1. ¿Imatá Jehová munan?

 JEHOVAQA runasta ruwawarqanchej sapa ujninchej imatachus ruwanata ajllakunanchejpaj. Chayrayku sapa día imatachus ruwanata ajllanchejpuni. Aswan sumaj imata ajllakusqanchejtaj kashan Jehovaman kausayninchejta qopusqanchej, familianmantaj yaykusqanchej. Jehovataj munan tukuypis chayta ruwananchejta. ¿Imarayku? Munakuwasqanchejrayku, allinninchejtataj munasqanrayku. Payqa munan amigosnin kananchejta, wiñaypajtaj kausakunanchejta (Deu. 30:19, 20; Gál. 6:7, 8).

 2. ¿Juchallikojkuna imata ruwanankutataj Jehová munan? (1 Juan 2:1).

² Jehovaqa mana pitapis obligawanchejchu payta sirvinapaj, manaqa saqewanchej sapa ujninchej ajllakunata imatachus ruwananchejta. Chanta, ¿imataj kanman uj cristiano bautizasqaña kashaspa uj jatun juchapi urmajtin? Mana arrepientekojtenqa congregacionmanta orqhosqa kanan tiyan (1 Cor. 5:13). Juchallikoj orqhosqa kajtinpis, Jehovaqa tukuy sonqo munan payman kutinpunanta. Payqa Wawanta kachamorqa juchankumanta arrepientekoj runasta perdonananpaj (1 Juan 2:1 leey). Diosninchejqa may munakuyniyoj kasqanrayku juchallikojkunata arrepientekunankupaj yanapayta munan (Zac. 1:3; Rom. 2:4; Sant. 4:8).

 3. ¿Imatataj kay yachaqanapi yachakusunchej?

³ ¿Imaynatá Jehová qhawan juchata, jatun juchapi urmajkunatapis? Chayta kay yachaqanapi yachakusun, chantá Jehová pay jina ruwanata munasqantapis. 1) Ñaupajtaqa yachakusunchej  Corinto congregacionpi uj runa jatun juchapi urmajtin imatachus paywan ruwasqankuta. 2) Chantá yachakusunchej chay juchallikoj arrepientekojtin imata ruwanankutachus apóstol Pablo nisqanta. 3) Chaymantataj yachakusunchej imaynatachus Jehová jatun juchapi urmajkunata qhawasqanta.

UJ HERMANO JATUN JUCHAPI URMAJTIN, ¿IMATÁ RUWARQANKU?

 4. ¿Imataj karqa Corinto congregacionpi? (1 Corintios 5:1, 2).

⁴ (1 Corintios 5:1, 2 leey). Apóstol Pablo willamunanpaj kinsa kaj viajenta ruwashajtin, yacharqa Corintomanta mosoj congregacionpi uj jatun juchata ruwakushasqanta. Uj hermano madrastranwan puriykuspa tiyaykakapusqa. Chaymanta parlaspa Pablo nerqa: “Chay jina khuchichakuy juchaqa mana creejkuna ukhupipis mana kanchu”, nispa. Congregacionmanta hermanostaj chayta qhawakushallarqanku, chantapis ichá allillanta ruwashasqanta yuyarqanku. Ichapis wakinninkoqa yuyarqanku Jehová jina khuyakushasqankuta, Diostaj pantaj runas kasqanchejrayku entiendellawasqanchejta. Chaywanpis Jehovaqa mana ima juchatapis qhawakullanchu. Chay hermanoqa mana pʼenqakuspa juchata ruwasqanwan congregacionta nichá allinpajchu qhawachisharqa. Chantapis ichá paywan masichakoj hermanospis pay jinallataj ruwayta munankuman karqa. Chayrayku, ¿imata ruwanankutataj Pablo nerqa Corintomanta congregacionman?

 5. ¿Imatá Pablo qhelqarqa Corinto congregacionman, chanta imatá chaywan niyta munasharqa? (1 Corintios 5:13; dibujotawan qhawariy).

⁵ (1 Corintios 5:13 leey). Pabloqa Dios yuyaychasqanman jina nerqa chay mana arrepientekoj runata congregacionmanta orqhonankuta. Jina kajtin, ¿hermanos paywan masichakuyta atillankumanpunichu karqa? Apóstol Pabloqa nerqa amaña paywan ‘purinankuta’, chay jina runawanqa ‘ama mikhunallankutapis’ (1 Cor. 5:11). Piwanpis mikhuspaqa parlarikunchejpuni, ajinamantataj aswan tiempota paywan kanchej. Chayrayku Pabloqa paywan mana mikhunankuta nispa, ama paywan masichakunankuta nisharqa. Paywan mana masichakojtinkutaj congregación jarkʼasqa kanman karqa (1 Cor. 5:5-7). Chantapis juchallikoj runa reparanman karqa Jehovaj sonqonta nanachisqanta. Chay juchata ruwasqanmanta mayta pʼenqakunman karqa, ajinamanta arrepientekuyta munanman karqa.

 6. Pablo cartanpi imatachus nisqanta, ¿hermanos japʼikorqankuchu, chanta juchallikoj runa imatá ruwarqa?

⁶ Corintomanta congregacionman cartata  apachisqantawan, Pabloqa yachaytachá munarqa imaynatachus hermanos chay cartanta japʼikusqankuta. Pisi tiemponmantaj Tito willarqa sumajta japʼikusqankuta, kamachisqanman jinataj ruwasqankuta (2 Cor. 7:6, 7). Chantapis Pablo cartanta apachisqanmanta pisi tiemponman juchallikusharqa chay runaqa, arrepientekusqa. Payqa imatachus ruwashasqanta, yuyasqantapis cambiaspa Jehovaj kamachiykunasninta kasukuyta qallarisqa (2 Cor. 7:8-11). Chayrayku, ¿ima kamachiykunatataj Pablo qorqa Corintomanta congregacionman?

¿IMATÁ CONGREGACIÓN RUWANAN KARQA JUCHALLIKOJ ARREPIENTEKOJTIN?

 7. Juchallikoj congregacionmanta orqhosqa kasqan, ¿imata ruwananpajtaj payta yanaparqa? (2 Corintios 2:5-8).

⁷ (2 Corintios 2:5-8 leey). Pablo nerqa: “Qankunaqa chay juchallikoj runata cheqanchankichejña. Amaña payta qhesachaychejchu”, nispa. Chaywanqa nisharqa congregacionmanta  orqhosqa kajqa arrepientekunan kasqanta reparakusqantaña. Arrepientekusqanraykutaj hermanosqa manaña cheqanchanankuchu karqa (Heb. 12:11).

 8. ¿Imatawantaj Pablo Corintomanta congregacionta nerqa?

⁸ Chaymantataj Pabloqa hermanosta nerqa: “Chay runata perdonaychej, sonqochaychejtaj”, nispa. Chantá nillarqataj: “Mañakuykichej, munakuyniykichejta payman watejmanta rikuchinaykichejta”, nispa. Chaywanqa Pablo nisharqa congregacionman kutimojta saqenankuta, chantapis parlasqankuwan ruwasqankuwan sonqomantapacha perdonasqankuta, munakusqankutataj rikuchinankuta. Ajinamanta juchallikojqa reparanman karqa congregacionmanta hermanosqa kutinpusqanmanta mayta kusikusqankuta.

 9. ¿Imaraykutaj wakin hermanos mana perdonayta atillarqankuchu congregacionman kutinpojta?

⁹ Ichapis congregacionmanta wakin hermanosqa, chay juchallikoj kutinpojtin mana chunka makiwan japʼikuyta atillarqankuchu. ¿Imaraykú chayta ninchej? Imajtinchus ruwasqanqa tukuynin congregacionta mana allinpajchu qhawacherqa, chantapis ichá wakin hermanospa sonqonkuta nanacherqa. Chay juchallikojqa millay imastapuni ruwarqa. Hermanostaj Jehovaj kamachiykunasninman jina kausakunankupaj kallpachakusharqanku. Chayrayku ichapis wakenqa yuyarqanku payta watejmanta chunka makiwan japʼikuy mana allinchu kasqanta (Lucas 15:28-30, kikinchay). Chaywanpis imaraykutaj congregacionman kutinpoj hermanoman, ¿tukuy sonqo munakusqankuta rikuchinankupuni karqa?

10, 11. ¿Imataj kanman karqa juchanmanta arrepientekojta ancianos mana perdonayta munajtinku?

¹⁰ Sichus ancianos chay juchallikoj hermanota arrepientekusqantawanña mana congregacionman kutinpunanta saqenkumanchu karqa chay, chayri sichus kutinpojtin mana munakuywanchu japʼikunkuman karqa chay, ¿imataj kanman karqa? Ichapis juchanmanta arrepientekojqa “anchata llakikusqanwan” atipachikunman karqa. Ichapis yuyanman karqa niña watejmanta Jehovata sirviyta atisqanta, chayri Jehovaj ñaupaqenpi allinpaj qhawasqa kananpaj qhasillata kallpachakushasqanta.

¹¹ Mana chayllachu kanman karqa. Sichus congregacionmanta hermanos juchallikojta mana perdonankumanchu karqa chayqa, paykunapis niña Jehovawan allinpichu kashankuman karqa. ¿Imarayku? Imaraykuchus mana perdonajtinkoqa mana Jehová jinachu ruwashankuman karqa. Payqa arrepientekojkunata perdonananpaj wakichisqa kashan. Astawanpis Satanás jina kashankuman karqa, payqa sajra, nitaj khuyakunchu. Chaywanqa Diabloj makinman churakushankuman karqa, Diablotaj paykunamanta valekunman karqa chay runata Jehovamanta karunchananpaj (2 Cor. 2:10, 11; Efe. 4:27).

12. ¿Imaynatá congregacionmanta hermanos Jehová jina ruwankuman karqa?

¹² Chanta, ¿imaynatá Corintomanta hermanos Jehová jina ruwankuman karqa, nitaj Satanás jinachu? Jehová jina juchanmanta arrepientekojta perdonaspa. Bibliata wakin qhelqajkuna imatachus Diosmanta nisqankuta qhawarina. David nerqa: “Qanmin kʼacha kanki, perdonanapajpis wakichisqa kashanki”, nispa (Sal. 86:5). Miqueastaj nerqa: “¿Pitaj qan jina Dios kanmanri? Qanqa […] juchasninta perdonanki, pantasqasnintapis perdonanki”, nispa (Miq. 7:18) Isaiastaj nerqa: “Sajra runaqa sajra kausayninta saqechun, wajkunata ñakʼarichej runapis yuyaychakusqanta qonqachun. Jehová Diosman kutirikuchun,  paytaj khuyakonqa, Diosninchejman kutirikuchun, paytaj mana michʼakuspa perdonanqa”, nispa (Isa. 55:7).

13. ¿Imaraykutaj arrepientekojta congregacionman kutinpunanta saqenanku karqa? (“ Corinto congregacionmanta juchallikoj runa, ¿mashkha tiemponmantaj kutinporqa?” nisqa recuadrota qhawariy).

¹³ Hermanosqa Jehová jina ruwanankupaj arrepientekojta chunka makiwan japʼikunanku karqa, mayta munakusqankutataj rikuchinanku karqa. Pabloqa nerqa juchanmanta arrepientekojta perdonajtinku, “tukuy imapi” kasukushasqankuta rikuchinankuta (2 Cor. 2:9). Congregacionmanta orqhochikusqanmanta pisi tiempollaraj pasajtinpis, cheqanchasqankoqa arrepientekunanpaj yanaparqaña. Chayrayku ancianosqa manaña suyanankuchu karqa astawan tiempo pasananta arrepientekoj congregacionman kutinpunanpaj.

¿IMATÁ YACHAKUNCHEJ JEHOVAJ CHEQAN KAYNINMANTA, KHUYAKUYNINMANTAWAN?

14, 15. ¿Imatataj yachakunchej Corinto congregacionpi imachus pasasqanmanta? (2 Pedro 3:9; fototawan qhawariy).

¹⁴ Jehovaqa imachus Corinto congregacionpi pasasqanta Palabranpi qhelqacherqa “yachachinawanchejpaj” (Rom. 15:4). Chaypi reparanchej Jehovaqa jatun juchasta llajtanpi mana qhawakullasqanta. Wakinkunaqa yuyanku Jehová khuyakuyniyoj kasqanrayku, juchanmanta mana arrepientekojta congregacionpi kananta saqellasqanta. Jinapis  chayqa mana ajinachu. Jehovaqa may khuyakuyniyoj kajtinpis mana ima juchatapis qhawakullanchu, nitaj kamachiykunasninta pʼakinankuta saqellanchu (Jud. 4). Sichus mana arrepientekojta congregacionpi kanallantapuni Jehová saqenman chayqa, mana khuyakuyniyojchu kanman. Imajtinchus chay runaqa congregacionta chʼichichanman (Pro. 13:20; 1 Cor. 15:33).

¹⁵ Chaywanpis Jehovaqa mana munanchu ni pi chinkachisqa kananta, payqa munan atikojtenqa tukuy runas salvakunankuta. Jehovaqa mayta khuyakun kausayninkuta cambiaspa watejmanta payman qayllaykunankupaj kallpachakojkunamanta (Eze. 33:11; 2 Pedro 3:9 leey). Juchallikoj runa arrepientekusqanrayku, kausaynintapis cambiasqanrayku, Jehovaqa apóstol Pablonejta Corinto congregacionta nerqa payta perdonanankuta, watejmantataj japʼikunankuta.

16. Corinto congregacionpi juchallikojta Jehová perdonasqanta yachaspa, ¿imatá Jehovamanta yuyanki?

¹⁶ Corinto congregacionpi imachus kasqanqa sutʼita rikuchiwanchej Jehová munakuyniyoj kasqanta, cheqan kajta ruwasqanta, nitaj wakillanman kutikuspachu juzgasqanta (Sal. 33:5). Chayrayku, ¿maytacharí Diosninchej Jehovata jatunchayta munanchej? Juchasapas kasqanchejrayku tukuyninchej necesitanchejpuni Jehová perdonanawanchejta. Maytapuni agradecekunchej Jehová Diosninchej Wawanta juchasninchejta perdonananpaj kachamusqanmanta. Maytapuni sonqochawanchej Jehová kamachisninta munakusqanta yachay, allinninchejtataj munasqanta yachay.

17. ¿Imastataj qhepan yachaqanaspi yachakusunchej?

¹⁷ Kay tiempopi pipis jatun juchapi urmajtin, ¿imaynatataj ancianos Jehová jina munakuywan juchallikojta arrepientekunanpaj yanapankuman? Ancianos uj juchallikojta congregacionmanta orqhojtinku, chayri kutinpunanta nejtinku, ¿imaynatá chayta qhawananchej tiyan? Chayta yachakusunchej qhepan yachaqanaspi.