypichus astawan predicajkuna necesitakun, chaypi yanapakushanku (Hech. 16:9). Chay hermanosqa, Jehová Diospaj astawan llankʼanankurayku chayta ruwashanku. Chay mosoj parlayta unaypi yachakojtinkupis, paykunaqa congregacionpi sumajta yanapakunku. Kausayninkuwan, kʼacha kasqankuwantaj, tukuy hermanosta kallpachanku. Mayta kusikunchej congregacionninchejpi chay jina hermanos kasqankumanta.

16. Uj hermano siervo ministerial chayri anciano kananpaj, ¿imatataj ancianos qhawaykurinanku tiyan?

¹⁶ ¿Allinchu kanman ancianos ninanku: “Kay hermano siervo ministerial chayri anciano kananpaj, parlayninchejtaraj allinta yachanan tiyan”, nispa? Mana. Astawanpis paykunaqa, chay hermano Bibliaj nisqanman jina wakichisqañachus manachus kasqanta qhawaykurinanku tiyan. Uj hermano siervo ministerial chayri anciano kananpajqa, mana uj parlayta chʼuwitatapunichu parlanan tiyan (1 Tim. 3:1-10, 12, 13; Tito 1:5-9).

17. ¿Imatá waj suyuman ripoj familias ajllananku tiyan?

¹⁷ Wakin familiasqa, suyunkupi problemas kasqanrayku chayri trabajota tarinankurayku, waj suyuman ripunku. Chay suyupitaj, runasqa ichá waj parlayta parlanku. Chay familiaspa wawasninkutaj, ichá chay parlaypi escuelaman rinku. Tataspis trabajota tarinankupaj, ichá chay parlayta yachakunallankutaj kanqa. Paykunaqa Diosta yupaychayta mana saqenankuchu kasqanta yachanku. Chay suyupitaj, ichá parlayninkupi uj congregación tiyan. Jina kajtin, ¿chay congregacionmanchu renqanku? Chayrí, ¿chay suyupi parlakoj congregacionmanchu renqanku? Chaytaqa paykuna ajllananku kanqa.

18. Gálatas 6:5 nisqanman jina, ¿imatá ruwananchej tiyan uj tata imatapis ajllajtin?

¹⁸ Sapa tata, familianta mayqen congregacionmanchus pusananta ajllanan tiyan. Chaypajtaj tataqa familianpaj imachus aswan allin kasqanta qhawarinan tiyan (Gálatas 6:5 leey). Rikunchej jina, sapa tatamanta kashan familian mayqen congregacionmanchus rinanqa. Chayrayku familianta congregacionninchejman pusamuyta ajllajtenqa, mana payta qhawaranachu tiyan, familiantataj tukuy sonqo japʼikuna tiyan (Rom. 15:7).

19. ¿Imatataj cristiano tatas ruwananku tiyan, wawasninku paykunaj parlayninkuta mana entiendejtinku?

 ¹⁹ Ichapis wakin familiasqa, tataspa parlayninkupi kaj congregacionman rinku. Jinapis wawasninkoqa, niña chay parlayta yachankuchu. Imaraykuchus escuelapeqa, waj parlaytaña parlanku. Chayrayku reunionman rispa, niña sumajtachu entiendenku, niñataj ñauparishankuchu. Jina kajtin, cristiano tataqa Diosmanta mañakuspa imatachus ruwananpi piensarinan tiyan. Payqa wawasninta yanapanan tiyan, Jehová Diosmanta mana karunchakunankupaj, llajtallanpipunitaj kanankupaj. Chaypajtaj tataqa, ichapis wawasninman parlayninta astawan yachachinanta nenqa. Chayrí ima parlaytachus wawasnin astawan entiendenku, chay parlaypi kaj congregacionman pusananta nenqa. Imayna kajtinpis, chay familia congregacionninchejman jampun chayqa, paykunata munakuywan, kusiywantaj japʼikunanchej tiyan.

20. Parlayninchejta yachakoj hermanosmanta, ¿imatataj qhawananchej tiyan?

²⁰ Yachakunchej jina, ashkha hermanos waj parlayta yachakunankupaj mayta kallpachakushanku. Ichá congregacionninchejpipis ajina hermanos tiyan. Paykunataj parlayninchejta ichá niraj chʼuwitatachu parlanku. Jinapis chayta qhawanamantaqa, Jehová Diosta munakusqankuta, tukuy sonqotaj sirvisqankuta qhawana. Chayta ruwasun chayqa, paykunata astawan munakusun, respetasuntaj. Chantapis parlayninchejta mana allinta parlajtinkupis, paykunata valechisunpuni.

21, 22. ¿Imamantataj Jehová Diosman agradecekunchej?

²¹ Jehová Diosman mayta agradecekunchej, llajtanpi yanapakojta saqewasqanchejmanta. Payqa mana qhawanchu: qharichus warmichus kasqanchejta, casadochus solterochus kasqanchejta, joveneschus viejitoschus kasqanchejta, chayri uj parlayta sumajtachus manachus yachasqanchejta. Jehová Diosninchejpaj, hermanosninchejpajpis, tukuyninchej mayta valenchej (Rom. 12:4, 5; Col. 3:10, 11).

²² Apóstol Pablo Diospa llajtanta uj cuerpowan kikinchasqanmanta, maytapuni yachakunchej. Chay kikinchayqa, imaynasmantachus hermanosninchejta kallpachanapi piensarichiwanchej. Yanapawanchejtaj paykunata munakunapaj, respetanapajtaj.