1. ¿Imatá ruwan arrepientekoj runa?

 MANA allin kajta ruwanchej chayqa, arrepientekunanchejpuni tiyan. Biblia nisqanman jina, arrepientekoj runaqa sajra kajta ruwasqanta chejnikapun, niña chay juchata ruwanñachu, nikuntaj ni jaykʼaj ujtawan chayta ruwananta (Bibliaj Glosarionpi “pesachikuy” nisqata leeriy).

 2. ¿Imaraykutaj tukuypis arrepientekuymanta yachakunanchejpuni tiyan? (Nehemías 8:9-11).

² Tukuypis sapa día juchallikunchej, chayrayku yachakunanchejpuni tiyan imachus arrepientekuy kasqanta. Adanmantawan Evamantawan mirasqanchejrayku tukuy juchallikunchej, wañunchejtaj (Rom. 3:23; 5:12). Tukuy juchata herenciata jina japʼinchej. Sinchʼi creeyniyoj runaspis juchawan maqanakorqanku, paykunamanta ujnintaj karqa apóstol Pablo (Rom. 7:21-24). Chaytaj mana niyta munanchu juchasapas kasqanchejrayku sapa día llakisqalla kanata. Jehovaqa khuyakuyniyoj, munantaj kusisqa kananchejta. Nehemiaspa tiempomanta judiospi piensarina (Nehemías 8:9-11 leey). Jehovaqa mana munarqachu juchasninkumanta llakisqalla kanankuta, manachayqa munarqa kusiywan payta sirvinankuta. Payqa yachan arrepientekojtinchej kusisqa kasqanchejta. Chayrayku arrepientekuyta yachachiwanchej. Sutʼita yachanchej Tatanchej Jehovaqa may khuyakuyniyoj kasqanrayku, arrepientekojtinchej juchasninchejta perdonasqanta.

 3. ¿Imatá kay yachaqanapi yachakusun?

³ Kay yachaqanapi ashkha imasta arrepientekuymanta yachakusun. Ñaupajtaqa yachakusun imatachus Jehová israelitasman arrepientekuymanta yachachisqanta. Chantataj yachakusun imaynatachus Jehová runasta yanapasqanta arrepientekunankupaj. Yachakullasuntaj imatachus Jesuspa discipulosnin arrepientekuymanta yachakusqankuta.

 JEHOVÁ ISRAELITASMAN ARREPIENTEKUYMANTA YACHACHIN

 4. ¿Imatá Jehová israelitasman arrepientekuymanta yachacherqa?

⁴ Jehovaqa israelitasta llajtan kanankupaj ajllakushaspa, paykunawan uj tratota ruwarqa. Jehová nerqa Leyesninta kasukojtinku jarkʼananta, bendecinanta ima. Paykunaman nerqa: “Kunan qoshaykichej chay kamachiykunaqa, ruwayta atinaykichejpaj jinalla, mana qankunamanta karupichu kashan”, nispa (Deu. 30:11, 16). Chaywanpis sichus waj diosesta yupaychaspa chayri waj imasta ruwaspa contranpi churakunkuman karqa chayqa, Jehovaqa nerqa manaña allinpajchu qhawananta, ñakʼarinankuta ima. ¿Chay ninayarqachu manaña Dios ni jaykʼaj paykunata allinpaj qhawananta? Mana. Leypeqa sutʼita nerqa Jehová Diosninkuman kutirikuyta atisqankuta, nisqantataj watejmanta uyariyta atisqankuta (Deu. 30:1-3, 17-20). Arí, paykunaqa arrepientekuyta aterqanku. Chayta ruwajtinkutaj Jehovaqa nerqa paykunaman qayllaykunanta, watejmantataj bendecinanta.

 5. ¿Imatá Jehová ruwarqa llajtan paymanta karunchakojtin? (2 Reyes 17:13, 14).

⁵ Israelitasqa kutin kutita Jehovaj contranta oqharikorqanku, ajllakusqan llajta kashaspapis. Paykunaqa llulla dioskunata yupaycharqanku, waj millay imastawan ruwarqanku. Chayraykutaj mayta ñakʼarerqanku. Chaywanpis Jehovaqa mana paykunamanta qonqaporqachu. Astawanpis profetasninta kacharqa arrepientekunankuta ninanpaj, paymantaj kutirikunankuta ninanpaj (2 Reyes 17:13, 14 leey).

 6. ¿Imaynatá Jehová llajtanta yanaparqa arrepientekunanpaj? (Dibujotawan qhawariy).

⁶ Jehovaqa profetasninta llajtanman kachaj mana cambiajtinku imachus paykunawan kananta willananpaj, cheqanchananpaj ima. Uj kutipi, Diosqa Jeremiasnejta nerqa: “Mana kasukoj Israel nacionníy, noqaman kutinpuway. Mana phiña uyawanchu qhawasqayki, imaraykuchus munakuyneyqa kallanqapuni”. “Mana wiñaypajchu phiñasqa kasaj. Juchallikusqaykita reparakuy. Qanqa Jehová Diosniykej contranta oqharikorqanki”, nispa (Jer. 3:12, 13).  Joelnejtataj nerqa: “Noqaman kutinpuychej tukuy sonqoykichejwan”, nispa (Joel 2:12, 13). Isaiasnejtataj nerqa: “Llimphuchakuychej. Sajra ruwasqasniykichejta ñaupaqeymanta chinkachiychej, amaña sajra imasta ruwaychejchu”, nispa (Isa. 1:16-19). Ezequielnejtataj nerqa: “¿Noqaqa kusikuymanchu uj sajra runa wañojtin? ¿Manachu noqaqa munayman sajra ruwasqasninta saqespa kausanallantapuni?”. “Noqaqa mana kusikunichu runa wañojtin. Chayrayku noqaman kutinpuychej kausallaychejpunitaj”, nispa (Eze. 18:23, 32). Jehovaqa runas wiñaypaj kausakunankuta munasqanrayku, maytapuni kusikun arrepientekojtinku. ¿Chaywanpis juchallikoj arrepientekunantarajchu Jehová suyan yanapananpaj? Mana. Chayta astawan ukhuncharina.

 7. ¿Imatá Jehová llajtanman yachacherqa Oseasnejta, warminnejta ima?

⁷ Qhawarina imatachus Jehová llajtanman yachachisqanta profeta Oseasnejta, warmin Gomernejta ima. Gomerqa qhenchachakorqa, tiempowantaj Oseasta saqerpaspa waj qhariswan puriykorqa. ¿Jehová yuyarqachu Gómer manaña cambiananta? Payqa sonqosta sumajta qhawasqanrayku Oseasta nerqa: “Watejmanta rispa, waj qhariwan qhenchachakuspa purishan chay warmiykiwan kutinakanpuy. Payta watejmanta munakuy, imaynatachus Jehová Diosqa Israel nacionta munakun ajinata, paykuna waj diosesta yupaychashajtinkupis”, nispa (Ose. 3:1; Pro. 16:2). Chayta nishajtin Gomerqa juchallapiraj kausasharqa. Chaywanpis Jehovaqa Oseasta nerqa payraj ñaupajta warminta perdonananta, paywantaj allinyakamunanta. a Chaywan Jehovaqa llajtanta reparacherqa imaynatachus paykunata qhawasqanta. Millay juchasta siga ruwashajtinkupis, paykunata munakullarqapuni, profetasninta kachallarqapuni, sigataj yanapallarqapuni arrepientekunankupaj, cambianankupaj ima. Chayqa yachachiwanchej Jehovaqa ‘sonqosta allinta qhawaykurisqanta’, juchallapipuni kausashajkunatataj arrepientekunankupaj yanapayta munasqanta (Pro. 17:3). Imaynatachus chayta ruwasqanta qhawarina.

JEHOVAQA JUCHALLIKOJKUNATA ARREPIENTEKUNANKUPAJ YANAPAN

 8. ¿Imaynatá Jehová Cainta yanapayta munarqa arrepientekunanpaj? (Génesis 4:3-7; dibujotawan qhawariy).

⁸ Cainqa Adanpatawan Evajtawan kuraj wawanku karqa. Paykunamantataj juchata herenciata jina japʼerqa. Chantapis Biblia nin Cainpa “ruwasqasnin sajra” kasqanta (1 Juan 3:12). Ichapis chayrayku Jehovaqa uj jaywanata jaywashajtin, payta “mana allinpajchu qhawarqa, nillataj jaywasqantapis”. Caintaj arrepientekunanmantaqa “mayta phiñakorqa, uyanpis uj jinayarqa”. Jehovarí, ¿imatá ruwarqa? Paywan parlarqa (Génesis 4:3-7 leey). Jehovaqa munakuywan payta nerqa ñaupaqenpi watejmanta allinpaj qhawasqa kayta atisqanta, mana cambiajtintaj imachus paywan kananta. Caintaj Jehovata mana uyarerqachu, nitaj saqerqachu arrepientekunanpaj yanapananta. ¿Imatá Jehová ruwarqa? ¿Niñachu chay kutimantapacha pitapis yanapayta munarqa arrepientekunanpaj? Mana ajinachu karqa.

 9. ¿Imaynatá Jehová Davidta arrepientekunanpaj yanaparqa?

⁹ Jehovaqa rey Davidta manchaytapuni munakorqa. Chayrayku nerqa: “Davidta tarini sonqoypa munasqanman jina”, nispa (Hech. 13:22). Chaywanpis Davidqa jatuchej juchasta ruwarqa. Payqa qhenchachakorqa, uj runatapis wañuchicherqa. Moisespa Leyninman jinataj,  wañuchisqa kanan karqa (Lev. 20:10; Núm. 35:31). Jehovatajrí manchay kʼachapuni kasqanrayku, Davidta arrepientekunanpaj yanapayta munarqa. b Chayrayku profeta Natanta kacharqa paywan parlamunanpaj. Chaytataj ruwarqa David niraj ni imaynitata arrepientekushajtin. Natanqa uj kikinchaymanta parlarqa Davidpa sonqonman chayananpaj. Chaypitaj Davidqa Jehovaj contranta juchallikusqanta reparakorqa, arrepientekorqataj (2 Sam. 12:1-14). Chay juchallikusqanmanta maytapuni sonqonta nanachikusqanmanta uj salmota qhelqarqa (Sal. 51, qallariynin). Chay salmota qhelqasqantaj ñaupa tiempomantapacha may chhika juchallikoj runastaña sonqochan, arrepientekunankupajtaj yanapan. Jehová manchay munakuywan kamachin Davidta arrepientekunanpaj yanapasqanta yachaspa maytapuni kusikunchej, ¿icharí?

10. Jehová pacienciayoj kasqanta, perdonaytataj yachasqanta yachaspa, ¿imaynataj sientekunki?

¹⁰ Jehovaqa tukuy laya juchasta chejnikun, mana ima juchatapis qhawakullanchu (Sal. 5:4, 5). Chaywanpis yachan tukuyninchej juchasapa runas kasqanchejta. Mayta munakuwasqanchejraykutaj, juchallikojtinchejqa yanapayta munawanchej. Payqa may jina jatun juchata ruwajkunatapis yanapayta munan arrepientekunankupaj, paymantaj qayllaykunankupaj. Chayta yachaytaj maytapuni sonqochawanchej. Jehová Diosninchej pacienciayoj kasqanpi, perdonaytataj yachasqanpi tʼukurispaqa, payta tukuy sonqollapuni kasukuyta munanchej, juchallikuspataj chay rato arrepientekuyta munanchej. Kunantaj yachakuna imatachus Jesuspa discipulosnin arrepientekuymanta yachakusqankuta.

¿IMATÁ JESUSPA DISCIPULOSNIN ARREPIENTEKUYMANTA YACHAKORQANKU?

11, 12. ¿Ima kikinchaywantaj Jesús entiendecherqa Tatan perdonananpaj wakichisqa kashasqanta? (Dibujota qhawariy).

¹¹ Mesiasqa 29 watapi chayamorqa. Ñaupaj yachaqanapi yachakorqanchej jinataj, Jehovaqa Juan Bautistanejta, Jesucristonejta ima runasman yachacherqa arrepientekunankupuni kasqanta (Mat. 3:1, 2; 4:17).

 ¹² Jesusqa kay jallpʼapi kashaspa yachacherqa Tatanqa perdonananpaj wakichisqa kasqanta. Chayta sumajta entiendenankupaj chinkasqa qhari wawamanta parlarqa. Chay qhari wawaqa wasinmanta ripuspa mana allinta kausaspa purisqa. Tiempowantaj ‘yuyayninman churakuspa’ wasinman kutinpusqa. Tatanrí, ¿imatá ruwarqa kutinpojtin? Jesús nerqa: “Karullapiraj kashajtintaj, tatanpa sonqon wawayasqa payta rikuspa, usqhayllata taripamuspataj abrazaykusqa, may munakuywantaj muchʼaykusqa”, nispa. Chay qhari wawaqa piensakusqa tatanman ninanta peonninta jinallaña japʼikunanta. Tatantajrí tukuy sonqo payta perdonarqa, familianpitaj watejmanta japʼikaporqa. Chayrayku nerqa: ‘Kay wawayqa chinkasqa kasharqa kutinpuntaj’, nispa (Luc. 15:11-32). Jesusqa niraj kay jallpʼaman jamushaspa, ashkha kutispichá rikorqa imaynachus Jehová juchankumanta arrepientekojkunata khuyakusqanta. Chayrayku ajina kʼachituta kikinchaspa entiendecherqa Tatanchej Jehová manchay khuyakuyniyojpuni kasqanta.

13, 14. ¿Imatá Pedro arrepientekuymanta yachakorqa, chanta imatá yachacherqa? (Dibujotawan qhawariy).

¹³ Apóstol Pedroqa Jesuswan kashaspa ashkha imasta yachakorqa arrepientekuymanta, perdonmanta ima. Pedroqa ashkha kutispi pantarqa. Ajinapis Jesusqa payta tukuy sonqo perdonallajpuni. Uj kutipi Jesusta kinsa kutita negarqa, chaymantataj maytapuni sonqon nanarqa (Mat. 26:34, 35, 69-75). Jesustaj kausarimuytawan Pedroman rikhurerqa, ichapis sapallanpi (Luc. 24:33, 34; 1 Cor. 15:3-5). Jesusqa yacharqa Pedro arrepientekusqanta. Chayraykutaj chay kutipi payta sonqocharqa, nerqataj perdonasqantaña (Marcos 16:7 chantá Biblia de estudio nisqapi “y a Pedro” nisqata qhawariy).

¹⁴ Pedroqa yacharqa imachus arrepientekuy kasqanta, perdonasqa kaspataj imaynachus sientekusqanchejta. Chayrayku chay imasmanta sutʼita parlarqa. Pentecostés Fiesta pasayta,  Pedroqa ashkha tantasqa judiosman nerqa Mesiasta wañuchisqankuta. Chaywanpis munakuywan nerqa: “Chayrayku juchasniykichejmanta pesachikuychej, Diosmantaj kutirikuychej juchasniykichej perdonasqa kananpaj. Ajinamanta Jehová Diosmanta samarikuna tiempos jamunanpaj”, nispa (Hech. 3:14, 15, 17, 19). Chaywan Pedroqa entiendecherqa pichus arrepientekojqa juchanmanta kutirikunan kasqanta, nisunman yuyasqanta cambianan kasqanta, sajra kausayninta saqepuspa allin imasta ruwanan kasqanta, Diosta kusichej imasta. Apóstol Pedroqa nerqa chayta ruwajtinku Jehová juchasninkuta perdonananta, qʼalata chinkachinanta. Ashkha watasninmantaj Pedroqa Jehovamanta nerqa: “Qankunawan pacienciakun. Mana munanchu ni pi chinkachisqa kananta. Astawanqa munan tukuy arrepientekunankuta”, nispa (2 Ped. 3:9). Jehovaqa juchasninchejta qʼalata perdonapuwanchej, may jina jatun jucha kajtinpis. Chayta yachaytaj maytapuni sonqochawanchej.

15, 16. 1) ¿Imaynapí Pablo yachakorqa imaynachus Diospa perdonnin kasqanta? (1 Timoteo 1:12-15). 2) ¿Imatataj qhepan yachaqanapi yachakusun?

¹⁵ Tarsomanta Sauloqa ni pi jina ashkha juchasta ruwarqa. Payqa mana khuyarikuspa Cristoj discipulosninta manchayta qhatiykacharqa. Chayrayku chay cristianosqa nichá yuyallarqankupischu cambiananta. Jesustajrí mana ajinatachu yuyarqa. Paypis Tatanpis Sauloj sonqonpi allin imasta rikorqanku. Chayrayku Jesús nerqa: “Chay runataqa noqa ajllakuni”, nispa (Hech. 9:15). Chantapis uj milagronejta Saulota yanaparqa arrepientekunanpaj (Hech. 7:58–8:3; 9:1-9, 17-20). Tiempowantaj Sauloqa cristianoman tukorqa, apóstol Pablo sutiwantaj rejsisqa karqa. Payqa ashkha kutispi maytapuni agradecekorqa Jehovawan Jesuswan khuyakusqankumanta, may kʼachapunitaj paywan kasqankumanta (1 Timoteo 1:12-15 leey). Mayta agradecekuspataj nerqa: “¿Manachu yachanki Diosqa kʼacha kasqanrayku arrepientekunaykipaj yanapashasusqanta?”, nispa (Rom. 2:4).

¹⁶ Uj kutipi Pabloqa yacharqa Corinto congregación ukhupi uj chʼampay kasqanta. Chaypeqa uj runa khuchichakuy juchapi purisharqa. ¿Imatá chay kutipi Pablo ruwarqa? Imatachus ruwasqanmantaqa ashkha imasta yachakusunman Jehovaj munakuyninmanta, cheqanchayninmanta, khuyakunapuni kasqanmantapis. Chaymanta qhepan yachaqanapi astawan yachakusun.