1. ¿Imastá ashkha hermanos ruwanku Jehová Diosta astawan sirvinankupaj?

KAY tiempopeqa may chhika hermanos Jehová Diosta astawan sirviyta munanku. Chayraykutaj wakenqa solteroslla qhepakunku. Wakin qhariwarmistaj mana wawasniyoj kayta ajllanku. Ashkha familiaspis pisi imasllawan kausakunku. Tukuy chay hermanosqa, Diosta tukuy atisqankuta sirvisqankumanta kusisqa kashanku. Paykunaqa yachanku, Jehová Dios paykunaman ni imata faltachinanta. Jehová Diostaj imatachus necesitasqankuta qonqapuni. ¿Imaraykutaj chayta ninchej? Imaraykuchus ñaupa tiempopi kamachisninwan chayta ruwarqaña. Chaykunamanta ujqa Abrahán karqa. Payqa “tukuy creejkunaj tatan”. Jehová Diostaj payta mayta bendicerqa (Rom. 4:11).

2. 1) Hebreos 11:8-10, 16 nisqanman jina, ¿imajtintaj Abrahán Ur llajtamanta llojsiporqa? 2) ¿Ima tapuykunamantaj kay yachaqanapi kutichisun?

² Abrahanqa Ur llajtapi tukuy imayoj karqa, allintataj kausakuyta atinman karqa. Jinapis “sumaj cimientosniyoj llajtata” suyakusharqa. Chayrayku Ur llajtamanta llojsiporqa (Hebreos 11:8-10, 16 leey). ¿Ima ‘llajtatataj’ Abrahán suyakusharqa? Chay llajta sayarichisqa kanankama, ¿ima llakiykunapitaj rikukorqa? ¿Imatá Abrahanmanta yachakusunman? ¿Pikunataj Abrahán jina kay tiempopi ruwanku? Kay yachaqanapi chay tapuykunaman kutichisun.

3. ¿Ima ‘llajtatataj’ Abrahán suyakusharqa?

³ Abrahán suyakusharqa chay ‘llajtaqa’, Diospa Gobiernon karqa. Chay Gobiernoj Reynenqa Jesucristo, paytaj 144.000 ajllasqa cristianoswan kamachenqa. Apóstol Pabloqa, chay Gobiernota ‘kausaj Diospa llajtan, nisunman cielopi kaj Jerusalén’  nispa suticharqa (Heb. 12:22; Apo. 5:8-10; 14:1). Jesuspis discipulosninman chay Gobiernota mañakuyta yachacherqa. Ajinamanta Diospa munaynin, cielopi jinallataj kay jallpʼapipis ruwakunanpaj (Mat. 6:10).

4. Génesis 17:1, 2, 6 nisqanman jina, ¿imatataj Abrahán yacharqa?

⁴ Abrahanqa mana sutʼita yacharqachu, imaynachus Diospa Gobiernon kananta. Chayqa ashkha watasta ‘Diospa pakasqa yachaynin’ karqa (Efe. 1:8-10; Col. 1:26, 27). Jinapis Jehová Diosqa, Abrahanman nerqa mirayninmanta reyes rikhurinankuta (Génesis 17:1, 2, 6 leey). Abrahantaj Diospa nisqan juntʼakunanpi creerqa. Diospa ajllasqan Mesiasta mana rikuspapis, paypajqa chay Mesías Diospa Gobiernonpi kamachishanmanñapis jina karqa. Chayrayku Jesusqa judiosman nerqa: “Tataykichej Abrahanqa rikuytapuni munarqa imastachus ruwanay karqa chayta, rikuspataj maytapuni kusikorqa”, nispa (Juan 8:56). Rikunchej jina, Abrahanqa Jehová Dios uj Gobiernota sayarichinanta yacharqa. Yachallarqataj mirayninmanta wakin, chay Gobiernopi reyes kanankuta. Chayrayku Abrahanqa, Jehová Diospa nisqasnin juntʼakunanta suyakorqa.

5. ¿Imaynapí yachanchej Abrahán Diospa Gobiernonta suyakusqanta?

⁵ ¿Imaynapitaj yachanchej Abrahán “sumaj cimientosniyoj llajtata”, nisunman Diospa Gobiernonta suyakusqanta? Ñaupaj kaj, payqa mana mayqen llajtatapis llajtanta jina qhawakorqachu. Astawanpis forastero jina purikorqa, nitaj mayqen gobiernotapis apoyarqachu. Iskay kaj, Abrahanqa mana uj gobiernota chayri uj llajtata sayarichiyta yuyarqachu. Astawanpis Jehová Diosta kasukorqa, imatachus nisqanta juntʼanantataj suyakorqa. Chayta ruwaspa, Jehová Diospa nisqasninpi creesqanta rikucherqa. Qhepan parrafospi qhawarisun, ima llakiykunapichus Abrahán rikukusqanta, imatachus paymanta yachakuyta atisqanchejta ima.

6. ¿Imaynataj Ur llajta karqa?

⁶ ¿Imaynataj Abrahanpa saqesqan llajta karqa? Ur llajtaqa sumaj jarkʼachasqa, tukuy imayoj, sumajta kausakunapaj jinataj karqa. Chantapis manchay jatuchaj perqaswan muyurisqa karqa, casi tukuynin muyuynintataj uj mayu pasaj. Wasispis ladrillomanta ruwasqa,  rebocasqa, yurajwan pintasqataj karqanku. Wakin wasisqa 13 chayri 14 cuartosniyoj karqa, sumaj empedrasqa patioyojtaj. Chay llajtamanta runasqa, escribiyta yachaj kanku, numerostapis sumajta rejsej kanku. Chantapis Ur llajtaqa, negociosmanta juntʼasina karqa. Imaraykuchus yachayniyoj runasqa, chay lugarpi allaspa vendejkunaj documentosninkuta tarisqanku.

7. ¿Imaraykutaj Abrahán Jehová Diospi atienekunan karqa?

⁷ Abrahanqa Jehová Dios payta, familiantapis cuidananpi atienekunan karqa. Paykunaqa sumaj jarkʼachasqa Ur llajtata saqerqanku, Canaán jallpʼamantaj riporqanku. Chaypeqa toldosllapi tiyakoj kanku, niñataj Ur llajtapi jinachu perqaswan mayuwan ima jarkʼasqa karqanku. Chayrayku enemigosninkoj makinkupi, facilta urmayta atinkuman karqa.

8. ¿Ima llakiykunapitaj Abrahán rikukorqa?

⁸ Abrahanqa Jehová Diosta kasukuspapis, familianman uj pacha ni imata mikhuchiyta aterqachu. Chaypacha tukuynin Canaán jallpʼapi manchay yarqhay karqa. Chayrayku Abrahanqa, warmin Sarawan tukuynin familianwan ima, Egiptoman uj tiempota riporqanku. Chaypi kashajtinkutaj, Egiptota kamachej faraonqa Sarata wasinman pusacherqa, warminpajtaj japʼikapuyta munarqa. Abrahanqa maytachá warminmanta llakikorqa. Jinapis Jehová Diosqa faraonman nerqa Sarata Abrahanman kutichipunanta. Abrahanqa warminta watejmanta rikusparajchá kusikorqa (Gén. 12:10-19).

9. ¿Ima problemastaj Abrahanpa familianpi karqa?

⁹ Abrahanpa familianpeqa, wakin problemas kallarqataj. Ujqa karqa, munasqa warmin Sara, mana wawayoj kayta atisqan. Chaytaj ashkha watasta paykunata mayta llakicherqa. Chayrayku Saraqa, kamachin Agarta Abrahanman jaywaykorqa. Ajinamanta paynejta wawasniyoj kanankupaj. Jinapis Agarqa onqoj rikhurisqantawan, Sarata pisipaj qhawayta qallarerqa. Chayrayku Saraqa Agarta ñakʼaricherqa, Agartaj ayqekorqa (Gén. 16:1-6).

10. ¿Ima kutispitaj Abrahán creeyniyoj kasqanta rikuchinan karqa?

¹⁰ Aswan qhepaman Saraqa onqoj rikhurerqa. Abrahantaj chay wawankuman Isaac sutita churarqa. Abrahanqa Agarpi wawan Ismaelta, wawan Isaactapis mayta munakorqa. Jinapis Isaac jatitunña kashajtin, Ismaelqa paymanta alqochakorqa. Chayrayku Abrahanqa, Ismaelta, Agarta ima wajnejman kachaporqa (Gén. 21:9-14). Chay qhepata, Jehová Diosqa Abrahanman nerqa wawan Isaacta qʼolachipunanta (Gén. 22:1, 2; Heb. 11:17-19). Chay iskaynin kutispi, Abrahanqa wawasninta Jehová Dios yanapananpi creenan karqa.

11. ¿Imastataj Abrahán mana rikorqachu?

¹¹ Abrahanwan familianwan Ur llajtamanta llojsipushajtinku, Abrahanqa 70 kuraj watasniyojsina karqa, 175 watasniyojtaj wañuporqa (Gén. 11:31–12:4; 25:7). Payqa 100 watasta jina toldospi tiyakuspa Canaán jallpʼapi purerqa. Abrahanqa mana rikorqachu, Jehová Dios chay jallpʼata mirayninman qosqanta. Nillataj rikorqachu “sumaj cimientosniyoj llajtata”, nisunman Diospa Gobiernon sayachisqa kasqanta. Jinapis Abrahanqa, tukuy chay tiempopi Jehová Diospi pacienciawan suyakorqa. Biblia nin: “Abrahamqa wañuporqa allin wañuypi, allin machuña”, nispa (Gén. 25:8). Abrahanqa ashkha llakiykunasniyoj kaspapis, sinchʼi creeyniyojllapuni karqa, Diospa nisqasnin juntʼakunantataj pacienciawan suyakorqa. ¿Pitaj chaypaj yanaparqa? Jehová Dios. Payqa Abrahanta cuidarqa, amigonpajtaj qhawarqa (Gén. 15:1; Isa. 41:8; Sant. 2:22, 23).

12. 1) ¿Imatataj suyakushanchej? 2) ¿Imamantataj qhepan parrafospi parlarisun?

¹² Noqanchejpis Abrahán jinallataj “sumaj cimientosniyoj llajtata”, nisunman Diospa Gobiernonta suyakushanchej. Jinapis mana Diospa  Gobiernon sayachisqa kanantachu suyakushanchej. Imaraykuchus chay Gobiernoqa, 1914 watapiña sayachisqa karqa, chaymantapachataj cielopi kamachishanña (Apo. 12:7-10). Jinapis Diospa Gobiernonqa, manaraj kay jallpʼata kamachishanchu. Noqanchejtaj chayta suyakushanchej. Chay tiempo chayamunankama, Abrahanwan Sarawan jinallataj llakiykunasniyoj kasunchej. Ashkha hermanosninchejqa, ajina llakiykunapi kaspa Abrahanwan Sarawan jinallataj sinchʼi creeyniyoj karqanku, pacienciawantaj Diospi suyakorqanku. Paykunaj kausayninkumantaqa Torremanta Qhawaj revistapi leesunman. Qhepan parrafospi, wakin hermanospa experienciankumanta parlarisun, paykunamantataj yachakusun.

13. ¿Imatá hermano Billpa kausayninmanta yachakusunman?

¹³ Jehová Diosta sirvinanchejrayku imatapis saqenanchej kajtenqa, tukuy sonqo saqepuna. Abrahanqa Diosta sirvinanrayku, ashkha imasta saqerqa. Noqanchejpis Diospa Gobiernonta ñaupajman churayta munanchej chayqa, pay jina ruwananchej tiyan (Mat. 6:33; Mar. 10:28-30). Bill Walden sutiyoj hermanomanta parlarina. * Payqa 1942 watapi universidadmanta arquitecto jina llojsinanpajña kasharqa. Jinallapi Bibliata estudiayta qallarerqa. Pisi tiemponman, ujnin profesornenqa trabajota taripusqanta nerqa. Billtaj profesorninman nerqa: “Kunanmantaqa Diospaj llankʼayta munani. Chayrayku manaña arquitectomanta trabajasajchu”, nispa. Chantá chay watallapitaj Billta guerraman rinanpaj wajyarqanku. Mana rinanta nejtintaj, 10.000 dolareswan multaykorqanku. Chantapis carcelman phishqa watapaj wisqʼaykorqanku. Jinapis kinsa watanman kachariporqanku. Chaymanta qhepatataj Galaad Escuelaman invitarqanku. Chaypi yachakuyta tukusqantawan, Africaman misionerota jina kacharqanku. Chantá Billqa Evawan casarakorqa, khuskataj Africapi Jehová Diosta sirverqanku. Chaypi kausayqa mana facilchu karqa. Africapi ashkha watastaña sirvishajtinku, Billpa maman onqoykorqa.  Chayrayku Billwan señoranwanqa, Estados Unidosman kutiporqanku payta qhawanankupaj. Hermano Billqa kausayninmanta parlaspa nin: “Jehová Dios 70 watas kurajta paypaj llankʼajta saqewasqanpi tʼukurejtiy, kusiymanta waqay waqay chayawan. Chayrayku Jehovaman ashkhata agradecekuni”, nispa. Noqanchejrí, ¿Jehová Diosta tukuy atisqanchejta sirviyta atisunmanchu?

14, 15. ¿Imatataj hermano Aristotelismanta, señoranmantawan yachakusunman?

¹⁴ Ama suyanachu kausayninchejpi llakiykuna mana kananta. Abrahanqa tukuy kausayninpi Jehová Diosta sirvispapis, llakiykunasniyoj karqa. Noqanchejpis ichá pay jinallataj llakiykunasniyoj kasun (Sant. 1:2; 1 Ped. 5:9). Hermanonchej Aristoteliswan ajina karqa. * Payqa Grecia suyupi 1946 watapi bautizakorqa. Chantá 1952 watapi, hermana Eleniwan casarakunankupaj parlasqa. Eleniqa pay jinallataj Jehová Diospaj llankʼayta munarqa. Jinallapi Eleniqa onqoykorqa, doctorestaj umanpi tumorniyoj kasqanta nerqanku. Hermanata operajtinkupis, chay tumorqa casarakusqankumanta watasninman ujtawan rikhurillarqataj. Doctoresqa watejmanta operallarqankutaj. Jinapis hermanaqa, khuskan cuerponta manaña kuyurichiyta aterqachu, niñataj sutʼita parlayta aterqachu. Payqa ajina onqosqa kaspapis, autoridades testigosta qhatiykachajtinkupis, kusiywan predicallarqapuni.

¹⁵ Hermano Aristotelisqa, señoranta 30 watasta jina cuidarqa. Tukuy chay wataspitaj congregacionninpi anciano jina yanapakorqa. Chantapis asambleasta wakichiypi yanapakorqa, uj Jatun Tantakuna Wasitapis ruwaysikorqa. Chantá 1987 watapi, señoranqa predicashaspa uj llasa punkuwan pampaman choqachikorqa. Hermanaqa kinsa watata wañusqa jina kasharqa, chantá wañuporqa. Hermano Aristotelisqa nin: “Kausayniypeqa ashkha llakiykuna kapuwarqa. Wakin llakiykuna rikhurinawantaqa ni yuyallarqanipischu. Manachus Jehová Dios kallpata qowanman karqa chayqa, manapuni chay llakiykunata aguantayta atiymanchu karqa”, nispa (Sal. 94:18, 19). Ashkha hermanosqa llakiykunasniyoj kaspapis, Diosta tukuy atisqankuta  sirvishanku. Jehová Diostaj paykunata mayta munakun.

16. ¿Imatataj hermano Knorr señoranman yuyaychasqa?

¹⁶ Jamoj tiempopi imatachus japʼinanchejpi yuyana. Abrahanqa imatachus Jehová Dios aswan qhepaman qonanpi yuyarqa. Chaytaj llakiykunata aguantananpaj yanaparqa. Hermananchej Audrey Hydeqa, Abrahán jinallataj imatachus aswan qhepaman japʼinanpi yuyarqa. * Paypa ñaupa qosanqa hermano Nathan Knorr karqa. Paytaj cancerwan wañuporqa. Chantá hermano Glenn Hydewan casarakorqa. Paytaj Alzheimer nisqa onqoywan onqoykorqa. Hermananchej Audreytaqa, ñaupa qosanpa nisqan mayta kallpacharqa. Payqa niraj wañupushaspa nisqa: “Wañupunanchejkama Jehová Diosninchejta sirvisun chayqa, premionchejta japʼisunpuni, niñataj ujtawan sufrisunchu”, nispa. Chaymantataj ajinata yuyaychasqa: “Ñaupajllamanpuni riy, imajtinchus chaypi tʼinkayki kashan”, nispa. Chantá nillasqataj: “Wajkunata tukuy atisqaykita yanapariy. Chayta ruwaspaqa kusisqa kanki”, nispa. Hermano Knorrpa nisqanqa, noqanchejtapis mayta yanapawasunman. Noqanchejpis wajkunata tukuy atisqanchejta yanaparina, jamoj bendicionestataj kusiywan suyakuna (Rom. 12:12).

17. 1) ¿Imaraykutaj jamoj bendicionespi astawan yuyananchej tiyan? 2) ¿Imaynatataj Miqueas 7:7 yanapawasunman jamoj bendicionesta japʼinanchejpaj?

¹⁷ Noqanchejqa jamoj bendicionespi astawanraj yuyananchej tiyan. Kay tiempopeqa tukuy imata mundontinpi rikushanchej. Chaytaj sutʼita rikuchiwanchej, kay sajra mundoj tukukuynin qayllitapiña kashasqanta. Pisi tiempomantawanqa, Diospa Gobiernon kay jallpʼata kamachenqa. Chayrayku manaña “sumaj cimientosniyoj llajtata” suyakunanchejchu kanqa. Chay Gobierno gobernashajtenqa, ashkha bendicionesta japʼisunchej. Chaypeqa wañupoj familiaresninchejwan, amigosninchejwan ima watejmanta tinkukapusun. Chantapis Jehová Diosqa, Abrahanta creeyniyoj, pacienciayojtaj kasqanmanta premianqa. Chaytataj ruwanqa, payta familiantawan kausarichimuspa. ¿Imatá ruwasunman paykunata kausarimojta rikunapaj? Abrahán jina ruwana. Diospa Gobiernonpaj tukuy atisqanchejta llankʼana, sinchʼi creeyniyojllapuni kana, Jehová Diospitaj pacienciawan suyakuna (Miqueas 7:7 leey).