35 YACHAQANA
123 TAKIY Diospa kamachisqanta kasunachej
Congregacionmanta orqhosqa kajkunata, ¿imaynatataj ancianos yanapanku?
“Cielopi aswan kusiy kanqa uj juchasapa runa juchasninmanta pesachikojtin, chay 99 cheqan runasmanta nisqaqa, pikunachus mana pesachikunankuchu tiyan chaykunamanta” (LUC. 15:7).
TEMA
¿Imaraykutaj wakin kutis pitapis congregacionmanta orqhokun? Chanta, ¿imaynatataj ancianos yanapankuman arrepientekunanpaj, watejmantataj Jehovaj amigon kananpaj?
1, 2. 1) Pipis mana arrepientekojtin, ¿imaynatá Jehová chay runata qhawan? 2) ¿Juchallikoj imata ruwanantataj Jehová munan?
JEHOVÁ DIOSNINCHEJQA mana ima juchatapis qhawakullanchu (Sal. 5:4-6). Payqa munan Bibliapi qowanchej chay cheqan kamachiykunasninta kasukunata. Pero yachan pantaj runas kasqanchejta, chayrayku mana suyanchu ni imitapi pantananchejta (Sal. 130:3, 4). Chaywanpis payqa mana qhawakullanchu sajra runasta, ‘Diosninchejpa jatun khuyakuyninta achakita jina churaspa mana pʼenqakuspa juchata’ ruwajkunata (Jud. 4). Bibliaqa sutʼita nin Diosninchej Armagedonpi ‘sajra runasta’ chinkachinanta (2 Ped. 3:7; Apo. 16:16).
2 Chaywanpis Jehovaqa mana munanchu ni pi chinkachisqa kananta. Ñaupaj yachaqanaspi yachakorqanchej jina, Bibliapi sutʼita willawanchej payqa “tukuy arrepientekunankuta” munasqanta (2 Ped. 3:9). Ancianosqa Jehová jina pacienciawan yanaparinku jatun juchapi urmajkunata, arrepientekunankupaj, watejmantataj Jehovaman qayllaykunankupaj. Chaywanpis mana tukuychu yanapachikuyta munanku (Isa. 6:9). Ancianos ashkha kutispi arrepientekunankupaj yanapayta munajtinkupis, wakenqa manapuni cambiankuchu. Ajina kajtin, ¿imatataj ruwakunan tiyan?
‘JUCHALLIKOJ RUNATAQA ORQHOYCHEJ’
3. 1) Biblia nisqanman jina, pipis juchallikuspa mana arrepientekojtin, ¿imatá ruwakunan tiyan? 2) Juchallikoj mana arrepientekojtin, ¿imaraykutaj nisunman pay kikin orqhosqa kayta ajllakusqanta?
3 Pillapis jatun juchapi urmaspa mana arrepientekunchu chayqa, ancianosqa 1 Corintios 5:13 nisqanman jina ruwananku tiyan. Chaypi nin: “Chay juchallikoj runataqa qankuna ukhumanta orqhoychej”, nispa. Juchallikojqa yachan mana arrepientekojtin congregacionmanta orqhosqa kananta. Chayrayku pay kikin chayta ajllakushan. Payqa imatachá tarpun chayllatataj oqharishan (Gál. 6:7). Ancianosqa ashkha kutistaña yanapariyta munarqanku, paytaj manapuni yanapachikuyta munarqachu (2 Rey. 17:12-15). Ruwasqanpi yachakun Jehovaj kamachiykunasninta mana kasukuyta munasqan (Deu. 30:19, 20).
4. Pillapis congregacionmanta orqhosqa kajtin, ¿imaraykutaj willakun manaña Jehovaj testigonchu kasqanta?
4 Jatun juchapi urmasqanmanta mana arrepientekojta congregacionmanta orqhojtinku, congregacionman willakun chay runaqa manaña Jehovaj testigonchu kasqanta. a Chaytaqa willakun mana juchallikojta kʼumuykachachinapajchu, manachayqa congregación Biblia nisqanman jina manaña paywan masichakunanpaj, nitaj paywan ‘mikhunallanpajpis’ (1 Cor. 5:9-11). Jehovaqa yachan imaraykuchus chayta kamachiwasqanchejta. Apóstol Pabloqa nerqa “pisi levaduralla tukuy masata poqochisqanta” (1 Cor. 5:6). Juchanmanta mana arrepientekojta congregacionpi kananta saqellankuman chayqa, ichapis hermanosqa manaña kallpachakunkumanchu Jehovaj cheqan kamachiykunasninman jina kausakunankupaj (Pro. 13:20; 1 Cor. 15:33).
5. ¿Imaynatá qhawananchej tiyan manaña testigochu kajkunata, chanta imaraykutaj?
5 Chanta, ¿imaynatá qhawanchej manaña Jehovaj testigonchu kajkunata? Manaña paykunawan masichakuspapis, mana yuyanchejchu ni jaykʼaj arrepientekunankuta. Astawanpis tropaman kutinpuyta atej chinkasqa ovejitata jina qhawanchej. Ama qonqanachu paypis Jehovaman kausayninta qopusqanta. Ajinapis kunanqa niña chayman jinachu kausakushan, chayrayku wañuy patapi kashan (Eze. 18:31). Chaywanpis tiempo kashajtillanraj, Jehová khuyakuyninta rikuchishallawajtinchejraj suyanchej Jehovaman kutinpunanta. Chayrayku, ¿imaynatataj ancianos yanapankuman congregacionmanta orqhosqa kajkunata?
¿IMAYNATÁ ANCIANOS YANAPANKU ORQHOSQA KAJKUNATA?
6. ¿Imaynatataj ancianos yanapanku congregacionmanta orqhosqa kajta?
6 Pillapis congregacionmanta orqhosqa kajtin, ¿imatá ancianos ruwanku? ¿Paymanta qonqakapunkuchu, niñatajchu Jehovaman kutinpunanpaj yanapayta maskʼanku? Mana ajinachu. Comité de ancianosmanta kajkunaqa juchallikojman orqhosqa kananta willajtinku, payman sutʼinchanqanku imatachus ruwananta congregacionman kutinpunanpaj. Jinapis mana chayllatachu ruwanqanku. Casi tukuynin kutispeqa, juchallikojman nenqanku uj mashkha killasninman paywan watejmanta parlayta munasqankuta cambiasqantañachus manachus yachanankupaj. Chayta nishajtinku juchallikoj “ya” nenqa chayqa, ancianosqa qhepan kutipi paywan tantakojtinku, juchallikojta munakuywan yanaparenqanku arrepientekunanpaj, Jehovamantaj kutinpunanpaj. Chay kutikama juchallikoj manarajpuni cambianchu chaypis, ancianosqa kallpachakullanqankupuni aswan qhepaman maypi jina paywan tantakunankupaj.
7. ¿Imaynatataj ancianos Jehová jina khuyakunku congregacionmanta orqhosqa kajkunata? (Jeremías 3:12).
7 Ancianosqa mayta kallpachakunanku tiyan congregacionmanta orqhosqa kajkunata Jehová jina khuyakunankupaj. Ñaupa tiempopi, Jehovaqa israelitas mana kasukojtinku mana jinallachu suyarqa paykunaraj kutinpunankuta. Astawanpis manaraj ni imaynitata arrepientekushajtinku, payraj paykunata yanapayta maskʼarqa. Kay revistaj iskay yachaqananpi yachakorqanchej jina, Jehovaqa profeta Oseasnejta rikucherqa may khuyakuyniyoj kasqanta. Jehovaqa Oseasman nerqa warmin juchallikushallajtinraj, paywan allinyakoj rinanta (Ose. 3:1; Mal. 3:7). Ancianosqa Jehová jina tukuy sonqo munanku juchallikoj arrepientekunanta, Jehovaj llajtanmantaj kutinpunanta. Nitaj ima jarkʼaytapis chaypaj churankuchu (Jeremías 3:12 leey).
8. Chinkasqa qhari wawamanta kikinchaypi, ¿imatá Jehovaj khuyakuyninmanta yachakunchej? (Lucas 15:7).
8 Iskay yachaqanapeqa chinkasqa qhari wawamantawan parlarqanchej. Tataqa wawanta rikuytawankama usqhayllata taripamuspa “abrazaykusqa, may munakuywantaj muchʼaykusqa” (Luc. 15:20). Payqa mana suyarqachu wawan perdontaraj mañakunanta. Astawanpis wawanta maytapuni munakusqanrayku payraj ñaupajta correrqa taripamoj. Ancianospis congregacionmanta chinkasqa ovejitasta ajinallatataj munakunku, maytataj yanaparinku “wasiman kutinpunankupaj” (Luc. 15:22-24, 32). Uj juchallikoj kutinpojtenqa cielopi mayta kusikunku, kay jallpʼapipis mayta kusikullanchejtaj (Lucas 15:7 leey).
9. ¿Imatataj Jehová nin jatun juchapi urmajkunaman?
9 Kaykama yachakunchej jina, Jehovaqa jatun juchapi urmajkunata, chaymantataj mana arrepientekojkunata mana qhawakullanchu, nitaj saqenchu llajtallanpipuni kanankuta. Chantapis payqa paykunamanta mana qonqakapunchu, astawanpis munan kutinpunankuta. Oseas 14:4 reparachiwanchej imaynatachus Jehová arrepientekojkunata qhawasqanta. Chaypi nin: “Noqa paykunata sanoyachisaj, paykunataj niña jaykʼajpis wasanchawanqankuchu. Noqaqa mana tanqasqa jinallachu paykunata munakusaj. Imaraykuchus phiñakuyneyqa paykunamanta karunchakun”, nispa. Chayrayku ancianosqa may atentos kashananku tiyan juchallikoj arrepientekuyta qallarishasqantañachus manachus reparanankupaj. Chantapis may sumajpuni kanman paykuna Jehovaman usqhayllata kutinpunanku.
10, 11. Unayña congregacionmanta orqhosqa kajkunata, ¿imaynatá ancianos yanaparinku?
10 Wakinkunaqa unayña congregacionmanta orqhosqas karqanku, ichapis ashkha watas ñaupajtaña. Paykunaqa ichapis manaña chay juchata ruwashankuñachu. Chayri ichapis ni yuyarikullankupischu imaraykuchus orqhosqa kasqankuta. Imayna kajtinpis, ancianosqa kallpachakonqanku paykunata maskʼanankupaj, visitarinankupaj ima. Visitarishaspaqa paykunawan khuska orakunankuta ninkuman. Chantapis munakuywan kallpacharenqanku congregacionman kutinpunanpaj. Pipis unayña congregacionmanta orqhosqa karqa chayqa, creeyninpi qʼala llauchhiyasqachá kashan. Chayrayku congregacionman kutinpuyta munan chayqa, ancianos arreglosta ruwankuman pipis Bibliamanta yachachinanpaj, manaraj kutinpushajtinpis. Ancianospuni ajllanqanku pichus estudiachej rinanta.
11 Ancianosqa Jehová jina khuyakuyniyoj kayta munanku. Chayrayku mayta kallpachakunku paykunata maskʼanankupaj, yanapanankupaj ima. Kutinpuyta munajtinkutaj, sutʼita willananku tiyan kutinpunankupaj punku kicharisqa kashasqanta. Juchallikoj arrepientekunña, kausaynintapis yuyaynintapis cambianña chayqa, kutinpuyta atinpacha (2 Cor. 2:6-8).
12. 1) ¿Ima juchas kajtintaj ancianos sumajtaraj tʼukurinanku tiyan? 2) ¿Imaraykutaj mana ninanchejchu tiyan wakin juchasta ruwajkunata Jehová ni jaykʼaj khuyakunanta? (Sutʼinchaynintawan qhawariy).
12 Wakinkunaqa congregacionmanta orqhosqa karqanku uj menor de edadta abusasqankurayku, Diospa contranpi oqharikusqankurayku, chayri casado kashaspa paykunapuni divorciakuyta maskʼasqankurayku. Chay jina juchasta ruwajkunata manaraj congregacionman kutiykuchimushaspa, ancianosqa sumajtaraj tʼukurinanku tiyan. Sutʼitaraj yachananku tiyan chay jina juchasta ruwasqankumanta tukuy sonqochus manachus arrepientekusqankuta (Mal. 2:14; 2 Tim. 3:6). Ancianosqa Jehovaj ovejitasninta sumajta cuidananku tiyan. Ajinapis kayta ama qonqanachu: Jehovaqa imayna jatun juchata ruwajkunatapis, tukuy sonqo arrepientekojtinku, manañataj chayta ruwajtinku, llajtanpi watejmanta japʼikaponqa. Chayrayku wajkunata traicionajkunata, manchay fiero juchastapuni ruwajkunata manaraj kutiykuchimushaspa ancianos sumajtaraj qhawaykunanku kajtinpis, mana ninankuchu tiyan Jehová wakin laya juchasta ruwajkunata ni jaykʼaj khuyakunanta (1 Ped. 2:10). b
¿IMATÁ CONGREGACIÓN RUWANMAN?
13. ¿Imatataj ruwayta atinchej pipis kʼamisqa kajtin, chanta imatataj mana ruwayta atinchejchu pipis orqhosqa kajtin?
13 Pasaj yachaqanapi yachakorqanchej jina, wakin kutisqa willakun uj hermano kʼamisqa kasqanta. Ajina kajtenqa paywan masichakuyta atillanchejpuni, imajtinchus yachanchej pay arrepientekusqantaña, manañataj juchata ruwashasqanta (1 Tim. 5:20). Payqa hermanollanchejpuni, necesitantaj kallpacharinanchejta allin kajta ruwanallanpajpuni (Heb. 10:24, 25). Congregacionmanta orqhosqa kasqanta willakojtinrí, ¿imatá ruwanchej? Manaña paywan masichakunchejchu, nitaj mikhullanchejpischu (1 Cor. 5:11).
14. ¿Imata ruwanantataj sapa uj cristiano ajllanan tiyan? (Fotostawan qhawariy).
14 ¿Chay ninayanchu congregacionmanta orqhochikojta nipuni imapajpis parlapayanata? Mana jinachu. Paywanqa mana masichakusunchu. Ajinapis uj cristianoqa Bibliamanta yachakusqanman jina, sonqon mana juchachananpaj jinataj ichapis congregacionmanta orqhosqa familiarninta, chayri ñaupajta uj sumaj amigon karqa chayta, tantakuykunaman invitarinman. Tantakuyman jamojtinrí, ¿imaynatá payta qhawasun? Ñaupaj wataspeqa mana saludarillajpischu kanchej. Chaywanpis kunanqa sapa ujña Bibliamanta yachakusqanchejman jina, sonqonchej mana juchachanawanchejpaj jinataj qhawarina tiyan tantakuyman jamojtin saludarinatachus manachus. Ajinapis tantakuyman jamojtenqa mana unaytachu paywan parlaykusun, nitaj paywan masichakuyta maskʼasunchu.
Sapa cristiano ajllanan tiyan Bibliamanta yachakusqanman jina, sonqon mana juchachananpaj jinataj, orqhosqa kajta tantakuykunaman invitarinantachus manachus, tantakuyman jamojtin uj chhikanta saludarinantachus manachus (14 parrafota qhawariy).
15. 2 Juan 9-11 versiculospi, ¿pikunamantataj Juan parlasharqa? (“ Juanwan Pablowan, ¿kikin clase juchasllamantatajchu parlasharqanku?” nisqa recuadrotawan qhawariy).
15 Ichapis tapukusunman: “¿Manachu Bibliaqa nin: ‘Pichus chay runata napaykojqa sajra ruwasqasninta ruwaysishan’, nispa?” (2 Juan 9-11 leey). Juanqa kay versiculospi parlasharqa Diospa contranpi oqharikojkunamanta, sajra imasta ruwanankupaj wajkunata aysajkunamanta ima (Apo. 2:20). Chayrayku sichus congregacionmanta orqhosqa kaj llullasta wajkunaman yachachishan, wajkunatapis juchata ruwanankupaj inkitashan chayqa, ancianosqa mana payta waturej renqankuchu. Ajinapis chay runaqa cambiayta atinraj. Pero cambianankamaqa mana chay runata saludananchejchu tiyan, nitaj tantakuymanpis invitarinanchejchu tiyan.
JEHOVÁ JINA KHUYAKUNA
16, 17. 1) ¿Juchallikojkuna imata ruwanankutataj Jehová munan? (Ezequiel 18:32). 2) ¿Imata ruwaspataj ancianos Jehovawan khuska llankʼanku?
16 ¿Imatataj kay phishqa yachaqanaspi yachakorqanchej? Jehovaqa ni pipis chinkachisqa kananta munanchu (Ezequiel 18:32 leey). Payqa munan juchallikojkuna paywan allinyakunankuta (2 Cor. 5:20). Chayrayku paymanta karunchakoj kamachisninta may chhika kutista nerqa arrepientekunankuta, paymantaj kutinpunankuta. Congregacionmanta ancianosqa Jehovawan khuska llankʼanku jatun juchapi urmajkunata arrepientekunankupaj yanapaspa. Chay ruwaytaj may sumajpuni (Rom. 2:4; 1 Cor. 3:9).
17 Cielopi may jatun kusiy kan juchallikojkuna arrepientekojtinku. Cielopi kashaj Tatanchej Jehovaqa maytapuni kusikun chinkasqa ovejitasnin congregacionman kutinpojtinku. Chayrayku tʼukurinallapuni Jehová Diosninchej may khuyakuyniyoj, jatun khuyakuyniyojtaj kasqanpi. Ajinamanta payta diamanta día astawan munakusunchej (Luc. 1:78).
111 TAKIY ¡May kusisqas kanchej!
a Kunanmantapachaqa manaña qharqosqa nispachu nisun. 1 Corintios 5:13 versiculopi ‘qharqoy’ palabra rikhurisqanqa griego parlaypi niyta munan “orqhoy”. Chayrayku chay palabrataqa quechuapi Diospa Palabran Biblianchejpi 1 Corintios 5:2, 13 versiculospi allinchakonqa. Kunanmantapachaqa congregacionmanta orqhosqa nispa nisun.
b Biblia nisqanman jina, mana perdonniyoj juchaqa mana uj laya juchachu. Manachayqa ima juchallapis kanman, pero chay juchata ruwajqa qʼala rumiyasqa sonqoyoj, wiñaypajtaj Diospa contranpi churakun. Jehovawan Jesusllawan niyta atinku pikunachus mana perdonniyoj juchata ruwasqankuta (Mar. 3:29; Heb. 10:26, 27).
