1. ¿Imaraykutaj Jehová Dios kausayniyoj kajkunata ruwarqa?

JEHOVÁ DIOSQA uj tiempota sapallan karqa, nitaj llakisqachu kausarqa. Payqa ni pita necesitanchu kusisqa kananpaj. Jinapis munakuyniyoj kasqanrayku, wajkunapis pay jinallataj kusikunankuta munarqa. Chayrayku kausayniyoj kajkunata ruwayta qallarerqa (Sal. 36:9; 1 Juan 4:19).

2. Jesuswan angeleswan, ¿imaynataj kasharqanku Jehová Diosta tukuy imata ruwajta rikuspa?

² Jehová Diosqa Wawan Jesustaraj ñaupajta ruwarqa. Chaymantataj “tukuy ima paynejta ruwasqa karqa”. Tukuy ima nispaqa, may chhika angelesmantawan parlashanchej (Col. 1:16). Jesusqa Yanapaj Maestro jina karqa. Tatanwan khuska llankʼaspataj, mayta kusikorqa (Pro. 8:30). Paywan Jehová Dioswanqa, cielotawan jallpʼatawan ruwarqanku. Angelestaj chayta rikuspa, mayta kusikorqanku. Chayrayku kay jallpʼa ruwasqa kasqantawan, Jehová Diosta jatuncharqanku. Jinapis Jehová Diosqa mana jallpʼallatachu ruwarqa. Payqa chaypi tukuy ima kajtawan ruwarqa, jinallataj runastapis. Angelestaj tukuy chay imasta rikuspa, Jehová Diosta maytachá jatuncharqanku (Job 38:7; Pro. 8:31). Jehová Diosqa tukuy ima ruwasqanpi munakuyniyoj, yachayniyojtaj kasqanta rikuchiwanchej (Sal. 104:24; Rom. 1:20).

3. Kay 1 Corintios 15:21, 22 nisqanman jina, ¿imapajtaj Jehová Dios Wawanta kachamorqa?

³ Jehová Diosqa sumaj kʼachitu jallpʼata ruwarqa, munarqataj runas chaypi wiñaypaj kausakunankuta. Jinapis Adanwan Evawan paypa contranpi oqharikorqanku. Ajinamantataj  juchawan wañuywan tukuy runasman chayarqa (Rom. 5:12). ¿Imatá Jehová Dios ruwarqa? Adanwan Evawan juchallikusqankutawan, Jehová Diosqa imaynatachus wawasninkuta juchamanta kacharichinanta nerqa (Gén. 3:15). Chaypajtaj Wawanta kay jallpʼaman kachamorqa tukuy runasrayku wañunanpaj. Ajinamanta paykunata juchamanta, wañuymantawan kacharichinanpaj. Jehová Dios chayta ruwasqanrayku, runasqa payta sirviytachus manachus ajllayta atinchej. Payta sirviyta ajllajtinchejtaj, wiñay kausayta japʼisunchej (Juan 3:16; Rom. 6:23; 1 Corintios 15:21, 22 leey).

4. ¿Ima tapuykunamantaj kay yachaqanapi kutichisun?

⁴ Jehová Dios wañusqasta kausarichimunanta nisqanqa, kay tapuykunapi piensarichiwanchej: ¿Imaynatá Jehová Dios runasta kausarichimonqa? Familiaresninchej kausarimojtinku, ¿paykunata rejsikapuyta atisunchu? ¿Imayna kusisqapunitaj kasun wañusqas kausarimojtinku? Wañusqas kausarimunanku, ¿imatá yachachiwanchej Jehová Diospa munakuyninmanta, yachayninmanta, paciencianmanta ima? Kay yachaqanapi chay tapuykunaman kutichisun.

5. ¿Imajtintaj ninchej mana tukuy runaschu ujllapi kausarimunankuta?

⁵ Jehová Diosqa, Wawan Jesusnejta may chhika runasta kausarichimonqa. Jinapis manasina tukuy runastachu ujllapi kausarichimonqa. ¿Imajtintaj chayta ninchej? Imajtinchus chayta ruwanman chayqa, may chhika runas ujllapi rikhurinkuman, kay jallpʼataj qʼala pejtu kanman. Jehová Diosninchejtaj mana munanchu imapis tʼusti kananta. Payqa yachan allin kausay kananpaj, tukuy imapis maychus kananpi kanan kasqanta (1 Cor. 14:33). Jehová Diosqa Jesuswan khuska kay jallpʼata pisimanta pisi wakicherqa. Chaytataj ruwarqa manaraj  runasta ruwashaspa. Ajinamanta yachayniyoj, pacienciayojtaj kasqanta rikucherqa. Jesuspis Waranqa Watas kamachiyninpi chayllatataj ruwanqa. Payqa imatachus kausarimojkuna necesitanqanku, chaytaraj wakichenqa. Chayta ruwananpajtaj, Armagedonta pasajkunawan yanapachikonqa.

6. Hechos 24:15 nisqanman jina, ¿pikunataj kausarimojkunamanta aswan ashkhas kanqanku?

⁶ Armagedonta pasajkunaqa, kausarimojkunaman Diospa Gobiernonmanta yachachenqanku, kamachiykunasnintapis rejsichenqanku. ¿Imaraykutaj chayta ruwananku kanqa? Imaraykuchus kausarimojkunamanta khuskan kurajpuni, ‘mana cheqan runaschu’ kanqanku (Hechos 24:15 leey). Paykunataj kausayninkuta cambiananku kanqa. Chayta ruwajtillanku, Cristoj wañuyninnejta kaj bendicionesta japʼenqanku. Chay chhika runasman Jehová Diosmanta yachachinapajqa, manchaytapuni trabajananchej kanqa. Jinapis, ¿kay tiempopi jinallatajchu sapa runaman yachachinanchej kanqa? ¿Kunan jinachu congregaciones kanqa? Kanqa chaytaj, ¿kausarimojkuna chaykunamanchu rinanku kanqa? Chantá, ¿paykunata yachachinachu kanqa paykunamanta qhepata kausarimojkunaman yachachinankupaj? Chayta yachanapajqa, suyakunachá kanqa. Jinapis kayta sutʼita yachanchej: Cristo Waranqa Watasta kamachiyta tukojtin, “tukuy jallpʼaqa Tata Diosta rejsiywan juntʼa kanqa” (Isa. 11:9). Chay wataspeqa ashkha trabajo kapuwasun, may kusisqastaj chayta ruwasun.

7. ¿Imataj kausarimojkunawan pacienciakunapaj yanapawasun?

⁷ Cristo mil watasta kamachishajtin, Jehová Diosta kusichinapaj cambianallanchejpuni kanqa. Chaytaj kausarimojkunawan pacienciakunapaj yanapawasun. Imaraykuchus paykunata yanapananchej kanqa, sajra yuyayninkuta cambianankupaj, Jehová Diospa munayninman jinataj kausakunankupaj (1 Ped. 3:8). Kausarimoj runasqa, Diospa kamachisnin llampʼu sonqos kasqanchejta rikonqanku. Rikullanqankutaj Diosta kusichinapaj kallpachakusqanchejta. Chayta rikuspataj, paykunapis Jehová Diosta yupaychayta munanqanku (Fili. 2:12).

8. ¿Imaraykutaj kausarimoj familiaresninchejta rejsikapuyta atisun?

⁸ Familiaresninchej kausarimojtinku, ¿paykunata rejsikapuyta atisunchu? Arí. Jehová Diosqa wañusqasta kausarichimunanpaj, watejmantasina cuerponkuta ruwanqa. Jinapis niraj wañupushaspa, imaynachá karqanku, kikisitunta kausarichimonqa. Parlasqankupis yuyasqankupis kikin kanqa. Jehová Diosqa ajinata ñaupa tiempopi runasta kausarichimorqa. Chantapis Jesusqa wañuyta puñuywan kikincharqa, kausarimuytataj puñuymanta rijchʼariywan (Mat. 9:18, 24; Juan 11:11-13). Runasqa niraj puñushaspa imaynachus kanku, kikisitun rijchʼarimunku. Parlasqankupis yuyasqankupis mana cambianchu. Lazaropi piensarina. Jesús payta kausarichishajtin, Lazaroqa tawa diaña wañusqa kasharqa, cuerponpis asnaykusharqañachá. Jinapis kausarimojtin, hermanasnenqa Lazarota chay rato rejsikaporqanku. Lazaropis paykunata rejsikapullarqatajchá (Juan 11:38-44; 12:1, 2).

9. Wañusqas sano cuerpoyoj kausarimojtinkupis, ¿imajtintaj pantaj runasllapuni kanqanku?

⁹ Jehová Dios nisqanman jina, Cristo kamachishajtenqa mana pipis nenqachu: “Onqosqa kani”, nispaqa (Isa. 33:24; Rom. 6:7). Chayrayku nisunman, Jehová Diosqa runasta sano cuerpoyojta kausarichimunanta. Jinapis kausarimojkunaqa, pantaj runasllapuni kanqanku. Mana jina kajtenqa, familiasnenqa mana paykunata rejsikapunkumanchu. Chantapis Cristo  Waranqa Watasta kamachimushajtinraj, tukuy runas pisimanta pisi juchamanta llimphuchasqa kasunchej. Chay waranqa watas tukukuytataj, Jesusqa Gobiernota Tatanman kutichiponqa. Chaypachataj manaña pantaj runaschu kasunchej. Ajinamanta Diospa Gobiernonqa munayninta juntʼanqa (1 Cor. 15:24-28; Apo. 20:1-3).

10. ¿Imayna kusisqapunitaj kasun wañusqas kausarimojtinku?

¹⁰ Wañupoj familiaresninchejwan tinkukapojtinchej, ichapis kusiymanta waqasun, asisun chayri Jehová Diosta takiykunawan alabasun. Imayna kusisqapunichus kananchejtaqa, mana yachanchejchu. Jinapis sutʼita yachanchej, Jehová Diosninchejta Wawan Jesustawan astawan munakunanchejta. Imaraykuchus wañusqastaqa paykuna kausarichimonqanku.

11. Juan 5:28, 29 nisqanman jina, ¿imatataj kausarimojkuna japʼenqanku Diosta kasukojtinku?

¹¹ Kausarimojkunaqa ñaupa kausayninkuta saqespa, Jehová Diospa munayninman jina kausakunanku kanqa. Chayta ruwajkunaqa, maytachá kusikonqanku. Imaraykuchus Diosta kasukojkunaqa, “wiñay kausayta” japʼenqanku. Diosta mana kasukuyta munajkunarí, chinkachisqa kanqanku. Ajinamanta paraisopi allin kausay kanallanpajpuni (Isa. 65:20; Juan 5:28, 29 leey).

12. Diospa Gobiernon kay jallpʼata kamachimojtin, ¿imaynatá Jehová Dios bendeciwasun?

¹² Diospa Gobiernon kay jallpʼata kamachimushajtin, payta kasukojkunaqa Proverbios 10:22 nisqanta juntʼakojta rikonqanku. Chaypi nin: “Tata Diospa bendicionnenqa qhapajyachin, nitaj ima llakiytapis chay bendición apamunchu”, nispa. Diospa atiyninwan yanapachikuspa, diamanta día astawan Cristoman rijchʼakusun, pisimanta pisitaj mana juchayoj runasman tukusun (Juan 13:15-17; Efe. 4:23, 24). Chantapis sapa día aswan sumaj runas kasun, cuerponchejpis sapa día aswan sano kanqa. ¡May kusiypuni kanqa! (Job 33:25). Qhepan parrafospi yachakusun, wañusqas kausarimunankupi tʼukuriy mayta yanapawasqanchejta.

13. Salmo 139:1-4 nisqanman jina, ¿Jehová Dios sumajtachu rejsiwanchej?

¹³ Rikunchej jina, Jehová Diosqa wañusqasta kikin yuyayniyojta kausarichimonqa. Runasqa niraj wañupushaspa imaynachus karqanku, kikisitun kausarimonqanku. Imaynachus chay kasqanpi piensarina. Jehová Diosqa mayta munakuwasqanchejrayku, sapa ujninchejta sumajta rejsiwanchej. Payqa yachan imatachus yuyasqanchejta, imachus sonqonchejpi kasqanta, imatachus nisqanchejta, ruwasqasninchejtapis. Chayrayku wañupusun chaypis, payqa imaynachus kanchej kikisitunta kausarichimuwasun. Yuyayninchejpis kikillanpuni kanqa. Rey Davidqa Jehová Dios tukuyta sumajta rejsisqanta yacharqa (Salmo 139:1-4 leey). Jehová Dios sumajta rejsiwasqanchejmanta, ¡mayta kusikunchej!

14. ¿Imajtintaj Jehová Dios sumajta rejsiwasqanchejmanta mana manchachikunachu tiyan?

¹⁴ Jehová Diosninchej sumajta rejsiwasqanchejmanta, ¿manchachikunachu kanman? Mana. Imajtinchus payqa, munakuwasqanchejrayku sumajta rejsiwanchej. Paypajqa sapa ujninchej mayta valenchej. Chantapis Jehová Diosqa, sumajta yachan imayna kausayniyojchus kasqanchejta. Chayrayku sumajta entiendewanchej. Chayta yachayqa mayta sonqochawanchej. Jehová Diosqa noqanchejwanpuni kashan, yanapaytataj munawanchej. Chayrayku amapuni sapallanchej kashasqanchejta yuyanachu (2 Cró. 16:9).

15. ¿Imapajtaj yanapawanchej kausarimunanchejta yachasqanchej?

¹⁵ Runasqa mana wañunankurayku imallatapis ruwankuman. Satanaspa makinpi kajkunataj, chaywan manchachispa runasta munasqankuta ruwachinku. Wakintaqa amigosninkuta wasanchachinku chayri sajra imasta ruwachinku. Noqanchejrí mana wañuyta manchachikunchejchu. Imajtinchus yachanchej, enemigosninchej wañuchiwajtinchejpis Jehová Dios kausarichimunawanchejta (Apo. 2:10). Chayrayku ni ima ruwasqankupis, Jehová Diosmanta karunchawasunchu (Rom. 8:35-39). Jehová Diosqa wañusqasta kausarichimuspa, manchay yachayniyoj kasqanta rikuchin. Satanasqa manaña wañuywan manchachiyta atiwanchejchu. Chantapis kausarimunanchejta yachayqa, astawan sinchʼita sayanapaj kallpachawanchej.

16. ¿Ima tapuykunapitaj piensarinanchej kanman, chanta imaynatá chay yanapawasun?

¹⁶ Enemigosninchej wañuchinawanchejta niwajtinchej, ¿atienekusunchu Jehová Dios kausarichimunawanchejpi? Chayta yachanapaj, kay tapuykunapi piensarina: Imata ruwanallapajpis, ¿Jehová Diospipunichu atienekunchej? (Luc. 16:10). Paypa Gobiernonta ñaupajman churajtinchej, ¿ni imata faltachinawanchejta creenchejchu? (Mat. 6:31-33). Chay tapuykunaman “arí” ninchej chayqa, Jehová Diospi atienekunchej. Chaytaj ima llakiyllatapis aguantanapaj yanapawasun (Pro. 3:5, 6).

17. 1) Wañusqas kausarimunanku, ¿imaynatá Jehová Dios pacienciayoj kasqanta rikuchiwanchej? 2) ¿Imatá ruwasunman Jehová Diospa paciencianmanta agradecekunapaj?

¹⁷ Jehová Diosqa yachanña maykʼajchus kay sajra mundota chinkachinanta (Mat. 24:36). Payqa yachallantaj maykʼajchus wañusqasta kausarichimunantapis (Juan 5:28). Jehová Diosqa wañusqasta mayta kausarichimuyta munaspapis, chay tiempo chayamunanta pacienciawan suyakonqa (Isa. 25:8). Ajina pacienciayoj kasqanmanta, mayta agradecekunanchej tiyan. Jehová Dios pacienciayoj kasqanrayku, ashkha runas juchasninkumanta arrepientekuyta atinku. Noqanchejpis paykuna ukhupi kashanchej (2 Ped. 3:9). ¿Imatá ruwasunman Jehová Diospa paciencianmanta agradecekunapaj? “Allin sonqoyoj” runasta tukuy atisqanchejta maskʼamuna (Hech. 13:48). Chantá paykunata Jehová Diosta munakunankupaj, sirvinankupaj ima yanapana. Ajinamanta paykunapis Jehová Diospa paciencianwan yanapachikuyta atenqanku. Imaraykuchus  payqa, tukuy runas wiñay kausayta japʼinankuta munan.

18. ¿Imaraykutaj wajkunawan pacienciakunanchej tiyan?

¹⁸ Waranqa watas tukukuytaraj, mana juchayoj runasman tukusunchej. Chaykamataj Jehová Diosqa pacienciawan perdonallawasunpuni. Chayrayku noqanchejpis, Jehová Dios jina wajkunawan pacienciakuna, allin ruwasqasninkutataj qhawana. Uj hermanamanta parlarina. Paypa qosanqa anchata phutikuyta qallarerqa, reunionesmanpis niña rerqachu. Hermananchej nin: “Maytapuni llakikorqani. Imatachus ruwayta munasqaykutapis, niña ruwayta aterqaykuchu”, nispa. Hermanaqa qosanwan pacienciakorqa, munakullarqapunitaj. Chantapis llakiyninta Jehová Diosman saqerqa, qosantapis yanapallarqapuni. Hermanaqa Jehová Dios jina ruwarqa. Llakiynillanpi piensananmantaqa, qosanpa allin ruwasqasninta qhawarqa. Pay nillanpuni: “Qosayqa manchay kʼacha, tukuy atisqantataj kallpachakushan manaña anchata llakikunanpaj”, nispa. Ichá familiaresninchej chayri wakin hermanosninchej, llakiykunapi kashanku. Paykunawan pacienciakunanchejqa may allinpuni.

19. Llakiykuna chinkanankama, ¿imatá ruwananchej tiyan?

¹⁹ Jesuswan angeleswanqa, Jehová Dios jallpʼata ruwashajtin mayta kusikorqanku. Jinapis kay jallpʼapi mana pantaj runasllataña rikuspa, astawanrajchá kusikonqanku. Chay runasqa Jehová Diosta munakonqanku, sirvenqankutaj. Jesuswan khuska cielopi gobernajkunapis, runasta yanapasqankumanta mayta kusikonqanku (Apo. 4:4, 9-11; 5:9, 10). Chay tiempopi imaynachus kausay kananpi piensarina. Llakiymanta waqanamantaqa, kusiymanta waqarisun. Onqoykunaqa manaña kanqachu, manaña llakikusunchu, wañuypis chinkanqa (Apo. 21:4). Chay pʼunchay chayamunankama, Jehová Dios jina munakuyniyoj, yachayniyoj, pacienciayojtaj kana. Chayta ruwasun chayqa, ima llakiypi kaspapis kusisqallapuni kasun (Sant. 1:2-4). Maytapuni agradecekunchej, Jehová Dios wañusqasta kausarichimunanta niwasqanchejmanta (Hech. 24:15).